[སྔོན་འགྲོའི་དཔར་གཞི།]་
@001A ༄༅། །སློབ་དཔོན་བཤད་སྒྲུབ་མིང་ཅན་གྱི་རྣམ་ཐར་ཟུར་པ་གཟུར་གནས་དགའ་བྱེད་བཞུགས་སོ།།
@001B ༄༅༅།། ༈ །།ན་མོ་གུ་རུ་མཉྫུ་གྷོ་ཥཱ་ཡ། རྣམ་དཀར་ལེགས་ཚོགས་ཚོགས་གཉིས་ཀྱིས་བསྐྲུན་སྐུ་མཆོག་མཚན་དཔེའི་དབལ་གྱིས་མཛེས། །རྣམ་དག་ཆོས་ཚུལ་ཚུལ་
བཞིན་སྟོན་མཛད་གསུང་མཆོག་ཡན་ལག་དྲུག་ཅུ་མངའ། །རྣམ་མང་ཆོས་ཀུན་ཀུན་ནས་མངོན་གཟིགས་ཐུགས་མཆོག་ཆགས་ཐོག་མི་མངའ་བ། །གང་ལ་མངའ་བ་ལྷ་མིའི་སྟོན་པ་ཤཱཀྱའི་
རྒྱལ་པོར་གུས་ཕྱག་འཚལ། །རིང་མོ་ཉིད་ནས་མངོན་བར་སངས་རྒྱས་ཀྱང༌། །སེམས་དཔའི་ཚུལ་གྱིས་རབ་འབྱམས་ཞིང་རྣམས་སུ། །རྒྱལ་བའི་མཛད་པ་སྒྲུབ་པའི་ཁུར་བཞེས་པ། །
རྒྱལ་ཚབ་མི་ཕམ་འཇམ་པའི་དབྱངས་ལ་འདུད། །ཐུགས་བསྐྱེད་སྨོན་ལམ་དག་པའི་འཚ(Ms) སྦྱོར་གྱིས། །ཐུབ་པའི་ལུང་རྟོགས་དམ་ཆོས་མ་ལུས་པ། །ཇི་བཞིན་འཛིན་མཛད་ཀླུ་སྒྲུབ་
ཐོགས་མེད་སོགས། །འཕགས་ཡུལ་མཁས་གྲུབ་ཚོགས་རྣམས་ཀུན་ལ་འདུད། །བྱང་ཕྱོགས་རྒྱུད་དུ་སྔོན་མེད་དམ་པའི་ཆོས། །བསྒྱུར་ཞིང་དགོངས་འགྲེལ་འཆད་ཉན་ལ་སོགས་ཀྱིས།།
@002A ༄༅། །ཐུབ་བསྟན་སྲོལ་བཟུང་དར་ཞིང་རྒྱས་མཛད་བའི། །ལོ་པཎ་བཀའ་དྲིན་ཅན་རྣམས་རྟག་ཏུ་བསྔགས། །མདོ་རྒྱུད་དགོངས་འགྲེལ་བཅས་པའི་ཚིག་དོན་རྣམས། །ཇི་བཞིན་ཐུགས་ཆུད་གཞན་ལ་ལེགས་འདོམས་པ། །བསྟན་
པའི་མངའ་བདག་ཆོས་རྗེ་བུ་སྟོན་དང༌། །བློ་བཟང་རྒྱལ་བ་གཉིས་བར་གྲགས་ལ་འདུད། །བློ་བཟང་ཉིན་བྱེད་དབང་པོ་གཤེགས་པའི་ཤུལ། །མཁས་མང་རྒྱུ་སྐར་ཚོགས་རྣམས་གཞུང་ལུགས་མཁར། །རྩེ་དགས་རོལ་དང་ལྷན་ཅིག་མེ་འཁྱེར་
འགའ། །ལེགས་བཤད་གཤོག་བསྐྱོད་འཕུར་ལྡིང་ལྟ་བུར་བྲེལ། ༈ །དེ་ཡང་སྔོན?་དུ་བདག་གིས་ནི། །ཚེ་འདིར་ཐོས་བསམ་ཇི་ལྟ་བུར། །བྱས་པའི་རྣམ་ཐར་ཐུན་མོང་བ། །གཞན་གྱིས་སྐུལ?་ལྷར་རྒྱས་ཙམ་ཞིག །བྲིས་ཟིན་པར་དུ་བརྐོས་
ཤིང་སྦེལ?། །དེ་ལས་ལྷག་པའི་རྣམ་ཐར་ཞིག །བདག་ལ་གཏན་ཡོད་མ་ཡིན་ཀྱང༌། །དད་ལྡན་གཟུར་གནས་བུ་སློབ་འགས། །ཉིད་ཀྱི་རྣམ་ཐར་ཐུན་མོང་དང༌། །ཐུན་མོང་མིན་པའི་ཁྱད་བར་ཞིག །ཅིས་ཀྱང་དགོས་ཞེས་བསྐུལ་བ་དང༌། །
འགའ་ཞིག་སྔོན་གྱི་སྐྱེ་བརྒྱུད་དང༌། །དགེ་སྦྱོར་བྱས་ཚུལ་ཇི་ལྟ་བུ། །ཡིན་རྣམས་མ་སྦས་གསལ་བ་རུ། །ཞུ་ཞེས་བསྐུལ་བ་མ་བཟློག་བར། །འདོད་པའི་རྗེས་སུ་འབྲང་སྟེ་བྲི། །དེ་ལ་རྣམ་ཐར་ཐུན་མོང་པ། །ཚེ་འདིར་དངོས་སུ་བྱས་པ་སྟེ། །
དེ་ནི་སྔོན་དུ་བརྗོད་བ་དང༌། །མཐོང་བ་ལས་ནི་ཤེས་ཟིན་ཀྱང༌། །བསྐུལ་བའི་དོན་དུ་སླར་ཡང་ནི། །བསྡུས་ཏེ་འགའ་ཞིག་བསྣན་བྱས་ཤིང༌། །དངོས་ཀྱི་ཉམས་སྣང་དང་འབྲེལ་བའི། །ཐུན་མོང་མ་ཡིན་རྣམ་ཐར་ནི། །ནམ་མཁའི་པདྨོའི་
@002B རྗེས་འགྲོ་ཡང༌། །གཟུགས་བརྙན་ལྟ་བུ་མཚོན་ཙམ་བརྗོད། །དེ་ཡང་ལས་སྨོན་འབྲེལ་པ་ཡིས། །དབུས་སུ་སོང་སྟེ་གྲྭ་ཚང་དུ། །ཞུགས་ནས་ལོ་འགོ་ཕྱེད་གཉིས་ཙམ། །བསྡུས་གྲྭར་བསྡད་དེ་བསྡུས་གཞུང་དཔེ། །ཤོག་གྲངས་ཉིས་བརྒྱ་ལྷག
ཙམ་ཞིག །བློ་ལ་བཟུང་ཞིང་བྱང་བར་བྱས། །བསྡུས་གཞུང་ཆེ་ཆུང་ཀུན་གྱི་དོན། །མྱུར་དུ་གོ་ཞིང་ཤེས་གྱུར་པས། །སྔོན་གྱི་བག་ཆགས་ཡིན་འདྲ་བསམ། །ཚུལ་དེར་མ་ཟད་རྣམ་འགྲེལ་གྱི། །ཡན་ལག་བློ་རྟགས་རྣམ་གཉིས་དང༌། །
གཞུང་གི་ཆ་འགའ་དཔེ་འཛིན་བྱས། །དེ་ལྟར་སྦྱངས་པའི་འབྲས་རྟགས་ལ། །བསྡུས་གཞུང་དཔེ་མང་བཀོད་ཟིན་ཅིང༌། །བློ་རྟགས་གཉིས་ཀྱི་པར་ཡང་བརྐོས། །རབ་སྟོད་དང་སེ་རར་ཡང༌། །བསྡུས་གྲྭའི་གཞུང་གི་ཚོགས་ལང་དང༌། །དམ་
བཅའ་དག་ཀྱང་འགའ་རེ་བཞག །གཞུང་ལ་ཞུགས་ན་སེ་ར་ཡི། །ཚོགས་ཆེན་དབུས་སུ་རི་རའི་སྐབས། །ཚོགས་ལང་ལན་བདུན་ལེགས་པར་བྱས། །དབུ་ཕར་འདུལ་མཛོད་བཞི་པོ་ཀུན། །བློར་བཟུང་སྐྱོར་ཞིང་མ་བརྗོད་ཐོག །ལྷ་པར་
མིང་བདག་བྱས་ནས་ནི། །རྒྱུད་གྲྭར་ཞུགས་ཤིང་དེ་ཉིད་དུ། །དམ་བཅའ་ལན་གསུམ་བར་དུ་བཞག །བཀྲ་ཤིས་ལྷུན་པོར་བསྙེན་རྫོགས་ཆེད། །སོང་ཚེ་དེ་ཁའི་མཁས་འགའ་དང༌། །བརྒལ་བརྟག་བྱས་པས་དེ་དག་གིས། །ཚོགས་ཆེན་
དམ་བཅའ་བཞག་ན་ལེགས། །ཟེར་ཡང་ཆགས་སྡང་འོང་སྙམ་སྟེ། །འཇོག་པར་ཁས་ནི་མ་བླངས་སོ། །དེ་ནས་སེ་འབྲས་དགའ་ལྡན་དུ། །དམ་བཅའ་བཞག་སྟེ་རང་ཡུལ་ལ། །འོངས་པས་ལེགས་སྨོན་འབྲེལ་པ་ཡིས། །བཀའ་
@003A ༄༅། །འགྱུར་ཚར་ཕྱིན་བསྒྲགས་པ་དང༌། །མཚན་ཉིད་གྲྭ་ཚང་འདི་ཉིད་ཀྱི། །ཐོག་མའི་བླ་མར་ལེགས་པར་བསྐོས། །དེ་ཚེ་ཀོའུ་ཤྲིའི་ཞབས་ཉིད་དང༌། །ལྷན་ཅིག་ཐབས་ཤེས་ཟུང་འབྲེལ་གྱིས། །གྲྭ་ཚང་གསར་དུ་བདེབས?་
པ་དང༌། །བསྒྲིག་ལམ་ཀུན་སྤྱོད་གསར་བཅོས་ཏེ། །འཆད་ཉན་ལེགས་པར་འཕེལ་བར་བྱས། །དེ་ལྟར་ཆོས་དང་འཇིག་རྟེན་གྱིས། །གྲྭ་ཚར་འདི་ལ་ཐོག་མ་རུ། །ཕན་འདོགས་ངེས་པར་ཆེ་ན་ཡང༌། །བྱས་བཟོ་མེད་པ་འགའ་ཞིག
གིས། །མ་ཤེས་མོད་ཀྱང་གཞན་དག་མཉེས། །དེ་བཞིན་རྒྱུད་གྲྭ་གསར་བཙུགས་ཀྱི། །ཐོག་མའི་སློབ་དཔོན་བྱས་ནས་ཀྱང༌། །རྒྱུད་འགྲེལ་བསྐྱེད་རྫོགས་འཆད་རྩོམ་སོགས། །རྒྱུད་གྲྭར་ཕན་འདོགས་དུ་མ་བྱས། །མདོར་ན་དགོན་འདིའི་
མཁན་པོ་དང༌། །རྒྱུད་པའི་སློབ་དཔོན་ལན་གཉིས་རེ། །བྱས་ཐོག་དབང་བསྐུར་འཆད་རྩོམ་གྱིས། །བསྟན་དང་འགྲོ་ལ་ཕན་མང་བསྒྲུབས། །གྲྭ་ཚང་སློབ་དཔོན་བྱེད་པ་ནས། །ད་ལྟ་རང་ལོ་དོན་གསུམ་པར། །མདོ་སྔགས་དགོངས་
འགྲེལ་བསྟན་བཅོས་ཀྱི། །རྩོམ་དཔེ?་པོ་ཏི་བཅུ་ལྷག་ཙམ། །བྱུང་འདི་སྔོན་ནས་ད་ཡི་བར། །པར་གྲུབ་ཡོངས་རྫོགས་འགའ་རེ་དང༌། །ལེ་ཚན་རང་རང་འདོད་པ་བཞིན། །ཕྱོགས་འདིའི་སྟོད་སྨད་གཡས་གཡོན་དང༌། །ཕོ་བྲང་ནང་
སོགས་རྒྱ་སོག་གི །ཡུལ་དུ་འཁྱེར་ཏེ་དར་བར་གྱུར། །ཚུལ་དེར་མ་ཟད་མེ?་ར་ཡི། །གྲྭ་ཚང་བླ་མ་དཀའ་རམ་འགས། །དགོས་ཚུལ་བྱུང་ལྟར་དུ་མ་ཞིག །སྔ་ཕྱིར་པར་ཏེ་བསྐུར་བྱས་པས། །སེ་འབྲས་དགེ་གསུམ་རྒྱུད་པ་འགར།།
@003B ཕུལ་དང་བྲིས་པས་དར་གྱུར་ཞེས། །གྲྭ་ཚང་བླ་མ་ཉིད་ཀྱིས་གསུང༌། །ང་ལ་རྣམ་ཐར་ཡོད་འདོད་ན། །འདི་ཉིད་རྣམ་ཐར་མཆོག་ཏུ་ཟུངས། །ཕྱོགས་འདིར་སྔ་ནས་ད་ཡི་བར། །མཁས་པ་མ་བྱོན་མིན་ན་ཡང༌། །སྨོན་ལམ་བཟང་པོའི་འབྲས་
སྨིན་ལས། །རྩོམ་པའི་འབྲེལ་པ་མང་པོ་ཞིག །འཇོག་པའི་དུས་བབ་སྐལ་ལྡན་པ། །བདག་ཉིད་ཁོ་ན་ཡིན་ནམ་སྙམ། །གཞན་ཡང་སྦྱིན་བདག་དད་ལྡན་འགས། །བོས་ཚེ་ཡུལ་གྲོང་དེ་དག་གི །ཕོ་མོ་སྐྱ་སེར་མང་པོ་ལ། །རང་རང་
འདོད་པའི་ཆོས་ལུང་དང༌། །བསླབ་པ་སྟེར་དང་བན་བོན་འགས། །ཨུ་ཚུགས་ནན་གྱིས་བསྐུལ་བའི་ངོར། །དེ་དག་སོ་སོའི་འདོད་པ་བཞིན། །དེ་བ་རྫོགས་ཆེད་དཔེ་དུ་མའི། །འདོན་ཚུལ་གཡར་ཁྲལ་ཚུལ་དུ་ནི། །དབང་མེད་བྱེད་དགོས་
མང་བྱུང་ཡང༌། །ཆོས་སམ་དེ་མིན་མ་ཤེས་མོད། །བསམ་པ་རྫོགས་བྱས་དགེ་བར་གྱུར། །གསོན་གཤིན་དོན་དུ་རྡོ་རྗེ་འཇིགས་བྱེད་དང༌། །རྣམ་སྣང་ཆོ་གའི་ཚུལ་ལ་མང་ཞུགས་ཏེ། །ཡུལ་ཆོས་དབང་བྱས་གཞན་གྱི་དོན་བསྒྲུབས་ཀྱང༌།།
རང་གཞན་དོན་གཉིས་འདྲེས་མར་བྱས་སྙམ་སེམས།། ༈ །།དེ་ནས་ནང་གི་རྣམ་ཐར་ནི། །རང་རྒྱུད་འདུལ་ཚུལ་དང་བསྟུན་ཏེ། །ཅུང་ཟད་བརྗོད་བྱ་དེ་ཡང་ནི། །བཀའ་གདམས་གོང་མའི་གསུང་རིགས་ལས། །ལྷག་པའི་ལྷ་ཡི་ཞལ་
མཐོང་ཙམ། །ཡོན་ཏན་གཙོ་བོར་མི་འཛིན་པར། །རྒྱུད་ལ་བྱམས་པ་སྙིང་རྗེ་དང༌། །སེམས་བསྐྱེད་ལྟ་བ་རྣམ་དག་སོགས། །སྐྱེས་ན་ཡོན་ཏན་མཆོག་ཏུ་བཞེད། །དཀོན་མཆོག་གསུམ་ལ་སྐྱབས་འགྲོ་བ། །སངས་རྒྱས་བསྟན་པའི་
@004A ༄༅། །འཇུག་སྒོ་སྟེ། །འདི་མེད་བསམ་གཏན་གཟུགས་མེད་དང༌། །མངོན་ཤེས་ཡོད་ཀྱང་རྒྱལ་བསྟན་ལ། །ཞུགས་པ་མིན་ན་ནང་པ་ཡི། །དམ་ཆོས་ཁྱད་འཕགས་གཞན་ལྟ་ཅི། །དེ་ཉིད་གཞིར་བྱས་ངན་སོང་དང༌།།
འཁོར་བའི་སྡུག་བསྔལ་ཁྱད་པར་ཀུན། །ལེགས་པར་ཤེས་ནས་ཐར་འདོད་བློ། །ཡང་ཡང་གོམས་བྱས་ངེས་འབྱུང་མཆིས། །གང་ལ་དེས་འབྱུང་མེད་གྱུར་ན། །དེ་ལ་ཐར་པ་དོན་གཉེར་བློ། །རྣམ་དག་ཡོད་པ་མི་སྲིད་ཕྱིར།།
ཐར་འདོད་ཞེས་པའང་ཚིག་ཙམ་འགྱུར། །ཁ་ཅིག་ཡིད་ལ་འདི་སྙམ་སེམས། །ངེས་འབྱུང་བློ་ལ་མ་སྦྱངས་པར། །ཐོག་མ་ཉིད་ནས་སངས་རྒྱས་ཀྱི། །གོ་འཕང་ཐོབ་འདོད་འབྱུང་སྲིད་པས། །ངེས་འབྱུང་མེད་ཀྱང་ཐར་འོད་དང༌།།
སངས་རྒྱས་དོན་གཉེར་འབྱུང་ངོ་ཟེར། །དེ་ལའང་ངེས་འབྱུང་ཕྱོགས་གཅིག་ཙམ། །ཡོད་ཀྱང་མཚན་ཉིད་མ་རྫོགས་ཕྱིར། །སངས་རྒྱས་ཐོབ་འདོད་དོན་གཉེར་ཡང༌། །ཕྱོགས་གཅིག་ཙམ་སྟེ་ཚུལ་འདི་ལ། །བརྒལ་བརྟག་མང་
ཡང་འདིར་མི་བརྗོད། །རང་ལ་ཆུང་ངུའི་དུས་སུ་ཡང༌། །སྙིང་རྗེ་བཅོས་མིན་རང་ཆས་སུ། །ཡོད་ཅིང་བསམ་ཤེས་བྱམས་སྙིང་རྗེ། །ཡང་ཡང་གོམས་བྱས་ད་ལྟ་ནི། །ཚིག་ཙམ་མ་ཡིན་བཅོས་མིན་མཆིས། །དེ་ཕྱིར་ཉམས་ལེན་
སྙིང་པོ་མཆོག །སྟོང་ཉིད་སྙིང་རྗེའི་སྙིང་པོ་ཅན། །གཞན་ཕན་ལྷག་བསམ་རྣམ་དག་དང༌། །བྱང་ཆུབ་སེམས་ཀྱི་དམིགས་རྣམས་ལ། །ཉིན་རེ་བཞིན་དུ་གོམས་བྱས་པས། །ལྷག་བསམ་རྣམ་
@004B དག་ཡོད་ངེས་ཀྱང༌། །བྱང་ཆུབ་སེམས་ནི་སྐྱེས་སོ་ཞེས། །བརྗོད་ཅིང་ཁས་བླངས་ནུས་མ་ལགས། །བྱང་ཆུབ་སེམས་ནི་སྐྱེས་གྱུར་ན། །ཡོན་ཏན་གཞན་དག་མེད་ན་ཡང༌། །རྒྱལ་སྲས་བྱང་ཆུབ་སེམས་དཔའ་རུ། །འགྱུར་
བར་ངེས་ཕྱིར་རང་གིས་རང༌། །བྱང་ཆུབ་སེམས་དཔར་འདོད་མི་རིགས། །རང་གིས་རློམ་པའི་དབང་བྱས་ན། །ཐེག་པ་ཆེན་པོའི་གཞུང་མང་ལ། །ཐོས་བསམ་འདི་ཙམ་བྱས་པ་དང༌། །བྱམས་དང་སྙིང་རྗེ་ལྷག་བསམ་སོགས།།
སེམས་བསྐྱེད་སྐྱེ་བའི་རྒྱུ་རྣམས་ལ། །ཡང་ཡང་དེ་ཙམ་འབད་བྱས་པས། །བྱང་ཆུབ་སེམས་ནི་བསྐྱེད་སྙམ་ཞིང༌། །གལ་ཏེ་དེ་ནི་མ་སྐྱེས་ན། །ཐེག་པ་ཆེན་པོའི་གཞུང་ལུགས་དོན། །ལུང་དང་རིགས་པས་གཏན་ཕབ་པའི།།
འབྲས་བུ་མཆོག་དེ་མ་བྱུང་བས། །ལུས་སེམས་ངལ་བ་བརྒྱ་ཕྲག་གིས། །ཐེག་ཆེན་ལ་འབད་དོན་ཆུང་ཞིང༌། །གཞན་ལ་བཤད་པའང་ཚིག་ཙམ་སྙམ། །དེ་ཕྱིར་བྱང་ཆུབ་སེམས་མཆོག་ནི། །ཁོ་བོའི་རྒྱུད་དང་རིང་མ་སོང༌། །བདག
མེད་རྟོགས་པའི་ལྟ་བ་ལ། །གྲུབ་མཐའ་རྣམ་བཞིའི་ལུགས་ཀྱི་དབང༌། །མཆོག་དམན་ཐ་དད་ཡོད་སྲིད་མོད། །ཀུན་ཀྱང་ལྷག་པ་ཤེས་རབ་ཀྱི། །བསླབ་པ་སྐྱེ་བའི་དམིགས་པར་འགྱུར། །ནང་བའི་གྲུབ་མཐའ་རྣམ་བཞི་ལས།།
དམའ་བ་བྱེ་བྲག་སྨྲ་བའི་ལུགས། །ཕྱི་རོལ་པས་ནི་རྟག་པའི་བདག །ཁས་ལེན་བྱེ་སྨྲས་དེ་བཀག་ནས། །རྟག་གཅིག་རང་དབང་ཅན་ཉིད་ཀྱིས། །སྟོང་པའི་བདག་མེད་བསྒོམས་བྱས་པས། །ཐར་པ་ཐོབ་པར་འགྱུར་ཞེས་
@005A ༄༅། །འདོད། །དེ་བཞིན་མདོ་སྡེ་པ་དང་ནི། །སེམས་ཙམ་དབུ་མ་རང་རྒྱུད་པ། །རྣམས་ཀྱི་ལུགས་ལའང་ཁྱད་པར་ཡོད། །དེ་ཀུན་བསྒོམ་བྱ་ཡིན་མོད་ཀྱི། །རང་ལུགས་དབུ་མ་ཐལ་འགྱུར་བའི། །ལུགས་བཞིན་
ལྟ་བ་བསྒོམ་དགོས་ཤིང༌། །དེ་ཡང་མགོན་པོ་ཀླུ་སྒྲུབ་ལུགས། །དཔལ་ལྡན་ཟླ་བས་ཚིགས་གསལ་དང༌། །དབུ་མ་འཇུག་པར་གཏན་ཕབ་བཞིན། །ཤེས་དགོས་འཕགས་པ་ཡབ་སྲས་ལུགས། །ཇི་བཞིན་འགྲེལ་མཛད་རྗེ་བླ་མའི།།
གསུང་རབ་ཚོགས་ལས་འབྱུང་ཞིང་ལྟོས། །བདག་ཀྱང་རྒྱལ་བ་གཉིས་པ་དང༌། །རྗེས་འབྲང་མགོན་པོ་ཀླུ་སྒྲུབ་ཀྱི། །ལུགས་ལྟར་ལྟ་བའི་སྐོར་ལ་སྦྱངས། །དེ་ཚེ་འཕགས་པས་བྱིན་བརླབས་པས། །རྗེ་ཡི་གསུང་ལྟར་ངེས་
དོན་གྱི། །ལྟ་བའི་གནད་ལ་ངེས་པ་རྙེད། །དེ་ཡང་དོན་དམ་དཔྱོད་བྱེད་ཀྱི། །རིགས་པས་དཔྱད་ན་མི་རྙེད་ཙམ། །དཀའ་བ་མིན་གྱི་རང་བཞིན་གྱིས། །སྟོང་སང་ནམ་མཁའ་ལྟ་བུ་ལ། །མིང་རྐྱང་བཏགས་ཡོད་ཙམ་ཞིག་གི།
དཀར་ནག་ལམ་འབྲས་ལ་སོགས་པའི། །བྱ་བྱེད་ཐམས་ཅད་གནོད་མེད་དུ། །འཇོག་ཚུལ་ཤེས་དེ་དཀའ་བ་ཡིན། །མཚོན་ན་འདས་པའི་དངོས་པོ་རྣམས། །ད་ལྟ་མེད་ཀྱང་སྤྱིར་ཡོད་ཅིང༌། །དེ་བཞིན་མ་འོངས་དངོས་རྣམས་ཀུན།།
ད་ལྟ་མེད་ཀྱང་ཡོད་ངེས་སུ། །འདོད་དགོས་དཀར་ནག་ལས་འབྲས་སོགས། །འཁོར་འདས་ཀུན་ཀྱང་རིག་ཤེས་ཀྱིས། །དཔྱད་ནས་རྙེད་པར་མི་འཇོག་ཀྱང༌། །མ་དཔྱད་ཐ་སྙད་བློ་ངོ་ལྟར། །ཀུན་རྫོབ་ཏུ་ནི་ཡོད་པར་འདོད། །དེ་ཡང་
@005B མེ་ལོང་ཆུ་ནང་གི །གཟུགས་བརྙན་བཞིན་དུ་ཀུན་རྫོབ་རྣམས། །བདེན་པར་སྣང་ཡང་སྣང་བཞིན་སྟོང༌། །སྟོང་བཞིན་སྣང་བས་གཞི་གཅིག་ལ། །བདེན་གཉིས་འདུ་བའི་འཇོག་ཚུལ་དེ། །ལེགས་པར་ཤེས་ན་ལྟ་བ་ལ། །མཁས་པར་
འདོད་ཀྱི་གཞན་དུ་ན། །རང་བཞིན་གྲུབ་པའི་ཆོས་རྡུལ་ཙམ། །མེད་ཅེས་ཚིག་གིས་བརྒྱ་བརྗོད་ཀྱང༌། །སྒྲ་སྤྱི་ཟློས་པ་ཙམ་དུ་ཟད། །དེ་ལྟར་རང་བཞིན་སྟོང་པའི་དོན། །རིགས་པ་བརྒྱ་ཕྲག་དག་གིས་ནི། །ཡང་ཡང་དཔྱད་ཅིང་ངེས་
བྱས་པས། །དཔྱད་བསྒོམ་ཙམ་ཞིག་ཡོད་ངེས་ཀྱང༌། །བྱིང་རྒོད་རགས་པའི་བྲན་གྱུར་ཏེ། །ཞི་ལྷག་གཉིས་ཀྱི་དབང་བྱས་པའི། །འཇོག་བསྒོམ་ཕྱོགས་གཏོགས་ཙམ་ཞིག་ལས། །མཚན་ཉིད་ཚང་བ་བསྐྱེད་?༌།
འོན་ཀྱང་བསླབ་གསུམ་ནང་ཚན་གྱི། །ཤེས་རབ་བསླབ་པ་ཡོད་ངེས་ཏེ། །ལྷག་པ་ཤེས་རབ་བསླབ་པ་ལ། །ཀུན་རྫོབ་དོན་དམ་ལ་དམིགས་གཉིས། །ཀུན་རྫོབ་རིག་པའི་གནས་ལྔ་པོ། །ཅི་རིགས་ཤེས་པའི་ཤེས་?་དང༌།།
དོན་དམ་བདག་མེད་ཕྲ་རགས་ཀུན། །རྟོགས་པའི་བློ་གྲོས་ཉིད་ལ་བཤད། །ལྷག་པ་བསམ་གཏན་བསླབ་པ་ཡང༌། །ཕྱོགས་ཙམ་ཡོད་དེ་དེ་ལ་ནི། ཀུན་རྫོབ་དོན་དམ་ལ་དམིགས་དང༌། །དཔྱད་བསྒོམ་འཇོག་བསྒོམ་རྣམ་པ་གཉིས།།
སྤྱིར་ནི་དགེ་བའི་དམིགས་རྟེན་ཞིག །དེ་ལ་རིང་ཐུང་གང་ཡིན་ཀྱང༌། །རྩེ་གཅིག་གནས་པ་ཙམ་བྱུང་ན། །ཏིང་འཛིན་ཡིན་ཞེས་སྔགས་རིམ་ལས། །བཤད་ཅིང་ཕྱི་ནང་གཉིས་ཀ་ཡི། །ཏིང་འཛིན་བསྒོམ་ཚུལ་མང་འབྱུང་སྟེ།།
@006A ༄༅། །བསམ་གཏན་ཞེས་པའི་གྲངས་སུ་འགྲོ། །སྔགས་ཀྱི་སྐབས་སུ་ལྷ་སྐུ་སོགས། །དམིགས་རྟེན་བྱས་ནས་དཔྱད་བསྒོམ་དང༌། །འཇོག་བསྒོམ་བྱ་བའི་ཚུལ་བཤད་ལྟར། །འབད་པས་བརྟན་པོ་མ་བྱུང་ཡང༌།།
ཞི་ལྷག་རྗེས་མཐུན་གྱིས་བསྡུས་པའི། །བསམ་གཏན་ཤེས་རབ་ཟུང་འབྲེལ་ཙམ། །ཡོད་པར་རང་གི་ཚད་མས་ངེས། །ལྷག་པ་ཚུལ་ཁྲིམས་བསླབ་པ་ལ། །རྣམ་པ་མང་ཡང་མདོར་བསྡུ་ན། །སོ་ཐར་བྱང་སེམས་གསང་
སྔགས་ཀྱི། །ཚུལ་ཁྲིམས་བསླབ་པ་ཅི་ནུས་བསྲུང༌། །ཚུལ་ཁྲིམས་བསླབ་པ་ཕྲ་བ་ནི། །ལས་འབྲས་ཕྲ་ཞིང་ཕྲ་བ་རུ། །འདུས་ཕྱིར་སངས་རྒྱས་ཁོ་ནའི་ཡུལ། །ད་ལྟའི་སོ་སྐྱེས་ག་ལ་ནུས། །དེ་བཞིན་ཕྱིན་དྲུག་ཕྱོགས་
ཙམ་སྟེ། །ཆོས་ཀྱི་སྦྱིན་པ་དུ་མ་དང༌། །དགེ་འདུན་མཆོད་དེ་ཡོན་དུ་མ། །ཕུལ་ཞིང་རང་གི་ལུས་ལོངས་སྤྱོད། །དགེ་ཀུན་གཞན་ལ་གཏོང་བའི་སེམས། །རྒྱུན་ཏུ་གོམས་བྱས་སྦྱིན་པ་དང༌། །ཚུལ་ཁྲིམས་སྔར་
བཤད་ལྟ་བུ་སྟེ། །རང་དོན་ཁོ་ན་ཡིད་བྱེད་དང༌། །བྲལ་ཏེ་བྱང་ཆུབ་སེམས་དཔའ་ཡི། །ཚུལ་ཁྲིམས་མཆོག་ཏུ་མདོ་ལས་བཤད། །ཆོས་ཀྱི་ཕྱིར་རུ་དཀའ་སྤྱད་དང༌། །ཆོས་ལ་ངེས་སེམས་བཟོད་པ་རྣམས།།
རྟག་ཏུ་ཡོད་ཅིང་སྡུག་བསྔལ་ཀུན། །དང་དུ་ལེན་ཅིང་གནོད་པ་ལ། །བཟོད་པའི་བཟོད་པའང་ཡོད་པའི་ཁུལ། །དགེ་ལ་སྤྲོ་བའི་བརྩོན་འགྲུས་ནི། །རྟག་ཏུ་ཡོད་ཅིང་སེམས་ཅན་དོན། །བྱ་དཀའ་མང་པོ་བསྒྲུབ་པ་
@006B དང༌། །བྱང་ཆུབ་དོན་དུ་ངན་འགྲོ་རུ། །བསྐལ་བར་གནས་ཀྱང་མི་སྐྱོ་བའི། །གོ་ཆའི་བརྩོན་འགྲུས་ཡོད་པའི་ཁུལ། །དེ་ནས་བསམ་གཏན་ཤེས་རབ་རྣམ་པ་གཉིས། །གོང་དུ་བརྗོད་ཟིན་ཡུམ་གྱི་མདོ་ལས་ནི།།
དགོན་ནམ་གྲོང་སོགས་དག་ཏུ་གནས་བྱས་ཀྱང༌། ཉན་རང་ཡིད་བྱེད་དམན་པའི་སེམས་བོར་ཏེ། །གཞན་གྱི་དོན་དུ་བྱང་ཆུབ་བསྒྲུབ་བཞིན་བར། །གཟུགས་སོགས་འདོད་ཡོན་ལྔ་ལ་སྤྱོད་གྱུར་ཀྱང༌། །དེ་ནི་བྱང་ཆུབ་
སེམས་དཔའི་དབང་བྱས་པའི། །བསམ་གཏན་གནས་དང་དབེན་པའི་མཆོག་ཏུ་བཤད། ༈ །ཡང་ནི་ཐུན་མོང་མ་ཡིན་པའི། །རྣམ་ཐར་རྨི་ལམ་བཟང་ཙམ་ཡན། །དགོས་ཞེས་ནན་ཏན་བསྐུལ་བའི་ལན།།
ཡང་དག་འདེབས་རྒྱུ་མི་སྣང་ཡང༌། །བསྐུལ་བའི་ངོ་བཟློག་མ་ནུས་པར། །རྨི་ལམ་བཟང་པོ་ཐར་ཐོར་ཞིག །བྱུང་བའི་རྣམ་ཐར་ཐུན་མོང་མིན། །གཟུགས་བརྙན་ཙམ་ཞིག་བརྗོད་པར་བྱ། །དེ་ཡང་གཞོན་ནུའི་དུས་ཀྱི་
ཚེ༑ ༑སངས་རྒྱས་ལྟ་བུའི་སྐུ་འགའ་ཞིག །ཤར་གྱི་ཕྱོགས་ཀྱི་ནམ་མཁའ་ནས། །ནུབ་ཕྱོགས་འབྱོན་པ་རེ་གཉིས་རྨིས། །དེ་ནི་ཅི་ཡིན་ཤེས་མ་བྱུང༌། །སྔ་སོར་ཐུབ་དབང་བྱམས་པ་ཡི། །སྐུ་དང་སྐུ་བརྙན་
ཅི་རིགས་པ། །ལན་མང་རྨི་ལམ་འབྱུང་བ་ཞིག །ཡོད་ཀྱང་ཕྱིས་སུ་དེ་མི་སྣང༌། །མཚན་ཉིད་བླ་མར་བསྐོས་པའི་སྐབས། །ང་ནི་ལུང་པ་ཞིག་གི་ནང༌། །ཤར་དུ་ཕྱོགས་ནས་ཡོད་པའི་ཚེ། །བྱང་ངོས་བྲག་རྩེའི་ནམ་
@007A ༄༅། །མཁའ་ན། །སྟོན་པ་སྐུ་མདོག་གསེར་བཙོ་མའི། །མདངས་ལྟར་འོད་གསལ་རབ་མཛེས་པ། །སྐྱེས་བུ་ཆེན་པོའི་ཚད་ཙམ་ཞིག །བཞུགས་ཤིང་རང་གི་མདུན་ངོས་ཀྱི། །ཤར་ཕྱོགས་ནམ་མཁའི་དབྱི(NGs)
ཉིད་ནས། །འཇམ་དབྱངས་དམར་སེར་འོད་དང་བཅས། །རབ་མཛེས་སྐུ་ཞིག་ནུབ་ཕྱོགས་སུ། །འབྱོན་གྱིན་འདུག་པར་ཤུགས་དྲག་པོས། །དད་ཅིང་གསོལ་འདེབས་བྱེད་པ་ན། །ཚུར་བྱོན་བདག་གི་མདུན་དུ་སླེབ། །
མགྱོགས་པར་ཕྱག་འཚལ་སྙམ་པའི་ཚེ། །བྱེད་ཡོད་མེད་པར་རང་ལ་ཐིམ། །གཉིད་སད་དགའ་སྤྲོས་ལུས་སེམས་བརྟས། །བྱིན་གྱིས་བརླབས་པ་ཡིན་ནམ་སྙམ། །གང་ལྟར་དགའ་བའི་རྨི་ལམ་ཡིན། །ཁྲི་པ་སྔོན་མ་
བྱེད་པའི་དུས། །ནུབ་ཀྱི་ཕྱོགས་ནས་སྟོན་པའི་སྐུ། །འོད་དང་བཅས་པ་ཆེ་ཙམ་ཞིག །བཞུགས་ཞིང་དེ་ཡི་ཐུགས་ཀ་ནས། །འོད་ཟེར་སྐར་མདའ་ལྟ་བུ་གཉིས། །བཤིབས་ཏེ་བྱུང་བའི་འོད་ཟེར་གཅིག །རང་གི་མགོ་ཐོག་རྒྱངས་
རིང་སོང༌། །གཅིག་ནི་ང་ཡི་མགོ་ཐོག་ཏུ། །ཟུག་གམ་མ་ཟུག་ཐེ་ཚོམ་ཞིང༌། །ཟུག་ན་དགའ་སྙམ་སེམས་པའི་ཚེ། །གཉིད་སད་ཡིད་ལ་དགའ་བ་སྐྱེས། །དེ་ཚེ་ཇོ་བོའི་ལྷ་ཁང་ཐོག །ཁྲི་སྟེང་རྗེ་ཉིད་བཞུགས་འདུག་པ། །
མཐོང་ནས་བྱིས་སྐས་བཙུགས་པའི་ཐོག །སོང་ནས་ཕྱག་དབང་ཞུ་རྨིས་ཀྱང༌། །བར་ཆད་ཅུང་ཟད་ཡོད་པར་ཤེས། །ལམ་གཙོའི་འགྲེལ་བ་རྩོམ་པའི་སྐབས། །ང་ནི་གནས་བཟང་ཞིག་ཏུ་ནི། །ཁ་ནི་ཤར་དུ་ཕྱོགས་གནས་ཚེ། །
@007B མདུན་ཐད་ཤར་ཕྱོགས་ནམ་མཁའ་ནས། །མགོན་པོ་ཀླུ་སྒྲུབ་ཞབས་ཀྱི་སྐུ། །གསེར་མདོག་ལྟ་བུ་རབ་མཛེས་ཤིང༌། །ཡིད་འཕྲོག་མདངས་དང་རབ་ལྡན་པ། །སྐྱེས་བུ་ཆེན་པོའི་ཚད་ཙམ་ཞིག །ནུབ་ཕྱོགས་འབྱོན་གྱིན་འདུག་པ་
ལ༑ ༑འདི་ནི་འཕགས་མཆོག་ཀླུ་སྒྲུབ་བོ། །སྙམ་སྟེ་དད་ཅིང་ཐར་སྦྱར་བས། །སྐད་ཅིག་ང་ཡི་མདུན་ཐད་བྱོན། །དགྱེས་པའི་རྣམ་འགྱུར་སྟོན་བཞིན་དུ། །རང་ལ་ཐིམ་སོང་གཉིད་སད་ཚེ། །འདི་ནི་ངེས་པར་བྱིན་རློབ་པའི། །
རྨི་ལྟས་བཟང་པོ་ཞིག་ཡིན་ངེས། །སྙམ་དུ་བསམ་ཞིང་ཡིད་ལ་བཟུང༌། །རྒྱུད་བླའི་བསྡུས་དོན་རྩོམ་པའི་སྐབས། །བྱམས་སྐུ་དམར་པོ་རབ་མཛེས་ཤིང༌། །ཡིད་འཕྲོག་བྱམས་པ་དངོས་ལྟ་བུ། །འོད་དང་བཅས་ཞིག
མདུན་གྱི་མཁར། །བྱོན་བཞུགས་བྱིན་རླབས་མཛད་པ་ལ། །དད་ཤུགས་དྲག་པས་གསོལ་འདེབས་དང༌། །གཉིད་སད་དགའ་སྤྲོ་ཆེ་སྐྱེས་ཤིང༌། །ང་ལ་ཡ་མཚན་ཆེ་བསམ་པའི། །བབ་འབྲེལ་དེ་འདྲ་ག་ལ་ཡོད། །སྙམ་དུ་
ཤར་བས་དགའ་རབ་ཡིན། །གཞན་ཡང་སྨན་བླ་མི་འཁྲུགས་པ། །འོད་དཔག་མེད་གསུམ་དངོས་ལྟ་བུ། །རྨི་ལམ་ལན་དགའ་བྱུང་གྱུར་ཏེ། །གསོལ་འདེབས་མང་དུ་བྱས་པ་ཡི། །ཐུགས་རྗེ་ཡིན་ནམ་སྙམ་དུ་
བསམ། །ཡང་གཅིག་ཇོ་བོའི་ལྷ་ཁང་སྟེང༌། །འཇམ་དབྱངས་འཇིགས་བྱེད་རྗེ་རྣམ་གསུམ། །བསྒྲིགས་ནས་བཞུགས་པ་རྨིས་པ་བྱུང༌། །ན་ནིང་བཅུ་པའི་ནང་ཉིད་དུ། །ང་ནི་ལམ་ནས་ཤར་ཕྱོགས་སུ། །
@008A ༄༅། །འགྲོ་བའི་མདུན་ཐང་ཤར་ངོས་ནས། །མི་གཉིས་བཤིབས་ཏེ་འོང་བ་ཡི། །གཡས་ཀྱི་དེ་ཉིད་འཇམ་པའི་དབྱངས། །ཡིན་པར་མཐོང་ནས་རྒྱུ(Gs) བྱས་ཏེ། །རྒྱལ་བའི་ཡབ་གཅིག་འཇམ་པའི་དབྱངས། །
བཅུ་དྲུག་ལོན་པའི་ན་ཚོད་ཅན། །གང་དུ་འབྱོན་ཞེས་ཚིག་བརྗོད་ཅིང༌། །སྐུ་ལ་འཇུས་ཤིང་འཁྱུད་པ་ན། །གཉིད་སད་དགའ་སྤྲོ་ཁྱད་ཅན་སྐྱེས། །བདེ་མཆོག་རྒྱུད་འགྲེལ་དེ་རྩོམ་ཚེ། །རྗེ་ཉིད་འབྱོན་གྱིན་ཡོད་དོ་ཞེས། །
སྒྲ་འུར་བཅས་ཏེ་བྱུང་བ་ན། །བལྟས་པས་རྗེ་ཉིད་འབྱོན་འདུག་པས། །དད་ཅིང་ཕྱག་བྱར་འདོད་པ་ན། །གཉིད་སད་དགའ་བ་ཅུང་ཟད་སྐྱེས། །གཞན་ཡང་རྗེ་ཡི་རྟོགས་བརྗོད་ཀྱི། །འགྲེལ་བ་བྱེད་དུས་ཁྲི་སྟེང་ན། །
རྗེ་ཉིད་བཞུགས་ལ་ཕྱག་འཚལ་རྨིས། །དེ་སོགས་གཞན་ཡང་ཡོད་གྱུར་ཀྱང༌། །ཁྱད་འཕགས་ཡིན་ནམ་སྙམ་པ་ནི། །དྲིས་ལན་འགྲེལ་པ་དེ་རྩོམ་པའི། །ཐོག་ཐ་བར་གསུམ་དག་ཏུ་ནི། །རྗེ་ཉིད་
ཤིན་ཏུ་མཛེས་པའི་སྐུ། །ལྟ་བས་ཆོག་མི་ཤེས་པ་ཞིག །འཛུམ་པ་དང་ལྡན་པཎ་ཞྭ་དང༌། །ཆོས་གོས་གསོལ་བ་ལྷ་ལྟ་བུ། །སྔ་ཕྱི་མ་འགྱུར་གཅིག་པ་ཉིད། ལན་གསུམ་ཟློས་ཏེ་བྱུང་ནས་
ནི༑ ༑དགྱེས་པའི་རྣམ་འགྱུར་སྟོན་རྨིས་པ། །འདི་ནི་ངེས་པར་དགའ་རབ་ཞིག །ཡིན་ནམ་སྙམ་དུ་མ་བརྗེད་ཡོད། །འགའ་ཞིག་ད་ལྟ་བ་རྗེད་སོང་ཞིང༌། །སྒྲོལ་མའི་སྐུ་སྟོད་དངོས་བསྟན་ཏེ། །
@008B སྐུ་སྨད་སྤྲིན་དུ་སྦས་པ་དང༌། །ནུ་མ་གཡས་པའི་ནུ་ཞོ་ནི། །རང་ལ་བླུད་པ་སོགས་ཀྱང་རྨིས། །གཞན་ཡང་བདེ་མཆོག་འཇི(Gs) བྱེད་སོགས། །ལྷ་འགའི་སྐུ་བརྙན་རྨི་ལམ་དུ། །བྱུང་བ་ཡོད་དེ་རྨི་ལམ་
ལ༑ ༑ངེས་པ་མེད་པས་འདིར་མ་བཀོད། །སྤྱིར་ནི་གཞན་ལ་ཕན་ཐོགས་པའི། །དཔེ་རྩོམ་བྱེད་པའི་དུས་སུ་ནི། །རྨི་ལམ་བཟང་པོ་རེ་འབྱུང་བས། །རྨི་ལམ་བཟང་ཙམ་མང་དུ་བྱུང༌། །
རྨི་ལམ་སྒྱུ་མ་མིག་འཕྲུལ་སོགས། །སྣང་བ་ལྟར་དུ་མ་གྲུབ་པས། །དེ་ལ་བདེན་པའི་དངོས་པོ་རུ། །བཟུང་བར་བྱ་བ་ག་ལ་ཡོད། །ཐུན་མོང་མ་ཡིན་རྣམ་ཐར་གཟུགས་བརྙན་དང༌། །རྨི་ལམ་
ལྟ་བུར་བསྟན་ཕྱིར་རྨི་ལམ་དུ། །འཁྲུལ་པའི་སྣང་བ་སྔ་ཕྱིར་འབྱུང་བ་འགའ། །འཁྲུལ་གཏམ་ལྟ་བུར་གཞན་གྱི་འདོད་ངོར་བསྒྲགས། ༈ །ད་ནི་དགེ་སྦྱོར་གཞན་
འགའ་ཞིག །ཇི་ལྟར་བྱས་པའི་ཚུལ་ཙམ་ཞིག །དད་ལྡན་དག་གིས་བསྐུལ་བ་ལྟར། །བརྗོད་ཀྱིས་རང་ཉིད་སྒྲོགས་ཕྱིར་མིན། །དེ་ཡང་ཉིན་ཞག་ཕྲུག་གཅིག་ལ། །མཚོན་ན་གཞན་རྣམས་ཤེས་
འགྱུར་བས། །ནང་པར་ལྟུང་བཤགས་ནས་འབྱུང་སོགས། །སངས་རྒྱས་བྱང་སེམས་ཉིས་བརྒྱ་དང༌། །ཉི་ཤུའི་སྐོར་གྱི་མཚན་བརྗོད་དེ། །ཕྱག་མཆོད་ཡན་ལག་བདུན་པ་དང༌། །སྐྱ(Bs) འགྲོ་སྨོན་འཇུག་སྡོམ་ལེན་ཞིག །
@009A ༄༅། །ཚད་མེད་བཞི་དང་བཅས་ལ་འབར། །དེ་ནས་འགྱུར་སྔགས་གཉིས་བརྗོད་དེ། །དབྱངས་གསལ་རྟེན་འབྲེལ་སྙིང་པོ་དང༌། །འཇམ་དབྱངས་གཉིས་དང་དབྱངས་ཅན་མའི། །སྙིང་པོ་བརྗོད་དེ་དམིགས་སྐོར་གྱི། །རིམ་
པས་ངག་ལ་བྱིན་རླབས་གཉིས། །དེ་ནས་འཇམ་དབྱངས་དཀར་པོ་ཡི། །སྙིང་པོ་ཉེར་གཅིག་བཟླ་བ་དང༌། །ཝཱ་གི་ཤྭ་ར་བཅྭོ་ལྔ་ཙམ། །འོད་ཐེར་ཅན་དང་རི་ཁྲོད་མ། །སོར་འབྲང་གདུགས་དཀར་ནོར་རྒྱུན་མ། །ཀུ་རུ་ཀུ་ལེ་ཙུནྡ་དང༌། །
ཁྲོ་གཉེར་ཅན་དང་རལ་གཅིག་མ། །འབྱུང་འདུལ་ལྷ་མོ་ནག་མོ་དང༌། །སེངྒེའི་སྒྲ་དང་སྨན་བླ་དང༌། །བདེ་གཤེགས་སྤྱི་སྙིང་གཙུག་ཏོར་ཅན། །ཀླུ་དབང་རྣམ་སྲས་འཁོར་བཅས་ཀྱི། །སྔགས་རྣམས་ལན་ནི་བདུན་རེ་དང༌། །གཙུག
ཏོར་འབར་བ་ཟླ་བའི་འོད། །རྡོ་རྗེ་སྡེར་མོ་སྟོབས་པོ་ཆེ། །བདུད་རྩི་འཁྱིལ་བའི་སྔགས་རིང་སོགས། །བརྗོད་དེ་ལྷ་ཚོགས་དེ་དག་ནི། །མ་བརྗེད་ཙམ་དང་དྲན་ཙམ་བྱས། ༈ །དེ་ནས་རྣམ་འཇོམས་མངོན་རྟོགས་དང༌། །གཟུངས་རིང་ཚར་
གཅིག་འབྲིང་པོ་གསུམ། །གཟུངས་ཐུང་དེ་ལས་མང་ཙམ་བརྗོད། །རྟ་མགྲིན་ཕྱག་རྡོར་གཏུམ་པོ་དང༌། །མི་གཡོ་མགོན་གསུམ་ཚོགས་ཞིང་དུ། །བྱས་ཏེ་ཡན་ལག་བདུན་པའི་མཐར། །རང་ལ་བསྟིམ་ནས་རྟ་མགྲིན་སོགས། །
དེ་དང་དེ་རུ་རིམ་བསྒོམས་ཏེ། །རྟ་མགྲིན་བྱག་རྡོར་རྣམ་གཉིས་ཀྱི། །སྔགས་ནི་ཅི་འགྲུབ་ཙམ་ཞིག་དང༌། །མི་གཡོ་མགོན་གྱི་སྙིང་པོ་ནི། །ཕྲེང་སྐོར་གཅིག་ཙམ་རྒྱུན་ཏུ་བརྗོད། ༈ །དེ་ནས་ཚེ་དཔག་འཁོར་བཅས་རྣམས། །ཚོགས་
@009B ཞིང་བྱས་ཏེ་ཕྱག་མཆོད་སོགས། །ཡན་ལག་བདུན་དང་དེ་ཡི་མཇུག །ཉི་གཞོན་འཆར་ཀ་མ་ཉིད་དང༌། །གསོལ་འདེབས་བྱས་མཐར་རང་ཉིད་ལ། །བསྟིམས་ནས་དེར་བསྒོམས་ས་བོན་གྱིས། །སྣོད་བཅུད་ནུས་པ་ཕུན་ཚོགས་སོགས། །
བཀུག་ནས་རང་ལ་བསྟིམ་པ་དང༌། །རྒྱལ་བ་སྲས་བཅས་ཐམས་ཅད་ཀྱང༌། །ཚེ་དཔག་མེད་ཀྱི་རྣམ་པ་རུ། །སྤྱན་དྲངས་བསྟིམ་ནས་དེར་བསྒོམས་ཏེ། །གཟུངས་ཐུང་བརྒྱ་ཚར་གཟུངས་རིང་ཀྱང༌། །ཅི་འགྲུབ་བཟླས་ཏེ་དམིགས་སྐོར་བྱས། །
༈ དེ་ནས་ནམ་མཁར་བད་སྡོང་སྟེང༌། །སེང་ཁྲིར་ཐུབ་པའི་དབང་པོའི་མཐར། །བྱམས་པ་འཇམ་དབྱངས་སྤྱན་རས་གཟིགས། །ཕྱག་རྡོར་དེ་མཐར་གཡས་གཡོན་རྒྱབ། །རྒྱ་ཆེན་ཟབ་མོ་ལྟ་བརྒྱུད་དང༌། །རྡོ་རྗེ་འཆང་ལ་སྔགས་བརྒྱུད་
ཀྱི། །བླ་མ་རྣམས་ཀྱིས་བསྐོར་བ་དང༌། །སྟེང་དུ་རྗེ་དང་ཇོ་བོ་ལ། །དངོས་ཀྱི་བླ་མས་བསྐོར་བ་ཞིག །ཟུར་དུ་བྱས་ཤིང་དེ་ཀུན་གྱི། །མཐར་ནི་རྒྱུད་སྡེ་བཞི་འབྲེལ་གྱི། །ལྷ་ཚོགས་རྣམས་དང་སངས་རྒྱས་དང༌། །བྱང་སེམས་ཉན་རང་
དཔའ་བོ་དང༌། །མཁའ་འགྲོ་ཆོས་སྐྱོང་ཚོགས་རྣམས་ཀྱིས། །བསྐོར་བ་བསྐྱེད་ཅིང་སྤྱན་དྲངས་བསྟིམ། །སོ་སོར་ཕྱག་དང་མཆོད་པ་སོགས། །ཡན་ལག་བདུན་བརྒྱས་ཙམ་དང༌། །མཆོད་པའི་སྤྲིན་གྱི་གཟུངས་ཀྱང་ཏོན། །སླར་
ཡང་གསོལ་འདེབས་ཚིགས་བཅད་དང༌། །ཚིགས་ལྷུག་བྱས་པ་ལན་བདུན་སོགས། །སོ་སོར་བརྗོད་ཅིང་ངེས་འབྱུང་དང༌། །བྱམས་དང་སྙིང་རྗེ་བྱང་ཆུབ་སེམས། །ཕྱིན་དྲུག་བསླབ་གསུམ་རིམ་གཉིས་སོགས། །སྐྱ་བའི་གསོལ་
@010A ༄༅། །གདབ་ལན་མང་དང༌། །སྐྱེ་ཀུན་རྗེས་སུ་འཛིན་པ་ཡི། །གསོལ་འདེབས་ལ་སོགས་བྱས་པའི་མཐར། །འོད་ཀྱི་རྣམ་པར་རང་ཉིད་ཀྱི། །སྙིང་ཁར་ཐིམ་ནས་བྱིན་རླབས་པར། །མོས་ཏེ་ངེས་འབྱུང་བྱམས་སྙིང་རྗེ། །
ལྷག་བསམ་སེམས་བསྐྱེད་ལྟ་བ་ཡི། །དམིགས་སྐོར་ཚིག་ཙམ་མ་ཡིན་པར། །ཡིད་ཁུལ་ངེས་པ་དག་ལ་འབད། །དེ་ཚེ་སྤྱོད་པ་ཕྱིན་དྲུག་ལ། །སློབ་པའི་བསམ་པ་ཤུགས་དྲག་པོས། །འཕགས་པ་རིགས་གསུམ་མགོན་པོ་ཡི། །
སྤྱོད་པ་ཇི་བཞིན་སྤྱོད་འགྱུར་བའི། །སྨོན་ལམ་སྐབས་འདིར་མ་ཟད་ཀྱི། །སྔར་ནས་བསམས་ཤིང་ལེགས་པར་བཏབ། །འདི་ནི་ང་ཡི་སེམས་བསྐྱེད་དུ། །གོ་བར་གྱིས་ལ་ཉམས་སུ་ལོངས། ༈ །དེ་ནས་ཐུབ་དབང་བྱམས་འཇམ་
དབྱངས། །སྤྱན་རས་གཟིགས་དང་ཕྱག་རྡོར་དུ། །རིམ་བཞིན་བས(Ms)
ཏེ་དེ་དག་གི །སྙིང་པོ་ཕྲེང་སྐོར་རེ་ཙམ་བརྗོད། །དེ་ནས་དམ་ཚིག་རྡོ་རྗེ་ཡི། །བསྒོམ་བཟླས་བྱས་ནས་སྤྱི་གཙུག་ཏུ། །རྡོར་སེམས་བསྐྱེད་བསྟིམ་ཡིག་བརྒྱ་
ནི། །ཉེར་གཅིག་ཙམ་རེ་བརྗོད་པར་བྱས། །དེ་ནས་གསང་འདུས་རྒྱས་བསྡུས་ལས། །གཙོ་ཆེར་བསྡུས་པའི་བསྒོམས་བཟླས་དང༌། །འཇིགས་བྱེད་བཅུ་གསུམ་དཔའ་གཅིག་གཉིས། །གཙོ་ཆེར་བདུད་ལས་རྣམ་རྒྱལ་གྱི། །
ཞི་ཁྲོའི་བསྒོམ་བཟླས་བྱས་པའི་མཐར། །བཅུ་གསུམ་ལྷ་ཚོགས་སྙིང་ཁ་རུ། །བཀོད་དེ་བཟླས་པ་ཅི་འགྲུབ་བྱས། །དེ་ནས་བདེ་མཆོག་རྒྱས་བསྡུས་ལས། །གཙོ་ཆེར་ལྷ་ལྔའི་བསྒོམ་བཟླས་བྱས། །མཇུག་ཏུ་ལུས་དཀྱིལ་ལྷ་རྫོགས་པར།།
@010B ལུས་ལ་གསལ་བཏབ་དེ་དག་གི །སྙིང་པོ་བསྡུས་པ་ཧཱུཾ་བཾ་སོགས། །ཅི་འགྲུབ་གོ་ཆའི་སྔགས་གཉིས་དང༌། །རྩ་སྔགས་བཅས་བཟླས་འོད་གསལ་དུ། །བསྡུས་ནས་ལྡང་ཞིང་སྨོན་ལམ་བྱས། །དེ་ནས་ཀུན་རིག་ཚོགས་ཞིང་ནི། །ཟུང་དུ་
བཀོད་ལྟར་གསལ་བཏབ་ནས། །ཡན་ལག་བདུན་བྱས་གསོལ་བཏབ་མཐར། །སྙིང་ཁར་བཀོད་དེ་སྙིང་པོ་རྣམས། །ཅི་འགྲུབ་བཟླས་ཤིང་སྦྱོང་རྒྱུད་ནས། །འབྱུང་ལྟར་རིགས་ལྔའི་སྔགས་རིང་རྣམས། །ཅི་འགྲུབ་བཟླས་ཤིང་མཇུག
སྡུད་བྱས། །དེ་ནས་གཞན་ཞིག་བྱས་མོད་ཀྱང༌། །མ་བཀོད་མཚན་བརྗོད་ཚར་གཅིག་བསྒྲགས། །བདེ་གསང་གཉིས་ཀྱི་རྒྱུད་དག་ལས། །ལེའུ་རེ་གཉིས་ལ་སོགས་པ། །ཅི་འགྲུབ་ཏོན་ཏེ་སྔ་དྲོ་ཡི། །འདོན་པའི་རིམ་པ་འགྲུབ་པར་
བྱས། ༈ །དེ་ནས་དཔེ་ལ་བལྟ་བ་དང༌། །རྩོམ་པའི་རིམ་པ་ལ་སོགས་པ། །ལུགས་གཉིས་བྱ་བ་ཅི་རིགས་དང༌། །ཐར་པ་ཆེན་པོ་ནས་འབྱུང་བའི། །སངས་རྒྱས་བྱང་སེམས་རྣམས་ཀྱི་མཚན། །རྫོགས་པར་ལོགས་སུ་བཀོད་པ་དང༌།།
སྤྲིན་ཆེན་མདོ་དང་མུན་སེལ་དང༌། །མེ་ཏོག་ཚོགས་དང་པད་དཀར་དང༌། །སངས་རྒྱས་བཅུ་པ་བཀྲ་ཤིས་བརྒྱད། །དྲ་བ་ཅན་འོད་ཁྱེའུ་ཞུས་མདོ། །སངས་རྒྱས་དབུ་རྒྱན་སྟོབས་བསྐྱེད་དང༌། །མདོ་སྡེ་རིམ་ལྔ་གསེར་འོད་དང༌། །དཔང་
སྐོང་ཕྱག་རྒྱ་ནས་འབྱུང་བའི། །སངས་རྒྱས་བྱང་སེམས་མཚན་རྣམས་དང༌། །ལྔ་སྟོང་བཞི་བརྒྱ་ལྔ་བཅུ་ནས། །གསུངས་པའི་མཚན་སྔགས་རབ་སྤེལ་བ། །བརྒྱ་ལྷག་སྐོར་དང་གཞན་ཡང་ནི། །བསམ་གྱིས་མི་ཁྱབ་མདོ་ཉིད་ནས། །
@011A ༄༅། །འབྱུང་བའི་སངས་རྒྱས་བཅུ་རྣམས་དང༌། །སངས་རྒྱས་བཅུ་གཉིས་སར་འབྱུང་བའི། །བདེ་བར་གཤེགས་པ་བཅུ་གཉིས་དང༌། །འཇམ་དཔལ་ཞིང་བཀོད་ནས་འབྱུང་བའི། །སངས་རྒྱས་བྱང་སེམས་མཚན?་
བཅས་ནི། །ཉི་མ་གཅིག་ལ་འདོན་པའམ། །ཡང་ན་དོན་ཞགས་གཟུངས་རིང་དང༌། །གཙུག་ཏོར་དྲི་མེད་གཟུངས་རིང་དང༌། །གསང་བ་རིང་བསྲེལ་རྒྱད་འབུམ་གསུམ། །སྟོན་པ་ཉེ་བའི་སྲས་བརྒྱད་ཀྱི། །གཟུངས་རིང་རྣམས་དང་
སྟོང་འགྱུར་དང༌། །ཀུན་བཟང་གཟུངས་རིང་ཞེས་བྱ་དང༌། །དཀོན་མཆོག་ཡེ་ཤེས་ཏ་ལ་དང༌། །ཡིད་བཞིན་འཁོར་ལོ་སྟོང་ཆེན་གཟུངས། །འཆི་མེད་རྔ་སྒྲ་སྒོ་མཐའ་ཡས། །རྣམ་སྣང་འོད་ཀྱི་རྒྱལ་པོ་ཡི། །གཟུངས་རིང་གཉིས་དང་
དཔལ་ཆེན་དང༌། །རྨ་བྱའི་ཡང་སྙིང་ཛམ་ལ་དང༌། །ནོར་རྒྱུན་གཉིས་ཀྱི་གཟུངས་རིང་དང༌། །འཇམ་དབྱངས་སྡིག་པ་ཞི་བྱེད་དང༌། །སྒྲོལ་མ་འཇིགས་པ་བརྒྱད་སྐྱོབ་སྔགས། །ཤེར་ཕྱིན་མཚན་སྔགས་ལང་གཤེགས་སྔགས། །
ཉི་ཁྲི་བསྡུ་ས་གཟུངས་དེ་ཡི་སྔགས། །སྟོང་ཕྲག་བརྒྱ་པ་གསུང་འགྱུར་དང༌། །བརྒྱད་སྟོང་ཏིང་འཛིན་རྒྱལ་པོའི་སྔགས། །ཕ་?་པོ་ཆེ་སྔགས་པ?(AR)་ཕྱིན་བཅུ། །ཐོབ་འགྱུར་ཚོགས་བདག་བདུད་གཞོམ་སྔགས། །སངས་རྒྱས་ཡན་ལག་དང་
ལྡན་དང༌། །ཚིགས་བཅད་གཉིས་པ་སྒོ་དྲུག་གཟུངས། །འཕགས་པ་གདོན་མི་ཟ་བ་དང༌། །སྡིག་སྒྲིབ་ཀུན་འཇོམས་ཆགས་པ་མེད། །ཡངས་པའི་གྲོང་ཁྱེར་འཇུག་པ་དང༌། །འདོན་པ་འབུམ་འགྱུར་འགྲོ་བའི་སྔགས། །སྨོན་ལམ་
@011B དོན་འགྲུབ་མི་བརྗེད་གཟུངས། །གོས་ཐོབ་ཡིད་འོང་ཚིག་བཙན་དང༌། །ལས་འགྲུབ་མཆོག་ཐོབ་སྔགས་རྣམས་ནི། །ཉི་མ་གཅིག་ལ་འདོན་པར་བྱས། །མདོར་ན་སྔོན་དུས་གཟུངས་སྔགས་དང༌། །སངས་རྒྱས་བྱང་སེམས་མཚན་དེ་རྣམས། །
ཉིན་གཅིག་ལ་ནི་རྫོགས་བྱས་ཀྱང༌། །ད་ལྟ་འདོན་རྒྱུ་གཞན་མང་སྟོབས། །རེ་མོས་བྱས་ཏེ་དོན་པར་བརྩོན། །ཕྱི་དྲོ་སླར་ཡང་མཚན་བརྗོད་དང༌། །སྟོན་པ་ཉེ་བའི་སྲས་ཆེན་བརྒྱད། །ཇི་ལ་ལྷ་མོ་ནག་མོ་ཡི། །མཚན་བརྒྱ་བརྒྱད་པ་རྣམས་
ལས་ནི། །གསུམ་རེ་རེ་མོས་བྱེད་པ་དང༌། །གཞན་ཡང་སྔགས་ཚན་དུ་མ་ཞིག །ལོགས་སུ་བྲིས་ནས་ཡོད་པ་དང༌། །སྡུད་པ་རྡོར་གཅོད་མངོན་རྟོགས་རྒྱན། །ལམ་སྒྲོན་ལམ་གཙོ་རྗེས་མཛད་དང༌། །རིན་པོ་ཆེ་ཡི་མཐའ་ཉིད་དང༌། །འཇམ་
དཔལ་གནས་པ་ཆོས་བཞིའི་མདོ། །ཆོས་བཅུ་འདའ་ཀ་ཡེ་ཤེས་དང༌། །འདུ་ཤེས་བཅུ་གཅིག་རྒྱལ་བློས་ཞུས། །ཤེས་རབ་ཕ་རོལ་ཕྱིན་པ་ཡི། །མཚན་མཆོག་བརྒྱ་རྩ་བརྒྱད་པ་དང༌། །བཟང་སྤྱོད་རྣམས་ལས་གང་ཐུབ་ཏོན། །གཞན་
ཡང་བརྒྱ་རྩ་(BSBU)ས་པ་དང༌། །རྡོ་རྗེ་མཁའ་འགྲོའི་སྦྱིན་སྲེག་གཉིས། །རྐྱེན་དབང་མ་གཏོགས་མ་ཆགས་ཙམ། །སྔོན་དུས་སྒྲོལ་མ་རྣམ་རྒྱལ་མའི། །གཟུངས་རིང་ཚར་ནི་ཉེར་གཅིག་རེ། །ད་ལྟ་འདོན་རྒྱུ་གཞན་མང་སྟོབས། །དེ་གཉིས་
བཅྭོ་ལྔ་བཅུ་གསུམ་ནས། །མ་ཐ་བདུན་རེ་སྔོན་དུས་ནས། །ད་ལྟའི་བར་དུ་ཅི་ཙམ་ཞིག །བྲེལ་བ་བྱུང་ཡང་ཆགས་པ་མེད། །སྒྲོལ་མའི་ཡི་གེ་བཅུ་པ་དང༌། །དམ་བཅས་གཟུངས་དང་རྣམ་རྒྱལ་མའི། །གཟུངས་ཐུང་རྣམས་ཀྱང་བརྒྱ་རྩའེ། །
@012A ༄༅། །གཞན་ཡང་མི་འཁྲུགས་པ་ཡི་གཟུངས། །ཕལ་ཆེར་ཉེར་གཅིག་རེ་བརྗོད་ཅིང༌། །བྱམས་པའི་གཟུངས་རིང་འཇམ་དཔལ་གྱི། །ཤེས་རབ་བློ་འཕེལ་སྤྱན་རས་གཟིགས། །བཅུ་གཅིག་ཞལ་གྱི་གཟུངས་རིང་རྣམས། །
སྔོན་ཚེ་ཉེར་གཅིག་རེ་ཏོན་ཀྱང༌། །ད་ལྟ་ཕལ་ཆེར་བཅྭོ་ལྔ་དང༌། །བཅུ་གཅིག་དགུ་དང་མ་ཐ་བདུན། །དེ་བཞིན་ཚུལ་ཁྲིམས་རྣམ་དག་དང༌། །དོན་ཞགས་གཟུངས་ཐུང་སྤྱན་རས་གཟིགས། །དྲན་དང་ཡིད་བཞིན་འཁོར་ལོའི་གཟུངས། །ཨུཥྞཱི་
ཥ་དང་གསེར་བཟང་དང༌། །གཙུག་ཏོར་དྲི་མེད་གཟུངས་ཐུང་དང༌། །དེ་བཞིན་གཤེགས་པའི་ཡི་གེ་བརྒྱ། །བཻ་ཌཱུ་རྱ་སྣང་གཟུངས་རྣམས་ཀྱང༌། །བཅྭོ་ལྔ་མ་ཐ་བདུན་ཙམ་ཞིག །ཅི་ཙམ་བྲེལ་ཡང་མ་ཆགས་སོ། ༈ །དེ་ནས་མཚན་མོ་འགོ་
ཉེ་ནས། །བདེ་མཆོག་བསྐྱེད་ཆོག་བསྔགས་པ་ལ། །བརྟེན་ནས་པད་མ་འདབ་སྟོང་སྟེང༌། །འཁོར་ལོ་ལྔ་བསྐྱེད་དབུས་སུ་ནི། །སེང་ཁྲེ་པད་ཉིའི་གདན་སྟེང་དུ། །བདེ་མཆོག་རྩ་བའི་བླ་མ་དང༌། །དབྱེར་མེད་བྱས་ནས་བསྐྱེད་པ་ཡི། །
མཐའ་སྐོར་འཁོར་ལོ་ལྔ་ཡི་སྟེང༌། །སྙིང་པོའི་རྣལ་འབྱོར་མ་བཞི་དང༌། །འཁོར་ལོ་གསུམ་དང་སྒོ་མཚམས་བརྒྱད། །དེ་མཐར་རྒྱལ་བཞི་ཁྲོ་དང༌། །སྟེང་དུ་རྡོ་རྗེ་འཆང་ལ་སོགས། །བསྐྱེད་ཅིང་བསྙིམས་ནས་ཕྱི་ནང་གསང༌། །ཡན་ལག
བདུན་དང་ཏིང་འཛིན་གྱི། །དབང་བཞི་བླངས་ཏེ་གསོལ་གདབ་མང༌། །བྱས་མཐར་འཁོར་རྣམས་གཙོ་བོ་ལ། །བསྡུས་ཏེ་རང་གི་ཚངས་བུག་ནས། །ཞུགས་ནས་རང་གི་རྩ་འཁོར་ནང༌། །མི་ཤིགས་ཐིག་ལེའི་དབུས་སུ་ནི། །ཧཱུཾ་ཡིག
@012B ཚུལ་དུ་བླ་མ་ལྷ། །རང་སེམས་དབྱེར་མེད་བྱས་ཏེ་བསམ། །རྫོགས་རིམ་མཚན་ཉིད་ཚང་བ་ཞིག །མ་ནུས་མོད་ཀྱང་དེ་ཉིད་ཀྱིས། །རྫོགས་རིམ་ཚ་ཙམ་མཚོན་པར་བྱས། །དེ་ནས་ཕྱོགས་བཅུའི་དཔའ་བོ་དང༌། །དཔའ་མོ་ཐམས་ཅད་བདེ་མཆོག་གི།
ལྷ་མཆོག་རྣམས་དང་དབྱེར་མེད་དུ། །མོས་ནས་སྤྱར་དྲངས་ལུས་ཀྱི་ཆར། །ཐིམ་ཞུགས་མོས་ཤིང་སྔགས་གསུམ་གྱིས། །ལུས་དཀྱིལ་ཉིད་དུ་གྱུར་བསམས་ཏེ། །བཟླས་པ་ཐམས་ཅད་རྫོགས་བྱས་ནས། །སྨོན་ལམ་བཏབ་ཅིང་མཇུག
སྡུད་བྱས། ༈ །དེ་ནས་རང་ཉིད་མི་བསྐྱོད་པར། །བསྒྱུར་ཏེ་མདུན་གྱི་ནམ་མཁའ་རུ། །སྔར་བཞིན་པད་སྡོང་སེང་ཁྲིའི་སྟེང༌། །རྗེ་བཙུན་བཙོང་ཁ་པ་ལ་སོགས། །འདུས་པའི་རྩ་བརྒྱུད་བླ་མ་དང༌། །དབྱེར་མེད་རྡོ་རྗེ་འཆང་བསྐྱེད་དེ། །
སྐུ་ལུས་དཀྱིལ་ལྷ་བཀོད་ཅིང༌། །དེ་མཐར་རྣམ་སྣང་ལ་སོགས་པ། །འདུས་པའི་ལྷ་ཚོགས་ཡི་དམ་དང༌། །སངས་རྒྱས་བྱང་སེམས་ལ་སོགས་ཀྱིས། །བསྐོར་དང་སྟེང་གི་ཆ་ལ་ནི། །འདུས་པའི་རྩ་བརྒྱུད་བླ་མ་ལ། །མདོ་སྔགས་བླ་མའི་
ཚོགས་རྣམས་ཀྱིས། །བསྐོར་ནས་བཞུགས་བསྐྱེད་སྤྱན་དྲངས་བསྟིམ། །ཕྱི་ནང་གསང་བའི་མཆོད་པ་ནི། །ཡན་ལག་བདུན་བཅས་བྱས་པའི་མཐར། །ཐུན་མོང་ཐུན་མོང་མ་ཡིན་པའི། །རིགས་ལྔའི་སྡོམ་གཟུངས་བཅས་བྱས་ཏེ། །དམིགས་
བརྩེམ་ནི་ཉེར་གཅིག་བརྗོད། །འོན་ཀྱང་རྐང་པ་བཞི་པ་ལ། །དབྱེར་མེད་རྡོ་རྗེ་འཆང་ལ་གསོལ་བ་འདེབས་སོ། །ཞེས་པར་བསྒྱུར་ནས་ཏོན་བྱས་ཤིང༌། །དེ་ཚེ་རྩ་བའི་བླ་མ་དང༌། །རྗེ་ཉིད་རིགས་གསུམ་མགོན་པོ་རྣམས། །དབྱེར་མེད་མོས་ཏེ་
@013A ༄༅། །གསོལ་འདེབས་བྱས། །དེ་ནས་ཏིང་ངེ་འཛིན་དབང་བཞི་དང༌། །གསོལ་གདབ་ལ་སོགས་བདེ་མཆོག་སྐོར། །བཤད་བཞིན་བསྒོམ་བཟླས་རྫོགས་པར་བྱས། །འོན་ཀྱང་ཕྱོགས་བཅུའི་རྒྱལ་བའི་ཚོགས། །འདུས་པའི་
ལྷ་དང་དབྱེར་མེད་དུ། །བྱས་ནས་ལུས་ཀྱི་ཆ་རྣམས་ལ། །ཞུགས་ནས་དེ་དང་དབྱེར་མེད་པར། །བཞུགས་མོས་རིམ་གྱིས་ཚིག་བརྗོད་ནས། །གསལ་བཏབ་སོ་སོའི་བཟླས་པ་དང༌། །མཐར་ནི་ཡབ་ཡུམ་སྦྱོར་མཚམས་ནས། །སྤྲོས་པའི་
འོད་ཟེར་ཕྱོགས་བཅུར་སོང༌། །སེམས་ཅན་ཀུན་གྱི་སྒྲིབ་སྦྱངས་ནས། །ཧཱུཾ་དང་དེ་རྣམས་རྡོ་རྗེ་འཆང༌། །ཉིད་གྱུར་རང་ལ་ཐིམ་ཚུལ་སོགས། །བདག་བསྐྱེད་མཇུག་ཏུ་འབྱུང་ལྟར་བྱས། ༈ །དེ་ནས་རང་ཉིད་འཇིགས་བྱེད་དུ། །བསྒྱུར་ནས་ཧཱུཾ་
ཡིག་འོད་ཟེར་གྱིས། །རང་བཞིན་གནས་ནས་གཤིན་རྗེ་གཤེད། །བཅུ་གསུམ་མ་དང་ཞེ་དགུ་མའི། །ལྷ་ཚོགས་བླ་བརྒྱུད་བཅས་པ་དང༌། །ཡིད་མ་རྒྱལ་བཞི་ཁྲོའི་ཚོགས། །སྤྱན་དྲངས་སྔར་བཞིན་པད་སྔོང་དབུས། །ཉི་མའི་གདན་ལ་
འཇིགས་བྱེད་སོགས། །བཅུ་གསུམ་ལྷ་ཚོགས་བཞུགས་མོས་ནས། །གཙོ་བོ་རྒྱས་བསྡུས་ཅི་རིགས་དང༌། །འཁོར་རྣམས་བསྡུས་ཏེ་གསལ་བཏབ་ཅིང༌། །དེ་མཐར་འཇིགས་བྱེད་ཞེ་དགུ་མའི། །ལྷ་ཚོགས་རྣམས་དང་མཐའ་སྐོར་དུ། །
ཡི་དམ་རྒྱལ་བ་ཞི་ཁྲོའི་ཚོགས། །སྔར་བཞིན་བཞུགས་པར་མོས་པ་དང༌། །སྟེང་དུ་འཇིགས་བྱེད་བླ་བརྒྱུད་བཅས། །གསལ་བཏབ་གང་དྲིན་གཟུགས་མཆོག་སོགས། །རྒྱས་བསྡུས་སྐབས་བསྟུན་ཕྱི་ནང་གི །མཆོད་པ་རྣམས་སོགས་ཡན་
@013B ལག་བདུན། །གསང་བའི་མཆོད་པ་སྡོམ་བཟུང་དང༌། །བསྟོད་པ་དབང་བཞི་ལེན་པ་སོགས། །གོང་དུ་བརྗོད་པ་ལྟ་བུ་དང༌། །གསོལ་འདེབས་ལ་སོགས་གསང་འདུས་ཀྱི། །སྐབས་ལྟར་བྱས་ཏེ་ཐུགས་ཀ་ཡི། །ས་བོན་འོད་ཀྱིས་བཅུ་གསུམ་མའི། །
ལྷ་ཚོགས་སྔར་བཞིན་སྤྱན་དྲངས་ཏེ། །སྙིང་བར་བཞུགས་མོས་སྔགས་རྣམས་བགྲངས། །བསྔོ་སྨོན་མཐར་ནི་རྡོར་སེམས་སུ། །བསྒྱུར་ཏེ་ཀུན་རིག་རྟེན་བརྟེན་པའི། །ལྷ་ཚོགས་སྤྱན་དྲངས་ནམ་མཁའ་རུ། །བཞུགས་མོས་ཚོགས་ཞིང་བསྐྱེད་
ཚུལ་ལྟར། །སྔགས་བརྗོད་རིམ་པར་གསལ་བཏབ་སྟེ། །བསྟོད་ཕྱག་ཡོན་ལག་བདུན་པ་རྣམས།། བྱས་མཐར་སླར་ཡང་བསྟོད་པ་དང༌། །གཞན་དོན་གཙོར་དམིགས་གསོལ་འདེབས་བྱས། ༈ །དེ་ནས་རང་གི་སྙིང་ཁ་རུ། །བཞུགས་པར་
མོས་ནས་བཟླས་པ་རྣམས། །ཚང་བར་བྱས་ཤེས་རིགས་ལྔ་ལས། །རྒྱལ་མཆོག་མེ་ཏོག་ཆེར་རྒྱས་ཀྱི། །གཟུངས་རིང་གཉིས་ཀྱང་འདོན་པར་བྱས། །དེ་ནས་རང་གཞན་གཉིས་ཀའི་ཆེད། །འོད་དཔག་མེད་དང་མི་འཁྲུགས་པ། །ཤཱཀ་
ཐུབ་བདེ་གཤེགས་མཆེད་བདུན་དང༌། །རྒྱལ་ལྷས?་བརྒྱད་དང་ཡེ་ཤེས་བླ། །འོད་ཀྱི་ཏོག་དང་སྨོན་ལམ་བློ། །དབང་པོ་ཞི་དང་རྣམ་མཁའ་མཛོད། །སངས་པོ་ཡི་དབྱངས་ལ་སོགས། །རྒྱལ་སྲས་ཆེན་པོ་འགའ་ཞིག་རྣམས། །ལྷན་ཅིག
སྤྱན་དྲངས་ནམ་མཁའ་ལ། །བཞུགས་བསམ་ཏེ་སོ་སོ་ཡེ། །མཚན་ནས་བརྗོད་དེ་ཕྱག་འཚལ་པ། །དབྱར་རྒུན་ཁྱད་ཀྱིས་བཅད་བདུན་ནམ། །ལྔ་རེར་བཅས་ཏེ་མཆོད་འབུལ་དང༌། །མཆོད་པའི་སྤྲིན་གྱི་གཟུངས་བརྗོད་ཅིང༌། །ཡན་ལག
@014A ༄༅། །བདུན་པ་བྱས་པའི་མཐར། །སླར་ཡང་ཕྱག་འཚལ་གསོལ་འདེབས་སུ། །བསྒྱུར་ནས་བདུན་ལྔ་ཅི་རིགས་དང༌། །རང་བཞན་ཕྱི་མར་བདེ་ཅན་དང༌། །དགའ་ལྡན་གནས་སུ་སྐྱེ་བ་ཡི། །སྨོན་ལམ་ཤུགས་དྲག་ཁེགས?་
པར་བྱས། །མཐར་ནི་རང་གི་སྙེང་ཁ་རུ། །བཞུགས་མོས་འོད་དཔག་མེད་ཉིད་ཀྱི། །གཟུངས་རིང་ཉེར་གཅིག་བཅྭོ་ལྔ་སོགས། །བརྗོད་དེ་བསློ་སྨོན་དག་ཀྱང་བྱས། །དེ་མཐར་སྒྲིབ་སྦྱོང་ཆེད་དམིགས་ཏེ། །ཤེར་སྙིང་ལྟ་བ་དང་འབྲེལ་དང༌། །
སེང་གདོང་སྔགས་བགྲངས་བཟློག་པའི་ཁུལ། །རང་དང་བསྟན་དང་འགྲོ་དོན་ལ། །དམིགས་ནས་ལན་གསུམ་ཐལ་བརྡབ་བྱས། །དེ་ནས་ཀུན་ཏུ་མྱུར་བའི་སོགས། །སྨོན་ལམ་ཁྱད་བར་ཅན་འགའ་དང༌། །བྱམས་དང་སྙིང་རྗེ་གཏོང་ལེན་ལ། །
བརྟེན་ནས་སྦྱོང་བའི་ཚུལ་ཞིག་བྱས། །མཇུག་ཏུ་འཇིགས་བྱེད་མགོན་ཆོས་སོགས། །ཚེས་སྦྱོང་རྣམས་ལ་གཏོར་འབུལ་དང༌། །སྲུང་འཁོར་མཚོན་ཙམ་བསྒོམས་བྱས་ཏེ། །ཁྲོ་བཅུའི་སྙིང་པོ་མི་གཡོ་མགོན། །ཕྱག་རྡོར་གཏུམ་པོ་
རྟ་མགྲིན་དང༌། །འཇིགས་བྱེད་སྔགས་གསུམ་མཚོན་ཙམ་དང༌། །རང་ཉིད་འཇིགས་བྱེད་དུ་བསམ་པའི། །ལུས་ཀྱི་གནས་སུ་ཡི་གེ་དང༌། །ལྷ་འགའ་བཀོད་དེ་སྲུང་བྱས་པ། །ཡན་གྱི་ཞག་གཅིག་དགེ་སྦྱོར་འགྲུབ། །འོན་ཀྱང་གྲོང་
ཆོག་ལ་སོགས་པའི། །རྐྱེན་གྱིས་སྔ་དྲོའི་དགེ་སྦྱོང་ལས། །གསང་བདེ་འཇིགས་གསུམ་མངོན་རྟོགས་དང༌། །དཔེ་ཐོག་འདོན་དགོས་ལ་སོགས་པ། །འགའ་ཞིག་ཆགས་མདོ་གཟུངས་རྣམས་ནི། །ཞར་ཞོར་རྟ་ཐོག་སོགས་ཀུན་ལས། །
@014B ཏོན་ཅིང་དེ་བཞིན་སྒྲོལ་མ་དང༌། །རྣམ་རྒྱལ་གཟུངས་རིང་སོགས་ཀྱང་ངོ། །གཞན་ནེ་གསང་བདེ་འཇིགས་གསུམ་དང༌། །ཀུན་རག་ཚོགས་ཞིང་ལ་སོགས་འགའ། །རྒྱས་བསྡུས་ཁྱད་པར་མ་གཏོགས་པར། །ནན་ཏན་མཆགས་བྱས་པའི་ཁུལ།།
དེ་ལྟར་འདོན་ཚན་མང་པོ་ལ། །ཞུགས་འདི་ཚེ་རབས་ཐམས་ཅད་དུ། །ཡི་དམ་དུ་མས་བྱིན་རློབ་ཅིང༌། །དགོངས་པར་འགྱུར་པའི་རྟེན་འབྲེལ་ཡོད། །ཇི་སྐད་སྨྲས་པ་འདི་དག་ལ། །ཅུང་ཟད་ཞིབ་ཆ་མཐོན་པ། །མཆིས་མོད་རེ་གཉིས་
ཆད་པ་ལས། །སྒྲོ་བཏགས་ལྷག་པ་བཀོད་མེད་སྙམ། ༈ །ཞོར་ལ་ཁ་ཅིག་གསུང་བ་ལྟར། །སྔོན་གྱི་སྐྱེ་བརྒྱུད་གང་ཡིན་པ། །རང་གིས་གསལ་པར་མ་ཤེས་ཀྱང༌། །སྔོན་ཚེ་རྗེ་ཡི་བུ་སློབ་ཞིག །ཡིན་འདྲ་བསམ་ཞིང་ཚེ་འདིའི་སྔོན། །
བཙུན་པ་ཆོས་ལྡན་ཞིག་གམ་སྙམ། །མདོ་ན་དེ་ལྟར་བོད་པ་ཡི། །དཔོན་གྱི་ལོ་རྒྱུས་ཞེག་ཏུ་ནི། །སྔ་སོང་རྗེ་དྲུང་རིན་པོ་ཆེ། །ཕྱོགས་འདིར་བྱོན་སྐབས་དཔོན་རྒྱུད་ལ། །ཀོའུ་ཤྲི་ནང་སོ་འབྱུང་བ་དང༌། །ལྷན་ཅིག་གྲགས་པའི་མིང་ཅན་ཞིག།
འབྱུང་ཞིང་དེ་ཉིད་དགོན་པ་འདི། །ཐོག་མར་འདེབས་མཁན་སློབ་དཔོན་པ། །རིན་ཆེན་ལྷུན་པོའི་སྐྱེ་བརྒྱུད་ཡིན། །དེ་དང་ཀོའུ་ཤྲི་རྣམ་པ་གཉིས། །ཟུང་འབྲེལ་མདོ་སྔགས་བསྟན་པ་ཉིད། །རྒྱས་པར་བྱེད་པ་འོང་ངོ་ཞེས། །ལུང་བསྟན་
མཛད་ཅེས་བཀོད་སྣང་སྟེ། །བདེན་ནམ་མི་བདེན་ཅང་མ་ཤེས། །མཛོད་དགེར་ཡོད་པའི་སྐུ་རྟེན་པས། །འདི་ཡི་སྐྱེ་བརྒྱུད་ཡིན་ནོ་ཞེས། །བརྗོད་ཅེས་ཟེར་ཡང་བཏང་སྙོམས་བྱས། །བླ་ཆེན་འགའ་ཞིག་འདི་སྐད་དུ། །ཁྱོད་ཉིད་མ་གཅིག
@015A ༄༅། །ལ་བསྒྲོན་གྱི། །མ་འོངས་ལུང་བསྟན་ལས་ཟིན་ཅིང༌། །སློབ་དཔོན་ཟླ་བ་གྲགས་པ་ཡི། །སློབ་མ་མཆོག་འདིའི་སྐྱེ་བརྒྱུད་ཙམ། །རྨི་ལམ་ལྟར་ན་ཡིན་སྙམ་ཟེར། །གང་ལྟར་སྔོན་གྱི་སྐྱེ་བརྒྱུད་ཙམ། །བཟང་བས་
ཕན་ཐོགས་འགྱུར་དཀའ་ཡི། །རང་གཞན་དག་ལ་ཕན་ཐོགས་པའི། །ཡོན་ཏན་ཉམས་ལེན་བཅས་པ་དགོས། །མེད་ན་ཚེ་སྔོན་ཚངས་པ་དང༌། །བརྒྱ་བྱིན་འཁོར་བསྒྱུར་ལ་སོགས་ཀྱི། །སྐྱེ་བ་བཟུང་བ་སྲིད་གྱུར་ཏེ། །དེ་དག
བཟང་བས་རང་ཉིད་ཀྱི། །སྐྱེ་བ་འདི་ཕྱིར་ཕན་ནམ་ཅི། །གལ་ཏེ་སངས་རྒྱས་བྱང་སེམས་ཀྱི། །སྤྲུལ་པའི་སྐྱེ་བརྒྱུད་ཞིག་ཡིན་ན། །དགའ་མོད་སྙིགས་དུས་སོ་སྐྱེ་ལ། །དེ་འདྲ་འབྱུང་བའི་རེ་བ་ནི། །བདག་ལྟ་རྣམས་ལ་ག་ལ་མཆི།།
འོན་ཀྱང་ཨང་དཀར་ཞབས་དྲུང་དང༌། །མཆེད་པའི་སྐུ་སྐྱེ་ལ་སོགས་འགས། །སྐྱེ་བརྒྱུད་གང་ཡིན་དྲིས་བྱུང་ཚེ། །ལན་ནི་འདེབས་རྒྱུ་དོན་མཐུན་ཞིག །མ་རྙེད་དེ་ལ་འདི་ལྟར་བརྗོད།། །སྔོན་གྱི་སྐྱེ་བ་འདི་ཡིན་ཞེས། །ངོས་བཟུང་མེད་
ཀྱང་ཀླུ་སྒྲུབ་ཀྱིས། །ལམ་གསུམ་ཐོག་ཐ་དབུས?་མེད་པར། །འཁོར་བའི་འཁོར་ལོ་མགལ?་མེ་ཡི། །ཞེས་སོགས་གསུངས་ལྟར་སྐྱེ་བརྒྱུད་ཡོད། །ཅེས་སྨྲས་དེ་འདྲ་དོན་མཐུན་ཡིན། །གཞན་ཡང་བླ་ཆེན་འགའ་ཞིག་གི །རྣམ་ཐར་
དག་ལས་སྦྱིན་བདག་འདིས། །རྟ་ནོར་འདི་དང་འདི་ཕུལ་སོགས?། །བགོད་པ་ལྟར་ན་འདི་ལྟ་བུ། །བརྗོད་ན་འགལ་བ་མེད་སྙམ་སྟེ། །དེ་ཡང་དཀོན་མཆོག་དྲིན་ལས་ནི། །དངོས་པོ་བཟང་མང་རྙེད་པ་ལས། །དགེ་སློང་སྦྱིན་པ་ཕུན་ཚོགས་ཉིད། །
@015B དབུས་སུ་འགྲོ་སྐབས་གོས་ཕུག?་འགའ། །དར་ཕུག?་མང་དང་ཁ་བཏགས་ནི། །སྟོང་དང་ལྔ་བརྒྱའི་སྐོར་རྣམས་དང༌། །དངུལ་སྲང་ཉིས་བརྒྱ་བཅས་བསྐུར་ཏེ། །སེར་འབྲས་དགེ་གསུམ་བཀྲ་ཤིས་ལྷུན། །རྣམས་ལ་མང་ཇ་རྣམ་གཞག་དང༌། །གླ་ཚང་
སྨད་ལ་ཁ་བཏགས་ཀྱི། །འགྱེད་དང་ཁང་ཚན་ལ་དངུལ་འགྱེད། །མཚོན་ཅམ་བཅས་པ་རྣམས་བྱས་ཤིང༌། །རྒྱལ་དབང་པཎ་ཆེན་རྣམ་གཉིས་ལ། །རང་དཔགས་དངུལ་གོས་འབུལ་ཆེན་དང༌། །དེ་ཀའི་བླ་ཆེན་གྲགས་ཆེ་འགར། །འབུལ་
བའི་མཚོན་བྱེད་རྣམ་མད་དང༌། །ཇོ་བོའི་སྐུ་མདུན་བརྒྱ་མཆོད་སོགས། །དགེ་རྩ་ཆེ་ཕྲ་ཅི་རིགས་བསྒྲུབས། །དགོན་འདིར་རང?་ཉིད་སླེབ་པ་ནས། །ད་ལྟའི་བར་དུ་ལས་སྣ་ཡང༌། །ལྔ་བཏང་རྒྱུད་པར་འགྱེད་དྲུག་དང༌། །མཚན་ཉིད་གྲྭ་ཚང་འགྱེད་
བདུན་བྱས། །དབྱར་གནས་སྐབས་སུ་འགྱེད་གཅིག་དང༌། །ཁྲི་ཐོག་ཡོད་དུས་དགུ་གཏོར་སྐབས། །འགྱེད་ཕུལ་ལྟ་བུ་འདེར?་མ་བཀོད། །སྤྱིར་ནི་བསོད་ནམས་ཚོགས་གསོག་ལ། །དཀོན་མཆོག་མཆོད་དང་སྦྱིན་གཏོང་ནི། །མཆོག
ཡིན་མདོ་ཀྱང་ཐར་འདོད་ཀྱིས། །བྱམས་དང་སྙིང་རྗེ་ལྷག་བསམ་དང༌། །ལྟ་བ་སྨོན་ལམ་རླབས་ཆེན་རྣམས། །བྱེད་པ་ཕན་ཡོན་ཆེ་ཚུལ་ནི། །བཟང་སྤྱོད་རྡོར་གཅོད་ལ་སོགས་པའི། །མདོ་སྡེ་ཟབ་ལས་བཤད་ལྟར་ཡིན། །རྩོམ་དཔེ་པོ་ཏི་བཅུ་
ལྷག་ཙམ། །པར་དུ་བསྒྲུབ་པའི་རྒྱ་རྐྱེན་ལ། །གང་སོང་དངུལ་ཕབ་བརྩིས་བྱས་ན། །དངུལ་སྲང་སུམ་བརྒྱ་ལྷག་ཙམ་ཞིག །བརྫུན་མེད་ངེས་པར་སོང་སྣང་ངོ། །དངོས་པོ་འགའ་ཞིག་སྐྱེ་ཡུལ་དང༌། །གཞན་གྱིས་དབང་མེད་འཁྱེར་གྱུར་ཏེ། །
@016A ༄༅། །ཆུད་ཟོས་སོང་བ་དག་ཀྱང་ཡོད། །གཞན་ཡང་ཕམ་དགེ་ཚུལ་སོགས། །གཤེགས་པའི་དགེ་རྩ་བཏང་བའི་སྐོར། །འགའ་ཞིག་ཡོད་མོད་དེ་ཐམས་ཅད། །འདི་རུ་འགོད་པར་མ་བྱས་སོ། །དེ་ལྟར་རྣམ་ཐར་ཐུན་མོང་
དང༌། །ཐུན་མོང་མིན་པའི་གཟུགས་བརྙན་ཙམ། །དད་ལྡན་འགའ་ཡིས་བསྐུལ་བའི་ངོར། །མ་སྦས་སྒྲོ་སྐུར་མེད་པར་བཀོད། །རྣམ་ཐར་ཐུན་མོང་རྣམ་གཞག་མཚོན་ཙམ་ཞིག །སྔོན་ནས་བྲིས་ཟིན་སྔོན་མ་ལས་ལྷག་པའི། །བརྗོད་
རྒྱུ་གཞན་ཞིག་བརྗོད་དུ་མི་སྣང་ཡང༌། །ནན་ཏན་བསྐུལ་བའི་ནན་ངོར་འདི་ལྟར་བྲིས། །དེ་ཡང་ཐུན་མོང་མིན་པའི་རྣམ་ཐར་མཆོག །བརྗོད་རྒྱུ་མ་རྙེད་རྣམ་ཐར་ཐུན་མོང་བའི། །བྱ་བྱེད་མཆོག་དམན་མང་པོས་ས་བཅད་དེ། །བརྗོད་འདིས་
མཁས་རྣམས་མ་གུ་བར་མི་ནུས་ཤིང༌། །དོན་གཉེར་ཅན་དག་སྤྱོད་པ་རྒྱ་མཚོའི་ནང༌། །རྣམ་ཐར་ཡིད་བཞིན་ནོར་བུ་ལེན་འདོད་ཀྱང༌། །མ་རྙེད་དགོས་ཆུང་རྣམ་ཐར་མཆིང་བུ་མང༌། །ཕྱིན་ཐོབ་ལྕི་བའི་ཁུར་གྱིས་ངལ་སྙམ་སེམས། །དེ་ལྟ་
ན་ཡང་དད་སྟོབས་བསྐུལ་བའི་དགེས། །ཚེ་རབས་ཀུན་ཏུ་ལྷ་མིའི་རྟེན་རྙེད་ཅིང༌། །དམ་པའི་མགོན་གྱིས་བརྩེབས་རྗེས་བཟུང་ནས། །མྱུར་དུ་རྒྱལ་བའི་གོ་འཕང་ཐོབ་པར་ཤོག །yc+ཅེས་པ་འདི་ནི། ཁྱ?་དགེའི་སློབ་དཔོན་རྡོ་རྗེ་འཆང་བློ་གྲོས་རྒྱ་མཚོའི་གདན་ས་
པ་སྐུ་སྐྱེ་སྔགས་རམ་པ་ངག་དབང་བསྟན་འཛིན་རྒྱ་མཚོ་སོགས་བླ་ཆེན་འགའ་ཞིག་དང༌། ཁྱད་པར་ཅོན?་རིས?་སྐྱོང?་ཆེན་པོ་འཇམ་དབྱངས་ནོར་བུས་རྣམ་ཐར་འདི་ལྟ་བུ་ཞིག་བགྱིས་ཞེས་གསུང་གིས་བསྐུལ་བ་ལྟར། ཤཱཀ?་བཙུན་བཤད་སྒྲུབ་མིང་ཅན་གྱིས་གཡར་ཁྲལ་དུ་སྦྱར་པའོ། །མངྒ་ལཾ། །-yc་