[སྔོན་འགྲོའི་དཔར་གཞི།]་
@001A ༄༅། །རྒྱུད་ཀྱི་རྒྱལ་པོ་མཚན་ཡང་དག་པར་བརྗོད་པའི་སྙིང་པོའི་དོན་བསྲེལ?་གསལ་བ་བཞུགས་སོ།
@001B ༄༅༅། །ན་མོ་གུ་རུ་མཉྫུ་གྷོ་ཥཱ་ཡ། རྣམ་དག་ཚོགས་གཉིས་ཁམས་ལས་ལེགས་གྲུབ་རྣམ་དག་མཚན་དཔེའི་འཕྲེང་བས་མཛེས། །གྲངས་མེད་གདུལ་བྱའི་ཁམས་དང་འཚམ་པར་གྲངས་མེད་གདུལ་བྱའི་ཁམས་དང་འཚམས་པར་གྲངས་མེད་མེད་ཆོས། །ཕུང་ཀུན་ནས་
སྒྲོགས། །མཐའ་བྲལ་རྟེན་ཅིང་འབྲེལ་འབྱུང་ཚུལ་ལ་མཐའ་བྲལ་གཟིགས་པ་མཆོག་མངའ་བ། །ལྷ་མིའི་སྟོན་པ་ཤཱཀྱའི་གཙོ་བོ་ལྷ་མིའི་གཙུག་ན་མཛེས་གྱུར་ཅིག །བདེ་གཤེགས་ཀུན་གྱི་མཁྱེན་བརྩེའི་ཕུང་པོ་གང༌། །གཅིག
བསྡུས་རྒྱལ་སྲས་གཞོན་ནུའི་ཟློས་གར་མཁན། །རབ་འབྱམས་ཞིང་དུ་(MHYE)ན་པའི་གཏེར་ཆེན་ཞེས། །ཡོངས་སུ་གྲངས་པའི་ལ་ཕྱག་འཚལ་ལོ། །མཐའ་ཡས་རྒྱལ་བ་ཀུན་གྱིས་མགྲིན་གཅིག་ཏུ། །མཐུ་སྟོབས་བདག
པོ་ཉིད་དུ་རབ་བསྔགས་པ། །གསང་སྔགས་རིགས་སྔགས་འཆང་རྣམས་ཀུན་གྱི་རྗེ། །བཅོམ་ལྡན་རྡོ་རྗེ་འཛིན་གྱིས་དག་སྐྱོངས་ཤིག །འཇམ་མགོན་གསང་གསུམ་སྒྱུ་འཕྲུལ་དྲ་བ་ཡས། །ལེགས་བྱོན་རྒྱལ་བའི་
གདུང་འཚོ་བ་ཆོས་ཀྱི་རྗེ། །ཀུན་མཁྱེན་བླ་མ་བཙོང་ཁ་པ་ལ་སོགས། །དངོས་བརྒྱུད་ཡོངས་འཛིན་རྣམས་ལ་གུས་པས་འདུད། །ཤིན་ཏུ་དཔག་དཀའ་རྡོ་རྗེའི་ཚིག་གི་རྒྱ། །བྱིས་བློའི་སོང་རྩེས་དབྱེ་བར་ནུས་མིན་ཀྱང༌། །
@002A ༄༅། །མཁས་མང་ལེགས་བར་བཤད་པའི་མཚོན་རྣོན་གྱིས། །ཚིག་དོན་དཀའ་གནད་བཅིངས་པའི་མདུད་དགྲོལ་བྱ། །དེ་ལ་འདིར་རྒྱུད་ཐམས་ཅད་ཀྱི་རྒྱལ་པོ་མཚན་ཡང་དག་པར་བརྗོད་པ་ནི། གང་བཤད་པར་བྱ་བའི་ཆོས་སོ། །འདི་ལ་གཉིས།
སྤྱིའི་རྣམ་གཞག་བསྟན་པ་དང་སྐབས་ཀྱི་དོན་བཤད་པའོ། །དང་པོ་ལ། འདིའི་རྒྱུད་ནི། གསུང་བ་པོ་གང་གིས། གནས་གང་དུ། དུས་ནམ་གྱི་ཚེ་གསུངས་ཞེ་ན། དེ་ཡང་བདག་ཅག་གི་སྟོན་པ་དེ་ཉིད་ཀྱིས་འཕགས་ཡུལ་གྱི་ལྷོ་ཕྱོགས་དཔལ་ལྡན་འབྲས་སྤུངས་
ཀྱི་མཆོད་རྟེན་ཆེན་པོར་དུས་ཀྱི་འཁོར་ལོའི་རྒྱུད་གསུངས་པའི་ཚེ་འདིའི་རྩ་རྒྱུད་སྒྱུ་འཕྲུལ་དྲ་བའི་རྒྱུད་ཆེན་པོ་གསུངས་པ་ཡིན་ལ། མཚན་ཡང་དག་པར་བརྗོད་པ་འདི་རྒྱུད་དེ་ལས་ཕྱུང་བའོ། །འདི་ངོ་བོ་ནི་བླ་མེད་ཀྱི་རྒྱུད་དུ་གཏོགས་ཀྱང༌། དགོངས་བ་འགྲེལ་བའི་
བསྟན་བཅོས་ཀྱི་རིམ་པའི་དབང་དུ་བྱས་ན། དུས་འཁོར། བླ་མེད་སྤྱི་འགྲོ། རྣལ་འབྱོར་རྒྱུད་ཀྱི་ཕྱོགས་སུ་འགྲེལ་བའི་ལུགས་གསུམ་བྱུང་ངོ། །དེ་དག་ཐམས་ཅད་ཀྱང་འདིའི་ཚིག་གི་དོན་ཡིན་པར་མི་འགལ་ཏེ། དཔེར་ན། གསང་འདུས་པའི་རྒྱུད་ཀྱི་ཚིག
རེ་རེ་ལའང་མཐའ་དྲུག་དང་ཚུལ་བཞིའི་བཤད་པ་མི་འདྲ་བ་དུ་མ་འདུག་བ་བཞིན་ནོ། །འདི་ལ་ཚིགས་བཅད་བརྒྱ་དང་དྲུག་ཅུ་རྩ་གཉིས་ཡོད་པར་བཤད་ཅིང༌། འགྱུར་ཡང་མི་འདྲ་བ་འགའ་རེ་སྣང་ངོ། །འདི་ལ་རྒྱ་འགྲེལ་གྱི་རིམ་པ་མང་དུ་སྣང་ཡང༌། བོད་འགྲེལ་ནི་རྗེ་དགེ་
འདུན་རྒྱ་མཚོས་དུས་འཁོར་དང་བསྟུན་ནས་མཛད་པ་ཞིག་འདུག་པ་ལས་གཞན་མ་མཐོང་ངོ། །ལོན?་འདིར་གང་གི་རྗེས་སུ་འབྲང་ནས་འཆད་ཅེ་ན། གཙོ་བོར་བླ་མེད་སྤྱི་འགྲོའི་དབང་དུ་བྱས་ཏེ། རྒྱ་འགྲེལ་རྣམས་ལས་གང་སྐབས་སུ་བའི་པ་དང་འཆད་བདེ་བ་ཉིད་གཙོ་བོར་
@002B བྱེད་ལ་དུས་འཁོར་དང་བསྟུན་པ་གཙོ་བོར་བྱས་ན། ལུགས་མི་འདྲ་བས་གོ་མི་བདེའོ། །དེར་མ་ཟད། རྡོ་རྗེའི་ཚིག་འདི་དག་ནི། གཞན་དང་མི་འདྲ་བས་ཤིན་ཏུ་གོ་དཀའ་བར་སྣང་བའི་ཕྱིར། བདག་ལྟ་བུའི་རང་སྟོབས་ཀྱིས་འགྲེལ་གལ་ནུས། འོན་ཀྱང་མཁས་བའི་ལན་དག་ལ་བརྟེན་ནས་ཇི་ལྟར་ནུས་བ་བཞིན། འདོར་
བསྡུས་ཏེ་དྲང་ངེས་ཀྱི་བཤད་པ་ཅི་རིགས་ཀྱིས་འཆད་པར་བྱའོ། །གཉིས་བ་སྐབས་ཀྱི་དོན་ལ་གསུམ། མཚན་གྱི་དོན། འགྱུར་གྱི་ཕྱག་གཞུང་གི་དོན་ནོ། །དང་པོ་ནི། རྒྱ་གར་ན་སྐད་རིགས་བཞི་ཡོད་པ་ལས། ལེགས་སྦྱར་གྱི་སྐད་དུ། འདིའི་མཚན་ལ། ཨཱརྱ་མཉྫུ་ཤྲཱི་ནཱ་མ་སཾ་གི་ཏི་ཞེས་འབྱུང་ལ།
དེ་ཡང་བོད་སྐད་དུ་སྦྱར་ན། འཕགས་བ་འཇམ་དཔལ་གྱི་མཚན་ཡང་དག་པར་བརྗོད་པ་སྟེ། ཨཱརྱ་ནི། འཕགས་པ། མཉྫུ་ཤྲཱི་ནི། འཇམ་དཔལ། ནཱ་མ་ནི། མཚན། སཾ་གི་ཏི་ནི། ཡང་དག་པར་བརྗོད་པའོ། །གཉིས་པ་ནི། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ་ཞེས་པ་
ལོ་ཙྪ་བས་བཀོད་པ་སྟེ་དོན་ནི་སླའོ། །གསུམ་པ་གཞུང་གི་དོན་ལ་གཉིས། དང་པོ་ནི། འདི་ལ་སྤྱིར་ལེའུ་བཅུ་གསུམ་ཡོང་པའི་ལུགས་སུ་བྱས་ནས་འཆད་པར་འགྱུར་ལ། འདི་ལའང་ཞུ་ལན་གཉིས་མདོར་བསྟན་པ་དང༌། ཞུས་པའི་ལན་གྱི་རང་བཞིན་རྒྱས་པར་བཤད་པ་དང་གཉིས། དང་པོ་ལ་གཉིས།
ཞུས་པ་དང༌། ལན་གྱི་ལེའུའོ། །དང་པོ་ནི། དེ་ནས་དཔལ་ལྡན་རྡོ་རྗེ་འཆང༌། །ཞེས་པ་ནས། ཁྱོད་ནི་རྩེ་གཅིག་ཡིད་ཀྱི་ཉོན། །ཅེས་པའི་བར་ཏེ། འདི་ལ་གང་གིས་ཞུས་པ་སོགས་བདུན་ལས། དང་པོ་ནི། འདིར་འདི་སྐད་བདག་གིས་ཐོས་པ་ཞེས་པའི་ཚིག་དངོས་སུ་མི་འབྱུང་བ་ནི། འདི་ཉིད་སྒྱུ་འཕྲུལ་དྲ་
བ་ཆེན་པོ་ཁྲི་དྲུག་སྟོང་པ་ལས་ཕྱུང་བའི་ཆ་ཤས་ཡིན་པས། རྒྱུད་དེའི་ཐོག་མར་འདི་སྐད་སྨྲས་ཟིན་པའི་རྒྱུ་མཚན་གྱིས་ཡིན་ལ། འོན་ཀྱང་དེ་ནས་ཞེས་པའི་སྐད་དོད་ཨ་ཐ་ཞེས་པ་ལས་འདི་སྐད་ཀྱི་དོན་ནི་མི་གསལ་བའི་ཚུལ་གྱིས་ཡོད་དོ། །སྤྱིར་མ་ཐའི་སྒྲ་ནི། དེ་མ་ཐག་པ། དབང་དུ་བྱས་པ། བཀྲ་ཤིས་པ་སོགས་ལ་
@003A ༄༅། །འཇུག་པ་ལས། འདིར་དེ་མ་ཐག་པའི་དོན་ཏེ། དེ་ཡང་སྔར་རྒྱུད་རྒྱས་པ་བཤད་པའི་རྗེས་དེ་མ་ཐག་ནས་ཞེས་འཚམས་སྦྱར་ཏེ། གང་གིས་ཞུས་པ་ནི་དཔལ་ཏེ་འདི་ལ་དོན་མང་དུ་ཡོད་པ་ལས། ཆོས་སྐུ་ལོངས་སྐུ་སྤྲུལ་སྐུ་གསུམ་ཐོབ་པས་ན་དཔལ་དང༌། ཡང༌། རང་དོན་དང་གཞན་དོན་གྱི་སྐུ་གཉིས་
ཐོབ་པས་ན་དཔལ། ཡང༌། སྟོང་པ་ཉིད་དང་རོ་གཅིག་ཏུ་ཞུགས་པའི་གཉིས་སུ་མེད་པའི་ཡེ་ཤེས་ཐོབ་པས་ན་དཔལ། ཡང༌། །བདེ་སྟོང་དབྱེར་མེད་ཀྱི་ཡེ་ཤེས་མཐར་ཐུག་བརྙེས་པས་ན་དཔལ་ཏེ། དེ་དག་ཐུགས་རྒྱུད་ལ་ལྡན་པའོ། །རྡོ་རྗེ་འཆང་སྟེ། འདི་ལ་སྒྲ་ཇི་བཞིན་པའི་དྲང་དོན་དང༌། དེ་མ་ཡིན་པའི་ངེས་དོན་གཉིས་
ཡོད་པ་ལས། དང་པོ་ནི། ཕྱག་མཚན་དུ་རྡོ་རྗེ་འཛིན་པའམ་འཆང་བའི་དོན་དང༌། བྱི་མ་ནི་བླ་མེད་ལྟར་ན། འབྲས་དུས་ཀྱི་བདེ་སྟོང་དབྱེར་མེད་ཀྱི་ཡེ་ཤེས་དང༌། བླ་མེད་དང་རྣལ་འབྱོར་རྒྱུད་ཐུན་མོང་བ་ལྟར་ན། གཉིས་སུ་མེད་པའི་ཡེ་ཤེས་ཉིད་རང་གི་བདག་ཉིད་དུ་འཆད་པའམ་འཛིན་པ་སྟེ། བཛྲ་བྷ་རའི་སྐད་དོད་དེ་གཉིས་ཀ་ལ་
འཇུག་པའི་དབང་དུ་བྱས་པའོ། །ཕྱི་རུ་འདུལ་དཀའ་བ་གནོད་སྦྱིན་སྲིན་པོ་དང༌། ནང་དུ་གདུལ་དཀའ་བ་ཉོན་མོངས་གསང་བའི་གདུལ་དཀའ་བ་ལས་རླུང་སྟེ། ཕྱི་ནང་གསང་བའི་གདུལ་དཀའ་བ་མཐའ་དག་འདུལ་བར་བྱེད་པ་ལ་མང་དུ་ཡོད་ཀྱང༌། དེ་རྣམས་ཀྱི་མཆོག་ཏུ་གྱུར་ཅིང༌། འདུལ་ཚུལ་ཡང་གཙོ་བོར་དྲག་པོའི་སྒོ་ནས་འདུལ་
བའོ། །དེ་ལྟར་འདུལ་ནུས་བས་ན་དཔའ་བོའོ། །ས་འོག་ས་སྟེང་ས་བླ་གསུམ་གྱི་འཇིག་རྟེན་གྱི་གཙོ་བོ་རྣམས་དབང་དུ་མཛད་པས་ན། འཇིག་རྟེན་གསུམ་ལས་རྒྱལ་བའོ། །གཉིས་སུ་མེད་པའི་ཡེ་ཤེས་ཀྱི་རྡོ་རྗེ་ཐུགས་ལ་མངའ་ཞིང་དེ་ལ་དབང་བསྒྱུར་བས་ན་དབང་ཕྱུག་དང༌། གསང་བ་གནོད་སྦྱིན་གྱི་བདག་པོ་ཡིན་
པའམ། རྒྱུད་སྡེ་འོག་མ་དང༌། ཉན་རང་རྣམས་ལས་གསང་བར་བྱ་བའི་ཡེ་ཤེས་ཐུན་མོང་མིན་པ་དང་ལྡན་པས་ན། གསང་བའི་རྒྱལ་པོ་སྟེ། དེ་ལ་དབང་བསྒྱུར་བའི། །དེ་འདྲ་བའི་གསང་བའི་བདག་པོ་དེ་པདྨའི་??་ཨ་དཀར་པོ་རྒྱས་པ་དང་འདྲ་བའི་སྤྱན་མངའ་ཞིང༌། བརྨ་རྒྱས་པ་དང་འདྲ་བའི་ཞལ་མངའ་བ་ཉིད་དོ།
@003B གསང་བདག་དེས་རང་གི་ལག་གིས་མཚོན་བྱེད་དཔེའི་རྡོ་རྗེ་མཆོག་དེ་ཉིད་ཡང་དང་ཡང་དུ་གསོར་བར་བྱེད་པ་དང༌། མཚོན་བྱ་དོན་གྱི་ཡེ་ཤེས་ཀྱི་རྡོ་རྗེ་ནི་གདུལ་བྱའི་རྒྱུད་ལ་གསོང་བ་སྟེ་སྤེལ་བར་བྱེད་པའོ། །གསང་བདག་དེ་ལ་འཁོར་ཇི་ལྟ་བུ་ཡོད་ཞེ་ན། ཁྲོ་གཉེར་རིམ་པར་ལྡན་པ་ལ་སོགས་པ་ལག་ན་རྡོ་རྗེའི་མིང་ཅན་གྲངས་
མཐའ་ཡས་པའི་འཁོར་དང་ལྡན་པའོ། །ཁྲོ་བོ་དེ་དག་ཐམས་ཅད་ཀྱང༌། དཔའ་བོ་གདུལ་དཀའ་བ་འདུལ་བར་བྱེད་ནུས་པ་པོ་སྟེ། དེ་ཡང་མཚེ་བ་གཙིགས་པ་ལ་སོགས་པའི་འཇིགས་སུ་རུང་བ་དང༌། མ་རུངས་པ་ཐམས་ཅད་འདུལ་ནུས་བས་ན། དཔའ་བྱད་ཅན་ནམ། དེ་ཐམས་ཅད་འདུལ་ནུས་པའི་མཚོན་བྱེད་དུ་དཔའ་བའི་ཆ་
བྱད་གར་དགུའི་ཉམས་དང་ལྡན་པ་སྟེ། དེ་རྣམས་ཀྱི་ཕྱག་མཚན་རྡོ་རྗེ་རྩེ་མོ་ལས་འོད་རབ་ཏུ་འཕྲོ་བ་རང་རང་གི་ལག་གིས་གསོར་བ་བྱེད་པ་ཅན་ནོ། །དེ་ཐམས་ཅད་ཀྱང་སྙིང་རྗེ་ཆེ་བ་དང་ཤེས་རབ་ཆེ་བ་དང༌། ཞི་དྲག་སོགས་ཐབས་སྣ་ཚོགས་ཀྱིས་འགྲོ་བའི་དོན་བྱེད་པའི་མཆོག་སྟེ། སེམས་ཅན་གྱི་དོན་བྱེད་པ་ལ་སྙིང་རྗེའི་
དགའ་བ་དང༌། ཤེས་རབ་ཀྱིས་མགུ་བ་དང༌། ཡིད་རངས་པའི་བསམ་པ་ཅན་ཁྲོ་བོའི་ལུས་ཀྱི་གཟུགས་དང་ལྡན་པའོ། །དེ་ལྟར་བསྟན་པ་ཡང་གཙོ་བོར་དྲག་པོའི་སྒོ་ནས་སངས་རྒྱས་ཀྱི་འཕྲིན་ལས་བྱེད་པའི་མགོན་དུ་གྱུར་པ་སྟེ། དེ་ལྟ་བུའི་ཁྲོ་བོ་དག་སྟོན་པ་ལ་གུས་པས་ལུས་བཏུད་པ་རྣམས་དང་ལྷན་ཅིག་ཏུ༌།སེམས་
ཅན་གྱི་མགོན་པོ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ཏེ། ལག་པ་ཐལ་མོ་སྦྱར་བར་བྱས་པར་གྱུར་ནས་སངས་རྒྱས་ཀྱི་སྤྱན་སྔར་འདུག་གོ །དེ་ལྟར་འདུག་སྟེ་ཞུ་ཚུལ་ནི། འོག་ནས་འབྱུང་བ་འདི་སྐད་ཅེས་གསོལ་ཏོ། །དགོས་པ་གང་གི་ཆེད་དུ་
ཞུ་བ་ནི། རིགས་ཐམས་ཅད་ལ་ཁྱབ་པས་ན། ཁྱབ་བདག་ཅེས་སྟོན་པ་ས་བོནྶ་ལས་བདག་ལ་སྨན་པ་སྟེ་ཕན་པ་དང༌། བདག་གི་དོན་དང༌། བདག་ལ་ཐུགས་བརྩེ་བའི་ཕྱིར་ཞུ་སྟེ། བདག་ལ་ཕན་པ་ཡང་སྒྱུ་མ་ལྟ་བུའི་རྣམ་པར་འཕྲུལ་བའི་དྲ་བ་མཐའ་ཡས་པ་སྟོན་པའི་ཚུལ་གྱིས་མངོན་པར་རྫོགས་པར་སངས་
@004A ༄༅། །རྒྱས་པའི་བྱང་ཆུབ་དེ་ཅི་ནས་ཀྱང་བདག་གིས་ཐོབ་པར་མཛོད་ཅིག་པ་སྟེ། འདིར་ཕྱག་རྡོར་རང་ཉིད་ཀྱིས་དེ་མ་ཐོབ་པ་ལྟ་བུར་བསྟན་པ་ནི། གདུལ་བྱའི་སེམས་ཅན་ལ་དགོངས་པའོ། །རང་དོན་དུ་དེ་ལྟར་ཞུས་ནས། གཞན་དོན་དུ་གང་ལ་ཞུ་བ་ནི། ཉོན་མོངས་པ་འདོད་ཆགས་ལ་སོགས་པས་སེམས་དཀྲུགས་
ཤིང༑ ཤེས་བྱ་ལ་རྨོངས་པའི་མི་ཤེས་པའི་འདམ་དུ་བྱིང་བ་ཡི། སེམས་ཅན་ཀུན་ལ་གནས་སྐབས་སུ་སྨན་པ་དང༌། མཐར་ཐུག་བླ་ན་མེད་པའི་སྐུ་བཞིའི་འབྲས་བུ་ཐོབ་པར་བྱ་བའི་ཕྱིར་དུ་རྫོགས་པའི་སངས་རྒྱས་བཅོམ་ལྡན་འདས་འགྲོ་བའི་བླ་མ་ཐར་ལམ་སྟོན་པ་པོ་དེ་ཉིད། ཆོས་ཀྱི་སྐུ་ལ་གནས་པ་དང༌། སེམས་ཅན་གྱི་དོན་
བྱེད་པ་ལས་མི་འདའ་བས་ན་དམ་ཚིག་ཆེན་པོ་དང༌། ཆོས་རྣམས་ཀྱི་དེ་ཁོ་ན་ཉིད་མཁྱེན་ཅིང༌། སེམས་ཅན་ཐམས་ཅད་ཀྱི་དབང་པོ་དང་བསམ་པ་ཇི་བཞིན་དུ་མཁྱེན་པ་མཆོག་གིས་ནི། ཆོས་གང་ཞུ་བ་ཡང་སངས་རྒྱས་བཅོམ་ལྡན་འདས་ཀྱི་གཉིས་སུ་མེད་པའི་ཡེ་ཤེས་ཀྱི་སྐུ་དེ་ནི། དེ་བཞིན་གཤེགས་པའི་གཙུག་ཏོར་
ཆེན་པོ་ལྟར་རྟོགས་པར་དཀའ་ཞིང༌། བསྔགས་པའི་གནས་སུ་གྱུར་པ་སྟེ། དེ་ཉིད་སྟོན་པ་པོ་ཚིག་གི་བདག་པོ་སངས་རྒྱས་བཅོམ་ལྡན་འདས་མཐའ་དག་གི་ཡེ་ཤེས་ཀྱི་སྐུ་སྟེ་དེ་ཡང༌། རིགས་ཐམས་ཅད་ཀྱི་སྤྲོ་བ་དང་བསྡུ་བའི་གཤིང?་གྱུར་ཅིང་ཡེ་ཤེས་ཀྱི་བདག་ཉིད་ལས་བྱུང་བས་ན་རང་བྱུང་བའོ། །དེ་ལྟ་བུའི་སྐུའི་
མཚན་གྱི་རྣམ་གྲངས་ལ། དྲང་དོན་གྱི་འཇམ་དཔལ་དང༌། ངེས་དོན་གྱི་འཇམ་དཔལ་གཉིས་ལས། དང་པོའི་དབང་དུ་བྱས་ནས། འཇམ་དཔལ་ཡེ་ཤེས་སེམས་དཔའ་ཡི་མཚན་དེ་ནི་ཡང་དག་པར་བརྗོད་པར་བྱ་བའི་མཆོག་ཡིན་ཏེ། ཕན་ཡོན་ཆེ་བའི་ཕྱིར་རོ། །གཉིས་པའི་དབང་དུ་བྱས་ན། རྒྱལ་བའི་ཐུགས་གཉིས་
སུ་མེད་པའི་ཡེ་ཤེས་ཀྱི་སྐུ་སྟེ་དེ་སྟོན་པའི་མཚན་བརྗོད་འདིའི་དོན་རྟོགས་པར་དཀའ་བས་ན་དོན་ཟབ་པ་དང༌། ཁྱད་པར་མར་བས་ན་དོན་ནི་རྒྱ་ཆེ་ཞིང་དང༌། འབྲས་བུའི་མཆོག་དང་ཉན་རང་སོགས་ཀྱི་ཐེག་པ་གཞན་དང་མི་མཉམ་པས་ན། དོན་ཆེན་པོ་དང༌། མཚུངས་མེད་པ་དང༌། སྐྱོན་ཐམས་ཅད་དང་བྲལ་ཞིང་
@004B ཟག་མེད་ཀྱི་རང་བཞིན་དུ་གྱུར་བས་ན། རབ་ཏུ་ཞི་བ་དང༌། ཐོག་མར་ཐོས་པའི་ཤེས་རབ་དང་རྒྱུ་དགེ་བ་དང༌། ཡང་དུ་བསམ་པའི་ཤེས་རབ་དང་ལམ་དགེ་བ་དང༌། ཐ་མར་སྒོམ་པའི་ཤེས་རབ་དང་འབྲས་བུ་དགེ་བའི་ཁྱད་པར་དང་ལྡན་ལ་བརྗོད་བྱ་དོན་གྱི་འཇམ་དཔལ་དེ་སྟོན་པར་བྱེད་པའི་རྗོད་བྱེད་ནི། འདས་པའི་སངས་རྒྱས་བཅོམ་
ལྡན་འདས་རྣམས་ཀྱིས་གསུངས་ཤིང༌། མ་འོངས་པའི་སངས་རྒྱས་རྣམས་ཀྱིས་ཀྱང་གསུང་བར་འགྱུར་ལ། ད་ལྟར་བྱུང་བའི་རྫོགས་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་ཡང་དང་ཡང་དུ་གསུང་བ་གང་ཡིན་པ། སྔར་རྒྱུད་ཆེན་པོ་སྒྱུ་འཕྲུལ་དྲ་བ་དེ་ཉིད་ལས་སྟོན་པ་རྡོ་རྗེ་འཆང་ཆེན་དང༌། གསང་སྔགས་འཆང་བའི་
སྟོན་པ་གཞན་དཔག་ཏུ་མེད་པ་རྣམས་ཀྱིས་དགྱེས་པ་ཡི་སྒོ་ནས་རབ་ཏུ་གསུངས་པ་གང་ལགས་པ་དེ་འདིར་ཡང་བཤད་དུ་གསོལ། ཞེས་པའོ། །གཞུང་སྔ་མ་དེས། སངས་རྒྱས་བཅོམ་ལྡན་འདས་མཐའ་དག་གིས་གསང་སྔགས་སྟོན་པར་བསྟན་ལ། འོན་ཀྱང་གསང་འདུས་རྩ་རྒྱུད་ལས། མར་མེ་མཛད་ནས་བདག་ཅག་གི་སྟོན་
པའི་པར་སངས་རྒྱས་གཞན་རྣམས་ཀྱིས་གསང་སྔགས་མ་གསུང་བར་བཤད་པ་ནི། འཕགས་ཡུལ་གྱིས་དེར་མ་བསྟན་པ་ལ་དགོངས་པར་བཤད་དོ། །དེ་བཤད་ན་དེ་བརྗེད་པར་མི་བྱ་སྟེ། མགོན་པོ་རྫོགས་པའི་སངས་རྒྱས་ཀུན་གྱིས་གསང་སྔགས་ཀྱི་ཆོས་འཛིན་པ་ཉིད་དུ་ཅི་ནས་ཀྱང་བདག་འགྱུར་བར་བྱ་བའི་ཕྱིར་དུ་ངེས་པར་འབྱུང་
གི་བྱང་ཆུབ་ཀྱི་བར་དུ་ནི་བདག་གིས་མི་བརྗེད་པའི་བསམ་པ་བརྟན་པོས་གཟུང་བར་བགྱིའོ། །དགོས་པ་གང་གི་ཆེད་དུ་ན། གདུལ་བྱའི་སེམས་ཅན་གྱི་ཕྱིར་ཏེ། དེའི་འདོད་ཆགས་སོགས་ཉོན་མོངས་པ་མ་ལུས་པ་བསལ་བར་བྱ་བ་དང༌། རྨོངས་པའི་མི་ཤེས་པ་མ་མ་ལུས་པ་སྤང་བར་བྱ་བའི་ཕྱིར་དུ། སེམས་ཅན་རྣམས་ཀྱི་དབང་
པོ་དང་བསམ་པའི་ཁྱད་པར་ཇི་ལྟ་བ་བཞིན་རབ་ཏུ་བཤད་པར་བགྱིའོ་ཞེས་གསང་བའི་བདག་པོ་ལག་ན་རྡོ་རྗེ་ཡིས་དེ་བཞིན་གཤེགས་པ་ལ་ཚིག་དེ་སྐད་དུ་གསོལ་བ་བཏབ་ནས་ཐལ་མོ་སྦྱར་བར་བྱས་ཏེ་གུས་པས་ལུས་བཏུད་ནས་ནི་སངས་རྒྱས་ཀྱི་སྤྱན་སྔར་འདུག་གོ་ཞེས་པ་སྟེ། འདི་དག་ལ་བཤད་པའི་
@005A ༄༅། །རྣམ་གྲངས་མི་འདྲ་བ་མང་ཞིང༌། ཁྱད་པར་ངེས་དོན་གྱི་བཤད་པ་མི་འདྲ་བ་གཞན་ཡོད་ཀྱང་འདིར་མ་བྲིས་སོ། །ཞེས་བྱ་བ་ཞུས་པའི་ལེའུའི་རྣམ་བཤད་དེ་དང་པོའོ།། །།གཉིས་པ་ལན་གྱི་ལེའུ་ལ་རིམ་པ་ལྔ་ལས། སྟོན་པ་ཕུན་སུམ་ཚོགས་པ་ནི། ཞུས་པའི་རྗེས་དེ་ནས་
བཅོམ་ལྡན་འདས་ཤཱཀྱ་ཐུབ་པ་ཡང་དག་པར་རྫོགས་པའི་སངས་རྒྱས་རྐང་མེད་དང༌། རྐང་མར་རྐང་གཉིས་པ་རྣམས་ཀྱི་མཆོག་དམ་པ་དེས། ཆོ་འཕྲུལ་ཕུན་སུམ་ཚོགས་པ་མཛད་པ་ནི། སྟོན་པ་ཉིད་ཀྱི་ཞལ་ནས་ལྗགས་བཟང་བ་དང་སྒྲ་མཚམས་སུ་སླེབ་པས་རིང་ཞིང༌། ཞལ་ཁེབས་པའི་ཡངས་པ་
བརྒྱད་པར་མཛད་དེ། དེ་ལས་འཕྲོས་པའི་འོད་ཀྱིས། ས་འོག་ས་བླ་ས་སྟེང་གི་འཇིག་རྟེན་གསུམ་པོ་སྣང་བར་བྱེད་ཅིང༌། ལྷའི་བུའི་བདུད་ལ་སོགས་པ་བདུད་བཞི་དང་བཅས་པའི་དགྲ་རྣམས་འདུལ་བར་བྱེད་པ་དང༌། ལྷ་མི་སོགས་སེམས་ཅན་རྣམས་ཀྱི་དན་སོང་གསུམ་དུ་འགྲོ་བའི་རྒྱུ་དང༌། སྡུག
བསྔལ་སྦྱོང་བར་བྱེད་པའི་ཞལ་འཛུམ་པ་བསྟན་ནས། རྣམ་པ་ཐམས་ཅད་པའི་སྐང་དང་མཐུན་པའི་ཕྱིར་ན་ཚངས་པའི་གསུང་ནི་སྙན་པ་ཡིས་ས་གསུམ་གྱི་འཇིག་རྟེན་གསུམ་པོ་ཀུན་བཀང་སྟེ། དྲང་དོན་དང་ངེས་དོན་གྱི་རྡོ་རྗེ་འཛིན་པའི་ལག་ན་རྡོ་རྗེ་བདུད་དང་མི་མཐུན་པའི་ཕྱོགས?་འཇོམས་ནུས་པའི་སྟོབས་
པོ་ཆེ་གསང་བའི་བདག་པོ་དེ་ལ་ནི། ལན་སླར་གསུང་བ་ཡང་སྙིང་རྗེ་ཆེན་པོ་དང་ལྡན་པར་གྱུར་པས། དགོས་པ་འགྲོ་བ་ལ་ཕན་པའི་དོན་དུ་ཁྱོད་ཀྱིས་ཡེ་ཤེས་ལུས་ཅན་འཇམ་དཔལ་གྱི་མིང་སྟེ་མཚན་བརྗོད་པས་ནི། འབྲས་བུ་དོན་ཆེ་བ་ཉེས་པ་རྣམས་དག་པར་བྱེད་ཅིང༌། ཁྱད་པར་སྡིག་པ་ཐམས་ཅད་སེལ་
པར་བྱེད་པའི་རྒྱུད་འདི། སྟོན་པ་ང་ལས་ཉན་པར་བརྩོན་པ་ནི། ལེགས་སོ་དཔལ་ལྡན་རྡོ་རྗེ་འཆང་སྟེ། རྡོ་རྗེ་འཛིན་པ་ཞེས་པོས་ནས། ཡང་ལག་ན་རྡོ་རྗེ་ཁྱོད་ལེགས་སོ་ཞེས་ལེགས་སོ་གཉིས་པ་བྱིན་ནོ། །ཡང་གསང་བའི་བདག་པོ་ཞེས་བོས་ནས། ཁྱོད་ཀྱི་ཞུ་དོན་དགོས་པ་ཁྱད་པར་ཅན་དང༌།
@005B ཞུས་པའི་བརྗོད་བྱ་ཁྱད་པར་དུ་འཕགས་པའི་རྒྱུ་མཚན་དེའི་ཕྱིར། ངས་ཁྱོད་ལ་ལེགས་པར་བསྟན་པར་བྱ་ཡིས། ཁྱོད་ནི་ཡིད་མ་ཡེངས་པར་རྩེ་གཅིག་པའི་ཡིད་ཀྱིས་ཉོན་ཅིག་ཅེས་པའོ། །འདིའི་སྐབས་སུ་འཇམ་དཔལ་ཞེས་འབྱུང་བ་ནི། དྲང་དོན་གྱི་དབང་དུ་བྱས་ན་རྗེ་བཙུན་འཇམ་དབྱངས་ཉིད་ལ་བྱེད་
དགོས་པས། མིང་ཞེས་པ་ཡང༌། དེའི་མཚན་ལ་བྱེད། ངེས་དོན་གྱི་དབང་དུ་བྱས་ན། བདེ་སྟོང་དབྱེར་མད་ཀྱི་ཡེ་ཤེས་མཐར་ཐུག་དང༌། འཇའ་ལུས་རྡོ་རྗེའི་སྐུ་ལ་བྱེད་པ་སྟེ། མིང་ཡང༌། མཚན་ཡང་དག་པར་བརྗོད་པའི་རྒྱུད་ལ་བྱེད་དགོས་སོ། །ཞེས་བྱ་བའི་ལེའུ་གཉིས་པའི་བཤད་པའོ།། །།གཉིས་པ་
དོན་གྱི་རང་བཞིན་རྒྱས་པར་བཤད་པ་ལ་བཞི། བརྗོད་བྱ་ལུས་ཀྱི་རྣམས། ཞག་ཡན་ལག་གི་རང་བཞིན་རྒྱས་པར་བཤད་པ། མཇུག་བསྡུ་པ་རྗེས་སུ་ཡི་རང་བའི་ཚུལ་ལོ། །དང་པོ་ལ་གཉིས། རིགས་དྲུག་ལ་གཟིགས་པ། ལུས་རྣམ་པར་བཞག་པའི་དངོས་གཞི་སྒྱུ་འཕྲུལ་དྲ་བས་མངོན་པར་བྱང་ཆུབ་པའི་ལེའུ་
བཤད་པའོ། དང་པོ་ནི། བཅོམ་ལྡན་དེད་ནི་ནས། རིགས་ཆེན་གཙུག་ཏོར་ཆེན་གཟིགས་ནས། །ཞེས་སོ། དེ་ནས་གསང་བདག་གིས་བཅོམ་ལྡན་འདས་དེ་ནི་ལེགས་སོ་ཞེས་གསོལ་ཏེ། ལན་གྱི་ལེའུ་རྗེས་དེ་ནས་བཅོམ་ལྡན་འདས་ཤཱཀྱ་པ་དེས་རིགས་དྲུག་ལ་གཟིགས་པ་ཡིན་ཏེ། དེ་བཞིན་གཤེགས་པ་དང༌།
རྡོ་རྗེ་དང༌། རིན་པོ་ཆེ་དང༌། པདྨ་དང༌། ལས་དང༌། རིགས་དྲུག་པ་ལ་གཟིགས་པའི་ཕྱིར་ཏེ། དེ་ཡང་གསང་སྔགས་རིགས་ཆེན་ཐམས་ཅད་དང༌། ཞེས་པས་རིགས་རྣམས་བསྡུས་ཏེ་བསྟན་ནས། དེ་ལ་གསང་སྔགས་ཐབས་ཀྱི་རིགས་དང༌། རིག་སྔགས་འཆང་བའི་རིགས་ཤེས་རབ་ཀྱི་རིགས་གཉིས་དང༌།
སྐུ་གསུང་ཐུགས་ཀྱི་དབྱེ་བའི་རིགས་གསུམ་ལ་ནི་རྣམ་པར་གཟིགས་ཤིང༌། འཇིག་རྟེན་དང་འཇིག་རྟེན་ལས་འདས་པཱི་རིགས་གཉིས་དང༌། འཇིག་རྟེན་སྣང་བར་བྱེད་པའི་རིགས་ཆེན་དང༌། ཕྱག་རྒྱ་ཆེན་པོ་མི་བསྐྱོད་པ་ལ་སོགས་པའི་རིགས་ཀྱི་མཆོག་ལྔ་དང༌། རིགས་དྲུག་པ་རིགས་ཚན་གཙུག་ཏོར་ཆེན་པོར་
@006A ༄༅། །གཟིགས་སོ། །འདི་དག་ནི་འོག་ནས་འཆད་པའི་ལྷའི་རིགས་ཀྱི་དབྱེ་བ་སྟོན་པ་སྟེ། འདིར་འཆད་ཚུལ་མི་འདྲ་བ་དུ་མ་ཞིག་སྣང་ངོ། །ཞེས་པ་ནི། ལེའུ་གསུམ་པ་བཤད་པའོ། །གཉིས་པ་སྒྱུ་འཕྲུལ་དྲ་བས་མངོན་པར་བྱང་ཆུབ་པའི་ལེའུ་བཤད་པ་ནི། ནས་ཚིག་གི་བདག་པོས་ནས་ནཱ་ཡ་ཏེ་ན་མཿ ཞེས་
སོ༑ ༑བཤད་མ་ཐག་པའི་དེ་ནས། རིགས་དྲུག་པ་མཆོག་ཏུ་བསྟན་པའི་ཕྱིར། ཚིག་གི་བདག་པོ་སངས་རྒྱས་ཀྱིས་ཚིགས་སུ་བཅད་པ་གསང་སྔགས་ཀྱི་རྒྱལ་པོ། །ཨོཾ་བཛྲ་ཏིཀྵ་སོགས་དྲུག་དང་ལྡན་ཞིང་གཉིས་སུ་མེད་པའི་ཡེ་ཤེས་ཀྱི་བདག་ཉིད་དམ། ངོ་བོར་ཟ་སྙད་དུ་འབྱུང་བ་དང༌། རང་བཞིན་གྱིས་མི་སྐྱེ་བའི་
ཆོས་ཅན་གྱི་དབྱངས་ཀྱི་ཚིག་འདི་དག་གསུངས་པ་སྟེ། དེ་ལ་དབྱངས་ཀྱི་མ་ནིང་བཞི་དོར་བའི་བཅུ་གཉིས་སོ། །བཅུ་གཉིས་པོ་དེས་སྔགས་ཀྱིས་བཅུ་གཉིས་དང༌། རྣམ་བྱང་གི་བརྟེན་འབྲེལ་བཅུ་གཉིས་སོགས་མཚན་ནོ། །དབྱངས་བཅུ་གཉིས་ཀྱང༌། ཨ་ཨཱ་ནས་ཨཾ་ཨཱཿའི་བར་བཅུ་གཉིས་ཏ་བཅུ་
གཉིས་པོ་དེ་ཉིས་ཚན་དུ་ཕྱེ་བས་དྲུག་ཚན་གཅིག་ཏུ་འགྱུར་རོ། །སྔགས་ལྷག་མ་རྣམས་ཀྱི་དོན་ནི། སྠི་ཏོ་ཧྲྀ་དི་ནི། སྙིང་དམ་ཐུགས་པར་གནས་པ་སྟེ། སྠི་ཏོ་ནི་གནས་པ། ཧྲི་དི་ནི་ཐུགས་སམ་སྙིང་པོ། །ཛྙཱན་མུ་རྟི་ནི། ཡེ་ཤེས་ཀྱི་སྐུ་སྟེ། ཛྙཱ་ན་ཡེ་ཤེས། མུརྟི་ནི་སེམས་དཔའ་སྐུའོ། །ར་ཧཾ་ནི་ངའོ། །བུདྡྷ་ནི་
རྟོགས་པ། བུདྡྷ་ནཾ་ནི་སངས་རྒྱས་རྣམས་ཀྱིའོ། །ཏྲྱ་དྷཱ་བརྟི་ནཾ་ནི་དུས་གསུམ་བཞུགས་པས། ཏྲྱ་(DTVA)?་ནཾ་དུས་གསུམ། བརྟི་ནཾ་ནི་བཞུགས་པའོ། །དེ་ནས་ལྷ་དྲུག་གི་སྙིང་པོ་ནི། ཨོཾ་བཛྲ་ཏཱི་ཀྵ་ནི་རྡོ་རྗེ་རྣོན་པོ། །དུཿ ཁ་ཙྪེ། ད་ནི་སྡུག་བསྔལ་གཅོད་པ། པར་ཛྙཱ་ཛྙཱ་ན་མུརྟ་ཡེ་ནི་ཤེས་རབ་ཡེ་ཤེས་ཀྱི་གཙུག་ཏོར་རམ??་ཅན།
ཛྙཱ་ན་ཀཱ་ཡ་ནི། ཡེ་ཤེས་ཀྱི་སྐུ་ཅན། ཝཱ་གི་ཤྭ་རན་ངག་གི་དབང་ཕྱུག །ཨ་ར་པ་ཙ་ན་ན་མཿ ནི་འགྲོ་བ་སྨིན་པར་བྱེད་ཁྱོད་ལ་འདུད་ཅེས་སམ། སྐྱེ་བ་མེད་པའི་ཤེས་རབ་ཆགས་པ་མེད་པའི་སྤྱོད་ཡུལ་ཞས་པའམ། སྡིག་པ་ཐམས་ཅད་སྲེག་པར་བྱེད་པའི་དོན་དུ་བཤད་དོ། །གསང་སྔགས་
@006B དྲུག་པོ་ཡང་རིམ་པ་བཞིན་དུ། པདྨ་དང༌། རྡོ་རྗེ་དང༌། དེ་བཞིན་གཤེགས་པ་དང༌། ལས་དང༌། རིན་པོ་ཆེ་དང༌། རིགས་དྲུག་པའི་སྙིང་པོའོ། །ཞེས་པ་ནི་ལེའུ་བཞི་པའི་བཤད་པའོ། །གཉིས་པ་ཡན་ལག་གི་རང་བཞིན་རྒྱས་པར་བཤད་པ་ལ་གཉིས། རིགས་དྲུག་པ་རྡོ་རྗེ་དབྱིངས་ཀྱི་དཀྱིལ་འཁོར་གྱི་ལེའུ་
དང༌། ཡེ་ཤེས་ལྔའི་ལེའུ་ལྔ་བཤད་པའོ། །དང་པོ་ལ་གཉིས། མདོར་བསྟན་པ་དང༌། རྒྱས་པར་བཤད་པའོ། །དང་པོ་ནི། འདི་ལྟར་སངས་རྒྱས་བཅོམ་ལྡན་འདས། །ནས་རབ་ཏུ་གསལ་བར་བྱེད། །ཅེས་སོ། །གོང་དུ་རིགས་ཀྱི་རྣམ་གཞག་བསྟན་པའི་དབྱེ་བ་ནི་འདི་ལྟར་བཤད་པར་བྱའོ། །དེ་ཡང་སངས་
རྒྱས་བཅོམ་ལྡན་འདས་ཞེས་བརྗོད་པའི་རྫོགས་པའི་སངས་རྒྱས་རིགས་དྲུག་པ་རྡོ་རྗེ་འཆང་དེ་ནི་ངེས་དོན་གྱི་ཨ་ཤིན་ཏུ་ཕྲ་བའི་རླུང་སེམས་ལས་བྱུང་བ་ཡིན་ནོ། །འདི་དྲང་དོན་དང་སྦྱར་ན་ཨ་ཡིག་ལས་གཙོ་བོ་བསྐྱེད་པའི་དོན་ནོ། །སྤྱིར་ཨ་ཡིག་ལ་དྲང་ངེས་ཀྱི་བཤད་པ་གཉིས་ལས། དྲང་དོན་གྱི་དབང་དུ་བྱས་ན།
གང་འཇུག་པའི་ཨ་ཐུང་གི་ཡི་གེ་དེ་ཉིད། གང་ལ་འཇུག་ན་དབྱངས་གསལ་གྱི་དག་ཚིག་མཐའ་དག་ལ་འཇུག །ཇི་ལྟར་འཇུག་ན། ཨ་ཐུང་དེ་དབྱངས་གསལ་དེ་དག་གི་སྲོག་ཏུ་ཞུགས་པའི་ཚུལ་གྱིས་འཇུག །ཅིའི་ཕྱིར་འཇུག་ན། དེ་ལྟར་ཞུགས་པ་ལ་བརྟེན་ནས་མིང་ཚིག་ཤོ་ལོ་ཀ་ལ་སོགས་པ་འབྱེད་པའི་ཚུལ་གྱི།
འཇུག་གོ །གཉིས་པ་ངེས་དོན་གྱི་དབང་དུ་བྱས་ན། གང་འཇུག་ན། དབྱངས་གསལ་གྱི་མཚོན་དོན་རྩ་བ་དང་ཡན་ལག་གི་རླུང་རྣམས་འཇུག །གང་ལ་འཇུག་ན། ཨ་ཐུང་གི་མཚོན་དོན་མི་ཤིགས་པ་ཕྲ་བ་ལ་འཇུག། ཅིའི་ཕྱིར་འཇུག་ན། དཔེ་དོན་གྱི་འོད་གསལ་སྐྱེ་བའི་ཆེད་དུ་འཇུག །ཇི་ལྟར་འཇུག་ན།
ས་ཆུ་སོགས་འབྱུང་བ་ཐིམ་རིམ་གྱིས་འཇུག་གོ་ཞེས་བྱའོ། །དེས་ན། དྲང་ངེས་གཉིས་ལས་དྲང་དོན་གྱི་དབང་དུ་བྱས་ན། ངག་གི་ངོ་བོ་ཨ་ཐུང་དེ་ནི་དབྱངས་གསལ་གྱི་ཡིག་འབྲུ་ཀུན་གྱི་ནང་ནས་མཆོག་ཡིན་ཏེ། དེ་ཡང་བརྗོད་བྱ་སྟོན་པའི་ངག་གི་རྩ་བ་ཡིན་པས་དོན་ཆེན་པོ་དང༌། མི་འགྱུར་བས་ན་ཡི་གེ། དོན་
@007A ༄༅། །ཆེ་བ་དང་མི་འགྱུར་བའི་ཕྱིར་ན་དམ་པ་ཡིན་ལ། ལུས་ཀྱི་ཁོང་པ་ནས་འབྱུང་བ་དང༌། དོན་དམ་པར་འདུས་བྱས་ཐམས་ཅད་སྐྱེ་བ་མེད་པར་མཚོན་པ་དང༌། དོན་དམ་པར་སྐྱེ་བ་མེད་པ་ཉིད་ཀྱིས་ན་དེ་ལྟར་ཚིག་ཏུ་བརྗོད་པ་སྤངས་པ་སྟེ་མེད་ལ། འོན་ཀྱང་ཐ་སྙད་དུ་མིང་ཚིག་སོགས་བརྗོད་པ་ཀུན་གྱི་རྒྱུ་
བྱེད་པ་ཡི་མཆོག་ཡིན་ཏེ། རྒྱུ་མཚན་ནི། རྗོད་བྱེད་ཀྱི་ཚིག་ཀུན་གྱི་སྲོག་ཏུ་ཞུགས་པའི་ཚུལ་གྱིས་རབ་ཏུ་གསལ་བར་བྱེད་པའོ། །ངེས་དོན་གྱི་དབང་དུ་བྱས་ན། ཤིན་ཏུ་ཕྲ་བའི་སྲོག་གི་རླུང་ནི། རླུང་གཞན་ལས་ཕྲ་བས་མཆོག་དང༌། དོན་ཆེ་བ་སངས་རྒྱས་ཀྱི་རྒྱུ་བྱེད་པ་དང༌། དེའི་ཕྱིར་དམ་པ་ཡིན་པ་དང༌། སྙིང་ཁའི་རྩ་དབུ་མའི་
ཁོང་སྟོང་ནས་འབྱུང་བ་དང༌། ཡིག་འབྲུའི་གཟུགས་སུ་སྐྱེ་བ་མེད་པ་དང༌། དེ་ལྟར་བརྗོད་པ་མེད་པ་དང༌། རླུང་གཞན་གྱིའང་རྩ་བ་བྱས་ཏེ་ཁ་ནས་ཚིག་འབྱུང་བར་བྱེད་པའོ།། །།གཉིས་པ་རྒྱས་པར་བཤད་པ་ལ། དབྱིབས་ཀྱི་རྣལ་འབྱོར། དཀྱིལ་འཁོར་རྒྱལ་མཆོག །ལས་རྒྱལ་མཆོག་གི་དབྱེ་བ། ལྷའི་དབྱེ་བ་སོགས་
ཡོད་ཀྱང༌། འདིར་ཐུན་མོང་དུ་ཚིག་དོན་གྱི་ངོས་ནས་བཤད་པར་བྱ་སྟེ། དེ་ཡང་རིགས་ལྔ་དང་ཡེ་ཤེས་ལྔ་གང་གི་དབང་དུ་བྱས་ཀྱང་ཡི་འགལ་ཡང༌། ཡེ་ཤེས་ཀྱི་དབང་དུ་བྱས་ན། མཆོད་པ་ཆེན་པོ་འདོད་ཆགས་ཆེ། །ནས་ཐེག་པ་ཆེན་པོའི་ཚུལ་གྱིས་མཆོག །ཅེས་སོ། །འདི་ལ་གཉིས་ཚིག་དོན་དང༌། དཀྱིལ་འཁོར་
གྱི་ལྷ་བཤད་ཚུལ་དང་སྦྱར་བའོ། །དང་པོ་ནི། འདོད་ཆགས་རྣམ་པར་དག་པའི་སོར་རྟོག་ཡེ་ཤེས་ནི། འདིར་མཆོད་པར་བྱ་བའི་གནས་ཆེན་པོའོ། །ཡེ་ཤེས་དེ་ཉིད་ལྷན་སྐྱེས་ཀྱི་བདེ་བའི་རང་བཞིན་ཡིན་པས་ན་འདོད་ཆགས་ཆེ་བ་སྟེ། དེས་གཟུགས་སོགས་ལ་ཆགས་པའི་འདོད་ཆགས་ཀྱིས་སེམས་ཅན་ཐམས་
ཅད་དགའ་བར་བྱེད་པའི་ཚུལ་གྱིས་འཁོར་བར་འཆིང་བ་ཉིད་སྦྱོང་བར་བྱེད་དོ། །ཞེ་སྡང་རྣམ་པར་དག་པ་མེ་ལོང་ལྟ་བུའི་ཡེ་ཤེས་ནི། མཆོད་པར་བྱ་བ་ཆེན་པོའོ། །ཡེ་ཤེས་དེས་ཞེ་སྡང་གི་དགྲ་འཇོམས་པས་ན་ཞེ་སྡང་ཆེ་བ་ཞེས་བྱ་ལ། དེའི་ཕྱིར་ཉོན་མོངས་པ་ཀུན་གྱི་དགྲ་ཆེ་བའང་ཡིན་ནོ། །གཏི་མུག་རྣམ་པར་དག
@007B པ་ཆོས་དབྱིངས་ཡེ་ཤེས་ནི། མཆོད་པར་བྱ་བ་ཆེན་པོའོ། །ཡེ་ཤེས་དེས་གཏི་མུག་འཇོམས་པར་བྱེད་པས་ན་གཏི་མུག་ཆེ་བ་ཡིན་ལ། དེའི་ཕྱིར་གཏི་མུག་འཇོམས་པའི་བློ་ཞེས་བྱ་སྟེ། ཉོན་མོངས་པ་གཏི་མུག་སེལ་བར་བྱེད་པའོ། །ཕྲག་དོག་རྣམ་པར་དག་པ་བྱ་བ་གྲུབ་པའི་ཡེ་ཤེས་དེ་ནི་མཆོད་པར་བྱ་བ་ཆེན་པོའོ། །ཡེ་ཤེས་དེས་
ཉོན་མོངས་པ་ཕྲག་དོག་འཇོམས་པའི་ཕྱིར་ན་ཁྲོ་བ་ཆེ་ཞེས་བྱ་ལ། དེ་ལྟ་བུའི་ཁྲོ་བ་ཆེན་པོའི་ཡེ་ཤེས་ནི། ཉོན་མོངས་པ་ཕྲག་དོག་གི་དགྲ་ཆེ་བའང་ཡིན་ནོ། །སེར་སྣ་རྣམ་པར་དག་པ་མཉམ་ཉིད་ཡེ་ཤེས་ནི། མཆོད་པར་བྱ་བ་ཆེན་པོའོ། །ཡེ་ཤེས་དེས། ཉོན་མོངས་པ་སེར་སྣའི་ཆགས་པ་ཐམས་ཅད་སེལ་བས་ན་ཆགས་
པ་ཆེ་བ་སྟེ། སེར་སྣའི་ཆགས་པ་ཐམས་ཅད་གཉེན་པོའི་སྟོབས་ཀྱིས་གཏན་ནས་སེལ་བར་བྱེད་པའི་ཕྱིར་རོ། །འདིར་ཡེ་ཤེས་ལྔ་ལ་སྦྱར་བ་ཡིན་ཀྱང༌། རིགས་ལྔ་ཉིད་ལའང་སྦྱར་རུང་སྟེ། རིམ་པ་བཞིན་དུ་སྣང་མཐའ། མི་བསྐྱོད་པ། རྣམ་སྣང༌། རིན་འབྱུང༌། དོན་གྲུབ་སྟེ་ལྡི?་ལ་སྦྱོར་རོ། །མཆོད་པ་ཆེན་པོའི་དོན་ནི་
བསྟེན་པ་དང་དགའ་བར་བྱེད་པ་ལའང་བཤད་དུ་ཡོད་དོ། །དེ་དག་ལ་འདོད་ཆགས་སོགས་ཀྱི་མིང་བཏགས་པ་ནི། དེ་དང་དེའི་རྣམ་དག་ལ་དགོངས་པ?། གཉེན་པོ་ལ་སྤང་བྱའི་མིང་གིས་བཏགས་པའོ། །རིགས་ལྔ་ཡང་འདིར་འཇམ་དཔལ་ཉིད་ལ་རིགས་ལྔར་ཕྱེ་བ་ཡིན་ནོ། །ལོངས་སྐུ་འཇམ་དཔལ་གྱིས་འདོད་པར་
བྱ་བ་ཆེན་པོ་གཉིས་སུ་མེད་པའི་ཡེ་ཤེས་ཀྱི་ངོ་བོ་བདེ་བ་ཆེན་པོའི་ཆེད་དུ་སེམས་ཅན་ལ་ཆོས་བསྟན་ནས་སེམས་ཅན་ཐམས་ཅད་དགའ་བར་བྱེད་པས་ན། དགའ་བ་ཆེན་པོ་ཡིན་ལ། དེས་ཡིད་མགུ་བར་བྱེད་པའི་ཕྱིར། མགུ་བ་ཆེན་པོའོ། །འགྲོ་བ་མ་ལུས་པ་འདུལ་བའི་ལུས་སྤྲུལ་པར་བྱེད་པའམ། ཐ་མལ་
པ་གཞན་གྱིས་སྤྱོད་ཡུལ་མ་ཡིན་པའི་གཟུགས་ཅན་ཡིན་པས་ན། གཟུགས་ཆེ་བ་དང༌། ཉོན་མོངས་ཀྱི་མ་བསྐྱེད་ཅིང་ཡེ་ཤེས་ཀྱི་བདག་ཉིད་ཅན་གྱི་ལུས་མངའ་བས་ན། ལུས་ཀྱང་ཆེ་བ་སྟེ། སྣ་ཚོགས་པའི་འོད་ཀྱི་ཁ་དོག་སྟོན་བས་ན་ཁ་དོག་ཆེ་ཞིང༌། སྐུའི་དབྱིབས་བོང་ཆེ་བས་ན་ལུས་བོང་ཆེ་བ་དང༌།
@008A ༄༅། །མཚན་སོ་གཉིས་དང་ལྡན་པས་སཾ། གྲགས་པ་ཆེ་བས་མིང་ཡང་ཆེ་ཞིང༌། ཚོགས་གཉིས་རྒྱ་ཆེ་བས་ན་རྒྱ་ཆེ་བ། རིགས་དྲུག་གི་དཀྱིལ་འཁོར་ལ་ཁྱབ་པས་ན། དཀྱིལ་འཁོར་ཆེན་པོ་ཡངས་པ་ཡིན་པ་དང༌། ཤེས་བྱ་ཐམས་ཅད་གཟིགས་པའི་ཤེས་རབ་ཀྱིས་རྨོངས་པའི་དགྲ་འཇོམས་པའི་ཕྱིར་ན་ཤེས་རབ་ཀྱི་མཚོན་
ཆ་ཆེན་པོ་འཆང་བ་སྟེ། གླང་པོ་ཆེ་ལྕགས་ཀྱུས་འདུལ་བ་ལྟར། ཤེས་རབ་དེ་འགྲོ་བའི་ཉོན་མོངས་པ་འདུལ་བའི་ལྕགས་ཀྱུ་ཆེ་བའི་མཆོག་དང༌། འཇིག་རྟེན་ཁྱབ་པར་བྱེད་པའི་གྲགས་པ་ཆེན་པོའི་སྙན་གྲགས་ཆེན་པོ་མངའ་བ་སྟེ། ཡེ་ཤེས་ཀྱི་སྣང་བ་ཆེན་པོ་ནི་ཆོས་ཐམས་ཅད་ལ་གསལ་བ་ཆེ་བ་ནི་མངོན་སུམ་དུ་གཟིགས་
པའོ༑ ༑གདུལ་བྱ་འདུལ་བའི་ཐབས་ལ་མཁས་པ་ཡིན་ཏེ། གང་ལ་གང་འཚམ་གྱིས་འདུལ་བས་ན་སྒྱུ་འཕྲུལ་ཆེན་པོ་འཆང་བའོ། །རྣམ་འཕྲུལ་གྱི་སྒྱུ་འཕྲུལ་ཆེན་པོ་དེ་ལྟ་བུའི་སྒོ་ནས་སེམས་ཅན་གྱི་དོན་གྲུབ་པར་བྱེད་པ་དང༌། སྒྱུ་འཕྲུལ་ཆེན་པོ་དེ་ལྟ་བུའི་སྒོ་ནས་ཀྱང་སེམས་ཅན་གྱི་དོན་བྱེད་པ་ལ་ཐུགས་དགའ་
བས་ཀྱང་ལྷག་པར་དགའ་ཞིང་ཐབས་སྣ་ཚོགས་པའི་སྒྱུ་འཕྲུལ་ཆེན་པོ་དེ་ལྟ་བུའི་སྒོ་ནས་གདུལ་བྱའི་བསམ་པ་བཞིན་དུ་འཆར་བས་ན་མིག་འཕྲུལ་ཅན་གྱི་སྤྲུལ་པའི་སྐུ་སྟོན་ཏོ། །ཟང་ཟིང་དང་ཆོས་ཀྱི་སྦྱིན་པ་སོགས་སེམས་ཅན་ལ་སྦྱིན་པས་ན། སྦྱིན་པ་དག་ཆེན་པོ་དང་དེ་ལྟར་སྦྱིན་པ་གཏོང་བ་གཞན་རྣམས་
ཀྱི་ཡང་མཆོག་ཡིན་པས་ན་གཙོ་བོ་སྟེ། སོ་ཐར་བྱང་སེམས་གསང་སྔགས་ཀྱི་ཚུལ་ཁྲིམས་ཆེན་པོ་འཆང་བའི་མཆོག་དང༌། སྡུག་བསྔལ་དང་ལེན་དང༌། གནོད་པ་ལ་ཇི་མི་སྙམ་པ་དང༌། ཆོས་ལ་དེས་ཐོབ་ཀྱི་བཟོད་པ་ཆེན་པོ་འཆང་བ་སྟེ་བརྟན་པར་བྱེད་པ་ནི་ནམ་ཡང་ཁྲོ་བ་མེད་པ་པོ་དང༌། སངས་རྒྱས་
མཆོད་ཅིང་སེམས་ཅན་ཐམས་ཅད་ཀྱི་དོན་བྱེད་པར་སྤྲོ་བའི་བརྩོན་འགྲུས་ཆེན་པོ་དང་ལྡན་ལ། དེར་འཇུག་པ་ལ་འབད་པས་ན་བརྟུལ་བ་ཡིན་ནོ། །ཟག་མེད་ཀྱི་བདེ་བའི་ཏིང་ངེ་འཛིན་དང༌། བདེ་སྟོང་དབྱེར་མེད་ཀྱི་ཏིང་ངེ་འཛིན་ལ་རྩེ་གཅིག་ཏུ་འཇུག་པས་ན། བསམ་གཏན་ཆེན་པོའི་ཏིང་ངེ་འཛིན་གྱི་རྒྱལ་
@008B པོ་ལ་གནས་ཤིང༌། ཇི་ལྟ་ཇི་སྙེད་ཀྱི་ཆོས་ཐམས་ཅད་གཟིགས་པའི་ཤེས་རབ་དང༌། སྟོང་པ་ཉིད་དང་དབྱེར་མི་ཕྱེད་པར་རོ་གཅིག་ཏུ་ཞུགས་པའི་བདེ་བ་ཆེན་པོའི་ཡེ་ཤེས་ཀྱི་ངོ་བོར་གྱུར་པའི་ཤེས་རབ་ཆེན་པོའི་ལུས་འཆང་བ་སྟེ། ཐུན་མོང་བ་དང་ཐུན་མོང་མ་ཡིན་པའི་ཕ་རོལ་ཏུ་ཕྱིན་པ་དྲུག་དང༌། ཕྱིའི་བདུད་སོགས་དང༌།
ནང་དུ་ཉོན་མོངས་པ་ཐམས་ཅད་ཐུབ་པས་ན་སྟོབས་པོ་ཆེ་སྟེ་སྟོབས་ཀྱི་ཕར་ཕྱིན་དང་ལྡན་ལ། ཐབས་སྣ་ཚོགས་ཀྱིས་གཞན་དོན་བྱེད་པས་ན་ཐབས་ཆེ་བའི་ཕར་ཕྱིན་དང༌། ཇི་ལྟར་སྨོན་པ་བཞིན་འགྲུབ་པའི་ཡེ་ཤེས་དང་ལྡན་པས་ན་སྨོན་ལམ་གྱི་ཕར་ཕྱིན་དང༌། ཆོས་ཀུན་གཟིགས་པའི་ཡེ་ཤེས་དང༌། གཉིས་སུ་
མེད་པའི་ཡེ་ཤེས་མང་པོའི་འབྱུང་གནས་སུ་གྱུར་པས་ན། ཡེ་ཤེས་རྒྱ་མཚོ་སྟེ་ཡེ་ཤེས་ཀྱི་ཕར་ཕྱིན་རྫོགས་ལ། མདོར་ན། ཐུན་མོང་བ་དང༌། ཐུན་མོང་མ་ཡིན་པའི་ཕར་ཕྱིན་བཅུ་ཡོངས་སུ་རྫོགས་པའོ། །འདི་དག་ཀྱང་འཇམ་དབྱངས་ཉིད་ལ་སྦྱར་བ་དང༌། དཀྱིལ་འཁོར་བའི་ལྷ་སོ་སོ་དང་སྦྱར་བའི་ཚུལ་གཉིས་
བཤད་དོ། །གཞན་ཡང་སེམས་ཅན་ཐམས་ཅད་བླ་མེད་ཀྱི་བདེ་བ་ལ་འགོད་པའི་བྱམས་པ་ཆེན་པོའི་རང་བཞིན་དཔག་ཏུ་མེད་པ་དང་ལྡན་ལ། དེ་དག་སྡུག་བསྔལ་ལས་སྐྱོབ་པར་བྱེད་པའི་སྙིང་རྗེ་ཆེན་པོ་དང་ལྡན་ཞིང༌། དེའི་སྒོ་ནས་སེམས་ཅན་ཐམས་ཅད་ཀྱི་དོན་སྒྲུབ་པར་བྱེད་པས་ན། དེ་བློ་ཡི་མཆོག་ཡིན་ལ།
ཆོས་རབ་ཏུ་རྣམ་པར་འབྱེད་པའི་ཤེས་རབ་ཆེན་པོ་མངའ་བ་དང༌། གདུལ་བྱ་འདུལ་བའི་ཐབས་ཤེས་པའི་བློ་གྲོས་ཆེན་པོ་དང་ལྡན་ཞིང༌། གང་ལ་གང་འདུལ་གྱི་ཐབས་མཁས་པ་ཆེན་པོ་དང་ལྡན་པས་ཐབས་ཆེ་བའོ། །གྲངས་མེད་པའི་སྤྲུལ་པ་བསྟན་ནས་སེམས་ཅན་འདུལ་བས་ན། རྫུ་འཕྲུལ་ཆེན་པོ་དང༌། ཞབས་ཀྱི་
མཐེ་བོང་གིས་ཀྱང་འཇིག་རྟེན་གྱི་ཁམས་བསྐྱོད་པར་ནུས་པས་ན། སྟོབས་དང་ལྡན་པ་དང༌། རྫུ་འཕྲུལ་གྱི་ཤུགས་ཆེན་པོས་འགྲོ་བ་ན་ཤུགས་ཆེན་པོ་དང༌། ལག་པ་བརྐྱངས་བསྐུམ་ཙམ་གྱི་རིང་ལ་གྲངས་མེད་པའི་འཇིག་རྟེན་གྱི་ཁམས་སུ་འགྲོ་བས་ན་མགྱོགས་པ་ཆེན་པོ་སྟེ་དང༌། གསུང་གི་རྫུ་འཕྲུལ་ཆེན་པོ་ཡན་
@009A ༄༅། །ལག་དྲུག་ཅུའི་དབྱངས་ཀྱི་སྒྲ་ཆེར་གྲགས་པ་དང༌། མཐུས་ཉན་ཐོས་དང་རང་སངས་རྒྱས་ཐམས་ཅད་ཟིལ་གྱིས་ནོན་པའི་ཕྱིར་སྟོབས་ཆེན་ཕ་རོལ་གནོན་པ་པོ་སྟེ་གྷེ??་ཀྱིས་སྲིད་པའི་རི་བོ་ཆེན་པོ་མ་རིག་པ་ནས་རྒ་ཤིའི་བར་འཇོམས་པར་བྱེད་པ་དང༌། སྟོང་པ་ཉིད་དང་དབྱེར་མེད་པའི་ཡེ་ཤེས་ཀྱི་རྡོ་རྗེ་དང༌།
ཆོས་ཀྱི་དབྱིངས་ཀྱི་སྐུ་དག་པ་གཉིས་ལྡན་ནི། མི་མཐུན་ཕྱོགས་ཀྱིས་ཕྱེད་པར་མི་ནུས་པས་ན་མཁྲེགས་པ། །སྲ་ཞིང་རྡོ་རྗེ་ཆེན་པོ་འཆང་བ་སྟེ། རྡོ་རྗེའི་དོན་ནི་མི་ཕྱེད་པའི་དོན་ཡིན་པའི་ཕྱིར་རོ། །ཕྱི་རུ་བདུད་དང་འབྱུང་པོ་སོགས་དང༌། ནང་དུ་ཉོན་མོངས་པ་འདུལ་བའི་ཕྱིར་དྲག་པོ་ཆེན་པོ་དང༌། ཕྱི་རུ་འཇིགས་
པའི་གཟུགས་ཅན་དྲག་པོ་སྟོན་པ་དང༌། ནང་དུ་ཡེ་ཤེས་ཀྱི་ནུས་པ་ཤུགས་དྲག་པོས་བདུད་དང་ཉོན་མོངས་ཐམས་ཅད་འཇོམས་པའི་ཕྱིར་དྲག་ཤུལ་ཆེ་ཞིང༌། ཕྱི་ནང་གི་འཇིགས་ཆེན་དེ་དག་འཇིགས་པ་སྟེ་འཇོམས་པར་བྱེད་པ་པོ་ཡིན་པའོ། །སེམས་ཅན་ཐམས་ཅད་ཀྱི་མགོན་སྐྱབས་སུ་གྱུར་པའི་ཕྱིར་ན།
མགོན་པོ་ཡིན་ལ། གསང་སྔགས་དང་རིག་སྔགས་ཀྱི་ལྷ་གཞན་རྣམས་ཀྱི་མཆོག་ཡིན་པའི་ཕྱིར་ན། རིགས་མཆོག་ཆེན་པོ་སྟེ་དང༌། འགྲོ་བ་ལ་ཆོས་སྟོན་པའི་ཕྱིར་འདིར་བླ་མ་ཞེས་བྱ་བའམ། ཡང་ན། རྒྱུད་སྡེ་འོག་མ་ལས་གོང་དུ་གྱུར་བའི་སྔགས་ཀྱི་ལམ་སྟོན་པས་ན་བླ་མ་གསང་སྔགས་ཆེ་བའི་མཆོག
གོ །གསང་སྔགས་ཀྱི་ཐེག་པ་ཆེན་པོའི་ཚུལ་ལ་གནས་ཤིང༌། ཁྱད་པར་བླ་མེད་ཀྱི་ཐེག་པ་ཆེན་པོའི་ཚུལ་གྱི་མཆོག་ལ་གནས་པའོ། །གཉིས་པ་ནི། གོང་དུ་བརྗོད་པ་དེ་རྣམས་ཀྱིས་དཀྱིལ་འཁོར་བའི་ལྷ་སྟོན་ཚུལ་གྱི་དབང་དུ་བྱས་ནས་མདོར་བསྡུས་བརྗོད་པར་བྱ་སྟེ། དེ་ཡང༌། འདི་ལྟར་སངས་རྒྱས་
བཅོམ་ལྡན་འདས། །ཞེས་སོགས་ཀྱི་རྐང་པ་བཞིས། དཀྱིལ་འཁོར་གྱི་གཙོ་བོ་འཇམ་དཔལ་རྡོ་རྗེ་སེམས་དཔའ་ཡབ་ཡུམ་སྐྱེད་ཚུལ་དང༌། མཆོད་པ་ཆེན་པོ་འདོད་ཆགས་ཆེ་སོགས་ཀྱིས་སྔར་བཤད་པ་ལྟར་རིགས་ལྔ་པོ་བསྟན། ཁོང་ནས་འབྱུང་བ་སྐྱེ་བ་མེད་ཅེས་སོགས་རྐང་པ་བཞིས་ཡུམ་
@009B བཞི༑ དེ་ནས་འདོད་པ་ཆེན་པོ་འདེ་བ་ཆེ།། ཞེས་སོགས་རྐང་པ་གཉིས་ཀྱིས། རྡོ་རྗེ་སེམས་དཔའ། རྡོ་རྗེ་རྒྱལ་པོ། རྡོ་རྗེ་ལེགས་པ། རྡོ་རྗེ་ཆགས་པ་སྟེ་བཞི། གཟུགས་ཆེ་ལུས་ཀྱང་ཆེ་བ་སྟེ། །ཞེས་སོགས་རྐང་པ་བཞིས་རྡོ་རྗེ་རིན་ཆེན། རྡོ་རྗེ་ཉི་མ། རྡོ་རྗེ་རྒྱལ་མཚན།
རྡོ་བཟད་པ་བཞི་ཤེས་རབ་མཚོན་ཆ་ཆེན་པོ་འཆང༌། །ཞེས་སོགས་རྐང་པ་བཞིས་རྡོ་རྗེ་ཆོས། རྣོན་པོ། །རྒྱུ། སྨྲ་བ་བཞི། མཁས་པ་སྒྱུ་འཕྲུལ་ཆེན་པོ་འཆང༌། །ཞེས་སོགས་རྐང་པ་བཞིས། རྡོ་རྗེ་ལས། སྲུང་བ། གནོད་སྦྱིན། ཁུ་ཚུར་བཞི་སྟེ། དེ་དག་གིས་སེམས་དཔའ་བཅུ་དྲུག།
བསྟན། སྦྱིན་བདག་ཆེན་པོ་སོགས་རྐང་པ་འགས་སྒེག་སོགས་ལྷ་མོ་བརྒྱད་དང༌། རྫུ་འཕྲུལ་ཆེན་པོ་སྟོབས་དང་ལྡན། །ཞེས་སོགས་ལྷག་མས་གཤིན་རྗེ་གཤེད་སོགས་ཁྲོ་བོ་བཅུ་བསྟན་པ་ནི། སྒྱུ་འཕྲུལ་དྲ་བ་ཞེ་གསུམ་མ་དང༌། ཐེག་པ་ཆེན་པོའི་ཚུལ་ལ་གནས། །ཞེས་སོགས་རྐང་པ་
གཉིས་ཀྱིས། ཡང་རྡོར་སེམས་ཡབ་ཡུམ་བསྟན་པ་ནི་ཞེ་ལྔ་མ། བྱམས་ཆེན་རང་བཞིན་དཔག་ཏུ་མེད། །ཞེས་སོགས་རྐང་པ་བཞིས་ལྕགས་ཀྱུ་མ་སོགས་སྒོ་བ་བཞི་བསྟན་པ་ནི་ལྷ་ཞེ་དགུ་མའོ། །གཞུང་འདི་དག་ནི། །དུས་འཁོར་དང༌། བླ་མེད་སྤྱིའི་ལུགས་ཀྱང་ཡིན་ལ། རྣལ་འབྱོར་རྒྱུད་དུ་
བཀྲལ་བ་ཕལ་ཆེར་ན་ལྷའི་དབྱེ་བ་གསལ་བར་མི་སྣང་ཞིང༌། འདིའི་ལྷ་རྣམས་ལ་ཞལ་གསུམ་ཕྱག་དྲུག་པར་བཞེད་པ་སོགས་མི་འདྲ་བ་འགའ་རེ་སྣང་ཡང༌། དེ་དག་ནི་འདིའི་དོན་ཡིན་པར་མི་འགལ་བའི་ཚུལ་ནི་བརྗོད་ཟིན་ཏོ། །ཞེས་བྱ་བ་ནི་ལེའུ་ལྔ་པའི་བཤད་པའོ། །གཉིས་པ་ལ་
ལྔ། ཆོས་དབྱིངས་ཡེ་ཤེས། མེ་ལོང་ལྟ་བུ། སོར་རྟོགས་ཡེ་ཤེས། མཉམ་ཉིད་ཡེ་ཤེས། བྱ་གྲུབ་ཡེ་ཤེས་ཀྱི་ལེའུ་བཤད་པའོ། །དང་པོ་ནི། སངས་རྒྱས་རྣམ་པར་སྣང་མཛད་ཆེ། །ནས་རྡོ་རྗེ་ལྕགས་ཀྱུ་ཞགས་པ་ཆེ། །ཞེས་སོ། །དེ་ཡང༌། རིགས་ལྔའི་ནང་ནས་སངས་རྒྱས་རྣམ་པར་སྣང་མཛད་ཆེན་པོ་ནི་སྐུའི་
@010A ༄༅། །རིགས་ཡིན་ལ། ངེས་མི་མཐུན་པའི་ཕྱོགས་ཐམས་ཅད་ཐུབ་པས་ན། ཐུབ་པ་ཆེན་པོ་ཞེས་བྱ་ལ། ལྷ་མིའི་དྲང་སྲོང་གཞན་ལས་མཆོག་ཡིན་པའི་ཕྱིར། ཐུབ་ཆེན་ལྡན་པའམ། ཡང་ན་སྒོ་གསུམ་དུས་རྟག་ཏུ་མཉམ་པར་བཞག་པས་ན་འདི་སྐད་ཅེས་བྱའོ། །གསང་སྔགས་ཀྱི་ཚུལ་ཆེན་པོའི་
ལམ་བསྒོམས་པ་ལས་བྱུང་བ་ཡིན་ལ། དེར་མ་ཟད། ད་ལྟ་ནི་འབྲས་བུ་གསང་སྔགས་ཀྱི་ཚུལ་ཆེན་པོའི་བདག་ཉིད་ཅན་གྱི་ཡེ་ཤེས་ཐོབ་པ་གནས་སོ། །འདིའི་རྣམ་སྣང་ནི་ཤཱཀྱ་ཐུབ་པའི་ངོ་བོ་རྣམ་སྣང་དེ་ལ་བཤད་པ་དང༌། འཇམ་དབྱངས་ལ་རིགས་ལྔར་ཕྱེ་བའི་རྣམ་སྣང་ལ་བཤད་པ་གཉིས་དང༌།
དེ་གཉིས་ངོ་བོ་གཅིག་ཏུ་བཤད་པ་ལྟ་བུར་ཡང་སྣང་བ་ལས། གཉིས་པའི་དབང་དུ་བྱས་ཚེ་འཇམ་དཔལ་ཉིད་ཀྱིས་སྔར་ནས་ཀྱང༌། ཐུན་མོང་དང་ཐུན་མོང་མ་ཡིན་པའི་སྦྱིན་པ་ནས། སྨོན་ལམ་གྱི་ཕར་ཕྱིན་གྱི་བར་སྔར་བཤད་པ་ལྟར་ཕ་རོལ་ཏུ་ཕྱིན་པ་བཅུ་པོ་ཐོབ་པ་སྟེ། དེར་མ་ཟད། ད་ལྟ་ཡང་འབྲས་
བུའི་ཕ་རོལ་ཏུ་ཕྱིན་པ་བཅུ་ལ་གནས་ཤིང༌། རྒྱུ་དང་འབྲས་བུའི་ཕ་རོལ་ཏུ་ཕྱིན་པ་བཅུ་ནི་སྐྱོན་གྱིས་མ་གོས་པས་ན་དག་བ་སྟེ། ཕ་རོལ་ཏུ་ཕྱིན་པ་བཅུའི་ཚུལ་ལ་རང་ཉིད་གནས་ཤིང༌། སེམས་ཅན་གཞན་ཀྱང་ཚུལ་དེ་ལ་འགོད་དོ། །མགོན་པོ་ཁྱོད་ནི། ས་དང་པོ་རབ་ཏུ་དགའ་བ་ནས། བཅུ་པ་ཆོས་ཀྱི་
སྤྲིན་གྱི་བར་རྫོགས་པའི་ཕྱིར། ས་བཅུའི་དབང་ཕྱུག་ཞེས་བྱ་སྟེ། ས་བཅུ་མཐར་ཕྱིན་པའི་ས་ལ་ནི་གནས་པ་པོ་ཡིན་ནོ། །སྡུག་བསྔལ། ཀུན་འབྱུང༌། འགོག་པ། ལམ། ཟད་པ། མི་སྐྱེ་བ། ཆོས། རྗེས་སུ། ཀུན་རྫོབ། གཞན་གྱི་སེམས་ཏེ་དེར?་ལ་ཤེས་པ་སྦྱར་བའི་ཤེས་པ་བཅུ་རྣམ་པར་དག་པའི་
བདག་ཉིད་ཅན་ཡིན་ལ། ཤེས་པ་བཅུ་རྣམ་པར་དག་པ་ཐུགས་རྒྱུད་ལ་འཆང་བ་པོ་སྟེ། སྡུག་བསྔལ་བདེན་པ་ཇི་ལྟ་བ་བཞིན་དུ་ཤེས་ནས། གཞན་གྱི་སེམས་ཇི་ལྟ་བ་བཞིན་དུ་ཤེས་པའི་ཡེ་ཤེས་དང་ལྡན་པའོ། །རྣམ་པ་བཅུ་པོ་ཞེས་དང་དོན་བཅུའི་དོན་ཞེས་པ་ལ་དོན་མི་འདྲ་བ་བཤད་པ་འགའ་
@010B རེ་སྣང་ཡང༌། ཕུང་པོ་ལྔ་དང༌། ཉོན་མོངས་ལྔ་སྟེ་བཅུ་ནི་རྣམ་པ་བཅུའམ། ཕུང་པོ་ལྔ་དག་པས་རིགས་ལྔ་དང༌། ཉོན་མོངས་ལྔ་དག་པས་ཡེ་ཤེས་ལྔ་སྟེ་བཅུ་ལ་དོན་བཅུའི་དོན་ཞེས་བྱ་བར་བཤད་པ་ལྟར་རམ། ཡང་ན། སློབ་པའི་སྐབས་ཀྱི་སྟོབས་རྣམ་པ་བཅུ་པོ་གོམས་པས་དོན་བཅུའི་འབྲས་བུ་ཐོབ་སྟེ། དེ་ཡང་
སངས་རྒྱས་ཀྱི་གོ་འཕང་དོན་ཆེན་པོ་ཐུབ་དབང་གི་གནས་དང་གནས་མ་ཡིན་པ་མཁྱེན་པའི་སྟོབས་ནས། ཟག་པ་ཟད་པ་མཁྱེན་པའི་སྟོབས་ཀྱི་བར་སྟོབས་བཅུ་མངའ་བ་དང༌། ཐུགས་སེམས་ལ་ཁྱབ་པའི་བདག་ཉིད་ཅན་ནམ། ཡང་ན། རྗེ་བཙུན་གྱི་རྒྱུད་ལ་སྟོབས་སོགས་ཡོན་ཏན་གྱིས་ཁྱབ་པར་བཤད་པ་
ལྟར་རོ། །སྟོབས་བཅུ་འདི་ཡང་ཐུན་མོང་བའི་སྟོབས་བརྗོད་པ་བཞིན་དང༌། ཡང༌། བསམ་པའི་སྟོབས་ནས། ཆོས་ཀྱི་འཁོར་ལོ་བསྐོར་བའི་སྟོབས་ཀྱི་བར་བཅུ་དྲི་མེད་འོད་ལས་བཤད་དེ། དེ་འདྲའི་སྟོབས་དེས་སེམས་ཅན་ཀུན་གྱི་དོན་ནི་མ་ལུས་པ་བྱེད་པ་ཡིན་ནོ། །རྣམ་བཅུ་དབང་ལྡན་ཤེས་
པ་ལ་མཚོན་བྱེད་དང་མཚོན་དོན་གཉིས། །དང་པོ་ནི། ཧ་ཀྵ་མ་ལ་ཝ་ར་ཡཾ་སྟེ་ཡི་གེ་བདུན་དང༌། ཟླ་ཚེས་ཐིག་ལེ་དང་བཅས་པ་དང༌། ནཱ་ད་དང༌། ཡི་གེ་ཐམས་ཅད་ཀྱི་སྲོག་གི་ཨ་ཡིག་སྟེ་བཅུ་ལ་རྣམ་བཅུ་དང་ལྡན་ཞེས་བྱ་ལ། དུས་འཁོར་ལྟར་ན། དེ་དག་གིས་མང་དུ་མཚོན་པར་བྱེད་དོ། །མཚོན་
དོན་གྱི་དབང་བཅུ་ཐུན་མོང་བ་ནི། ཚེ་ལ་དབང་བ་དང༌། དེ་བཞིན་དུ། ལས་དང༌། ཡོ་བྱད་དང༌། མོས་པ་དང༌། སྨོན་ལམ་དང༌། རྫུ་འཕྲུལ་དང༌། སྐྱེ་བ་དང༌། ཆོས་དང༌། སེམས་དང༌། ཡེ་ཤེས་ལ་དབང་བ་སྟེ་བཅུ་དང་ལྡན་ན། རྣམ་པ་བཅུའི་དབང་དང་ལྡན་པའི་ཆེ་བ་པོ་སྟེ་ཆེན་པོའོ། །གློ་
བུར་དུ་བྱུང་བ་མ་ཡིན་པར་ཐོག་མ་མེད་པ་ནས་རང་བཞིན་གྱིས་གྲུབ་པའི་སྤྲོས་པ་མེད་པའི་བདག་ཉིད་དུ་གནས་པའི་དེ་བཞིན་ཉིད་དང་དབྱེར་མི་ཕྱེད་པའི་བདག་ཉིད་ཅན་གྱི་ཡེ་ཤེས་སྒྲིབ་གཉིས་རྣམ་པར་དག་པའི་བདག་ཉིད་ལས་མི་གཡོ་བར་ཆུ་ལ་ཆུ་བཞག་པ་ལྟར་མཉམ་པར་བཞག་གོ །དེ་ལྟ་ནའང་
@011A ༄༅། །གཞན་གྱི་དོན་དུ་མི་འཇུག་པ་མིན་ཏེ། གཞན་ལ་རྫུན་མེད་པའི་བདེན་པར་སྨྲ་ཞིང་ཚིག་གཞན་དུ་མི་འགྱུར་བ་ཡིན་ལ། སེམས་ཅན་གྱི་དོན་བྱེད་པར་དམ་བཅས་པ་ཇི་སྐད་སྨྲས་བདེ་བཞིན་དུ་བྱེད་ཅིང༌། གཟུང་འཛིན་གྱི་ཆོས་གཉིས་རང་གཞིན་གྱིས་མེད་པ་དེ་ནི། གཞན་ལ་གཉིས་སུ་མེད་པའི་ཚུལ་དེ་
ལྟར་སྟོན་པར་བྱེད་དོ། །སྔར་བཤད་པ་དེ་དག་གིས་དབང་བསྐུར་ཚུལ་དང༌། སློབ་མའི་རྣམ་གཞག་ཀྱང་བསྟན་པར་བཞེད་པའང་ཡོད་དོ། །རང་ཉིད་ཡང་དག་པའི་མཐའ་དེ་བཞིན་ཉིད་ལ་རྣམ་པར་གནས་ནས་སེམས་ཅན་གཞན་ཆོས་ཐམས་ཅད་གང་ཟག་དང་ཆོས་ཀྱི་བདག་མེད་པར་སྟོན་པའི་སེང་གེའི་
སྒྲ་སྒྲོགས་པ་དང་ལྡན་པའི་ཕྱིར། བདག་ཏུ་སྨྲ་བའི་མུ་སྟེགས་བྱེད་ཀྱི་རི་དྭགས་ངན་པའི་ཚོགས་རྣམས་འཇིག་པར་བྱེད་དོ། །འདི་ནི་གཟུགས་ཅན་གྱི་རྒྱན་ཏེ། འཇམ་དཔལ་དང༌། སེང་གེ་དེའི་གསུང་དང་སེངྒེའི་སྒྲ། མུ་སྟེགས་ངན་པ་དང༌། རི་དྭགས་གཉིས་སྦྱར། སེངྒེའི་སྒྲས་རི་དྭགས་སྐྲག་པར་བྱེད་པ་
བཞིན་དུ། རྗེ་བཙུན་གྱི་བདག་མེད་སྟོན་པའི་གསུང་གིས། བདག་སྨྲའི་མུ་སྟེགས་ཀྱི་རིགས་རྣམས་སྐྲག་པར་བྱེད་པར་བསྟན་ཏོ། །སངས་རྒྱས་ཀྱི་ཞིང་ཀུན་དུ་འགྲོ་བའི་ཚུལ་གྱིས་སེམས་ཅན་གྱི་དོན་སྒྲུབ་པར་བྱེད་པའི་ཕྱིར་དོན་ཡོད་པའི་སྟོབས་དང་ལྡན་ལ། དེའི་ཚེ་མགྱོགས་ཚུལ་ནི། དེ་བཞིན་གཤེགས་
པའི་ཡིད་ལྟར་སྐད་ཅིག་གཅིག་ལ་ཞིང་དེ་དང་དེ་དག་ཏུ་སླེབ་པའི་མགྱོགས་པ་སྟེ་མྱུར་རོ། །གང་ལས་རྒྱལ་བ་ཡིན་ན་ཉོན་མོངས་པ་དང་སྡིག་པའི་ཆོས་ལས་རྣམ་པར་རྒྱལ་ཞིང༌། ཕ་རོལ་གྱི་སྨྲ་བ་ངན་པའི་དགྲ་ལས་རྒྱལ་བའོ། །ཁམས་གསུམ་གྱི་ཆོས་ཀྱི་རྒྱལ་སྲིད་ལ་དབང་བསྒྱུར་བའི་ཕྱིར་ན། འཁོར་ལོ་སྒྱུར་བ་དང༌། གཞན་
གྱི་དཔུང་འཇོམས་པས་ན་སྟོབས་པོ་ཆེ་ཞེས་བྱའོ། །ཉན་ཐོས་ཀྱི་ཚོགས་ཀྱི་སློབ་དཔོན་མཛད་ཅིང༌། རང་རྒྱལ་གྱི་ཚོགས་རྣམས་ཀྱི་མཆོག་ཡིན་ལ། བྱང་ཆུབ་སེམས་དཔའི་ཚོགས་རྣམས་ཀྱི་རྗེ་བོ་སྟེ་དཔོན་དང༌། དེ་བཞིན་གཤེགས་པའི་ཚོགས་ཀྱི་བདག་པོ་སྟེ། མདོར་ན། རྗེ་བཙུན་ནི། རིགས་དང་དཀྱིལ་འཁོར་གྱི་བདག་པོ་
@011B ཉིད་དུ་བསྟན་པའོ། །དེ་རྣམས་ལ་ཡོན་ཏན་གྱི་དབང་སྒྱུར་བས་དབང་དང་ལྡན་ལ། དེ་ཉིད་གྱི་ཕྱིར་ན་མཐུ་ཆེན་པོ་ཞེས་ཀྱང་བྱའོ། །མཐུ་དེ་ཡང་ཡེ་ཤེས་ཀྱི་སྟོབས་ཡིན་པས་ཡེ་ཤེས་དེ་རང་གིས་གཅེས་པར་འཛིན་ཞེས་ཀྱང་བཤད་ལ། ཆོས་དང་རྗེ་བཙུན་ཉིད་སངས་རྒྱས་བྱང་སེམས་ཀྱིས་གཅེས་པར་འཛིན་པའི་ཕྱིར་
གཅེས་པར་འཛིན་པ་སྟེ་ཞེས་བཤད། ཐེག་པ་ཆེན་པོའི་སྔགས་ཀྱི་ཚུལ་མཐར་ཐུག་པ་ཆེན་པོ་ལ་གནས་པས་ན་གཞན་གྱི་དྲིང་མི་འཇོག་སྟེ། ཉན་རང་བྱང་སེམས་སོགས་སློབ་དཔོན་གཞན་ལ་བལྟོས་པ་མེད་པའི་ཕྱིར་རོ། གསུང་གི་ཡོན་ཏན་གྱི་ཁྱད་པར་ལ་དོན་སོ་སོ་ཡང་དག་པ་རིག་པ་ཉིད་ཐོབ་པས་ན། ཚིག་གི་རྗེ་དང༌། ཆོས་
སོ་སོ་ཡང་དག་རིག་པ་ཐོབ་པས་ན། ཚིག་གི་བདག་པོ་དང༌། ངེས་པའི་ཚིག་སོ་སོ་ཡང་དག་རིག་པས་ནི་སྨྲ་མཁས་པ་དང༌། སྤོབས་པ་སོ་སོ་ཡང་དག་རིག་པས་ནི་ཚིག་ལ་དབང་བའོ། །སྐད་སྣ་ཚོགས་ཀྱིས་ཆོས་སྟོན་པའི་ཕྱིར་ན། ཚིག་མཐའ་ཡས་པའོ། །དོན་མི་སླུ་བར་སྟོན་པས་ན་ཚིག་བདེན་ཞིང༌། སྔ་
ཕྱི་མི་འགལ་བར་དོན་དང་མཐུན་པར་སྟོན་པས་ན་བདེན་པར་སྨྲ་བ་སྟེ། སྡུག་བསྔལ་བདེན་པ། ཀུན་འབྱུང༌། ལམ། འགོག་བདེན་ཏེ། འཕགས་པའི་བདེན་པ་བཞི་ནི་གདུལ་བྱ་ལ་སྟོན་པ་པོའོ། །དེ་དག་ནི་སྒྲ་ཇི་བཞིན་པའི་དབང་དུ་བྱས་ལ། འདི་དག་གིས་སྦས་དོན་ལ་དབང་བསྐུར་བའི་སློབ་དཔོན་གྱི་དབྱེ་བ་བསྟན་
པའི་ཚུལ་ཡང་ཡོད་དོ། །ཐེག་པ་དམན་པའི་ལམ་དུ་ལྡོག་མི་སྲིད་པས་ན། ཕྱིར་མི་ལྡོག་པ་སྟེ། དེ་ཡང་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་དོན་ནོ། །ལས་ཉོན་མོངས་གྱི་དབང་གིས་འཁོར་བར་མི་འོང་བས་ན་ཕྱིར་མི་འོང་བའོ། །གདུལ་བྱ་འདུལ་བའི་ཕྱིར་དུ་འདྲེན་པར་རང་རྒྱལ་ཚོགས་ན་གནས་པ་དང༌། གཅིག་པུར་
གནས་པ་བསེ་རུ་ལྟ་བུའི་ཚུལ་དུ་སྤྲུལ་པར་མཛད་ལ། ཡང་ན། རང་རྒྱལ་དེ་དག་གི་རིགས་ཅན་ལ་ཆོས་བསྟན་ནས། རང་རྒྱལ་དགྲ་བཅོམ་པའི་གོ་འཕང་འཐོབ་པར་བཤད་པ་ལྟར་རོ། །གདུལ་བྱའི་རིགས་སྣ་ཚོགས་པ་རང་རང་གི་རིགས་དང༌། མཐུན་པར་འཁོར་བ་ལས་ངེས་པར་འབྱུང་བའི་ཐབས་སྣ་ཚོགས་པ་བསྟན་ནས།
@012A ༄༅། །དེ་ཡང་ངེས་པར་འབྱུང་བའི་ཐར་པ་ལ་འགོད་པར་མཛད་དོ། །གོ་འཕང་དེར་འབྱུང་བའི་ཐབས་ཆེན་པོ་རྒྱུ་གཅིག་པུ་ནི་དགེ་བའི་ལས་ཁོ་ནའོ། །འདིར་འབྱུང་བ་ཆེན་པོ་ནི་རྒྱ་འགྲེལ་ཁ་ཅིག་ཏུ་འབྱུང་བཞིར་བཤད་པ་ཡང་སྣང་ལ། འོན་ཀྱང་འགྱུར་བ་ཆེན་པོ་ཞེས་འབྱུང་བ་ནི། མ་དག
པར་གསལ་སྟེ་འགྲེལ་པ་རྣམས་སུ་འབྱུང་བའི་དོན་དུ་བཤད་པས་སོ། །ཉོན་མོངས་དང་བྲལ་བས་ན། དོན་དམ་པའི་དགེ་སློང་ཞེས་བྱ་ལ། ཉོན་མོངས་ཅན་དང་ཉོན་མོངས་ཅན་མ་ཡིན་པའི་ཟག་པ་ཐམས་ཅད་སྤངས་པའི་ཕྱིར་ན་དགྲ་བཅོམ་པ་ཟག་པ་ཟད་པ་དང༌། འདོད་པའི་ཡུལ་ལྔ་ལ་འདོད་
ཆགས་དང་བྲལ་བའི་ཕྱིར། འདོད་པའི་ཡུལ་གཟུགས་སོགས་ལ་ཆགས་པས་འཇུག་པ་མེད་པས་མིག་སོགས་ཀྱི་དབང་པོ་ལྔ་ཐུལ་བ་ཡིན་ཏེ། དཔེར་ན། རྟ་རྒོད་བཏུལ་བ་བཞིན་ནོ། །མཐར་ཐུག་གི་ཟག་མེད་ཀྱི་བདེ་བ་དམ་པ་རྙེད་པས་བདུད་བཞི་ལ་འཇིགས་པ་མེད་པའི་གནས་ཐོབ་པའོ།།
ཉོན་མོངས་པའི་ཚ་གདུང་སྤངས་པས་ན་བསིལ་བར་གྱུར་པ་དང༌། གློ་བུར་གྱི་དྲི་མས་མ་གོས་པས་རྙོག་པ་མེད་པའོ། །འདི་དག་གི་སྦས་དོན་ལ་རྡོ་རྗེ་སློབ་དཔོན་གྱིས་ཆོས་སྟོན་ཚུལ་དང༌། དེའི་ཡོན་ཏན་བསྟན་པ་ལ་སྦྱར་བ་ཞིག་ཀྱང་སྣང་ངོ། །རྗེ་བཙུན་གྱིས་གཞན་གྱི་སེམས་ཤེས་པ་དང༌། སྔོན་
གྱི་གནས་དྲན་པ་དང༌། ཟག་པ་ཟད་པ་སྟེ་ཤེས་པའི་རིག་པ་དང་ནི། རྫུ་འཕྲུལ་གྱི་རྐང་པར་ལྡན་ལ། མཐར་ཐུག་གི་བདེ་བ་དམ་པར་གཤེགས་པས་བདེ་བར་གཤེགས་པ། སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་མཁྱེན་ནས་ཆོས་སྟོན་པས་འཇིག་རྟེན་རིག་པ་སྟེ་མཁྱེན་པའི་གཙོ་བོ་དམ་པའི།
མཆོག་གོ །མིག་སྣ་སོགས་བདག་གི་བ་ལ་དམིགས་ནས་བདག་གི་བར་རང་བཞིན་གྱི་གྲུབ་པར་མི་འཛིན་ལ། བདག་ལ་དམིགས་ནས་བདག་གམ་རང་རང་ངོས་ནས་གྲུབ་པར་ཡང་མི་འཛིན་ཞིང༌། ཀུན་རྫོབ་ཀྱི་སྣང་བ་རྣམས་སྒྱུ་མ་ལྟ་བུ་དང༌། དེ་དག་རང་བཞིན་གྱིས་མེད་པའི་དོན་དམ་པ་སྟེ། བདེན་པ་དེ་གཉིས་ཀྱི་
@012B ཚུལ་ཤེས་པ་ལ་གནས་པའོ། །ཤེས་རབ་ཀྱི་སྟོབས་ཀྱིས་འཁོར་བའི་རྒྱ་མཚོའི??་གྱི་མཐར་སོན་པ་སྟེ་ཕྱིན་པ། དེ་ཡང་ལྟ་བ་དང་སྤྱོད་པས་ལམ་གྱི་བྱ་བ་ཐམས་ཅད་བྱས་པ་ལས་སྒྲིབ་གཉིས་ཀྱི་རླན་གཤེད་བསྐམས་པའི་སངས་རྒྱས་ཀྱི་སར་གནས་སོ། ཡང་ན། བྱ་བ་བྱས་པ་ནི་སེམས་ཅན་གྱི་དོན་བྱས་པའོ་ཞེས་འཆད་པ་
ལྟར་རོ། །དེ་ཁོ་ན་ཉིད་ད་ལ་རྟག་ཏུ་མཉམ་པར་བཞག་པའི་ཤེས་པ་འབའ་ཞིག་ཞེས་པར་གསལ་བ་སྟེ། དེས་དེ་ཁོ་ན་ཉིད་མངོན་སུམ་དུ་རྟོགས་པའི་ཕྱིར་རོ། །ཡང་ན་སངས་རྒྱས་ཀྱི་སར་རྟེན་བརྟེན་པའི་དངོས་པོ་རྣམས་ཡེ་ཤེས་ཀྱི་བདག་ཉིད་འབའ་ཞིག་ཏུ་སྣང་བའི་དོན་ཏེ། བཤད་པ་མི་འདྲ་བ་མང་ངོ། །ཤེས་རབ་མཚོན་ཆ་ལྟ་
བུས་གདུལ་བྱའི་མི་མཐུན་ཕྱོགས་ཐམས་ཅད་རྣམ་པར་འཇོམས་པར་བྱེད་ལ། ལུང་དང་རྟོགས་པའི་དམ་ཆོས་རྣམས་ལ་དབང་བསྒྱུར་བས་ན་ཆོས་ཀྱི་རྒྱལ་པོ་སྟེ། དེས་ཆོས་ཀྱིས་སེམས་ཅན་རྣམས་ཀྱི་མ་རིག་པའི་མུན་པ་བསལ་ནས་གནས་པས་གསལ་བར་ལྡན་པའམ། ཡང་ན། ཆོས་དེ་དག་རྗེ་བཙུན་གྱི་ཐུགས་ལ་
གསལ་བར་ལྡན་པའོ་ཞེས་བཤད་པ་ལྟར་རམ། ཡང༌། དམ་ཆོས་ནི་ལུང་དང༌། ཆོས་རྒྱལ་ནི་རྟོགས་པའི་དམ་ཆོས་སོ། །དམ་ཆོས་དེས་འཇིག་རྟེན་སེམས་ཅན་གྱི་མ་རིག་པའི་མུན་པ་བསལ་ནས་ཡེ་ཤེས་ཉིད་སྣང་བར་བྱེད་པའི་མཆོག་གོ །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལ་དབང་བསྒྱུར་བས་ན་ཆོས་ཀྱི་དབང་ཕྱུག
དང༌། འཁོར་ལ་ཆོས་དེ་རྣམས་རང་དབང་གི་སྟོན་པས་ན་ཆོས་ཀྱི་རྒྱལ་པོ་དང༌། ལེགས་པ་ཐར་པ་དང་སངས་རྒྱས་ཀྱི་ཆོས་གཟུགས་ཀྱི་སྐུ་སྟེ། དེ་ཐོབ་བྱེད་ཀྱི་ཐབས་དང་རྗེས་སུ་མཐུན་པའི་ལམ་ནི་སྟོན་པ་པོའོ། །དེ་ལྟར་བསྟན་པས་གདུལ་བྱའི་འདོད་པའི་དོན་ཐམས་ཅད་གྲུབ་པར་བྱས་པས་གདུལ་བྱའམ་རྗེ་བཙུན་རང་
ཉིད་ཀྱི་བསམ་པ་གྲུབ་པ་སྟེ། སྔོན་སྨོན་ལམ་དེ་ལྟར་བཏབ་པ་བཞིན་འགྲུབ་པའི་ཕྱིར་རོ། །བདག་གཉིས་སུ་མཚན་མར་འཛིན་པའི་ཀུན་ཏུ་རྟོག་པ་ཐམས་ཅད་སྤངས་པའི་ཆོས་ཀྱི་སྐུ་ཐོབ་ཅིང༌། ཆོས་སྐུ་དེ་ནི་གཉིས་སྣང་གི་རྟོག་པ་ཐམས་ཅད་དང་བྲལ་བས་རྣམ་པར་མི་རྟོག་པའི་རང་བཞིན་ཅན་དག་པ་གཉིས་ལྡན་
@013A ༄༅། །གྱི་ཆོས་དབྱིངས་མི་ཟད་པ་ཡིན་པའི་ཕྱིར། ཆོས་ཀྱི་དབྱིངས་དམ་པ་ཟད་མི་ཤེས་ཞེས་བྱ་སྟེ། ཟད་པ་དང་འཇིག་པ་མེད་པའི་ཆོས་ཉིད་ཀྱི་སྒུ་ཡིན་པའི་ཕྱིར་ངོ། །དེ་ནི་སྤངས་པ་ཆོས་སྐུའི་དབང་དུ་བྱས་ལ་གཟུགས་སྐུ་དང་ཡེ་ཤེས་ཆོས་སྐུ་གཉིས་ཀྱི། དང་པོ་ནི། ལེགས་པར་སྤྱད་པའི་བསོད་ནམས་དང་ལྡན་
པ་ཡིན་ལ། སྔར་བསགས་པའི་བསོད་ནམས་ཀྱི་ཚོགས་ལས་བྱུང་བ་དང༌། ཕྱི་མ་ཡེ་ཤེས་ཆོས་སྐུ་ནི། ཡེ་ཤེས་ཀྱི་འབྱུང་གནས་ཆེན་པོ་ཡེ་ཤེས་ཀྱི་ཚོགས་ལས་འབྱུང་བ་ཡིན་ནོ། །དེ་ལྟ་བུའི་ཡེ་ཤེས་དང་ལྡན་པས་ནི། དངོས་པོ་རྣམས་ཇི་ལྟར་འབྱུང་བ་དང་འཇིག་པའི་ཁྱད་པར་དང་ཐ་སྙད་དུ་ཡོད་ཅིང༌། རང་བཞིན་གྱིས་མེད་
པའི་ཁྱད་པར་ཇི་ལྟ་བ་བཞིན་དུ་ཤེས་པས་སམ། ཡང་ན། ཡོད་པ་ནི་མངོན་སུམ་དང༌། མེད་པ་ནི་ལྐོག་གྱུར་ལ་བཤད་པ་ལྟར་རོ། །བསོད་ནམས་དང་ཡེ་ཤེས་ཀྱི་ཚོགས་གཉིས་ཀྱི་ཚོགས་ནི་མཐའ་བསགས་པ་པོ་སྟེ། རྗེ་བཙུན་དེའི་ཡེ་ཤེས་དང༌། དེས་མཚོན་པའི་གཞན་གྱི་ཡེ་ཤེས་ལའང་སྦྱར་རུང་ངོ། །འདིད་སྦས་དོན་དུ་བསོད་
ནམས་ཀྱི་ཚོགས་བསྟན་པའི་སྒོ་ནས་བསྐྱེད་རིམ་དང༌། ཡེ་ཤེས་ཀྱི་ཚོགས་བསྟན་པའི་སྒོ་ནས་རྫོགས་རིམ་ཀྱང་བཤད་པའི་ཚུལ་ཡོད་དོ། །གཟུགས་སྐུའི་འཕྲིན་ལས་རྒྱུན་མི་འཆད་པ་དང༌། ཆོས་ཀྱི་དེ་བཞིན་ཉིད་མི་འཇིག་པའི་ཕྱིར་ན་རྟག་པ་ཞེས་བྱ་ལ། དེ་ནི་མི་མཐུན་ཕྱོགས་ལས་གྲོལ་བས་ན་ཀུན་ལས་རྒྱལ་བའོ། །རྟག་ཏུ་བསཾ་
གཏན་དང་པོ་སོགས་དང༌། བླ་མེད་ལྟར་བདེ་སྟོང་དབྱེར་མེད་ཀྱི་ཡེ་ཤེས་ཉིད་ལ་རྣལ་འབྱོར་དུ་བྱེད་པ་ཅན་ཏེ་དེ་དག་ལ་བསམ་གཏན་བྱེད་ཅིང༌། བསྒོམ་པའམ་བསམ་པར་བྱ་བར་གནས་སོ། །དེ་ལྟ་བུའི་བསམ་གཏན་གྱི་བློ་དང་ལྡན་པའི་བདག་ཉིད་ཅན་ཡིན་པའི་ཕྱིར། ཆོས་ཐམས་ཅད་རང་བཞིན་གྱིས་སྟོང་པར་རྟོགས་པའི་མཉམ་གཞག
སོ་སོ་རང་རིག་པའི་ཡེ་ཤེས་ལས་མི་གཡོ་བར་གནས་པ་ཞེས་བྱའོ། །འདིར་རྟག་པ་ཞེས་པ་ནི་རྣམ་སྣང་ལ་བྱས་ནས་དེའི་རྣལ་འབྱོར་སྒོམ་ཚུལ་ཞིག་ཀྱང་བསྟན་པར་བཞེད་པའང་ཡོད་དོ། །སངས་རྒྱས་ཀྱི་གོ་འཕང་མཆོག་གི་དང་པོ་ཆོས་ཀྱི་སྐུ་ཐོབ་ལ་དེ་དང་དུས་མཉམ་པའི་ཚུལ་གྱིས་ལོངས་སྐུ་དང་སྐུ་གཉིས་ཀྱང་ཐོབ་
@013B པས་ན་ཆོས་སྐུ་ལོངས་སྐུ་སྤྲུལ་སྐུ་སྟེ་སྐུ་གསུམ་འཆང་བ་སྟེ་ཐོབ་པའམ་འཛིན་པའོ། །བླ་མེད་ལྟར་ན་སངས་རྒྱས་རྡོ་རྗེ་འཆང་འཇམ་དཔལ་དེ་ནི། ངོ་བོ་ཉིད་སྐུ་དང༌། ཡེ་ཤེས་ཆོས་སྐུ། ལོངས་སྤྱོད་རྫོགས་སྐུ། སྤྲུལ་སྐུ་ལ་རྣམ་པར་སྨིན་པ་དང༌། སྨིན་པ་མ་ཡིན་པའི་སྤྲུལ་སྐུ་གཉིས་སུ་ཕྱེ་བས་སྐུ་ལྔའི་བདག་ཉིད་ཅན་ཡིན་པས།
རིགས་ཀུན་ལ་ཁྱབ་པའི་བདག་ཉིད་ཅན་དང༌། ཆོས་དབྱིངས་ཡེ་ཤེས་སོགས་ཡེ་ཤེས་ལྔའི་བདག་ཉིད་ཅན་ཡིན་ལ་ཡེ་ཤེས་ལྔ་མཚོན་པའི་ཕྱིར་སངས་རྒྱས་རིགས་ལྔའི་བདག་ཉིད་ཅོད་པན་དུ་འཛིན་པ་ཅན་ནོ། །སྤྱན་ལྔ་དང་ཡང་ལྡན་ཏེ། ཤའི་སྤྱན་ལ་སོགས་པ་སྤྱན་ལྔ་ནི་ཡུལ་ཐམས་ཅད་ལ་ཆགས་པ་མེད་ཅིང༌། ཐོགས་པ་མེད་པ་ཉིད་
ཡིན་ལ། དེ་ལྟ་བུའི་སྤྱན་ལྔ་འཆང་བའི་ཕྱིར་རོ། །རྗེ་བཙུན་ཉིད་དུས་གསུམ་གྱི་སངས་རྒྱས་ཐམས་ཅད་བསྐྱེད་པ་པོ་སྟེ་ཡབ་ཏུ་གྱུར་པ་སྟེ། འོན་ཀྱང་སངས་རྒྱས་ཀྱི་སྲས་པོ་ས་བཅུ་པའི་བྱང་ཆུབ་སེམས་དཔའ་ཆེན་པོ་དམ་པ་མཆོག་གི་ཚུལ་འཛིན་པའོ། །ཆོས་རྣམས་རང་བཞིན་མེད་པར་ཤེས་པ་ཉིད་ཀྱིས། སྲིད་པ་འཁོར་བ་ལས་འབྱུང་བས་ན་
འཁོར་བའི་སྐྱེ་གནས་མེད་དོ། །འདིར་འགྲེལ་པ་རྣམས་ལས་སྐྱེ་གནས་མེད་པའི་དོན་དུ་བཤད་པས། ཏེ་ཞེས་པ་ནི་མ་དག་པར་གསལ་ལོ། །དེ་ཡང་ཆོས་ཉིད་རྟོགས་པ་ལས་བྱུང་བའི་ཡེ་ཤེས་ཀྱི་སྐུས་སྲིད་པར་སྐྱེ་བའི་རྒྱུ་ལས་དང་ཉོན་མོངས་པ་ཐམས་ཅད་སེལ་བར་བྱེད་པའོ། །གཉིས་སུ་མེད་པའི་ཡེ་ཤེས་ཀྱི་བདག་ཉིད་ཅན་གྱི་སྐུ་ཡིན་པས་ན་
གཅིག་པུ་དང༌། དེ་མི་མཐུན་ཕྱོགས་ཀྱིས་བྱེད་པར་མི་ནུས་པའི་སྲ་བརྟན་ཅན་ཡིན་པས་ན། སྲ་ཞིང་འཁྲེགས་པ་དང་རྡོ་རྗེའི་བདག་ཉིད་ཅན་ཏེ། དེ་ལྟ་བུའི་སྐུ་དེ་ཐོབ་མ་ཐག་པ་ནས་འགྲོ་བའི་དཔལ་དུ་གྱུར་པས་ན། སྐྱེས་མ་ཐག་པ་ནས་འགྲོ་བའི་བདག་པོའོ། །འདིར་གཅིག་པུ་སྲ་འཁྲེགས་རྡོ་རྗེ་ནི། དེས་དོན་ལ་སྦྱར་ན། བདེ་སྟོང་དབྱེར་མེད་
ཀྱི་ཡེ་ཤེས་དང༌། ཟུང་འཇུག་གི་སྐུ་ལ་བྱེད་དུ་རུང༌། ནམ་མཁའ་ལྟ་བུའི་ཆོས་ཀྱི་དབྱིངས་རྟོགས་པ་ལས་བྱུང་བའི་རང་བྱུང་བའི་ཡེ་ཤེས་མངོན་དུ་བྱས་ཤིང༌། ཟབ་མ་རྟོགས་པའི་ཤེས་རབ་དང་རྒྱ་ཆེ་བ་རྟོགས་པའི་ཡེ་ཤེས་ཀྱི་མེ་བོ་ཆེ་སྟེ་མེ་ཆེར་འབར་བས། གདུལ་བྱའི་ཉོན་མོངས་པ་སོགས་ཐམས་ཅད་སྲེགས་པར་བྱེད་ཅིང༌། ཡེ་ཤེས་དེའི་འོད་
@014A ༄༅། །ཆེན་པོས་རང་གི་རྒྱུད་རྣམ་པར་སྣང་བར་བྱེད་དོ། །འདིར་ནམ་མཁའ་ནི། ཆོས་ཉིད་ཀྱི་འོད་གསལ་ལ་བྱས་ནས་དེ་ལས་ཡེ་ཤེས་ཀྱི་སྐུ་ཟུང་འཇུག་འགྲུབ་པའི་ཚུལ་ལའང་བཤད་དུ་རུང་ངོ། །ཡེ་ཤེས་དེས་ཡུལ་ཐམས་ཅད་མངོན་སུམ་དུ་རྟོགས་པས་ན། སྣང་བ་ལམ་མེ་བར་གསལ་ལོ། །འགྲོ་བའི་མ་རིག
པའི་མུན་པ་ཐམས་ཅད་སེལ་བའི་ཕྱིར་ན་མར་མེ་ཞེས་བྱའོ། །དེ་སེལ་བ་ཙམ་དུ་མ་ཟད་དེ་དག་གི་རྒྱུད་སྣང་བར་བྱེད་པའི་ཕྱིར་ཡེ་ཤེས་ཀྱི་སྒྲོན་མེའོ། །ནམ་མཁའ་ལས་བྱུང་ནས་འདིའི་བར་གྱི་རྐང་པ་ལྔས། རིམ་བཞིན། ཆོས་དབྱིངས་ཡེ་ཤེས། མེ་ལོང་ལྟ་བུ། མཉམ་པ་ཉིད། སོ་སོར་རྟོགས་པ། བྱ་གྲུབ་ཡེ་ཤེས་ཏེ་ལྔ་བཤད་པར་འདོད་པའང་
ཡོད་དོ། །ཡེ་ཤེས་ལྔའི་རང་བཞིན་མཚོན་པའི་ཕྱིར་རྣམ་པར་བཀྲ་བའི་འོད་ཁ་དོག་ལྔ་དང་ལྡན་པས་ན། གཟི་བརྗིད་ཆེན་པོ་འོད་གསལ་བའོ། །སྔགས་ཀྱི་མཆོག་གསང་ཀྱི་བདག་པོ་ཡིན་པས། རིག་པའི་རྒྱལ་པོའོ། །དེ་ཡང་སྔགས་ཀྱི་དཀྱིལ་འཁོར་གྱི་གཙོ་བོ་ཡིན་པའི་དོན་ནོ། །གསང་སྔགས་ཀྱི་རྒྱལ་པོ་ཡིན་པས། དེའི་
སྒོ་ནས་སེམས་ཅན་གྱི་དོན་ཆེན་པོ་བྱེད་དོ། །གསང་སྔགས་ཞེས་པའི་དོན་ནི། ཐབས་ཤེས་དབྱེར་མེད་པ་ཞིག་ལ་བྱེད་པས། དེ་རྒྱུད་སྡེ་བཞིའི་དོན་ལ་ཡོད་དོ། །གསང་སྔགས་དེ་དང་དེ་ཉིད་ལྡན་པ་ནི། གཙུག་ཏོར་ཆེན་པོ་ལྟར་རྨད་དུ་བྱུང་བ་སྟེ། ཀུན་གྱི་སྤྱི་གཙུག་ཏུ་བཀུར་བར་བོས་སོ། །འདི་དག་གིས་ཁྲོ་བོ་ཁམས་གསུམ་རྣམ་རྒྱལ་གྱི་དཀྱིལ་འཁོར་
བསྟན་པར་བཤད་པའང་ཡོད་པས། དེའི་ལུགས་ལ། གཙུག་ཏོར་ཆེན་པོ་ནི་གཙུག་ཏོར་འཁོར་སྒྱུར་དང༌། རིག་སྔགས་རྒྱལ་པོ་ནི་གནོད་མཛེས་ལ་བྱེད་པར་སྣང༌། དུས་ཀྱི་འཁོར་ལོའི་ལུག་སུ་བྱས་ཏེ་བཤད་ན། གཙུག་ཏོར་ཆེན་པོ་ཞེས་པ་དང༌། ནམ་མཁའི་བདག་པོ་སོགས་ལ་བཤད་པ་ཡ་མཚན་ཞིག་འདུག་ཀྱང་མང་དུ་དོགས་ནས་མ་བྲིས་སོ།།
ནམ་མཁའ་ལྟ་བུའི་ཆོས་ཀྱི་དབྱིངས་ལ་རྟག་ཏུ་མཉམ་པར་གཞག་པའི་བདག་ཉིད་ཅན་ཡིན་པའི་ཕྱིར་ན་བདག་པོ་སྟེ། དེ་ལ་གནས་བཞིན་དུ་སྤྲུལ་པ་དང་འཕྲིན་ལས་མི་འདྲ་བ་སྣ་ཚོགས་སྟོན་པར་བྱེད་དོ། །རིགས་ཐམས་ཅད་ཀྱི་བདག་པོའི་སྐུ་ཡིན་པས་ན། སངས་རྒྱས་ཀུན་གྱི་བདག་པོའི་སྐུ་ཡི་མཆོག་སྟེ། ཟུང་འཇུག་གི་སྐུ་བརྙེས་
@014B བའོ༑ ༑སྐུ་དེའི་སྒོ་ནས་སྤྲུལ་པ་སྣ་ཚོགས་བསྟན་ནས་སེམས་ཅན་གྱི་དོན་བྱེད་པས་ན། འགྲོ་ཀུན་དགའ་བའི་མིག་དང་ལྡན་པ་སྟེ། གང་ལ་གང་མོས་ཀྱི་གཟུགས་འཛིན་པའོ། །དེ་ཡང་གང་ཞེ་ན། ལྷ་མི་ཀླུ་སོགས་སྣ་ཚོགས་པའི་གཟུགས་ཅན་བསྐྱེད་པ་པོ་སྟེ་སྤྲུལ་པར་བྱེད་དོ། །མིག་དང་ཞེས་པ་ལ་དོན་གཞན་ཡང༌། ཤེས་རབ་
དང་ཡེ་ཤེས་ཀྱི་མིག་ཅེས་བཤད་པའང་སྣང་ངོ། །དེ་ལྟ་བུའི་ཡོན་ཏན་དང་ལྡན་པའི་འཇམ་དཔལ་དེ་ནི། ཚངས་པ་བརྒྱ་བྱིན་སོགས་ཀྱིས་ཀྱང་མཆོད་པར་འོས་པ་དང་བརྗེད་པར་འོས?་པ་སྟེ་བསྟོད་འོས་པ་དང༌། ལྷ་མིའི་དྲང་སྲོང་རྣམས་ལས་ཁྱད་པར་དུ་འཕགས་བསན་དྲང་སྲོང་ཆེན་པོའོ། །སྐུ་གསུང་ཐུགས་ཀྱི་རིགས་སམ། གསང་
སྔགས་རིགས་སྔགས་གཟུངས་སྔགས་ཀྱི་རིགས་གསུམ་འཆང་བ་སྟེ་འཛིན་པས་ན། གསང་སྔགས་དང་ལྡན་པ་ཞེས་བྱའོ། །གསང་སྔགས་ཀྱི་ཚུལ་ལས་མི་འདའ་བས་ན་དམ་ཚིག་ཆེན་པོ་ཏེ། ཚུལ་དེས་དོན་གྱི་གསང་སྔགས་འཛིན་ལ། དེ་ཡང་གཉིས་སུ་མེད་པའི་ཡེ་ཤེས་དང༌། ཟུང་འཇུག་གི་སྐུ་འཛིན་པའོ། །གཙོ་བོའམ་མཆོག་ཏུ་
གྱུར་པའི་ཡེ་ཤེས་དང་སྐུ་དེ་ལྟ་བུ་འཛིན་པ་ནི་སངས་རྒྱས་ལ་སོགས་པའི་དཀོན་མཆོག་གསུམ་འཛིན་པའང་ཡིན་ནོ། །དེ་ཡང་ཡེ་ཤེས་དེ་ནི་ཆོས་དཀོན་མཆོག་དང༌། དེ་མཐར་ཕྱིན་པ་ན་སངས་རྒྱས་དང༌། དེ་སྒྲུབ་པར་བྱེད་པ་ནི་དགེ་འདུན་དགོན་མཆོག་ཏུ་བྱེད་པའོ། །ཐེག་པ་མཆོག་གསུམ་ཞེས་པ་ནི། ཕྱི་མཉན་ཐོས་རང་རྒྱལ་བྱང་སེམས་
ཀྱི་ཐེག་པ་གསུམ་དང༌། ནང་དུ་གསང་སྔགས་རིག་སྔགས་གཟུངས་སྔགས་གསུམ་ལ་བཤད་དོ། །དེ་གསུམ་ནི་གདུལ་བྱ་ལ་སྟོན་པ་པོ་ཡིན་ལ། འབྲས་བུའི་དོན་ཡོད་པའི་ཐུགས་རྗེའི་ཞགས་པས་གདུལ་བྱ་རྣམས་རྗེས་སུ་འཛིན་པ་དང༌། ཐུགས་རྗེའི་ཞགས་པ་དེ་ནི། མི་མཐུན་ཕྱོགས་རང་དོན་ཉིད་གཙོ་བོས་བྱེད་པས་རྣམ་པར་རྒྱལ་བ་དང༌།
ཐུགས་རྗེས་སེམས་ཅན་མི་གཏོང་བས་ན་འཛི་པ་ཆེན་པོ་ཡིན་ལ། མི་མཐུན་ཕྱོགས་ཀྱིས་མི་བྱེད་པས་ན་རྡོ་རྗེ་དང་སེམས་ཅན་རྗེས་སུ་འཛིན་པའམ་འཆིང་བས་ན་ཞགས་པ་སྟེ། དེ་ལྟ་བུའི་ཡེ་ཤེས་དེས་འཛིན་པ་དང༌། འཆིང་བར་བྱེད་པ་གཉིས་ཀྱི་སྒོ་ནས་རྡོ་རྗེ་ལྕགས་ཀྱུ་དང༌། རྡོ་རྗེ་ཞགས་པ་ཆེན་པོ་ཞེས་མཚུངས་པའི་མིང་གིས་
@015A ༄༅། །བརྗོད་དོ། །འདིར་ལྟགས་ཀྱུ་དང་ཞགས་པ་ཞེས་པའི་སྤས་དོན་དུ་སྒོ་པ་བཞི་བསྟན་པར་བཞེད་དོ། །གོང་དུ་བརྗོད་པ་དེ་དག་གིས་རྫོགས་རིམ་གྱི་སྦྱོར་བ་ཡན་ལག་དྲུག་བསྟན་པར་དུས་འཁོར་གྱི་ལུགས་སུ་འགྲེལ་ཚུལ་སྣང་ཡང་མ་བྱས་སོ། །ཞེས་བྱ་བ་ནི་ལེའུ་དྲུག་པའི་རྣམ་པར་བཤད་པའོ།། །།གཉིས་པ་མེ་
ལོང་ལྟ་བུའི་ཡེ་ཤེས་ནི། རྡོ་རྗེ་འཇིགས་བྱེད་འཇིགས་པར་བྱེད། །ནས། སྒྲ་དང་ལྡན་པ་རྣམས་ཀྱི་མཆོག །ཅེས་སོ། །དེ་ནས་རྡོ་རྗེ་འཇིགས་བྱེད་འཇིགས་པར་བྱེད་ཅེས་གསུངས་ཏེ། འདི་དག་ལ་བཤད་ཚུལ་མི་འདྲ་བ་གཞན་སྣང་ཡང༌། དྲང་ངེས་གཉིས་ཀྱིས་བཤད་ན། བདེ་སྟོང་དབྱེར་མེད་ཀྱི་ཡེ་ཤེས་མཐར་ཐུག་ནི། ངེས་དོན་གྱི་རྡོ་རྗེ་
འཇིགས་བྱེད་ཡིན་ལ། དེས་སྒྲིབ་གཉིས་བག་ཆགས་དང་བཅས་པ་འཇིགས་པར་བྱེད་པས་དེ་ལྟར་དུ་བརྗོད་ཅིང༌། ཡང་བདུང་དང་སིན་པོ་སོགས་འཇོམས་པར་བྱེད་པའི་ཕྱིར་ན། འཇིགས་པར་བྱེད་ཅེས་བརྗོད་དོ། །རྒྱ་འགྲེལ་འགའ་ཞིག་ཏུ་ནི། འཇིགས་པར་བྱེད་པ་དེ་གདོང་དྲུག་ཅེས་པའི་ཁྲོ་བོ་ཉིད་དང་སྦྱང་ལ། ལ་
ལར་རྡོ་རྗེ་འཇིགས་བྱེད་ཅེས་པས་འཇིགས་བྱེད་དང༌། འཇིགས་པར་བྱད་ཅེས་པས་ཕྱག་རྡོར་དབང་བསྐུར་བའི་རྒྱད་ལས་འབྱུང་བའི་སྦྲུལ་བའི་ཁྲོ་དེ་བསྟན། གདོང་དྲུག་ནི། གདོང་དྲུག་གི་རྒྱུད་ནས་བཤད་པའི་ཁྲོ་བོ་བསྟན་པ་ཡིན་ཞེས་སོགས་བཤད་ཚུལ་མང་ངོ། །འོན་ཀྱང་འདི་ལྟར་བཤད་པར་བྱ་སྟེ། རྡོ་རྗེ་འཇིགས་
བྱེད་ཅེས་པ་འཇིགས་བྱེད་ཉིད་ལ་བྱས་ནས། དས་གང་འཇིགས་པར་བྱེད་ན་བདུད་དང་གཤིན་རྗེ་སོགས་འཇིགས་པར་བྱེད་དོ། །ཡང༌། འཇམ་དཔལ་གྱི་སྤྲུལ་པའི་ཁྲོ་བོ་རྒྱལ་པོ་གདོང་དྲུག་ཅེས་བྱ་བ་དེ་ཡང་འཇིགས་པའི་གཟུགས་ཅན་ཏེ། དེའི་གདོང་དྲུག་རེ་རེ་ལའང་མིག་གསུམ་གསུམ་ཡོད་ཀྱང༌། མིག་གསུམ་པོ་རིང་
གཅིག་ཏུ་བསྡུས་ན། མིག་དྲུག་ཡོད་ཅེས་བྱལ་ལག་པ་དྲུག་དང་ལྡན་ཞིང༌། བདུད་དང་བགེགས་ཐམས་ཅད་འཇོམས་ནུས་བས་ན་སྟོབས་དང་ལྡན་པའོ། །ཐོད་སྐམ་སོགས་ངུས་པའི་རྒྱན་གྱིས་བརྒྱན་བས་ན་གེང་རུས་གྱིས་བརྒྱན་པ་དང༌། ཞལ་མཆེ་བ་གཙིགས་པ་པོའོ། །ཡང༌། ཁྲོ་བོ་ཧ་ལ་ཧ་ལ་ཞེས་བྱ་བ་འཇམ་
@015B དཔལ་གྱི་སྤྲུལ་པ་དེ་ལ་ཞལ་བརྒྱ་ཡོད་བས། གདོང་བརྒྱ་བ་ཞེས་བྱ་ལ། དེས་གཤིན་རྗེ་འཇོམས་པས་ན་གཤིན་རྗེ་གཤེད་པོ་དང༌། བགེགས་འཇོམས་པས་ན་བགེགས་ཀྱི་རྒྱལ་པོའོ། །ཧ་ལ་ཧ་ལ་ཞེས་པ་ནི་སྔ་མའི་སྦྲུལ་རྒྱན་དུ་བཤད་པའང་སྣང་དོ། །ཕྱག་མཚན་གྱི་རྡོ་རྗེ་ནི། དཔེ་མེད་པའི་ཤུགས་ཆེན་པོ་ཅན་ཏེ་དགེ་བ་
ཐམས་ཅད་འཇིགས་པར་བྱེད་པའོ། །འགའ་ཞིག་ཏུ་གཤིན་རྗེ་གཤེད་པོ་དང༌། བགེགས་ཀྱི་རྒྱལ་པོ་དང་རྡོ་རྗེ་ཤུགས་ཅན་དང༌། འཇིགས་པར་བྱེད་པ་རྣམས་རེ་རེས་ཀྱང་འཇམ་དཔལ་རྣམ་འཕྲུལ་གྱི་ཁྲོ་བོ་རེ་རེ་བསྟན་པར་བཤད། ཡང༌། དྲང་དོན་དུ་རྫས་ཀྱི་རྡོ་རྗེ་ལ་དེ་ལྟར་དུ་གྲགས་པ་ཡིན་ཀྱང༌། རྡོ་རྗེའི་དོན་
ནི༑ ངེས་དོན་གྱི་སྙིང་པོའི་དབང་དུ་བྱས་ན། བདེ་སྟོང་དབྱེར་མེད་པའི་ཡེ་ཤེས་ཉིད་ལ་བྱེད་པ་ཡིན་ལ། དེ་ཉིད་ལྷ་དྲག་པོའི་རྣམ་པར་བསྟན་པས་ན་སྒྱུ་འཕྲུལ་རྡོ་རྗེ་ཞེས་བྱའོ། །ལ་ལར་རྡོ་རྗེ་གྲགས་པ་དང༌། རྡོ་རྗེ་སྙིང་པོ་དང༌། སྒྱུ་འཕྲུལ་རྡོ་རྗེ་སོགས་རེ་རེས་ཀྱང་ཁྲོ་བོ་རེ་རེ་བསྟན་པར་བཤད་དེ། འདིའི་
གོང་འོག་རྣམས་སུ་ཁྲོ་བོ་ལྔ་བཅུའི་སྐོར་ཞིག་བཤད་པར་བཞེད་པའང་ཡོད་དོ། །དེ་ལྟར་སྤྲུལ་པའི་ཁྲོ་བོ་དེ་ལང་མིའུ་ཐུང་གི་གཟུགས་སུ་ཡོད་ཅིང་ལྟོ་བ་ཆེ་བས་ན་གསུས་པོ་ཆེ་ཞེས་བྱའོ། །དེ་ནི་ངེས་དོན་གྱི་རྡོ་རྗེ་གཉིས་སུ་མེད་པའི་ཡེ་ཤེས་ལས་སྐྱེས་པ་ཡིན་ལ། དེ་ལས་སྐྱེས་བའི་སྐུ་དེ་
ཕང་མི་ཕྱེད་པའི་རྡོ་རྗེའི་བདག་ཉིད་ཅན་ནོ། །མི་ཕྱེད་པའི་རྡོ་རྗེའི་སྙིང་པོ་ངེས་དོན་གྱི་རྡོ་རྗེ་གཉིས་སུ་མེད་པའི་མཐར་ཐུག་པ་ནི། གཉིས་སྣང་ཐམས་ཅད་ཞི་བས་ན། ནམ་མཁའ་དང་འདྲ་བ་ཞེས་བྱ་ལ། དེ་ནི་མཚན་འཛིན་གྱི་རྣམ་རྟོག་གིས་མི་གཡོ་བ་སྟེ་བསྐྱོད་པར་མི་ནུས་སོ། །སྐུའི་ཆ་བྱད་
ལས། དབུའི་རལ་བ་ནི་སྤྱི་བོར་མཉམ་པོར་གཅིག་གིས་བཅིངས་པའི་བསྒྱིངས་པ་སྟེ་འགྱིངས་པའི་ཚུལ་ལོ། །ཁྲོ་བོ་དེ་དག་ནི་གླང་ཆེན་གྱི་ཀོ་བ་རློན་པ་སྟོད་དུ་གོས་སུ་གྱོན་པ་ཅན་ནོ། །གསུང་གི་གད་བརྒྱངས་ནི་སྒྲ་དྲག་པོ་ཆེན་པོ་ཧ་ཧ་ཞེས་སྒྲོགས་པར་བྱེད་ཅིང་ཧི་ཧི་ཞེས་པའི་སྒྲ་སྒྲོགས་
@016A ༄༅། །ཏེ་གདུག་བཅན་རྣམས་འཇིགས་པར་བྱེད་དོ། །དྲག་ཆེན་ཞེས་པ་ལ་གྲགས་ཆེན་གྱི་དོན་དུ་བྱས་པའང་སྣང་ངོ། །ཧ་ཧ་ལ་སོགས་པའི་གད་མོ་ཆེན་མོས་ས་གསུམ་ཁྱབ་པར་བྱེད་པའི་གད་བརྒྱངས་ཅན་གྱི་སྙིང་པོ་ཉིད་སྟོན་པའི་རྡོ་རྗེ་གད་མོ་བཞད་པའི་སྒྲ་ཆེས་ཆེར་སྒྲོགས་པའོ། །ནང་
དུ་བདེ་སྟོང་གི། ཡེ་ཤེས་ཀྱིས་མྱོས་བས་ཕྱི་རོལ་ཏུ་ཞལ་ནས་སྒྲ་དེ་ལྟར་སྒྲོགས་པར་བྱེད་ཀྱང༌། ཐུགས་ནི་མི་མཐུན་ཕྱོགས་ཀྱིས་མི་ཕྱེད་པས་ན་རྡོ་རྗེ་དང༌། རང་དོན་མཐར་ཐུག་བས་ན་སེམས་དཔའ་དང༌། གཞན་དོན་མཐར་ཐུག་པས་ན་སེམས་དང་ས་ཆེན་པོ་ཞེས་བྱ་ཞིང་ཐག་མེད་བདེ་སྟོང་གི །ཡི་
ཤེས་དེ་ནི་རྡོ་རྗེའི་རྒྱལ་པོ་ཡིན་ལ། དེ་མི་འགྱུར་བའི་བདེ་བའི་ངོ་པོང་གྱུར་བས་ན་བདེ་བ་ཆེ་བ་དང༌། དེས་མི་མཐུན་ཕྱོགས་འཇོམས་པས་ན་རྡོ་རྗེ་དྲག་པོ་དང༌། རང་གཞན་ཐམས་ཅད་མགུ་བར་བྱེད་པས་ན་དགའ་བ་ཆེ་བའོ། །གཞན་ཡང༌། ཞལ་ནས་རྡོ་རྗེ་ཧཱུཾ་སྟ་ཧཱུཾ་ཞེས།
སྒྲོགས་ཤིང༌། མཚོན་དུ་ནི་དྲང་ངེས་ཀྱི་རྡོ་རྗེའི་མདའ་གཉིས་ཐོགས་པ་སྟེ། ནང་གི་མི་མཐུན་ཕྱོགས་འབིགས་པར་བྱེད་པའི་ངེས་དོན་ཡེ་ཤེས་ཀྱི་མངའ་དང༌། དྲང་དོན་དུ་མཚོན་གྱི་མདའ་འམ་ཟ་དང་འདྲ་བའི་མཚོན་ཐོགས་པ་ལའང་བཤད། དེ་བཞིན་དུ་ངེས་དོན་ཤེས་རབ་གྱི་རལ་གྲི་
དང༑ དྲང་དོན་མཚོན་གྱི་རལ་གྲི་འཆང་བས་ན་རྡོ་རྗེ་རལ་གྲི་དང༌། དེས་མི་མཐུན་ཕྱོགས་གཅོད་པར་བྱེད་པས་ན་མ་ལུས་གཅོད་པའོ། །རྡོ་རྗེ་ཀུན་འཆང་ཞེས་པ་ལ་དྲང་ངེས་གཉིས་ལས་དྲང་དོན་གྱི་སྣ་ཚོགས་རྡོ་རྗེ་འཆང་བ་ཡིན་ལ། རེས་དོན་གྱི་ཡེ་ཤེས་ལྔ་འཆང་བའོ། །དེ་ལྟ་
@016B བུའི་དྲང་ངེས་ཀྱི་རྡོ་རྗེ་འཛིན་པས་ན་རྡོ་རྗེ་ཅན་ཞེས་བྱའོ། །ངེས་དོན་གཉིས་སུ་མེད་པའི་ཡེ་ཤེས་ཀྱི་རྡོ་རྗེ་གཅིག་བུས་དེས་ནི་མི་མཐུན་ཕྱོགས་ཀྱི་གཡུལ་སེལ་བར་བྱེད་པ་སྟེ། མཚོན་བྱེད་དུ་རྫས་ཀྱི་རྡོ་རྗེ་བསྣམས་པའོ། །རྡོ་རྗེ་འབར་བ་མིག་མི་བཟང༌། །ཞེས་པ་ལ་དྲང་ངེས་ཀྱི་བཤད་པ་གཉིས་ལས།
ངེས་དོན་ནི། ཐུགས་ཡེ་ཤེས་ཀྱི་རྡོ་རྗེའི་སྤྱན་གྱིས་ཡུལ་ཐམས་ཅད་མཐོང་བའི་མཐའ་ཚང་བཟུང་མི་ནུས་པ་དང༌། ཡེ་ཤེས་ཀྱི་མིག་དེས་ཉོན་མོངས་པ་སོགས་འཇོམས་པར་བྱེད་པས་ན། མིག་མི་བཟང་ཤེས་བྱ་ལ། དྲང་དོན་གྱི་ཡེ་ཤེས་དེ་གང་ལ་ཡོད་པའི་ཁྲོ་བོ་དེ་དག་གི་སྤྱན་ལས་
མེ་ལྟ་བུའི་འོད་འབར་པས་ན་རྡོ་རྗེ་འབར་བ་དང༌། སྤྱན་གྱི་འོད་དེས་གདུག་པ་ཅན་རྣམས་སྲེག་པར་བྱེད་པའི་ཕྱིར་མིག་མི་བཟང་བའོ། །ཞེས་བྱ་བ་སྟེ་དེས་ནི་སྤྱན་རྩ་གློག་ལྟར་འཁྱུག་བ་སོགས་བལྟ་བར་མི་བཟང་བར་བསྟན་ཏོ། །འདིར་མིག་མི་བཟང་བ་དང་མི་བཟད་པ་གང་བྱས་
ཀྱང་དོན་འདྲ་ཡང་འགྲེལ་པ་ཕལ་ཆེར་ལས་སྔ་མ་ལྟར་འབྱུང་ངོ། །དེ་ལྟ་བུའི་དྲང་ངེས་ཀྱི་སྤྱན་གཉིས་ཀྱང་མི་མཐུན་ཕྱོགས་ཀྱིས་མི་ཕྱེད་པས་ན་རྡོ་རྗེ་ཞེས་བྱ་ལ། དེར་མ་ཟད། དབུའི་སྐྲ་ཡང་རྡོ་རྗེ་འབར་བ་སྟེ། ཡེ་ཤེས་ཀྱི་བདག་ཉིད་ཅན་ཡིན་པ་སོ། །དེ་ནི་དབུ་སྐྲས་མཚོན་པའི་དབུ་སྐྲས་མཚོན་པའི་དབུ་ཞབས་ཕྱག་སོར་མོ་སོགས་
སྐུའི་ཆ་ཐམས་ཅད་ཀྱང་ལེ་ཤེས་ཀྱི་ངོ་བོའི་བདག་ཉིད་ཡིན་པས་ཐམས་ཅད་ཀྱིས་ཡུལ་མཐོང་བ་དང་ཐོས་པའི་ཁྱད་པར་མེད་ངོ། །དེ་ཡང༌། བདེ་མཆོག་རྩ་རྒྱུད་ལས། ཀུན་ཏུ་བྱག་དང་ཞབས་ལྡན་པའི། །ཀུན་ཏུ་སྤྱན་དང་དབུ་དང་ཞལ། །ཀུན་ཏུ་སྙན་ལྡན་འཇིག་རྟེན་ན། །ཐམས་ཅད་གཡོགས་ཏེ་རྣམ་པར་བཞུགས། །
@017A ༄༅། །ཞེས་གསུངས་པ་ལྟར་རོ། །དེ་ལྟ་ནའང་དེ་ངག་ཤེས་པ་ཡིན་ནོ་ཞེས་མི་བྱའོ། །འབར་བའི་དོན་ནི། དྲང་དོན་དུ་འོད་འབར་བ་ལའང་བྱེད་ཅིང༌། ངེས་དོན་དུ་ཡུལ་གསལ་བར་གཟིགས་པའོ། །རྡོ་རྗེ་འབེབས་པ་འབེབས་པ་ཆེ་ལའང་གཉིས་ཏེ། དྲང་དོན་དུ་སྐུའི་ཆ་ཐམས་ཅད་ནས་རྡོ་རྗེའི་མཚོན་
ཆའི་ཆར་འབེབས་པ་དང༌། རབ་ཏུ་འབེབས་པས་གདུག་པ་ཅན་འདུལ་བའི་དོན་ཏེ། འབེབས་པ་ནི་གདུག་པ་ཅན་ཆུང་ངུ་འདུལ་བ་དང༌། འབེབས་བ་ཆེན་པོ་ནི། གདུག་པ་ཅན་ཆེན་པོ་འདུལ་པ་ལའང་བཤད། ངེས་དོན་ནི། རྡོ་རྗེ་ལྟ་བུའི་ཡེ་ཤེས་ཀྱིས་དེ་ཁོ་ན་ཉིད་མངོན་སུམ་དུ་གཟིགས་པས་འབེབས་
པ་དང༌། ཇི་སྙེད་པའི་ཤེས་བྱ་ཐམས་ཅད་ཐོགས་མེད་དུ་གཟིགས་པ་ནི་འབེབས་པ་ཆེན་པོ་སྟེ། བཤད་མ་ཐག་པའི་དྲང་ངེས་ཀྱི་སྒྱན་དང༌། སླ་སོགས་ལའང་སྦྱར་རུང་བར་སེམས་སོ། །མིག་བརྒྱ་པ་སྟེ་ཞེས་པ་ནི་ཆོས་ཐམས་ཅད་མངོན་སུམ་དུ་རྟོགས་པའི་ཡེ་ཤེས་ཀྱི་སྤྱན་བརྒྱས་མཚོན་ནས་མང་དུ་པོར་
པོར་བསྟན་པ་དྲང༌། ཁྲོ་བོ་གདོང་བརྒྱ་པ་ལ་མིག་བརྒྱ་སོགས་ཡོད་པའི་དོན་དུ་བཤད་པ་གཉིས་སོ། །ཡུལ་ལ་ཐོགས་པ་མེད་པས་ན་རྡོ་རྗེའི་མིག་གོ །འདིར་དུས་ནི་ཞེས་སོགས་གོང་མ་དང༌། ཟློས་སམ་སྙམ་དུ་དོགས་པར་མི་བྱ་སྟེ། ཕྱི་ནས་གསུངས་པས་མི་འགལ་བར་ཤེས་དགོས་ལ་དེ་བཞིན་
དུ་གཞན་ལ་ཡང་ཤེས་པར་བྱའོ། །སུམ་ནི་རྡོ་རྗེའི་བ་སྤུ་ཅན་ཏེ། ལུས་ཀྱིས་སྤུ་རྣམས་ནི་གཉིས་སུ་མེད་པའི་ཡེ་ཤེས་ཀྱི་རང་བཞིན་ཅན་ནོ། །ཐ་མལ་གྱི་བ་སྤུ་མ་ཡིན་པར་ཡེ་ཤེས་ཀྱི་ངོ་བོ་རྡོ་རྗེའི་སྤུ་ནི་གཅིག་པུ་སྟ་ཁོ་ནའི་རང་བཞིན་ལུས་ཅན་དང༌། ཕྱག་གི་སེན་མོ་སྐྱེས་བ་ནི་རྡོ་རྗེའི་རྩེ་མོ་དང་མཚུངས་ཤང་
མི་མཐུན་བུའི་ཕྱོགས་འཇོམས་པར་བྱེད་དོ། །དེ་བཞིན་དུ་རྡོ་རྗེའི་སྙིང་པོ་ཅན་གྱི་པགས་པ་མཁྲེགས་པ་སྟེ། སྲ་ཞི་ངམ་ཁྲེགས་པས་སུས་ཀྱང་མི་འཐིགས་པའི་ཕྱིར་རོ?། །ཡེ་ཤེས་ཀྱི་རང་བཞིན་ཅན་གྱི་རྡོ་རྗེའི་འཕྲེང་བ་མི་མགོའི་རྣམ་པ་ཅན་ཐོགས་པ་སྟེ། དེ་རྣམས་ཀྱི་མཚོན་དོན་ཕུན་སུམ་
@017B ཚོགས་པའི་དཔལ་དང་ལྡན་པའོ། །མདོར་ན། ཡེ་ཤེས་ཀྱི་རང་བཞིན་ཅན་གྱི་རྡོ་རྗེའི་རྒྱན་སྔར་བཤད་པ་དེ་དག་ཀུན་གྱི་བརྒྱན་པ་སྟེ། རྒྱན་ཐམས་ཅད་ཀྱང་ཡེ་ཤེས་ཀྱི་ཆ་ཤས་ཡིན་པས་ན། ཀུན་ཀྱང་རྡོ་རྗེ་འབར་བ་མིག་མི་བཟང༌།། སྐྲ་ཡང་ཞེས་པའི་སྐབས་སུ་བཤད་པ་ལྟར་ཉན་པ་དང་ལྟ་བ་སོགས་ཀྱི་
ཁྱད་པར་དང་ལྡན་ནོ། །གསུང་གིས་གང་བརྒྱངས་ཧ་ཧ་ཞེས་ངེས་པར་སྒྲོགས་པ་སྟེ། དྲག་བོའི་དབང་དུ་བྱས་པའོ། །འདི་ནི་གོང་དུ་བསྟན་ཀྱང་ཁོ་བོ་སོ་སོ་ལ་སྦྱར་བའམ། ཡང་ན། སྔ་མ་ལྟར་གསུང་གི་ཧ་ཧ་ཞེས་སྒྲོགས་པ་སོགས་ཀྱང་ཡེ་ཤེས་ཀྱི་བདག་ཉིད་ཅན་དུ་བསྟན་པ་སྟེ། སྔགས་བླ་མེད་
གྱི་ཐེག་པའི་སྐབས་སུ་ངག་གསུང་ཐུགས་ཀྱི་རྡོ་རྗེ་གསུམ་ངོ་བོ་དབྱེར་མི་ཕྱེད་པའི་བདག་ཉིད་ཅན་ཡིན་པའི་ཕྱིར་རོ། །ཞི་བའི་དབང་དུ་བྱས་ན། ཡི་གེ་དྲུག་པ་རྡོ་རྗེ་སྒྲ།། ཞེས་པའི་ཡིག་གེ་དྲུག་པ་ནི། ཨ་ར་པ་ཙ་ན་དྷཱིཿ ལ་བྱེད་པ་དང༌། ཨོཾ་ཝཱ་གི་ཤྭ་རི་མུཾཿ ལ་བྱེད་པ་གཉིས་སྣང་ལ། དེ་ལྟ་བུའི་རྡོ་རྗེའི་ཚིག
གི་སྒྲ་སྒྲོགས་པ་སྟེ། ཡེ་གེ་དེ་དག་མཚོན་དོན་རིགས་དྲུག་གིས་བསྡུས་པའི་སྔགས་ཀྱི་ཐེག་པ་སྟོན་པའི་དོན་ནོ། །དེ་ལྟར་སྒྲོགས་པའི་གསུང་ནི་འཇམ་ཞིང་སྙན་པའི་དབྱངས་ཆེན་པོ་སྟེ། དེའི་སྒྲ་ཆེ་བའམ་མ་ཆོག་ཡིན་ལ། དེ་ནི་ས་འོག་སོགས་འཇིག་རྟེན་གསུམ་ན་སྒྲ་ཇི་སྙེད་ཡོད་པའི་ནང་ནས་
འགྲན་ཟླ་མེད་པས་སྒྲ་གཅིག་པ་ལྟ་བུ་སྟེ་དེ་ཡང་ནམ་མཁའི་མཐའ་ཀླས་ཏེ། ནམ་མཁའི་ཁམས་ལ་མཐའ་མང་བ་ལྟར་མཐའ་དང་བྲལ་བའི་ཚུལ་གྱིས་སྒྲ་སྒྲོགས་པ་བྱེད་པའི་ཕྱིར་ན། སྒྲ་དང་ལྡན་པ་གཞན་རྣམས་ཀྱི་མཆོག་ཅེས་བྱའོ། །འདིར་ཡི་གེ་དྲུག་པ་ནི་ཧཱུཾ་གི་སྒྲ་དྲུག་ལ་བྱས་ནས། དེ་སྒྲོགས་
པ་པོ་ངག་པོ་ཉིད་ལ་སྦྱར་བ་དང༌། ཡི་གེ་དྲུག་སྔར་ལྟར་བྱས་ནས། འཇམ་དབྱངས་ཞེས་པ་འཇམ་དབྱངས་ཉིད་ལ་སྦྱར་བའང་ཡོད་དོ་ཞེས་པ་ནི་ལེའུ་བདུན་པའི་བཤད་པའོ།། །།གསུམ་པ་སོར་རྟོག་ཡེ་ཤེས་ནི། ཡང་དག་བདག་མེད་དེ་བཞིན་ཉིད། །ནས། ཡེ་ཤེས་མི་ལྕེས་འོད་རབ་གསལ།
@018A ༄༅། །ཞེས་སོ། །ཡང་དག་པའི་གནས་ལུགས་ཀྱི་དོན་སྟོང་པ་ཉིད་དེ་ནི། ཆོས་ཀྱི་བདག་དང་གང་ཟག་གི་བདག་མེད་པས་རབ་ཏུ་ཕྱེ་བའི་དེ་བཞིན་ཉིད་ཡིན་པས་དེ་ལ་ཡང་དག་པའི་མཐའ་ཞེས་ཀྱང་བྱ་སྟེ། དེ་ནི་ཡི་གེ་དང་བརྗོད་པའི་སྒྲ་དང་རྟོག་པ་ཙམ་གྱིས་བློ་ཡུལ་དུ་མཚོན་པར་
བྱར་མེད་དེ་རྟོག་གེ་ཙམ་གྱི་ཡུལ་མ་ཡིན་པའི་ཕྱིར་རོ། །འདིར་སངས་རྒྱས་ཀྱི་ཐུགས་རྒྱུད་ལ་མངའ་བའི་དག་པ་གཉིས་ལྡན་གྱི་ཆོས་སྐུ་སྟོང་པ་ཉིད་དང༌། དེ་མངོན་སུཾ་དུ་རྟོགས་པའི་ཡེ་ཤེས་ཀྱི་སྐུ་གཉིས་བསྟན་ཏེ། །དེ་ལྟ་བུའི་སྟོང་པ་ཉིད་སྟོང་པར་བྱེད་པའི་གང་ཟག་མཆོག་ཡིན་པའི་ཕྱིར་
ན་སྨྲ་བའི་ཁྱུ་མཆོག་ཅེས་བྱ་སྟེ། ཟབ་པ་བདག་མེད་བ་ཇི་ལྟ་བ་བཞིན་སྟོན་ཅིང༌། རྒྱ་ཆེ་བ་ཇི་སྙེད་པ་ཐམས་ཅད་དང་ཐབས་ཀྱི་ཕྱོགས་ལེགས་པར་སྟོན་པའི་སྒྲ་སྒྲོགས་པ་སོ། །དེ་ལྟར་སྟོན་པའི་གསུང་ལ་ཆོས་ཀྱི་དུང་ཞེས་བྱ་སྟེ། དེ་ཆོས་ཀྱི་སྒྲ་ཆེན་པོ་སྒྲོགས་པ་དང་ལྡན་པའོ།།
དེ་ཡང་རྗོད་བྱེད་ཀྱི་ངོས་ནས་ཆོས་དུང་བུས་པ་ལྟ་བུའི་སྒྲ་ཆེ་བ་སོགས་དང་བརྗོད་བྱའི་ངོས་ནས་ཟབ་པ་དང་རྒྱ་ཆེ་བ་སྒྲོགས་པའོ། །གསུང་ལ་ཆོས་ཀྱི་གཎྜཱི་སྒྲ་བོ་ཆེ་ཞེས་བྱ་སྟེ། བདུད་དང་མུ་སྟེགས་ཕམ་པར་བྱེད་པའི་གཎྜཱིའི་སྒྲ་ཆེན་པོ་སྒྲོགས་པ་དང་མཚུངས་པའོ། །སྲིད་ཞི་གཉིས་
ཀྱི་མཐའ་ལ་མི་གནས་པའི་མྱ་དན་ལས་འདས་པའི་ཐབས་སྟོན་པར་བྱེད་པ་བོའི་སྒྲ་ཡང་ཡིན་ལ། སྒྲ་ཕྱོགས་བཅུར་སྒྲོགས་པའི་ཆོས་ཀྱི་རྔ་བོ་ཆེ་དང་མཚུངས་པའང་ཡིན་ནོ། །སངས་རྒྱས་ཀྱི་ལོངས་སྐུ་ནི། རྡུལ་ཕྲ་རབ་འདུས་པའི་གཟུགས་མེད་ལ། འོན་ཀྱང་འཇའ་ཚོན་ལྟ་བུའི་
གཟུགས་ཕྲ་བའི་ངག་ཉིད་ཅན་ཡིན་པས་གཟུགས་བཟང་དམ་པ་ཞེས་བྱ་སྟེ། ཤིན་ཏུ་ཕྲ་བའི་རླུང་སེམས་ལས་གྲུབ་པའི་གཟུགས་ལ་མཚན་དཔེགས་ལ་རྫོགས་ཀྱིས་སྤྲས་པའི་ཕྱིར་རོ། །རྒྱ་འགྲེལ་འགའ་ཞིག་ཏུ། གཟུགས་མེད་པ་ནི་ཆོས་སྐུ་དང༌། གཟུགས་བཟང་བ་ནི་ལོངས་སྐུར་
@018B བཤད་པའང་ཡོད་དོ། །ལོངས་སྐུ་དེས་སྤྲུལ་པ་སྣ་ཚོགས་པ་སྟོན་པས་ན་སྣ་ཚོགས་གཟུགས་ཅན་ཤེས་བྱལ། ཡེ་ཤེས་ཀྱི་བདག་ཉིད་ཅན་ལས་གྲུབ་པས་ན་ཡིད་ལས་སྐྱེས་པའོ། །རྡུལ་གཅིག་གི་སྟེང་དུ་ཡང་སྣ་ཚོགས་པའི་གཟུགས་རྣམས་སྟོན་པས་ན་གཟུགས་རྣམས་ཐམས་ཅད་སྣང་
བའི་དཔལ་ཞེས་བྱ་ལ། ཟླ་བའི་གཟུགས་བརྙན་བཞིན་དུ། གདུལ་བྱའི་བསམ་ངོ་དང་མཐུན་པར་སྤྲུལ་བའི་གཟུགས་བརྙན་མ་ལུས་འཆང་བ་པོའོ། །བདུད་དང་བགེགས་སོགས་ཀྱིས་ཚུགས་པ་མེད་ཅིང༌། ལྷ་དང་མི་སོགས་ཀུན་གྱི་ནང་ནས་བསོད་ནམས་དང་ཡོན་ཏན་གྱིས་ཆེ་བར་གྲགས་བློ?་
མ་འོག་སོགས་གསུམ་མམ། འདོད་ཁམས་སོགས་ཁམས་གསུམ་ལ་དབང་ཕྱུག་ཏུ་བྱེད་པའི་ཆེན་པོ་སྟེ། ཁམས་གསུམ་གྱི་བདག་པོ་ཚངས་པ་དང་དབང་ཕྱུག་སོགས་ལས་ཀྱང་མཆོག་ཡིན་པའི་ཕྱིར་རོ། །འཕགས་པའི་ལམ་ཤིན་ཏུ་མཐོ་བ་གཉིས་སུ་མེད་པའི་ཡེ་ཤེས་མཐར་ཐུག་ལ་
གནས་པ་སྟེ། དེ་ལྟ་བུའི་ཡེ་ཤེས་ཀྱི་དད་པ་ཆེན་པོ་ནི་དར་བའམ་རྒྱས་ཞིང་འཕེལ་བའི་མཐར་ཕྱིན་པ་ཡིན་པས་སོ། །དེ་ཆོས་རྣམས་ཀྱི་ནང་ནས་མཆོག་ག་མ་རྩེ་མོ་ལྟ་བུ་ཡིན་པས་ན། དེའི་ཏོག་ཅེས་བྱའོ། །ཁ་ཅིག་དར་པ་ཆེན་པོ་ནི། ལོངས་སྐུ་དང༌། འགའ་ཞིག་ཡེ་ཤེས་ཀྱིས་
མཁྱེན་ཚུལ་རྒྱ་ཆེ་བ་ལ་བཤད་དོ། །མཛད་པ་ནི། འཇིག་རྟེན་གསུམ་ན་གཞོན་ནུ་བཅུ་དྲུག་ལོན་པ་ལྟ་བུའི་ལུས་གཅིག་བ་ལྟ་བུར་སྟོན་པ་དང༌། ཡར་ཧན་ཐོས་ཀྱི་གཟུགས་སུ་གནས་བརྟན་དང་རང་རྒྱལ་ལྷན་པོ་ལྟ་བུར་སྟོན་པ་དང༌། ཚངས་པ་ལ་སོགས་པ་སྐྱེ་དགུའི་བདག་པོ་
དང༌། སུམ་ཅུ་རྩ་གཉིས་ཀྱི་མཚན་འཆང་བའི་བྱང་སེམས་སམ་སངས་རྒྱས་ལྟ་བུ་དང༌། གཞན་གྱི་ཡིང་དུ་འོང་བ་སྡུག་གུའི་གཟུགས་དང་ལྡན་པ། འཇིག་རྟེན་གསུམ་ན་མཛེས་པ་དང༌། འཇིག་རྟེན་ལ་རང་ཉིད་ཀྱིས་ཤེས་པ་ལགས་པའི་ཕྱོགས་སྟོན་པའི་སློབ་དཔོན་དུ་གྱུར་ཏེ། ལམ་
@019A ༄༅། །སྟོན་པ་ན། འཇིག་རྟེན་གྱི་སློབ་དཔོན་དུ་གྱུར་པ་དང༌། ཕས་ཀྱི་རྒོལ་བ་གཞན་གྱིས་འཇིགས་པ་མེད་པ་དང༌། འཇིག་རྟེན་སེམས་ཅན་གྱི་མགོན་དུ་གྱུར་པ་དང༌། དེ་རྣམས་ངན་སོང་ལས་སྐྱོབ་པ་པོར་གྱུར་པ་དང༌། འཇིག་རྟེན་ཐམས་ཅད་ཀྱིས་ཡིད་བཅུགས་པ་སྟེ་ཡིད་མཛའ་བའི་གྲོགས་ལྟ་བུ་དང༌། དེ་དག
སྡུག་བསྔལ་ལས་སྒྲོལ་བའི་སྐྱབས་དང༌། དེའི་ཤེས་རྒྱུད་མི་མཐུན་ཕྱོགས་ལས་སྐྱོབ་པ་པོ་དང༌། ཚུལ་དེ་ལྟར་བྱེད་པ་ལ་གོང་ན་གཞན་མེད་པས་བླ་ན་མེད་པ་ཞེས་བྱའོ། །འདིར་རྒྱ་འགྲེལ་འགའ་ཞིག་ཏུ་སྐུའི་རྣམ་པར་བསྟན་པ་ལམ་བཤད་པར་རྗེ་བཙུན་ཉིད་ལ་དེ་དག་གི་སྒྲ་བཤད་ཀྱི་དབང་དུ་བྱས་ནས་བཤད་ལ་ལར་དབང་
བཞིའི་སྐབས་སུ་དང༌། དེའི་སློབ་དཔོན་གཉིས་སྦྲེལ་ནས་སྟོན་པའི་དོན་དུ་བཤད་དེ། ཕྱི་མ་ནི་སྦས་དོན་དུ་བྱས་ཀྱང་མི་འགལ་ལ། སློབ་དཔོན་ནི་འཇིག་རྟེན་ཤེས་ལེགས་ཞེས་སོགས་རྐང་པ་བཞི་འཆད་པར་འདོད་དོ། །ཆོས་ཀྱི་སྐུ་ནམ་མཁའ་ལྟ་བུའི་མཐའ་ལ་ལོངས་སྤྱོད་པར་བྱེད་ཅིང༌། ཤེས་བྱ་ཐམས་ཅད་མངོན་
སུམ་དུ་མཁྱེན་པའི་ཡེ་ཤེས་ཀྱི་འབྱུང་གནས་ཡིན་པའི་ཕྱིར་ན་རྒྱ་མཚོའོ། །ཡང་ན་རྒྱ་མཚོ་ནི་མང་ཚིག་སྟེ། ཡེ་ཤེས་མང་དུ་མངའ་བའི་དོན་ནོ། །བྱ་སྒོ་ངའི་ནང་ནས་འདོན་པ་ལྟར། གདུལ་བྱ་མ་རིག་པའི་སྒོ་ངའི་སྦུབས་ན་འདུག་པའི་སྒོ་འབྱེད་པར་མཛད་ཅིང༌། དེ་ལ་ཕྱིར་བཏོན་ནས་ཐར་བ་ལ་འགོད་པར་བྱེད་དོ། །
སྲིད་པ་སྡེ་འཁོར་བའི་དྲ་བ་ལས་དང་ཉན་མོངས་པ་ཐམས་ཅད་འཇོམས་པར་བྱེད་པ་པོ་ཞེས་བྱ་སྟེ། རྩ་བ་དང་ཉེ་བའི་ཉོན་མོངས་པ་མ་ལུས་པ་ཞི་བར་བྱེད་པས་སོ། །ལས་དང་ཉོན་མོངས་པའི་དབང་གིས་ཉིང་འཆམས་སྦྱར་བ་འཁོར་བའི་རྒྱ་མཚོའི་ཕ་རོལ་ཏུ་སོན་པ་སྟེ་ཕྱིན་ནས་ཐར་པ་བླ་ན་མེད་པའི་སྐམ་པར་
གནས་པའོ། །འདི་དག་གིས་སྦས་དོན་དུ་བླ་མས་དབང་གསུམ་པ་དང་བཞི་པ་བསྐུར་ནས་འཁོར་བ་ལས་གྲོལ་བར་བྱེད་པའི་ཚུལ་ཞིག་བསྟན་པར་བཤད་དེ། ཡེ་ཤེས་དབང་བསྐུར་ཞེས་པ་ཡང་དབང་དེ་གཉིས་ལ་བྱེད་དོ། །འོན་ཀྱང་འདི་ལྟར་བྱ་སྟེ། མེ་ལོང་ལྟ་བུའི་ཡེ་ཤེས་སོགས་ཡེ་ཤེས་ལྔ་དང་ལྡན་པ་
@019B ཉིད་མཚོན་པའི་ཕྱིར་སངས་རྒྱས་རིགས་ལྔ་རང་གི་སྤྱི་བོར་དབང་བསྐུར་བའི་ཅོད་པན་ཅན་དུ་ཐོགས་པ་སྟེ། རྫོགས་པའི་སངས་རྒྱས་རྒྱན་དུ་ཐོགས་ཞེས་སོ། །སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་ཏེ་སྡུག་བསྔལ་གསུམ་གྱི་སྡུག་བསྔལ་
མ་ལུས་པ་ཞི་བར་བྱེད་པ་དང་ཆགས་སོགས་དུག་གསུམ་སེལ་བར་བྱེད་ཅིང༌། མཐའ་ཡས་པའི་འགྲོ་བ་རྣམས་ནི་ཆོས་སྐུ་ལོངས་སྐུ་སྤྲུལ་སྐུ་སྟེ་གྲོལ་བ་གསུམ་ཐོབ་པར་མཛད་དོ། །གྲོལ་གསུམ་ནི་ཉན་ཐོས། རང་རྒྱལ། བྱང་སེམས་ཀྱི་གྲོལ་བ་ལ་བཤད་པ་དང༌། གྲོལ་གསུམ་ཐོབ་པ་གདུལ་བྱས་
ཐོབ་འགྱུར་ལ་མི་བྱེད་པར་སངས་རྒྱས་ཀྱིས་ཐོབ་ཟིན་པ་ལ་བཤད་པའང་སྣང་ངོ། །ཉོན་མོངས་པ་དང་ཤེས་བྱའི་སྒྲིབ་པ་ཀུན་ལས་ངེས་པར་གྲོལ་ནས་ནམ་མཁའ་ལྟར་ཁྱབ་པའི་ཆོས་ཀྱི་དབྱིངས་མཉམ་པ་ཉིད་ལ་གནས་པའི་ཕྱིར་ན། ཉོན་མོངས་པ་དང་དྲི་མ་ཀུན་ལས་འདས་པའི་བདག་ཉིད་ཅན་ཞེས་བྱའོ། །ཇི་ལྟ་བ་
གཟིགས་པའི་མཉམ་བཞག་གི་གཟིགས་ངོར་འདས་མ་འོངས་ད་ལྟའི་དུས་གསུམ་དུས་ཀྱི་རང་བཞིན་དུ་གྲུབ་པ་མེད་པར་རྟོགས་པ་པོ་དང༌། སྤངས་པ་དང་རྟོགས་པའི་ཁྱད་པར་དེ་དག་གིས་སེམས་ཅན་ཀུན་གྱི་གཙོ་བོ་ཆེན་པོར་གྱུར་པ་དང༌། ཡོན་ཏན་གྱི་ཐོད་ཅན་ཉན་རང་བྱང་སེམས་རྣམས་ཀྱིའང?་ཐོད་དུ་གྱུར་པ་སྟེ།
མགོ་བོའི་ཐོད་བཞིན་དུ་བཀུར་བའི་གནས་མཆོག་ཏུ་གྱུར་པའོ། །ཉོན་མོངས་པ་བག་ཆགས་དང་བཅས་པ་ཀུན་ལས་རྣམ་པར་གྲོལ་བའི་ཆོས་སྐུ་ཐོབ་ཅིང༌། ནམ་མཁའི་ལམ་དང་མཚུངས་པའི་ཡེ་ཤེས་ཀྱི་སྐུ་ལ་རབ་ཏུ་གནས་པ་སྟེ་སྤངས་རྟོགས་ཕུན་སུམ་ཚོགས་པ་གཉིས་རྫོགས་པའོ། །འདིར་ཉོན་མོངས་ཀུན་ལས་
རྣམ་གྲོལ་བ། ཞེས་པ་ནི་རྒྱ་འགྲེལ་འགའ་ཞིག་ཏུ། ལུས་ཅན་ཀུན་ལས་རྣམ་གྲོལ་བ། ཞེས་བཏོན་ནས་བཤད་ཅིང༌། སེམས་ཅན་ཀུན་གྱི་གཙོ་བོ་ཆེ་ཞེས་པའང༌། གཙོ་བོ་ནི་ཀླུ་ཞས་བྱས་ནས་བཤད་པའང་སྣང་ངོ། །ཆོས་སྐུ་དེ་ལྟ་བུ་བརྙེས་ནས་འཕྲིན་ལས་ནི། ཡིད་བཞིན་གྱི་ནོར་བུ་རིན་པོ་ཆེ་ཆེན་པོ་ཆེ་ལ་གང་གིས་
@020A ༄༅། །གསོལ་བ་བཏབ་ན། ནོར་བུ་ངེ་ལས་དངོས་གྲུབ་འབད་མེད་ལྷུན་གྲུབ་ཏུ་འབྱུང་བ་ལྟར། མཛད་པ་འཕྲིན་ལས་ཀྱང་གདུལ་བྱ་ལ་འབད་མེད་ལྷུན་གྲུབ་ཏུ་བྱེད་པ་འཆང་ངོ། །རྒྱ་མཚན་དེ་ཉིད་ཀྱིས་ནི། རིགས་ཀྱི་ཁྱབ་བདག་དེ་ནི་རིན་ཆེན་ཀུན་གྱི་ནང་ནས་མཆོག་ཡིན་ནོ། །དེར་མ་ཟད། དཔག་བསམ་གྱི་
ཤིང་ཆེན་པོ་རྒྱས་པ་སྟེ་ཞེས་ཀྱང་བྱ་ལ། འདོད་རྒུ་འབྱུང་བའི་བུམ་པ་བཟང་པོ་ཆེ་བའི་མཆོག་དང༌། མཚུངས་པ་ཞེས་ཀྱང་བྱ་སྟེ། འཕྲིན་ལས་འབད་མེད་ལྷུན་གྲུབ་ཏུ་བྱེད་པར་ཆོས་མཐུན་པའི་ཕྱིར་རོ། །འཕྲིན་ལས་བྱེད་པོ་སྐར་ཡིན་པ་དེ་རང་དོན་དུ་མ་ཡིན་པར་སེམས་ཅན་ཀུན་གྱི་དོན་བྱེད་པ་ཡིན་པ། སེམས་ཅན་རྣམས་
ལ་ཕན་པར་འདོད་པའི་བྱམས་པ་དང་ལྡན་པའི་ཕྱིར་ན། སེམས་ཅན་གྱི་གཉེན་གཤིན་པའི་མ་ལྟ་བུའོ། །བཟང་བ་སྟེ་གདུལ་བྱ་སྐལ་བ་ལྡན་པ་དང་ལེགས་པའི་ཕྱོགས། ངན་པ་དེ་ལས་བཟློག་པའི་ཚུལ་རྣམས་ཤེས་ཤིང༌། འདུལ་བའི་དུས་ཀྱང་ཤེས་པའོ། །ཁྱབ་བདག་དེས་རང་ཉིད་སེམས་ཅན་གྱི་དོན་བྱེད་པར་དམ་
བཅས་པ་ཤེས་ནས་དམ་བཅས་པ་དེ་ལས་མི་འདའ་བས་ན། དམ་ཚིག་དང་ལྡན་པ་ཞེས་བྱའོ། །གདུལ་བྱའི་ཚེ་སྔོན་དང་ཕྱི་མའི་དུས་ཀྱི་ཁྱད་པར་རྣམས་ཤེས་ཤིང༌། སེམས་ཅན་དེ་དག་གི་ཁམས་དང་དབང་པོ་རྣོ་རྟུལ་གྱི་རིམ་པ་རྣམས་ཀྱང་ཤེས་པའི་སྒོ་ནས་སེམས་ཅན་གྱི་དོན་ཚུལ་བཞིན་ཕྱེད་པའོ། །ཉན་ཐོས་
དང་རང་སངས་རྒྱས་དང་སངས་རྒྱས་གསུམ་གྱི་རྣམ་གྲོལ་གསུམ་གྱི་ཁྱད་པར་ལ་མཁས་པ་པོ་ཞེས་བྱ་ལ། རང་ཉིད་སྤངས་རྟོགས་ཡོངས་སུ་རྫོགས་པའི་ཡོན་ཏན་དང་ལྡན་ཞིང༌། གཞན་རྒྱུད་ཀྱི་ཡོན་ཏན་རྣམས་ཀྱང་ཇི་ལྟ་བ་བཞིན་དུ་ཤེས་སོ། །དགེ་མི་དགེའི་བླང་དོར་གྱི་ཆོས་ཤེས་ནས་མི་དགེ་བ་དོར་ཏེ་བཀྲ་
ཤིས་པའི་དགེ་བ་བསྒྲུབས་པ་ལས་བཀྲ་ཤིས་པ་བདེ་འགྲོ་ལྷ་མིའི་རྟོན་ཐོབ་པར་འབྱུང་བ་ཤེས་ཤིང༌། དེ་ལྟ་བུའི་རྟེན་བཀྲ་ཤིས་པ་ཐོབ་པའི་ཚེ་ལེགས་ཚོགས་ཀུན་གྱི་བཀྲ་ཤིས་པ་དེ་ཡང་འབྱུང་བ་དང་དེ་དག་གི་ཚེ་གྲགས་པའི་བཀྲ་ཤིས་སྙན་གྲགས་དགེ་བ་བཟང་པོ་འཐོབ་པར་འགྱུར་བའང་ཤེས་སོ། །སྡུག་བསྔལ་
@020B གྱིས་མནར་ནས་དབུགས་མ་ཕྱིན་པའི་སེམས་ཅན་རྣམས་དེ་ལས་སྐྱོབ་པའི་ཚུལ་གྱིས་དབུགས་འབྱིན་པ་ཆེན་པོ་བྱེད་ལ། དེ་ནིས་བདེ་བའི་དགའ་སྟོན་ཆེ་ལ་སྦྱོར་རོ། །དེ་ནས་ཀྱང་ཆོས་ཀྱི་དགའ་བ་ཆེན་པོའི་རོལ་མོ་ཟག་མེད་ཀྱི་བདེ་བ་ཆེན་པོ་སྟེ་བླ་ན་མེད་པའི་གོ་འཕང་ལ་འགོད་པར་བྱེད་དོ། །མཆོད་པར་བྱ་བ་སོགས་
འོས་བས་ན་བཀུར་སྟི་བྱར་འོས་པ་དང༌། ཚུལ་དེས་བསྟེན་པར་བྱ་བས་རིམ་འགྲོ་ཕུན་སུམ་ཚོགས་པར་བྱར་འོས་པའོ། །འགྲོ་བའི་དོན་ལ་ཟག་མེད་ཀྱི་བདེ་བ་ཐོབ་པས་ན་མཆོག་ཏུ་དགའ་བ་དང་ལྡན་ལ། ཕྱོགས་སུ་ཁྱབ་པའི་གྲགས་པ་དག་གི་དཔལ་ཕུན་སུམ་ཚོགས་པ་ཐོབ་པའོ། །རང་ཡོན་ཏན་གྱི་མཆོག་སྤངས་
རྟོགས་ཕུན་སུམ་ཚོགས་པ་དང་ལྡན་ལ། གཞན་དག་ལ་ཡོན་ཏན་གྱི་མཆོག་དེ་སྦྱིན་པར་བྱེད་པའོ། །དེ་ལྟར་མཆོག་སྦྱིན་པ་ཀུན་གྱི་ནང་ནས་གཙོ་བོ་སྟེ། ཁྱད་པར་དུ་འཕགས་པའོ། །སྐྱབས་གཞན་ལས་མཆོག་ཏུ་གྱུར་པས་ན་སྐྱབས་ཀྱི་དམ་པ་ཞེས་བྱ་བ་ལ། རྒྱུ་མཚན་དེ་ཉིད་ཀྱི་ཕྱིར། ཀུན་གྱི་སྐྱབས་སུ་འོས་པོ།།
བདུད་སོགས་དང་ལས་ཉོན་སྡུག་བསྔལ་སོགས་ཀྱི་འཇིགས་པ་ཆེན་པོ་ཐམས་ཅད་འཇོམས་པར་བྱེད་པའི་ཕྱིར་ན། དེའི་དགྲ་ཞེས་བྱ་སྟེ་རབ་ཉན་རང་བྱང་སེམས་རྣམས་ཀྱིའང་མཆོག་གོ །འགའ་ཞིག་ཏུ་རབ་དང་མཆོག་གི་དོན་དུ་བཤད། འཁོར་བ་དང་ངན་སོང་གི་འཇིགས་པ་མ་ལུས་པ་སེལ་བ་པོ་ཞེས་བྱ་ལ། ཁ་ཅིག
སྟག་དང་སེངྒེ་སོགས་ཀྱི་འཇིགས་པ་ལས་སྐྱོབ་པར་བྱེད་པའི་ཕྱིར་ན། དེ་ལྟར་བརྗོད་ཅེས་འདོད་དོ། །བཤད་ཅིང་འཆད་འགྱུར་འདི་དག་གི་སྐབས་སུ་རྗེ་བཙུན་གང་ལ་གང་འདུལ་དེ་དང་དེ་དག་གི་གཟུགས་སྤྲུལ་ནས་དེ་དང་དེའི་དོན་བྱེད་པར་འཆད་པ་དང༌། ལྷ་བསྒོམ་པའི་དུས་སུ་ཆས་འཇུག་བྱེད་ཚུལ་དང༌།
སྤྱི་བོའི་རྩ་འདབ་ཀྱི་གནས་སྟོན་པ་སོགས་འཆད་ཚུལ་མང་དུ་སྙང་ཡང༌། འདི་ལྟར་བྱ་སྟེ། སྤྱི་བོའི་གནས་སུ་དབུ་སྐྲ་གྱེན་དུ་བཅིངས་པའི་གཙུག་ཕུད་དབུས་མ་དང༌། དེའི་གཡས་གཡོན་སོགས་ལ་བཅིངས་པའི་ཕུད་བུ་དང༌། མཐོན་མཐིང་ལྟ་བུའི་ལྗང་ལོ་ཅན་གྱི་རལ་པ་ནུཉྩའཾ?་གྲོལ་བ་ཐོར་ཅོག་གྲོལ་བའི་དོན་དུ་བཤད་
@021A ༄༅། །པ་དང༌། རྐང་མགོར་སླེབ་པའི་རལ་བའི་ལྷག་མ་སྐ་རགས་སུ་བྱས་པ་དང༌། རལ་བའི་ཐོར་ཅོག་སྤྱི་བོར་བཅིངས་པ་ལའང་བཤད་པ་སོགས་སམ། ཐོར་ཅོག་གྲོལ་བ་སོ་སོར་ཡོད་པའི་དོན་དུ་བྱས་ན་ལེགས་སྙམ་མོ། །དེ་ལྟ་བུའི་རལ་པའི་ཐོར་ཆོག་ལྔ་སྤྱི་བོར་ཅོད་པཎ་དུ་ཐོགས་ཤིང༌། གདོང་ལྔ་སྟེ་ཡེ་ཤེས་
ལྔ་མཚོན་པའི་གཙུག་ཕུད་ལྔ་དང་ལྡན་པ་དང༌། གཙུག་ཕུད་དམ་ཟུར་ཕུད་ལྔ་པ་ཅན་དང་མེ་ཏོག་གི་རྒྱན་ཐོད་དུ་བཅིངས་པའོ། །ཁ་ཅིག །གདོང་ལྔ་བཞས་ཚངས་པའི་རྣམ་པར་སྤྲུལ་ནས་སེམས་ཅན་གྱི་དོན་བྱེད་པར་འཆད་ལ། ལ་ལ་གཙུག་ཕུད་ཅེས་སོགས་ཀྱིས་བྱིས་བ་ལྟ་བུའི་གཟུགས་ཀྱིས་སེམས་ཅན་གྱི་དོན་
བྱེད་པ་ལའང་བཤད་དོ། །མགོ་ཟླུམ་ཞེས་པ་ནི་མགོ་རེག་ཅེས་པ་ཡིན་ལ། དེ་ཡང་མགོའི་སྐྲ་བྲེགས་པའི་དགེ་སྦྱོང་གི་སྤྱོད་པ་ལ་གནས་པའི་དོན་གྱིས་བརྟུལ་ཞུགས་ལ་གནས་པ་ཞེས་བྱའོ། །སྦས་དོན་ལ་གསང་སྔགས་ཀྱི་སྤྱོད་པ་ལ་གནས་པ་སྟེ། ཧེ་རུ་ཀའི་བརྟུལ་ཞུགས་ལ་གནས་པར་ཡང་བཤད། དེ་ལྟ་བུའི་
བརྟུལ་ཞུགས་དེ་ནི། བརྟུལ་ཞུགས་གཞན་རྣམས་ཀྱི་མཆོག་ཡིན་པས་ན་ཆེན་པོ་སྟེ་ཞེས་བྱ་ལ། དགེ་སྦྱོང་གི་ཚུལ་གྱིས་མི་ཚངས་པར་སྤྱོད་པ་སྤངས་པའི་ཚངས་པར་སྤྱོད་པ་གནས་པས། ཚངས་སྤྱོད་ཀྱི་བརྟུལ་ཞུགས་དེ་ནི་བརྟུལ་ཞུགས་གཞན་རྣམས་ཀྱི་མཆོག་གོ །བཟོད་པ་ལ་སོགས་པའི་དཀའ་ཐུབ་མ་ཧཱ་
དག་མཐར་ཕྱིན་པའི་དཀའ་ཐུབ་ཆེན་པོ་འཇིག་རྟེན་ལས་འདས་པའི་དཀའ་ཐུབ་ལ་གནས་པའོ། །འདིར་སྟོན་པ་ཤཱཀྱ་ཐུབ་ཀྱིས་དཀའ་ཐུབ་ལོ་དྲུག་ཏུ་མཛད་པ་ལྟར། རྗེ་བཙུན་གྱིས་ཀྱང་དཀའ་ཐུབ་མཛད་ནས་སེམས་ཅན་གྱི་དོན་བྱེད་པ་ལ་བཤད་པའང་སྣང༌། ཕྱིའི་སྤྱོད་པ་གཙང་བ་དང་ནང་གི་རྐྱད་ཉོན་མོངས་བདག
པ་ན། གཙང་གནས་དམ་པ་ཞེས་བྱ་ལ། དེའི་སྒོ་ནས་གོའུ་ཏཾ་སྟེ་རིགས་མཆོག་ཞེས་པ་ནི། ཤཱཀྱ་ཐུབ་པ་དང་མཚུངས་པའོ། །ཕྱི་ནང་གི་གཙང་སྦྲ་ལ་གནས་པས་ན་བྲམ་ཟེ་སྟེ། ཉོན་མོངས་པ་སྤངས་པས་ཚངས་པ་དང༌། ཤེས་བྱའི་སྒྲིབ་པ་སྤངས་པས་ཚངས་པ་ཆེན་པོ་སྟེ། དེ་གཉིས་ཀྱི་ཚུལ་མངོན་སུམ་དུ་ཤེས་ནས།
@021B དེ་ལྟ་བུའི་མྱ་ངན་ལས་འདས་པ་ཚངས་པ་མཐར་ཐུག་པ་དེ་ཉིད་ཐོབ་པའོ། །སྐབས་འདི་དག་ལ་བཤད་པ་མི་འབྲབ་མང་སྟེ། ཁ་ཅིག་ཚངས་པ་ནི། ལྷའི་རྒྱལ་པོ་ཚངས་པར་སྤྲུལ་ནས་སེམས་ཅན་གྱི་དོན་བྱེད་པ་དང༌། ལ་ལ་ཆོས་ཀྱི་དབྱིངས་མཁྱེན་བས་ཚངས་པ་དང༌། གཉིས་སུ་མེད་པའི་ཡེ་ཤེས་མཁྱེན་པས་ཚངས་བ་
ཆེན་པོ་ཞེས་དང༌། ཁ་ཅིག་སྔར་ལྟར་འཆད་པ་སོགས་མང་དུ་སྣང་ངོ། །དེ་དག་ཀྱང་འདིའི་དོན་ཡིན་པར་མི་འགལ་ཏེ། གཞན་དུ་ན་པཎ་ཆེན་དེ་དག་གིས་ཀྱང་རང་དགར་བཤད་པར་ཐལ་བའི་ཉེས་པ་ཡོད་དོ། །འཁོར་བའི་འཆིང་བ་ལས་གྲོལ་བ་དང༌། ཤེས་བྱའི་སྒྲིབ་པ་ལས་ཐར་པའི་རྣམ་གྲོལ་གྱི་ལུས་ཏེ་སྐུ་ཐོབ་པའོ། །
དེ་ལྟ་བུའི་རྣམ་གྲོལ་དེ་ནི། སྲིད་མཐའ་ལ་མེ་གནས་པས་ན་ཞི་བ་དང་ཞི་མཐའ་ལ་མི་གནས་པས་ན་ཞི་བ་ཉིད་ཅེས་བྱའོ། །ཡང་ན། ཞི་བ་དང་པོ་ནི་བདེན་གྲུབ་ཀྱི་སྤྲོས་པ་ཞི་བ་དང༌། གཉིས་པ་མཚན་འཛིན་གྱི་སྤྲོས་པ་ཞི་བའམ། ཡང༌། དང་པོ་ནི། ལས་ཉོན་ཞི་བ་དང༌། ཕྱི་མ་ནི་མ་རིག་པཱི་བག་ཆགས་ཞི་བ་ལ་བཤད་པ་ལྟར་
རོ༑ ༑ཉོན་མོངས་པ་སྤངས་པའི་ཉན་ཐོས་ཀྱི་མྱ་ངན་ལས་འདས་པ་ཞི་བ་དང༌། རང་སངས་རྒྱས་ཀྱི་མྱ་ངན་ལས་འདས་པ་དང༌། ལེགས་པར་མྱ་ངན་འདས་པ་སངས་རྒྱས་ཀྱི་ཆོས་སྐུ་དང་ཉེ་བ་བྱང་སེམས་ཀྱི་མྱང་འདས་ཡིན་ལ། དེ་དག་ནི་ཉོན་མོངས་པ་སྤངས་པ་ཙམ་ཡིན་གྱི། འགྲོ་བ་ཐམས་ཅད་ཀྱི་གནས་སྐབས་
དང་མཐར་ཐུག་གི་བདེ་བ་མཐའ་དག་སྒྲུབ་པ་དང༌། སྡུག་བསྔལ་མཐའ་དག་སེལ་བ་མཐར་ཕྱིན་པར་གྱུར་པ་ནི་སངས་རྒྱས་ཉིད་ཡིན་ནོ། །བཤད་མཐག་པའི་ཆགས་བྲལ་ཉན་རང་གི་མྱང་འདས་ལ་གནས་པའི་དམན་པའི་ལུས་འདས་པ་པོ་སངས་རྒྱས་ཀྱི་ཆོས་ཀྱི་སྐུ་ནི། གནོད་པས་མི་ཐུས་པས་ཐུབ་པ་མེད་པ་དང༌།
གནས་ཚུལ་ཇི་བཞིན་མཚོན་པའི་དཔེ་མེད་པ་དང༌། གཏིང་ཟབ་པས་ན་མེ་མངོན་པ་དང༌། དབང་པོའི་ཤེས་པའི་ཡུལ་མིན་བསན་མི་སྣང་བ་དང༌། རང་བཞིན་གྱིས་འོད་གསལ་བ་ཡིན་གྱི། རྐྱེན་གཞན་གྱི་གསལ་བྱེད་ལ་བལྟོས་པ་མིན་པའོ། །གཞན་ཡང༌། ཆོས་སྐུ་སྟོང་པ་ཉིད་དེ་ཆ་མེད་ཅེས་པ་ལྟར་ན། གཟུགས་
@022A ༄༅། །ཅན་ལྟར་ཕྱོགས་ཀྱི་དབྱེར་བ་མེད་པ་དང༌། མི་འགྱུར་ཞེས་པ་ལྟར་ན། ངོ་བོ་མི་འགྱུར་བས་གནས་པའོ། །ནམ་མཁའ་ལྟར་ཀུན་དུ་ཁྱབ་པའི་ཚུལ་གྱིས་འགྲོ་ཞིང་ཁྱབ་པ་པོ་དང༌། རྟོགས་པར་དཀའ་བའི་ཕྱིར་ཕྲ་མོ་དང༌། མ་རིག་པ་སོགས་ཀྱི་ས་བོན་གྱི་ཟག་པ་མེད་པ་དང༌། རང་གི་ངོ་བོ་ལ་དྲི་མ་མ་
ཞུགས་པས་ན། རྡུལ་མེད་པས་རང་བཞིན་རྣམ་དག་དང༌། གློ་བུར་གྱི་དྲི་མའི་རྡུལ་དང་བྲལ་ཞིང་དྲི་མ་མེད་པས་གློ་བུར་རྣམ་དག་དང་ལྡན་ལ། གློ་བུར་གྱི་དྲི་མ་ཉོན་མོངས་པའི་ཉེས་པ་སྤངས་པ་དང༌། ཤེས་བྱའི་སྒྲིབ་པའི་སྐྱོན་མེད་པའོ། །སྒྲིབ་གཉིས་ཀྱི་རྨོངས་པའི་གཉིད་ལས་ཤིན་ཏུ་སད་པའི་ཡེ་ཤེས་ཀྱིས་
ཤེས་བྱ་ཐམས་ཅད་མངོན་སུམ་གཟིགས་པས་ན། སད་པའི་བདག་ཉིད་ཅན་ནོ། །ཡེ་ཤེས་དེས་ཇི་ལྟ་བ་ཀུན་ཤེས་ཤིང་ཇི་སྙེད་པ་ཀུན་རིག་པ་དང༌། དམ་པ་པོ་སྟེ་མཆོག་ཅེས་བྱའོ། །ཡེ་ཤེས་དེ་ནི་ཕྱི་རོལ་གྱི་ཆོས་སུམ་ཟད། ནང་རྣམ་པར་ཤེས་པའི་ཆོས་ཉིད་ལ་བདེན་པར་འཛིན་བ་ལ་འདས་ནས། ཡེ་ཤེས་མཐར་ཐུག
གཉིས་སུ་མེད་པའི་ཡེ་ཤེས་ཀྱི་ཚུལ་འཆད་པའོ། །ཡེ་ཤེས་དེ་ཉིད་ཀྱི་འཕྲིན་ལས་རྣམ་པར་རྟོག་པ་མེད་པ་སྟེ། འབད་རྩོལ?་མེད་པར་ལྷུན་གྱིས་གྲུབ་པར་འབྱུང་ངོ། །འདས་མ་འོངས་ད་ལྟའི་དུས་གསུམ་གྱི་སངས་རྒྱས་རྣམས་ཀྱང་འཕྲིན་ལས་དེ་ལྟ་བུས་སེམས་ཅན་གྱི་དོན་བྱེད་པའོ། །རྒྱ་འགྲེལ་ཁ་ཅིག་ཏུ། རྗེ་བཙུན་
གྱིས་དུས་གསུམ་གྱི་སངས་རྒྱས་ཐམས་ཅད་ཀྱི་འཕྲིན་ལས་བྱེད་པར་འཆད་ལ་འགལ་ཞིག་ཏུ། དུས་གསུམ་རྒྱུན་མི་འཆད་པར་ཡེ་ཤེས་ཆོས་སྐུའི་བདག་རྐྱེན་ལས་སངས་རྒྱས་ཀྱི་འཕྲིན་ལས་འབྱུང་བར་བཤད། སངས་རྒྱས་ཀྱི་ཆོས་སྐུ་སྟོང་བ་ཉིད་ནི། ནམ་མཁའ་ལྟར་ཁྱབ་པའི་ཕྱིར་ཐོག་བའི་མཐའ་དང༌། ཐ་མའི་མཐའ་
མེད་པ་ཞེས་བྱ་སྟེ། སེམས་ཅན་ཐམས་ཅད་ཀྱི་སེམས་རང་བཞིན་གྱིས་རྣམ་པར་དག་པ་གློ་བུར་གྱི་དྲི་མ་དང་བྲལ་བའོ་ཚེ་ཆོས?་ཀྱི་སྐུར་གྱུར་པའི་ཕྱིར་རོ། །དེ་ཡང་སེམས་ཅན་དང་སངས་རྒྱས་གཉིས་ཀའི་སེམས་རང་བཞིན་བྱིས་རྣམ་པར་དག་པ་རིགས་གཅིག་པ་ལ་དགོངས་སོ། །ཡང་ཐོག་མར་སངས་རྒྱས་པའི་ཚེག་སར་དུ་
@022B ཐོབ་པའི་ཆོས་ཀྱི་སྐུ་ནི། དང་པོའི་སངས་རྒྱས་ཡིན་ལ། དེ་ནི་འཇིག་པ་མེད་པའི་འདུས་མ་བྱས་ཡིན་པའི་ཕྱིར། སྐྱེ་བྱེད་ཀྱི་རྒྱུ་མེད་པའོ། །ལ་ལར་རེས་མེད་པའི་དོན་དུ་འཆད་དེ། དེ་ཡང་ཐོག་མའི་སངས་རྒྱས་དེ་ཉིད། རིགས་གཞན་གྱི་འབྱིན་པ་བོ་ཡིན་པས་ད་ནི་རིགས་ཐམས་ཅད་ལ་ཁྱབ་པའི་རིས་སུ་མ་ཆད་
པའོ་ཞེས་བཤད། དེའི་ཐུགས་གཉིས་སུ་མེད་པའི་ཡེ་ཤེས་ཀྱི་མིག་རྣམས་ནི་གཅིག་ཏུ་དྲི་མ་མེད་པར་མཚུངས་པ་ཁོ་ནའོ། །གཅིག་ཅེས་པའི་དོན་ནི། སྟོང་པ་ཉིད་དང་རོ་གཅིག་ཏུ་ཞུགས་པའི་ཡེ་ཤེས་སམ། གཉིས་སུ་མེད་པའི་ཡེ་ཤེས་ཞེས་བྱ་བའང་ཡིན་ནོ། །དེ་ལྟ་བུའི་ཡེ་ཤེ་སྡང་ངོ་གཅིག་པའི་
སྐུ་གང་ལ་ལྡན་པ་ནི། ཡེ་ཤེས་ཀྱི་ལུས་ཅན་ཏེ། དེ་ནི་དེ་བཞིན་གཤེགས་བ་ཞེས་བྱའོ། །འདི་དག་གིས་རྗེ་བཙུན་ཉིད་ཀྱི་དེ་མངོན་དུ་བྱས་པར་དོན་གྱི་བསྟན་ཏོ། །ཡེ་ཤེས་ཀྱི་སྐུ་ཅན་དེའི་གསུང་ཡང་འདི་ལྟ་བུ་དང་ལྡན་པ་འབྱུང་བ་སྟེ། སྐད་ཐམས་ཅད་ཀྱི་ཆོས་སྟོན་པས་ཚིག་གི་དབང་ཕྱུག །བརྗོད་པ་རྣམས་ལ་
ཐོགས་པ་མེད་པས་སྨྲ་བ་ཆེན་པོ། །སྨྲ་བ་པོ་ཐམས་ཅད་ཀྱི་མཆོག་ཡིན་པས་སྨྲ་བའི་སྐྱེས་མཆོག། སྨྲ་བ་ལ་འགྲན་ཟླ་མེད་པས་སྨྲ་བའི་རྒྱལ་པོ། །ཆོས་སྨྲ་བ་ཐམས་ཅད་ཀྱི་ནང་ནས་སྨྲ་བའི་དམ་པར་གྱུར་པས་སྨྲ་བའི་དམ་པ། བླ་ན་མེད་པའི་གོ་འཕང་ཐོབ་བྱེད་ཀྱི་ཐབས་སྟོན་པས་མཆོག་གི་གནས། སྨྲ་
བའི་ཚེ་གཞན་ལ་འཇིགས་པ་མེད་པས་སྨྲ་བའི་སེངྒེ། རྒོལ་བ་གཞན་གྱིས་གླགས་མི་ནུས་པས་ཚུགས་བ་མེད་པའོ། །དེ་དག་ལ་མུ་སྟེགས་ཚངས་པ་སོགས་དང༌། ཉན་རང་གི་སྨྲ་བ་ལས་ཁྱད་པར་འཕགས་ཚུལ་སོ་སོར་སྦྱར་ནས་བཤད་པའང་སྣང་སྐུའི་ཆེད་ནི། འགྲོ་བ་གཞན་གྱིས་ཀུན་ཏུ་ལྟ་བ་སྟེ་ལེགས་པར་
བལྟས་ན་མཆོག་ཏུ་དགའ་བ་ཐོབ་པའོ། གཅིག་ཏུ་ཤུགས་རྗེས་འགྲོ་བ་ལ་བལྟ་བ་དང༌། ལ་ལར་སྟོང་ཉིད་ལ་ལྟ་བར་དགའ་བའི་དོན་དུའང་འཆད་དོ། །སྐུ་ལ་གཟིག་བརྗིད་ཀྱི་འཕྲེང་བ་འབར་བས་ལྟ་ན་མྱུར་པ་སྟེ་མ་ཐོང་ན་དགའ་བ་དང༌། སྐུ་ལས་འོད་ལྔེའི་ཁོ་དོན་བཟང་པོ་འབང་བ་སྟེ་འཕྲོ་ཞིང༌། ཐུགས་ཀ་ནི་དཔལ་གྱི་
@023A ༄༅། །བེའུས་བརྒྱན་པ་སྟེ་མཚན་གཞན་ཡང་མཚོན་ནོ། །ལག་ན་འོད་འབར་སྣང་བ་པོ་ནི། ཕྱག་ལས་འོད་ཟེར་འབར་བ་ལ་འཆད་པ་དང༌། དེ་ལས་གཞན་དུ་བཤད་པའང་ཡོད། སེམས་ཅན་གྱི་ཉོན་མོངས་པའི་ནད་སེལ་བས་ན་སྨན་པ་ཆེན་པོ། །སྡུག་བསྔལ་གསུམ་གྱི་ནད་ཐམས་ཅད་བཞི་བར་བྱེད་བས་ན་མཆོག །
དེ་ལྟར་བྱེད་པ་ཀུན་གྱི་ནང་ནས་གཙོ་བོ་སྟེ། སྡུག་བསྔལ་གྱི་ཟུག་རྔུ་མ་ལུས་(BDRU)ང་ནས་འབྱིན་པ་ལ་བླ་ན་མེད་པའོ། །སྨན་རྣམས་མ་ལུས་པ་འབྱུང་བའི་ལྗོན་པའི་ཤིང་ཆེན་པོ་བཞིན་དུ་ཉོན་མོངས་པའི་ནད་ཀྱི་གདུང་བ་ཐམས་ཅད་ཞི་བར་བྱེད་པའི་ཕྱིར་ན། དེའི་དགྲ་ཆེ་བའོ། །ཀུན་གྱི་ཡིད་དུ་འོང་བས་ན་སྡུག་གུ་སྟེ། འཇིག
རྟེན་གསུམ་གྱི་མཆོག་གམ་དམ་པར་གྱུར་བའོ། །དཔེར་ན། རྒྱུ་སྐར་རྣམས་ཀྱིས་ཟླ་བའི་དཀྱིལ་འཁོར་བསྐོར་ནས་མཛེས་པ་དེ་བཞིན་དུ། དཔལ་ལྡན་སྟེ་ཕུན་སུམ་ཚོགས་པ་རྒྱུ་སྐར་ལྟ་བུའི་འཁོར་གྱི་དཀྱིལ་འཁོར་གྱིས་བསྐོར་བས་ན་ཅན་ཏེ་ལྡན་པའི་དོན་ནོ། །འདིར་ཕྱིལ་ཟླ་ཉི་རྒྱུ་སྐར་སོགས་སུ་སྤྲུལ་ནས་དོན་བྱེད་
པར་བསྟན་ཅིང༌། ནང་དུ་ཡེ་ཤེས་ཀྱིས་སྟོབས་ཀྱིས་མི་མཐུན་ཕྱོགས་ཟིལ་གྱིས་གནོན་པར་བསྟན་ལ། དུས་ཀྱི་འཁོར་ལོའི་ལུགས་སུ་ཕྱི་?ཀླིང་??་ཉི་ཟླ་སོགས་དང༌། ནད་དུ་དེ་དང་ཚེས་མཐུན་པའི་ལམ་བསྒོམ་པ་ལ་བཤད། བརྗོད་མ་ཐག་ལྟ་བུའི་སྐུ་དང་འཁོར་གྱིས་ཕྱོགས་བཅུ་ནམ་མཁའི་མཐར་ཐུག་པ་སྟེ་མཐའ་ཇི་
སྲིད་ཀྱི་བར་དུ། ལུང་དང་རྟོགས་པའི་ཚེས་ཀྱི་རྒྱལ་མཚན་ལེགས་པར་འཇུགས་བར་མཛད་དོ། །རྒྱ་འགྲེལ་ཁ་ཅིག་ཏུ་འདི་དག་གི་སྐབས་སུ་དོན་གཞན་འགའ་རེ་བཤད་ཀྱང་མ་བྲིས། གདུགས་ཀྱི་ཚ་བས་གདུངས་བ་ལས་སྐྱོབ་བ་དེ་བཞིན་དུ། འགྲོ་བ་རྣམས་ཉོན་མོངས་པའི་ཚ་གདུངས་ལས་སྐྱོབ་པར་བྱེད་
པའི་ཕྱིར་འགྲོ་བའི་ཁམས་ན་གདུགས་གཅིག་བུ་ཡངས་པ་རྒྱ་ཆེ་ཕ་ལྟ་བུ་སྟེ། དེ་གང་ཞེ་ན། བྱམས་པ་དང་སྙིང་རྗེའི་དཀྱིལ་འཁོར་ཅན་གྱི་དཔལ་ལྡན་ཏེ་དེ་ཉིད་དོ། །འཁོར་བ་ལ་མ་ཆགས་པས་པདྨ་དང་མཚུངས་པའི་བྱམས་སྙིང་རྗེའི་ཟློས་གར་གྱི་བདག་ཉིད་ཅན་ནོ། །གར་ནི། ཐབས་སྣ་ཚོགས་ཀྱིས་འགྲོ་བའི་དོན་བྱེད་
@023B པ་བའང་བཤད་ལ། པདྨ་གར་གྱི་དབང་ཕྱུག་གི་གཟུགས་སུ་འཛིན་པར་ཡང་འཆད་དོ། །བྱམས་པ་དང་སྙིང་རྗེས་སེམས་ཅན་ཐམས་ཅད་ཀྱི་དོན་བྱེད་པས་ན་ཁྱབ་བདག་ཆེན་པོ་ཅེས་པ་སྟེ། འདོད་པ་སྒྲུབ་པས་རིན་པོ་ཆེ་དང་འདྲ་ལ། གདུང་བ་སེལ་བས་གདུགས་དང་མཚུངས་སོ། །རིན་པོ་ཆེའི་གདུགས་དང་འདྲ་བར་བྱས་ཀྱང་མི་
འགལ་ལ། རྒྱ་འགྲེལ་ཕལ་ཆེར་ལས་རྗེ་བཙུན་ཉིད་ལ་སྦྱར་ཞིང༌། ལ་ལར་ཉམས་ལེན་གྱི་སྐབས་སོགས་ཅི་རིགས་ལ་སྦྱར་རོ། །སངས་རྒྱས་ཀུན་གྱི་རྒྱལ་བ་ཆེ། །ཞེས་པ་ལྟར་ན་ལོངས་སྐུ་ནི་སངས་རྒྱས་ཐམས་ཅད་ཀྱི་གཙོ་བོའམ་རྒྱལ་པོ་ལྟ་བུའི་དོན་ཏེ། དེ་ཡང་རིགས་ཀྱི་བདག་པོ་ཡིན་པའོ། །སངས་རྒྱས་ཀུན་གྱི་
གཟི་བརྗིད་ཆེ། །ཞེས་འབྱུང་བ་ལྟར་ན་ལོངས་སྐུ་དེ་མཚན་དཔེ་གསལ་རྫོགས་ཀྱི་མ་སྦྲས་པ་ལ་བཤད་དོ། །རིགས་ཐམས་ཅད་ཀྱི་བདག་པོ་ཡིན་བས་ན། སངས་རྒྱས་ཀུན་གྱི་སྐུ་རང་གི་ངོ་བོར་འཆང་བའོ། །ལོངས་སྐུའི་དབང་དུ་བྱས་ཚེ་སངས་རྒྱས་ཐམས་ཅད་ཀྱི་སྐུའི་ཡོན་ཏན་འཆང་བ་ལ་བཤད། གཉིས་
སུ་མེད་པའི་ཡེ་ཤེས་ཀྱི་རྣལ་འབྱོར་རང་གི་བདག་ཉིད་དུ་འཛིན་པས་ན་སངས་རྒྱས་ཀུན་གྱི་རྣལ་འབྱོར་ཚེ་ཞེས་སམ། དེ་ལྟ་བུའི་རྣལ་འབྱོར་སྟོན་པར་བྱེད་པའི་ཕྱིར་ཡང་དེ་ལྟར་རོ། །སངས་རྒྱས་ཐམས་ཅད་ཀྱི་གཉིས་སུ་མེད་པའི་ཡེ་ཤེས་ཉིད་སྟོན་པར་མཚུངས་པས་ན་སངས་རྒྱས་ཀུན་གྱི་བསྟན་པ་གཅིག་པའོ།
རྡོ་རྗེ་རིན་ཆེན་དབང་བསྐུར་དཔལ་ཏེ་རྡོ་རྗེའི་རིགས་དང༌། རིན་ཆེན་ཀུན་བདག་དབང་ཕྱུག་སྟེ་རིན་པོ་ཆེའི་རིགས་དང༌། འཇིག་རྟེན་དབང་ཕྱུག་ཀུན་གྱི་བདག་ནི་པདྨའི་རིགས་དང༌། རྡོ་རྗེ་འཆང་བ་ཀུན་གྱི་རྗེ་ནི་ལས་ཀྱི་རིགས་དང༌། སངས་རྒྱས་ཀུན་གྱི་ཐུགས་ཆེ་བ་ནི། དེ་བཞིན་གཤེགས་པའི་རིགས་སུ་བཤད་པ་
ཡང་སྣང་ལ། ལ་ལར་བུམ་པའི་དབང་བསྐུར་བ་སོགས་ལ་སྦྱར་བའང་འདུག་མོད། འོན་ཀྱང་འདི་ལྟར་བཤད་པ་བཞིན་བྱ་སྟེ། རྡོ་རྗེ་རིན་ཆེན་ནམ་རིན་པོ་ཆེ་དང༌། མཚུངས་པའི་གཉིས་སུ་མེད་པའི་ཡེ་ཤེས་ཀྱིས་དབང་བསྐུར་བའི་དཔལ་དང་ལྡན་ཞིང༌། རིན་ཆེན་ལྟ་བུའི་རིགས་ཀུན་གྱི་བདག་པོ་སྟེ་དེ་
@024A ༄༅། །ལ་དབང་བསྐུད་བས་དབང་ཕྱུག་སྟེ་ཞེས་བྱ་ཞིང༌། ཡང་འཇིག་རྟེན་གྱི་དབང་ཕྱུག་གཞན་ཀུན་གྱི་བདག་པོར་གྱུར་པ་དང༌། རྡོ་རྗེ་འཛིན་པ་ཐམས་ཅད་ཀྱི་གཙོ་བོ་ཡིན་པས་ན་རྡོ་རྗེ་འཆང་བ་ཀུན་གྱི་རྗེའོ། །སངས་རྒྱས་ཐམས་ཅད་ཀྱི་ཐུགས་རྡོ་རྗེའི་ངོ་བོ་ཉིད་པས་ན། སངས་རྒྱས་ཀུན་གྱི་ཐུགས་ཆེ་བ་དང༌།
སངས་རྒྱས་ཀུན་གྱི་ཐུགས་ལ་གནས་པའང་ཡིན་ནོ། །སངས་རྒྱས་ཐམས་ཅད་ཀྱི་སྐུ་རྡོ་རྗེའི་བདག་ཉིད་ཡིན་བས་ན་སངས་རྒྱས་ཀུན་གྱི་སྐུ་ཆེ་བ་ཡིན་ལ། སངས་རྒྱས་ཐམས་ཅད་ཀྱི་གསུང་རྡོ་རྗེའི་ངོ་བོ་ཡིན་པའི་ཕྱིར་ན། སངས་རྒྱས་ཀུན་གྱི་གསུང་ཡང་ཡིན་ནོ། །གཉིས་སུ་མེད་པའི་ཡེ་ཤེས་ཀྱི་རྡོ་རྗེ་ཉི་མ་ལྟ་བུའི་མ་རིག་པའི་
མུན་པ་བསལ་ནས་སྣང་བ་ཆེ་ལ། ཐུགས་རྗེ་ཆེན་པོའི་རྡོ་རྗེ་ཟླ་བ་ལྟ་བུས་གདུལ་བྱ་ལ་ཕན་བདེ་སྒྲུབ་པས་དྲི་མ་མེད་པའི་འོད་ཆགས་པའོ། །ཡང་ཉོན་མོངས་པའི་གདུང་བ་བསིལ་བར་བྱེད་པས་ན་ཟླ་བའོ། །རྡོ་རྗེ་ཉི་མ་དང་ཟླ་བ་ལ་བཤད་པའི་རྣམ་གྲངས་ཁ་ཅིག་ཉི་མ་རིག་མ་དང༌། ཁམས་དམར་བོ་ལ་བྱེད། ཟླ་བ་ནི་སྒྲུབ་པ་པོ་
དང༑ ཁམས་དཀར་པོ་ལ་བྱེད་པའང་སྣང༌། ཉོན་མོངས་པའི་ཆགས་པ་དང་བྲལ་བ་ལ་སོགས་ཡིན་ནའང༌། སེམས་ཅན་ཐམས་ཅད་ལ་བརྩེ་བས་རྗེས་སུ་ཆགས་པ་ཆེ་བའོ། །ཡང་ན་ཆགས་བྲལ་གྱི་ལམ་མམ་ཕ་རོལ་ཏུ་ཕྱིན་པའི་ཐོག་པ་དང༌། ཆགས་བཅས་ཀྱི་ལམ་མམ་སྔགས་ཀྱི་ཐེག་པ་སྟོན་པ་ལ་བཤད་པ་ལྟར་རོ། །
དང་པོ་དང༌། ལ་སོགས་ཞེས་གཉིས་ལ་བསྒྱུར་བ་ཡང་སྐད་དོང་གཅིག་པ་ཡིན་པའི་དབང་དུ་བྱས་ལ། རྒྱ་འགྲེལ་རྣམས་སུ་སོགས་ཀྱི་དོན་དུ་བཤད་དོ། །ཡེ་ཤེས་ལྔའི་རང་བཞིན་ཁ་དོག་སྣ་ཚོགས་པ་འབར་བའི་འོད་ལྔ་འཕྲོ་བ་ཅན་དང༌། ཡང༌། སྣ་ཚོགས་པའི་གཟུགས་སྟོན་པའི་དོན་དུ་བཤད་པ་ལྟར་རོ། །ཐབས་ཤེས་
དབྱེར་མི་ཕྱེད་པའི་རྟགས་སུ་རྡོ་རྗེའི་སྐྱིལ་ཀྲུང་གིས་བཞུགས་པ་སྟེ། རྫོགས་པའི་སངས་རྒྱས་ཤཱཀྱ་ཐུབ་པ་ནི་རྡོ་རྗེ་སྐྱིལ་ཀྲུང་གིས་སངས་རྒྱས་བའི་ཚུལ་སྟོན་པ་ལྟ་བུའོ། །འདིར་སྦས་དོ་ནི་གྱི་བཤད་པ་གཞན་ཡོད་ཀྱང་མ་བྲིས། སངས་རྒྱས་རྣམས་ཀྱིས་བརྗོད་པ་སྟེ་བསྟན་པའི་དམ་པའི་ཆོས་མ་ལུས་པ་འཛིན་བར་མཛད་
@024B ལ༑ དཔལ་དང་ལྡན་པའི་སངས་རྒྱས་བཅོམ་ལྡན་འདས་འཇམ་དཔལ་ནི། འདམ་གྱིས་མ་གོས་པའི་པདྨ་དང་འདྲ་བར་དྲི་མ་མེད་པའི་བདག་ཉིད་དུ་སྐྱེས་ཤིང༌། ཤེས་བྱ་ཀུན་མཁྱེན་པའི་ཡེ་ཤེས་ཀྱི་མཛོད་འཛིན་པའོ། །བཞད་བ་ཙམ་གྱིས་འདོད་རྒུར་དབང་བསྒྱུར་བའི་རྒྱལ་བོ་སྤྲུལ་པ་སྣ་ཚོགས་སྟོན་པའི་སྒྱུ་འཕྲུལ་སྣ་ཚོགས་
པ་འཆང་ཞིང༌། རྟོགས་པའི་ཡོན་ཏན་ཆེ་བ་སངས་རྒྱས་ཀྱི་རིགས་སྔགས་ཐབས་དང་ཤེས་རབ་དང་ཡེ་ཤེས་མཐར་ཐུག་པ་འཆང་བ་དང༌། གཉིས་སུ་མེད་པའི་ལྷན་སྐྱེས་ཀྱི་ཡེ་ཤེས་རྡོ་རྗེ་རྣོན་པོ་ནི། མི་མཐུན་ཕྱོགས་ཐམས་ཅད་གཅོད་པར་བྱེད་པའི་ཕྱིར་རལ་གྲི་ཆེ་ན་པོའོ། །ཡི་གེ་མ་ཆོག་སྟེ་ཞེས་པ་ལ་གཉིས་ལས།
དང་པོ་ནི། ཡི་གེ་དྷཱིཿ ལ་བྱེད་པ་དང༌། ཨ་ཡིག་ལ་བྱེད་པའི་ཚུལ་གཉིས་ཡོད་དོ། །གཉིས་པ་ནི། ཡི་གེའི་སྐད་དོད་ཨ་ཀྵ་ར་ནི་མི་འགྱུར་པའི་དོན་ལ་བཤད་པ་ལྟར། འགྱུར་བ་མེད་པའི་ཡེ་ཤེས་ཀྱི་སྐུ་ལ་བྱེད་དོ། །དེ་ལྟ་བུའི་སྐུ་དེ་ཉོན་མོངས་པ་སོགས་ཀྱི་དྲི་མས་རྣམ་པར་དག་པའོ། །གསང་སྔགས་ཀྱི་ཐེག་པ་ཆེན་པོའི་
ལམ་གྱིས་སེམས་ཅན་ཐམས་ཅད་ཀྱི་སྡུག་བསྔལ་རྒྱུན་གཅོད་པར་བྱེད་ཅིང༌། ལམ་དེ་ལ་མཚོན་ཆ་ཆེན་པོ་ཞེས་བྱ་སྟེ། དེས་སྡུག་བསྔལ་རྒྱུ་དང་བཅས་པ་རྒྱུན་གཅོད་པའི་ཕྱིར་རོ། །གཉིས་སུ་མེད་པའི་ཡེ་ཤེས་ཀྱི་ཆོས་ཡིན་པས་ན་རྡོ་རྗེ་ཆོས་ཞེས་བྱ་ཞིང༌། དེས་ཡུལ་སྟོང་པ་ཉིད་མངོན་སུཾ་དུ་རྟོགས་པས་ན་རྡོ་རྗེ་
ཟབ་མོ་དང༌། ཉོན་མོངས་པ་ལས་རྒྱལ་བའི་ཉན་རང་གི་ཡེ་ཤེས་ལས་ཀྱང་གོང་དུ་འཕགས་པས་ན་རྒྱལ་བ་སྟེ། ཛི་ན་ཛི་ཀ་ཀྱང་དོན་དེ་ལྟར་རོ། །དེ་འདྲའི་རྡོ་རྗེ་ལྟ་བུའི་བློ་གྲོས་ཀྱི་ཤེས་བྱ་ཇི་ལྟ་ཇི་སྙེད་ཀྱི་དོན་ཇི་ལྟ་བ་བཞིན་དུ་རིག་པ་དང༌། སྦྱིན་སོགས་ཀྱི་ཕ་རོལ་ཏུ་ཕྱིན་པ་ཀུན་རྫོགས་པ་དང༌། ས་བཅུ་མཐར་ཕྱིན་པའི་ཡོན་
ཏན་དང་ལྡན་བས་ན། མ་རྣམས་ཀུན་གྱི་རྒྱན་དང་ལྡན་པ་སྟེ། འདི་ལ་ཕར་ཕྱིན་ཐེག་པ་དང༌། སྔགས་ཀྱི་ཁྱད་པར་གྱིས་སའི་དབྱེ་བ་མང་ཉུང་ཡོད་ཀྱང༌། ཁོག་འདྲའོ། །རང་བཞིན་གྱིས་རྣམ་པར་དག་པ་བདག་མེད་པའི་ཆོས་མངོན་སུམ་དུ་རྟོགས་པ་ཡང་དག་པའི་ཡེ་ཤེས་ནི་དྲི་མ་མེད་པའི་ཟླ་བའི་འོད་ལྟར་བཟང་ཞིང་
@025A ༄༅། །འོད་གསལ་བ་ཡིན་ལ། དེ་བརྩོན་འགྲུས་ཆེན་པོ་བསྒྲུབས་པས་སྦྲུལ་པ་སྣ་ཚོགས་སྟོན་པའི་སྒྱུ་འཕྲུལ་དྲ་བའི་སྐུར་སངས་རྒྱས་པ་སྟེ། སྦྲུལ་བ་སྣ་ཚོགས་སྟོན་པའི་དོན་དུའང་བཤད་ཅིང༌། སྦྲས?་དོན་གྱི་བཤད་པ་གཞན་ཡང་སྣང༌། དེ་འདྲའི་ཡི་ཤེས་དང་སྐུ་སྟོན་པའི་མཚན་བརྗོད་ཀྱི་རྒྱུད་འདི་ནི། རྒྱུད་
སྡེ་འོག་མའམ་བཞི་པོ་ཀུན་གྱི་བདག་པོ་རྒྱལ་པོ་མཆོག་ཡིན་ཏེ། བདེ་སྟོང་དབྱེར་མེད་ཀྱི་ཡེ་ཤེས་རྡོ་རྗེའི་གདན་ཏེ་ཡེ་ཤེས་དེ་སྐྱེ་བའི་གཞི་འམ་ཐབས་ཀྱི་ཁྱད་པར་ནི་མ་ལུས་པ་དང་ལྡན་པས་སོ། །འོན་ཀྱང༌། འདིར་རྒྱུད་ཀྱི་བདག་པོ་ནི་འཇམ་དཔལ་ཉིད་ལ་བྱས་པ་སོགས་ཀྱང་སྣང༌། ཆོས་དབྱིངས་ཡེ་ཤེས་སོགས་ཡེ་
ཤེས་ལྔ་འདུས་པའི་བདག་ཉིད་ཅན་གྱི་སྐུ་ཡིན་པས་ན་སྐུ་རྣམས་མ་ལུས་པ་འཆང་བ་སྟེ། སྐུ་དེ་ནི་ཉེས་པ་ཐམས་ཅད་དང་བྲལ་ཞིང་ཡོན་ཏན་གྱི་རིགས་རྫོགས་པས་ན་ཀུན་ཏུ་བཟང་པོ་ཞེས་བྱ་ལ། གཞན་ལ་ཕན་བདེ་སྒྲུབ་པའི་གནས་ཐམས་ཅད་མཁྱེན་པས་སམ། ཡང༌། དྲི་མ་མེད་པའི་ཡེ་ཤེས་ཀྱི་བདག་ཉིད་ཅན་ཡིན་པས་
ན་བློ་གྲོས་བཟང་པོའོ། །མས་ནི་འགྲོ་བ་རྣམས་གནས་པའི་རྟེན་བྱེད་ཅིང་འཛིན་པ་དེ་བཞིན་དུ། །རྗེ་བཙུན་གྱིས་འགྲོ་བ་རྣམས་རྗེས་སུ་འཛིན་པས་ན་ས་ཡི་སྙིང་པོ་འགྲོ་བ་འཛིན་པ་སྟེ། འདི་ལ་བཤད་ཚུལ་མི་འདྲ་བ་ནི། རྗེ་བཙུན་སྣོད་ཀྱི་འཇིག་རྟེན་དུ་སྤྲུལ་ནས་འགྲོ་བ་རྟེན་པས་ན་འགྲོ་བ་འཛིན་པ་དང༌། ཡང༌། སའི་སྙིང་
པོ་ནི་ལུས་ཀྱི་ཁམས་དྭངས་མ་བྱང་སེམས་ལ་བྱས་ནས། དེ་ཕྱིར་མི་འཕོ་བར་འཛིན་པས་ན། འགྲོ་བ་འཛིན་ཅེས་བཤད་པའང་སྣང༌། སངས་རྒྱས་བཅོམ་ལྡན་འདས་རྣམས་འདུས་པའི་བདག་ཉིད་དེ་དག་བསྐྱེད་པའི་རྒྱུར་གྱུར་པས་ནི། སངས་རྒྱས་ཀུན་གྱི་སྙིང་པོ་ཆེ་ཞེས་བྱ་ལ། གདུལ་བྱ་འདུལ་བའི་ཕྱིར་དུ་གང་ལ་གང་
འཚམ་གྱི་སྤྲུལ་བའི་འཁོར་ལོ་སྣ་ཚོགས་པ་འཆང་བ་སྟེ། འདི་ལ་ལྷའི་དཀྱིལ་འཁོར་སྣ་ཚོགས་སྤྲུལ་པ་ལའང་བཤད། ཆོས་རྣམས་ཀྱི་དངོས་པོ་ཀུན་གྱི་རང་བཞིན་སྟོང་པ་ཉིད་གང་ཡིན་པ་དེ་ལ་མཆོག་ཅེས་བྱ་ཞིང༌། དེ་ལས་ཆོས་ཀྱི་དངོས་པོ་ཀུན་གྱི་རང་བཞིན་སྟོང་པ་ཉིད་ཀྱི་ངོ་བོ་རྟེན་འབྲེལ་གྱི་སྣང་བ་སྣ་ཚོགས་འཆན་བླ??་
@025B ན་འཛིན་པ་སྟེ། དེ་ཡང་རང་བཞིན་གྱིས་སྐྱེ་བ་མེད་པའི་ཆོས་སྟོང་པ་ཉིད་དེ་ཉིད་ལས་འཁོར་འདས་སོགས་སྣ་ཚོགས་པའི་དོན་ཅན་དུ་འཆར་བས་སྣང་སྟོང་ཚོགས་པ་སྒྱུ་མ་ལྟ་བུའོ། །དེ་འདའི་ཆོས་ཀུན་ནི་རང་བཞིན་གྱིས་མེད་པ་ཉིད་ཡིན་པས་ན་ངོ་བོ་ཉིད་འཆང་བ་སྟེ། དངོས་རྙེད་ངོ་བོ་གཉིས་ནི་འཛིན་པར་འགྱུར། ཞེས་པ་
དང་འདྲའོ། །ཇི་སྐད་བཤད་པའི་ཇི་ལྟ་ཇི་སྙེད་ཀྱི་ཆོས་ཐམས་ཅད་སྐད་ཅིག་གིས་ཁོང་དུ་ཆུད་པའི་ཡེ་ཤེས་མངའ་བ་ནི་ཤེས་རབ་ཆེན་པོས་སྐད་ཅིག་ལ། ཆོས་ཀུན་ཁོང་དུ་ཆུད་པ་འཆང་བ་སྟེ། ཡེ་ཤེས་ཀྱིས་བདེན་གཉིས་དུས་གཅིག་ཅར་དུ་གཟེགས་པའོ། །ཆོས་ཀུན་དེ་ལྟར་རྟོགས་པ་དེ་ཡང་མངོན་པར་རྟོགས་པ་སྟེ་མངོན་
སུམ་རྟོགས་པ་ཉིད་ཡིན་གྱི་དོན་སྤྱིའི་ཚུལ་གྱིས་མ་ཡིན་པའོ། །དེ་འདྲའི་ཡེ་ཤེས་དང་ལྡན་པའི་ཐུབ་པ་དེའི་བློ་མཆོག་ནི། ཡང་དག་པའི་མཐའ་སྟེ་མཐར་ཐུག་པའི་ཡེ་ཤེས་སོ། །རྒྱ་འགྲེལ་ཁ་ཅིག་ཏུ་འབྱུང་བ་མཐའི་དོན་དུ་བཤད་ལ། འབྱུང་བ་ཡང༌། གནོད་པ་ལས་སམ། འཁོར་བ་ལས་འབྱུང་བའི་དོན་དུ་བྱས་པའང་སྣང༌།
རྣམ་རྟོག་གྱི་མི་བསྐྱོད་པས་ན་མི་གཡོ་ཞིང་དྲི་མའི་རྙོག་པ་དང་བྲལ་བས་ཡུལ་གསལ་བར་མཐོང་བ་རབ་ཏུ་དང་བའི་བདག་ཉིད་ཅན་གྱི་རྫོགས་པའི་སངས་རྒྱས་ཀྱི་བྱང་ཆུབ་ཉིད་འཆང་བ་སྟེ། མངོན་དུ་བྱེས་པའམ་འཛིན་པའོ། །སངས་རྒྱས་ཀུན་གྱི་མངོན་སུམ་པ་སྟེ། མངོན་དུ་བྱས་པའི་གཉིས་སུ་མེད་པའི་ཡེ་ཤེས་ཀྱི་མི་ལྕེས་
མ་རིག་པའི་མུན་པ་བསལ་ནས་ཤེས་བྱ་ཐམས་ཅད་ལ་རང་གི་འོད་རབ་ཏུ་གསལ་བ་སྟེ་མངོན་དུ་གཟིགས་པ་ཡིན་ནོ། །ཡེ་ཤེས་ཀྱི་ཡུལ་གཟིགས་ཚུམ་ཡང་ཡང་ཟློས་ནས་བཤད... སྣང་བ་ནི། འགལ་བར་མི་བསམ་སྟེ། འགའ་ཞིག་རྟེན་སོ་སོ་དང༌། ལ་ལ་ཡེ་ཤེས་ཀྱི་ངོ་བོ་དང༌། ཁ་ཅིག་འཕྲིན་ལས་སོགས་ཀྱི་དབང་དུ་
བྱས་པའོ། །ཞེས་པ་ནི། ལེའུ་བརྒྱད་པའི་བཤད་པའོ།། །།བཞི་པ་མཉམ་ཉིད་ཡེ་ཤེས་ནི། འདོད་པའི་དོན་གྲུབ་དམ་པ་སྟེ། །ནས་ནོར་བུ་ཆེན་པོ་རིན་ཆེན་ཏོག །ཅེས་སོ། །རང་གཞན་གྱི་འདོད་པའི་དོན་གྲུབ་དམ་པ་སྟེ་སངས་རྒྱས་ཀྱི་གོ་འཕང་བརྙེས་པས་ངན་སོང་གསུམ་པོ་ཐམས་ཅད་ཀྱི་སྡུག་བསྔལ་རྒྱུ་དང་བཅས་པ་རྣམ་པར?་
@026A ༄༅། །སྦྱོང་བར་མཛད་བའི་མགོན་པོ་སེམས་ཅན་ཀུན་གྱི་མཆོག་ཏུ་གྱུར་པ་དེས། སེམས་ཅན་ཐམས་ཅད་རང་རང་གི་སྐྱལ་པ་དང་འཚམ་བར་རབ་ཏུ་གྲོལ་བར་བྱེད་པ་ཡིན་ཏེ། དེ་ཡང་ཉོན་མོངས་པའི་དགྲ་འཇོམས་པའི་ཕྱིར་ན་གཡུལ་དུ་འཇུག་པ་ལ་གཅིག་ཏུ་དཔའ་བའམ་དཔའ་བ་གཅིག་པུ་ཡིན་ལ། མི་ཤེས་
པའི་རྨོངས་པ་བག་ཆགས་དང་བཅས་པའི་དགྲའི་དྲེགས་པ་འཇོམས་པར་མཛད་པས་མོ། །དགྲའི་དྲེགས་པ་ནི་མུ་སྟེགས་སོགས་ལ་བྱས་པའང་སྣང༌། སྤྲུལ་སྐུའི་མཛད་པ་ནི། གདུལ་བྱ་འདུལ་བའི་ཐབས་མཁྱེན་པའི་བློ་དང་ལྡན་ཞིང༌། རྒྱན་ཆ་ལུགས་དང་ལྡན་པར་སྟོན་པས་སྒེག་འཆང་དང༌། ནུས་མཐའི་དཔལ་
དང་ལྡན་པའི་དཔའ་བོ་མི་སྡུག་པའི་གཟུགས་འཆང་བའི་ཁྲོ་བོའི་གཟུགས་ཅན་དུ་སྤྲུལ་ནས་འགྲོ་བའི་དོན་བྱེད་ལ། དེ་ཡང་འགའ་ཞིག་ཏུ་དཔའ་པོའི་དོད་དུ་བརྟེན་པོ་ཞེས་བཏོན་ནས་བཤད། དེ་ལྟ་བུའི་སྤྲུལ་པ་མཚོན་ཆ་སྣ་ཚོགས་པ་ཐོགས་པའི་ལག་པ་བརྒྱ་པོ་ཀུན་བསྐྱོད་པར་བྱེ་ཅིང༌། ཞབས་ཀྱི་གོམ་
པའི་སྟབས་ཀྱིས་གར་བྱེད་པ་སྟེ། དཔལ་ལཾ་ཕུན་སུམ་ཚོགས་པ་དང་ལྡན་པའི་ལག་ཕ་བརྒྱ་སྤྲུལ་ནས་གང་བ་ལ། ནམ་མཁའ་ཁྱབ་པར་གར་བྱེད་པའོ། །འདིར་ལག་པའི་དབྱུག་པ་ཞེས་པ་ནི། ཕལ་ཆེར་ལས་ལག་པ་བརྒྱ་པོ་ཞེས་འབྱུང་བས་དེ་བཞིན་དུ་བཤད་དོ། །ལག་པ་བརྒྱ་པོ་ནི། ཚངས་
བ་འདུལ་བའི་ཆེད་དུ་སྤྲུལ་པར་བཤད་ལ། ཁ་གཅིག་ཏུ་ས་ཆོག་གི་སྐབས་སུ་གར་བྱེད་པ་དང་སྦྱར་ནས་ཀྱང་བཤད་དོ། །སྟོང་གསུམ་གྱི་ས་ཡི་དཀྱིལ་འཁོར་ཆེན་པོའི་གཞི་ཡི་ཁྱོན་འདི་རྐང་པ་ཡ་གཅིག་གི་མཐིལ་གྱིས་གནོན་པར་མཛད་ཅིང༌། དེར་མ་ཟད་རྐང་པའི་མཐེབ་སྟེ་མཐེ་བོང་གི་སེན་
མོ་གཅིག་གི་ཁྱོན་ཀྱིས་ཀྱང་ཚངས་པའི་ཡུལ་ས་སྟོང་གཅིག་གི་འཇིག་རྟེན་ཁྱབ་པའི་རྩེ་ནས་གནོན་པར་བྱེད་དོ། །འདི་དག་ལ་སྦས་དོན་གྱི་བཤད་པ་རྫོགས་རིམ་གྱི་སྐབས་དང་སྦྱར་བའང་ཡོད་དོ། །དེ་ལྟར་ནུས་པར་མ་ཟས། ཟུང་འཇུག་བརྙེས་པའི་གང་ཟག་གིས་རྡུལ་ཕྲ་མོ་གཅིག
@026B གི་གོ་སང་སྟོང་གསུམ་ཤོང་བར་བྱེད་ནུས་ལ་དེའི་ཚེ་རྡུལ་ཆེ་དུ་མ་སོང་ཞིང༌། སྟོང་གསུམ་ཆུང་དུར་འང་མི་འགྲོ་བར་བཤད་དེ། དེ་ཡང་ཇི་སྐད་དུ། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །ཞེས་དང༌། སྐྲ་ཙམ་ཁྱོན་ལ་དུས་གསུམ་ཚད་སྙེད་ཀྱི། །ཞེས་སོགས་གསུངས་པ་ལྟར་རོ། །དོན་མཐར་
ཐུག་པ་གཅིག་ཆོས་ཀྱི་སྐུ་སྟོང་པ་ཉིད་དེ་ནི། ཀུན་རྫོབ་དང་ངོ་བོ་གཉིས་སུ་མེད་པ་ཆོས་ཀྱི་དེ་ཁོ་ན་ཉིད་ཀྱི་དོན་ཞེས་བྱ་ལ། སྐུ་དེ་ནི་དམ་པའི་དོན་གྱི་སྐུ་ཡི་ཏེ། གནོད་པས་འཇིགས་པ་མེད་པའི་དོན་དམ་གྱི་སྐུ་ཡིན་བས་སོ། །ཆོས་སྐུ་དེ་ལ་རྣམ་རིག་སྟེ་མོས་པ་སྣ་ཚོགས་པའི་ངོ་བོར་དེ་དང་མཐུན་པའི་གཟུགས་ཀྱི་
དོན་ཅན་དུ་སྣང་ངོ། །འོན་ཀྱང༌། རྣམ་རིག་ཞེས་པ་སེམས་དང༌། སྣ་ཚོགས་ནི་སྒོ་ལྔའི་རྣམ་ཤེས་ལ་བྱེད་པ་ཡང་སྣང་བས་འདི་ལྟར་བྱེད་ན། སེམས་དང་རྣམ་ཤེས་གཉིས་ཀྱང་དེ་ལྟར་བྱེད་པ་དང་འབྲེལ་ལོ། །སྔ་མ་ལྟར་བྱས་ནའང༌། སེམས་ཡིད་དང་དབང་པོའི་རྣམ་པར་ཤེས་པའི་རྒྱུད་དང་ལྡན་པའི་འགྲོ་བ་རྣམས་ཀྱི་དངོས་ཀྱི་
དོན་མ་ལུས་པ་རྣམས་བྱེད་བཱི་གཟུགས་འཛིན་པ་ལ་དགའ་བ་སྟེ། འགྲོ་བའི་དོན་ལ་དགའ་བར་ཡང་བཤད། དེ་ལྟར་འཁོར་བའི་དོན་བྱེད་པ་མི་གཏོང་ཡང༌། སྟོང་པ་ཉིད་ལ་མཉམ་པར་འཇོག་པ་ལ་དགའ་བའི་མཆོག་གི་བློ་དང་ལྡན་ནོ། །སྲིད་པར་སེམས་ཅན་གྱི་དོན་དུ་སྣང་ཡང་སྲིད་པའི་འདོད་ཆགས་ལ་སོགས་པ་ལས་
འདས་པའོ། །དེ་ལས་འདས་ཀྱང་སྲིད་པ་གསུམ་གྱི་སེམས་ཅན་ཀུན་གྱི་དོན་ལ་དགའ་བ་ཆེན་པོ་པའོ། །དེ་དག་ནི་སྤྲུལ་སྐུ་དང་ཆོས་སྐུ་གཉིས་ཅི་རིགས་ཀྱི?་དབང་དུ་བྱས་པ་སྟེ། ལོངས་སྐུའི་དབང་དུ་བྱས་ན། དཔེར་ན། སྤྲིན་དཀར་པོ་དག་བ་དེ་བཞིན་དུ། ལོངས་སྐུའི་ཁ་དོག་ཀྱང་དཀར་ཞིང་དག་པའོ། །དཀར་བཞི་
མཚོན་པ་ཙམ་ཡིན་ལ། ཁ་གཅིག་ཏུ་དཀར་བ་ནི་དག་པའི་དོན་དུའང་བཤད། སྐུ་ལས་འོད་བཟང་པོ་སྟོན་ཀའི་ཟླ་བའི་འོད་བཞི་དུ་འཕྲོ་ལ། འོད་དེ་ཡར་འཁོར་ཡུག་དང་ལྡན་པ་ནི། ཉི་མ་འཆར་ཀའི་དཀྱིལ་ལྟར་མཛེས་ཤིང༌། ཕྱག་གི་སེན་མོ་ལས་འཕྲོ་བའི་འོད་ནི་ཤས་ཆེར་དམང་བའོ། །སྤྱི་བོའི་དབུ་སྐྲ་ཐོབ་ཅོག
@027A ༄༅། །ཏུ་བཅིངས་པའི་ཅོད་པན་བཟང་པོ་ནི་ནོར་བུ་མཐོན་ཀ་སྟེ་ཨིནྟྲ་ནཱི་ཡའི་རྩེ་མོ་ལྟ་བུ་དང༌། དབུ་སྐྲ་མཆོག་གི་མདོག་ཀྱང་ནོར་བུ་མཐོན་ག་ཆེན་པོ་དབང་སྔོན་གྱི་མདོག་ལྟ་བུ་འཆང་བའི་ཅོད་པན་གྱི་རྩེར་ནོར་བུ་ཆེན་པོ་འོད་ཆགས་པའི་དཔལ་གྱིས་མཛེས་ལ། སངས་རྒྱས་སྤྲུལ་པའི་རྒྱན་དང་ལྡན། ཞེས་
ཕ་ལ་དོན་གཉིས་ཀྱི་དང་པོ་ནི། སངས་རྒྱས་ལོངས་སྐུར་རང་ཉིད་ལ་བྱས་ནས་རྒྱན་ནི་མཚན་དང་དཔེ་བྱད་ལ་བྱས་པ་དང༌། གཉིས་པ་ནི་སྤྲུལ་པ་དཔག་ཏུ་མེད་པ་སྤྲུལ་པའི་དོན་དུ་བཤད་དོ༌།དེ་ལ་ནུས་པ་ནི། འཇིག་རྟེན་གྱི་ཁམས་བརྒྱ་ཀུན་ནས་བསྐྱོད་པ་སྟེ་གཡོ་བར་མཛད་པའི་རྫུ་འཕྲུལ་གྱི་རྐང་པའི་སྟོབས་
ཆེན་པོ་དང་ལྡན་ཏེ། རྫུ་འཕྲུལ་གྱི་རྐང་པ་བཞི་མཐར་ཕྱིན་པའོ། །དེ་ལྟ་བུའི་རྫུ་འཕྲུལ་དེ་ཉིད་ལ་ཉམས་པ་མི་མངའ་བའི་དྲན་པ་ཆེན་པོ་འཆང་བ་སྟེ། འདི་དེ་ཁོ་ན་ཉིད་ལ་གནས་པ་མི་བརྗེད་པའི་དོན་དུ་བཤད་པའང་སྣང༌། དྲན་པ་བཞི་པོ་ནི། དྲན་པ་ཉེར་བཞག་བཞི་ལ་བཤད་པ་དང༌། དགོན་མཆོག་གསུམ་དང་གཏོང་བར་
རྗེས་སུ་དྲན་པ་བཞི་ལ་བཤད་པ་གཉིས་སྣང་སྟེ། དེ་ནི་ཏིང་ངེ་འཛིན་གྱི་རྒྱལ་པོ་ལྟ་བུ་སྟེ་གཙོ་བོའོ། །དྲན་པ་ཡང་དག་བྱང་ཆུབ་ཀྱི་ཡན་ལག་སོགས་བྱང་ཆུབ་ཀྱི་ཡན་ལག་བདུན་ནི། འཕགས་པ་རྣམས་དགྱེས་པ་བསྐྱེད་པའི་ཕྱིར་མེ་ཏོག་དང་སྤོས་ཞེས་བྱའོ། །འདིར་སྦས་དོན་དུ་རྫོགས་རིམ་གྱི་ལམ་བསྟན་པར་
བྱས་ནས། མེ་ཏོག་ནི་ཁྲག་དང༌། སྤོས་ནི་བྱང་སེམས་དཀར་པོ་ལ་བཤད་པའང་སྣང་སྟེང་དེ་དག་ནི་དེ་བཞིན་གཤེགས་པའི་ཡོན་ཏན་རིན་པོ་ཆེའི་འབྱུང་གནས་སུ་གྱུར་པས་ན་མཚོའོ། །ཡང་དག་པའི་ལྟ་བ་སོགས་འཕགས་པའི་ལམ་གྱི་ཡན་ལག་བརྒྱད་ཀྱི་ཚུལ་ཏེ། མདོར་ན་སངས་རྒྱས་སུ་བགྲོད་ཐབས་ཀྱི་ལམ་བྱང་
ཕྱོགས་སོ་བདུན་པོ་ཐམས་ཅད་ཇི་ལྟ་བ་བཞིན་དུ་རིག་པའི་ཕྱིར་ན། ཡང་དག་པར་རྫོགས་པའི་སངས་རྒྱས་ཀྱི་ལམ་རིག་པ་སྟེ་མཁྱེན་པ་ཞེས་བྱ་བ་ནི་རྗེ་བཙུན་ཉིད་ལ་སྦྱར་རོ། །སེམས་ཅན་ཀུན་ལ་བརྩེ་བས་ཤས་ཆེར་ཆགས་ཀྱང༌། ནམ་མཁའ་ཐམས་ཅད་ལ་ཁྱབ་བཞིན་དུ་གང་ལའང་མ་ཆགས་པ་ལྟ་བུར་ཉོན་
@027B མོངས་ཅན་གྱིས་ཆགས་པ་མེད་དོ། །སེམས་ཅན་ཀུན་གྱི་ཡིད་དེ་བསམ་ཕ་ལ་འཇུག་གོ །འདིར་བདེ་བ་ཆེན་པོའི་ཡེ་ཤེས་སེམས་ཅན་གྱི་རྒྱུད་ལ་འཇུག་པར་བཤད་པ་ཞིག་ཀྱང་སྣང་སྟེ། སྦས་དོན་དུ་བྱས་ན་མི་འགལ་ལོ། །སེམས་ཅན་རྣམས་ཀྱི་བསམ་པ་ཤེས་པ་ད་ཡང༌། སེམས་ཅན་ཀུན་གྱི་ཁམས་དང་བསམ་
པའི་ཁྱད་པར་ཐ་དད་པ་རྣམས་སྐད་ཅིག་གིས་མཁྱེན་པས་ན་ཡིད་ལྟར་མགྱོགས་པའོ། །སེམས་ཅན་ཀུན་གྱི་དབང་པོ་རྣོ་རྟུལ་གྱི་རིམ་པའི་དོན་ལེགས་པར་ཤེས་ནས་ཆོས་བསྟན་ཏེ། དེས་སེམས་ཅན་ཀུན་གྱི་ཡིད་འཕྲོག་པར་བྱེད་དོ། །ཡིད་ལྟར་མགྱོགས་པ་ནི། བརྩོན་འགྲུས་ཀྱིས་ཡིད་ལྟར་མགྱོགས་པ་དང༌།
སེམས་ཅན་འདུལ་བའི་དུས་ལས་སྐད་ཅིག་ཀྱང་མི་འདའ་བའི་དོན་དུ་བྱས་པའང་སྣང་ལ། ཡིད་འཕྲོག་པ་ནི་སྐུ་མཐོང་བས་ཡིད་འཕྲོག་པ་ལ་བཤད་པའང་ཡོད་དེར་མི་འགལ་ལོ། །ཆོས་བསྟན་པས་གཟུགས་སོགས་ཕུང་པོ་ལྔའི་དོན་གཟུགས་དབུ་བ་བརྡོས་པ་དང༌། ཚོར་བ་ཆུ་བུར་ལྟ་བུ་སོགས་ཀྱང་ཀུན་རྫོབ་
སྒྱུ་མ་ལྟ་བུའི་ཚུལ་དང༌། དེ་དག་སྒྱུ་མ་ལྟ་བུ་ལས་རང་བཞིན་གྱིས་མེད་པའི་དེ་ཉིད་ཤེས་སོ། །རྣམ་དག་ཕུང་པོ་ལྔ་འཆང་བ། །ཞེས་པ་ལ་གཉིས་ཏེ། གཟུགས་སོགས་ཕུང་པོ་ལྔ་རྣམ་པར་དག་པའི་ཡེ་ཤེས་ལྔ་འཆང་བ་དང༌། ཚུལ་ཁྲིམས་ཀྱི་ཕུང་པོ། །དེ་བཞིན་དུ་ཏིང་འཛིན། ཤེས་རབ། རྣམ་གྲོལ། རྣམ་པར་གྲོལ་བའི་
ཡེ་ཤེས་མཐོང་བའི་ཕུང་པོ་ལྔ་འཆང་ལ་འཆད་པ་གཉིས་ཀྱི་དང་པོ་ནི། ཐུན་མོང་མ་ཡིན་པའི་སྐབས་དང༌། གཉིས་པ་ཐུན་མོང་བའི་སྐབས་དང་སྦྱར་བའོ། །ཡེ་ཤེས་ལྔ་ནི་མེ་ལོང་ལྟ་བུའི་ཡེ་ཤེས་སོགས་ལྔ་སྟེ། རིགས་ལྔའི་བདག་ཉིད་ཅན་འཆང་བའི་དོན་ནོ། །ངེས་པར་འབྱུང་བའི་ཐེག་པའམ་ལམ་ཀུན་གྱི་མཐང་
ཐུག་ལ་གནས་པས་ན་མཐའ་ལ་གནས་པ་དང༌། ཐེག་པ་གསུམ་གྱི་ངེས་པར་འབྱུང་བ་ཀུན་གྱི་དོན་ལ་མཁས་ཤིང༌། སྡུག་བསྔལ་ལས་ངེས་པར་འབྱུང་བ་ཀུན་གྱི་ལམ་མཐར་ཐུག་པ་གཉིས་སུ་མེད་པའི་པའི་ཡེ་ཤེས་ལ་གནས་ཏེ། གདུལ་བྱ་ལ་ངེས་པར་འབྱུང་བ་གསུམ་པོ་ཀུན་ལེགས་པར་སྟོན་པར་
@028A ༄༅། །མཛད་དོ། །མ་རིག་པ་ནས་རྒ་ཤིའི་བར་གྱི་ཡན་ལག་བཅུ་གཉིས་ཀྱི་སྒོ་ནས་འཁོར་བར་འཁོར་བའི་སྲིད་པའི་རྩ་བ་བཅད་པའམ་བཏོན་པ་སྟེ། འཁོར་བའི་རྩ་བ་མ་རིག་པ་སྤངས་པས་འཁོར་བའང་སྤངས་པའི་ཕྱིར་རོ། །དག་པ་རྣམ་པ་བཅུ་གཉིས་འཆང༌། །ཞེས་པ་ལ་གཉིས་ཏེ། མ་
རིག་པ་འགག་པ་ནས་རྒ་ཤི་འགག་པའི་བར་གྱི་དག་བ་བཅུ་གཉིས་འཆང་བ་དང༌། མིག་གི་སྐྱེ་མཆེད་ནས་ཡིད་ཀྱི་སྐྱེ་མཆེད་ཀྱི་བར་དྲུག་དང༌། གཟུགས་ཀྱི་སྐྱེ་མཆེད་ནས་ཆོས་ཀྱི་སྐྱེ་མཆེད་ཀྱི་བར་དྲུག་སྟེ་སྐྱེ་མཆེད་བཅུ་གཉིས་རྣམ་པར་དག་པ་དང་ལྡན་པའོ། །འདིས་རྗེ་བཙུན་གྱིས་རང་རྒྱལ་གྱི་ལམ་རྟོགས་ནས་དེ་
ལ་སྟོན་པའི་དོན་དུ་བཤད་དོ། །སྡུག་བསྔལ་བདེན་པ་སོགས་འཕགས་པའི་བདེན་པ་བཞིའི་ཚུལ་གྱི་རྣམ་པ་ཤེས་པ་ཅན་གྱི་ཤེས་པ་བརྒྱད་པོ་སྡེ་འདི་ལ་གཉིས། སྡུག་བསྔལ་ཆོས་ཤེས་དང༌། སྡུག་བསྔལ་རྗེས་ཤེས་དང༌། དེ་བཞིན་དུ། ཀུན?་འབྱུང༌། འགོག་པ། ལམ་གསུམ་པོ་རེ་རེ་ལའང་ཆོས་ཤེས་རྗེས་ཤེས་
གཉིས་སྦྱར་བའི་བརྒྱད་ལ་བཤད་པ་དང༌། མིག་གི་རྣམ་ཤེས་སོགས་དྲུག་དང་ཀུན་གཞི་ཉོན་ཡིད་དེ་རྣམ་ཤེས་ཚོགས་བརྒྱད་དག་པ་ལ་བཤད་པ་གཉིས་སྣང༌། དེ་ལྟ་བུའི་རྟོགས་པ་ཡང་ལྡན་གྱིས་རྫོགས་པའི་རིགས་མཐུན་འཆང་པའོ། །འཕགས་པའི་བདེན་པའི་དོན་ནི་རྣམ་པ་བཅུ་གཉིས་དང་ལྡན་ཏེ། དེ་ཡང་བདེན་
པ་བཞི་རེ་རེ་ལའང༌། ངོ་བོ་དང༌། བྱེད་པ་དང༌། བྱ་བའི་འབྲས་བུ་གསུམ་སྟེ། བཅུ་གཉིས་ཡོད་པས། དེ་བཅུ་གཉིས་ལས་བརྩམས་ཏེ་ཆོས་ཀྱི་འཁོར་ལོ་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བའང་ཡིན་ནོ། འདིར་ཁ་ཅིག་བཅུ་གཉིས་ལྡན་པ་ནི་སྐྱེ་མཆེད་བཅུ་གཉིས་ལ་བཤད་པའང་སྣང་ལ། སྦས་
དོན་གྱི་དབང་དུ་བྱས་ནས་བཅུ་གཉིས་ལྡན་པ་ནི་དབང་བཞི་དང༌། སྐད་ཅིག་མ་བཞི་དང་དགའ་བ་བཞི་སྟེ་བཅུ་གཉིས་ལ་བཤད་པ་དང༌། ཡང་བཅུ་གཉིས་པོ་ཡན་ལག་བཅུ་གཉིས་ལ་བྱས་ནས་དེ་འགགས་པའི་ཆ་བཅུ་གཉིས་ལྡན་པ་ལའང་འཆད་དོ། །དེ་ཉིད་རྣམ་པ་བཅུ་དྲུག་རིག་ཅེས་པ་ལ། སྡུག་བསྔལ་བདེན་
@028B པའི་མི་རྟག། སྡུག་བསྔལ། སྟོང་པ། བདག་མེད་བཞི། ཀུན་འབྱུང་བདེན་པའི་རྒྱུ། ཀུན་འབྱུང༌། རབ་སྐྱེ། རྐྱེན་གྱི་རྣམ་པ་བཞི། ལམ་བདེན་གྱི་ལམ། སྒྲུབ་པ། རིག་པ། ངེས་འབྱིན་བཞི། འགོག་པ་བདེན་གྱིས་འགོག་པ། ཞི་བ། གྱ་ནོམ་པ། ངེས་འབྱུང་བཞི་སྟེ་བཅུ་དྲུག་རིག་པ་ལ་འཆད་པ་དང༌། ནང་སྟོང་པ་ཉིད་སོགས་སྟོང་ཉིད་བཅུ་དྲུག་རིག་པར་
ཡང་འཆད་ལ། སྦས་དོན་དུ། ཡས་བབས་མས་བརྟན་གྱི་དགའ་བ་བཞི་པོ་རེ་རེ་ལའང་བཞི་བཞིར་ཕྱེ་ནས་བཅུ་དྲུག་བསྟན་པར་བཤད་དོ། །རྣམ་པ་ཉི་ཤུས་བྱང་ཆུབ་པ་ཞེས་པ་ལ། གཟུགས་བདག་མ་ཡིན་ཞིང་ས་གཟུགས་ལ་བདག་རང་ངོས་ནས་མེད། བདག་ཉིད་གཟུགས་མིན། བདག་ལ་གཟུགས་དང་བཞིན་གྱིས་མེད་པ་བཞི་སྟེ། དེ་
བཞིན་དུ། ཚོར་བ། འདུ་ཤེས། འདུ་བྱེད། རྣམ་ཤེས། བཞི་ལ་སྦྱར་བའི་འཇིག་ལྟ་ཉི་ཤུ་སྤངས་པ་ལ་བྱེད་པ་དང༌། སྟེང་ཉིད་བཅུ་དྲུག་ཤེས་པའི་སྟེང་དུ། མི་ལོང་ལྟ་བུ། མཉམ་པ་ཉིད། སོ་སོར་རྟོགས་པ། བྱ་བ་གྲུབ་པའི་ཡེ་ཤེས་བཞི་བསྣན་ཏེ་ཉི་ཤུ་ལ་འཆད་པ་དང༌། ཡང༌། འབྱུང་བ་ལྔ། ཕུང་པོ་ལྔ། ཉོན་མོངས་པ་ལྔ། དབང་པོ་ལྔ་སྟེ་
ཉི་ཤུ་པོ་ཤེས་པ་དང༌། དེ་ལས་གཞན་དུ་འཆད་པའང་སྣང༌། ཕྱི་མ་ལྟར་ན། དེ་དག་རྣམ་པར་དག་པའི་ཆ་ནས་བྱང་ཆུབ་པའོ། །ཤེས་བྱའི་རྣམ་པ་ཐམས་ཅད་ཁོང་དུ་ཆུད་པས་ན་སངས་རྒྱས་དང་ཀུན་རེག་པའི་མཆོག་ཅེས་བྱ་ལ། དེ་ལྟར་རིག་པས་ན་སེམས་ཅན་གྱི་དོན་དུ་སངས་རྒྱས་ཀུན་གྱི་སྤྲུལ་པའི་སྐུ་བྱེ་བ་དཔག་ཏུ་མེད་པ་ཕྱོགས་བཅུར་
སྤྲུལ་ནས་འགྱེད་པ་པོ་སྟེ། ལོངས་སྐུས་སྤྲུལ་པ་སྟོན་པའི་ཚུལ་ལོ། །འདི་དག་གི་སྦས་དོན་ལ་སྔགས་ཀྱི་སྐབས་སུ་འཚང་རྒྱ་བའི་ཚུལ་སྟོན་པར་བཤད་དོ། །ཤེས་བྱ་མཐོང་བ་ལ་གེགས་བྱེད་ཀྱི་སྒྲིབ་པ་སྤངས་པས། སེམས་ཅན་ཐམས་ཅད་ཀྱི་སེམས་ཀྱི་རྣམ་པར་རྟོག་པ་སྐད་ཅིག་སྔ་ཕྱི་ཇི་སྙེད་ཅིག་སྐྱེས་པ་ཐམས་ཅད་མངོན་པར་
ཏེ་མངོན་སུམ་དུ་རྟོགས་ཤིང༌། ཡང༌། སེམས་ཀྱི་སྐད་ཅིག་མ་གཅིག་ལ་ཤེས་བྱའི་དོན་ཀུན་མངོན་སུམ་དུ་རེག་པར་མཛད་དོ། །ཐུན་མོང་དང་ཐུན་མོང་མ་ཡིན་པའི་ཐེག་པ་སྣ་ཚོགས་པའི་ཐབས་ཀྱི་ཚུལ་ལ་མཁས་པའི་ཚུལ་གྱིས་འགྲོ་བའི་དོན་ལ་རང་རང་གི་དབང་པོ་དང་འཚམ་པར་རྟོགས་པ་པོ་སྟེ་ཤེས་པར་བྱས་ནས། དེ་ཡང་སེམས་
@029A ༄༅། །ཅན་དེ་དག་ཉན་ཐོས་དང་རང་རྒྱལ་སངས་རྒྱས་ཀྱི་ཐེག་པ་གསུམ་གྱི་ངེས་པར་འབྱུང་བ་ལ་འཁྲིད་པར་མཛད་ཀྱང༌། དེ་དག་ཐམས་ཅད་མཐར་ཐུག་ཐེག་པ་ཆེན་པོ་གཅིག་གི་འབྲས་བུ་སངས་རྒྱས་ཀྱི་སར་གནས་པ་མཛད་དོ། །ཐེག་པ་གཅིག་ཅེས་པ་བླ་མེད་ཀྱི་ཐེག་པ་ལ་བཤད་པ་ཡོད་ཀྱང༌། དེ་ནི། ཐེག་པ་ཆེན་པོར་འདུས་
པས་མི་འགལ་ལོ། །འདོད་ཆགས་སོགས་ཉོན་མོངས་པའི་ཁམས་རྣམས་མ་ལུས་པ་དག་པའི་བདག་ཉིད་ཅན་དང༌། ཉོན་མོངས་པས་ཀུན་ནས་བསླངས་པའི་ལས་ཀྱི་ཁམས་རྣམས་ཟད་པར་བྱེད་པ་དང༌། སྡུག་བསྔལ་གྱི་ཆུ་བོ་འབབ་པའི་འཁོར་བའི་རྒྱ་མཚོ་ཀུན་ལས་བརྒལ་ཞིང༌། སྦྱོར་བའི་དགོན་པ་ཉོན་མོངས་པ་མེད་པའི་གནས་
ལས་བྱུང་བའོ། །སྦྱོར་བའི་དགོན་པ་ནི། སྤང་བྱ་ལ་བཤད་ན། འཁོར་བའི་གནས་སུ་སྦྱོར་བར་བྱེད་པའི་ཀུན་སྦྱོར་ལ་བྱའོ། །རྒྱ་འགྲེལ་འགའ་ཞིག་ཏུ་འཁོར་བའི་དགོན་པ་ཞེས་འབྱུང་ལ། ལས་ཞེས་འབྱུང་བ་ལྟར་ན། སྤང་བྱ་ལ་བྱས་ན་བདེ་ཡང༌། ཕལ་ཆེར་ལས་སྔ་མ་བཞིན་བཤད་དོ། །གཞན་ཡང་འདོད་ཆགས་སོགས་རྩ་བའི་
ཉོན་མོངས་པ་དང༌། ཕྲག་དོག་སོགས་ཉེ་བའི་ཀུན་ནས་ཉོན་མོངས་པ་བག་ཆགས་དང་བཅས་པ་གཏན་དུ་སྤངས་པའོ། །དེ་དག་ནི་སྤངས་པའི་ཁྱད་པར་བསྟན་པའོ། །དམིགས་མེད་ཀྱི་སྙིང་རྗེ་ཆེན་པོ་དང་སྟོང་ཉིད་རྟོགས་པའི་ཤེས་རབ་ཀྱི་ཐབས་དེ་ལྟ་བུའི་སྒོ་ནས། དོན་ཡོད་པར་གྱུར་པའི་ལས་འགྲོ་བའི་དོན་བྱེད་པའོ། །བདག་ཏུ་འཛིན་
པའི་འདུ་ཤེས་ཀུན་གྱི་དོན་སྤངས་ཤིང༌། རྣམ་པར་ཤེས་པའི་ཚོགས་དྲུག་བདེན་སྣང་དང་བཅས་པའི་འཁྲུལ་པའི་དོན་ནི་འགོག་པ་སྟེ་སྤངས་པ་འཆང་བའོ། །ཁ་ཅིག་ཏུ་འགགས་པར་བྱེད་ཅེས་འབྱུང་ངོ། །སེམས་ཅན་ཀུན་གྱི་ཡིད་ཀྱི་ཡུལ་སེམས་རང་བཞིན་མེད་པ་དེ། སེམས་ཅན་ཀུན་གྱི་ཡིད་ལ་གནས་པས། དེ་སེམས་ཅན་དུན་
གྱི་ཡིད་ཀྱི་ནང་ན་གནས་པ་སྟེ། སེམས་ཅན་ཐམས་ཅད་ཀྱི་རང་བཞིན་གྱི་རྣམ་པར་དག་པ་ཡིན་ལ། དེ་ནི་ཆོས་སྐུར་འགྱུར་བར་སྟོན་པའོ། །འོན་ཀྱང་རྐང་པ་གསུམ་པོ་ལ་འགྱུར་མི་འདྲ་བའང་སྣང་བས། དོན་ཀྱང་མི་འདྲ་བ་ཡོད་དོ། །གཞན་ཡང༌། ཡིད་ལ་གནས་པ་པོ་ནི་རྗེ་བཙུན་ཉིད་ལ་སྦྱར་བའང་སྣང༌། སེམས་ཅན་རྣམས་
@029B རྣམས་ཀྱི་སེམས་རང་བཞིན་གྱིས་རྣམ་པར་དག་པའི་རྒྱུ་མཚན་གྱིས་རྗེ་བཙུན་སེམས་ཅན་དེ་དག་གི་སེམས་ཏེ་བསམ་པ་དང་མཐུན་པར་འཇུག་པར་བྱེད་དེ། རིམ་གྱིས་སངས་རྒྱས་ཀྱི་སར་འགོད་པའི་ཐབས་སྟོན་པའོ། །སངས་རྒྱས་ཀྱི་གཉིས་སུ་མེད་པའི་ཡེ་ཤེས་ཉིད། སེམས་ཅན་གྱི་རྒྱུད་ལ་འཇུག་པར་བཤད་པ་བཞིན་བྱས་ཀྱང་མི་
འགའ་བར་སེམས་སོ། །དེ་གཉིས་གང་གི་དབང་དུ་བྱས་ཀྱང༌། ཞུགས་ནས་ནི། སེམས་ཅན་ཀུན་གྱི་ཡིད་ཚིམ་པར་བྱེད་པ་དང༌། སེམས་ཅན་ཀུན་གྱི་ཡིད་དགའ་བར་བྱེད་དེ། གྲུབ་པ་མཐའ་རུ་ཕྱིན་པ་ནི་སྤངས་རྟོགས་མཐར་ཕྱིན་པ་དང༌། གྲུབ་མཐའ་ཀུན་མཁྱེན་པའི་བཤད་ཚུལ་གཉིས་སྣང༌། དེ་མཐར་ཕྱིན་པས་ན་ནོར་པའི་འཁྲུལ་
པ་དང་ལྡན་པ་མ་ཡིན་པ་སྟེ། ནོར་བ་ཐམས་ཅད་རྣམ་པར་སྤངས་པའི་ཕྱིར་རོ། །རང་གཞན་སོ་སོ་དང་གཉིས་ཀའི་དོན་གསུམ་པོ་ཐེ་ཚོམ་མེད་པར་འགྲུབ་ངེས་སུ་བྱེད་ནུས་པའི་བློ་གྲོས་དང་ལྡན་ཏེ། རང་གཞན་ཀུན་གྱི་དོན་བྱེད་ནུས་པའི་ཡོན་ཏན་ཆོས་སྐུ་ལོངས་སྐུ་སྤྲུལ་སྐུ་གསུམ་གྱི་བདག་ཉིད་ཅན་གྱི་གོ་འཕང་མངོན་དུ་བྱས་པའི་
ཕྱིར་རོ། །གཟུགས་སོགས་ཀྱི་ཕུང་པོ་ལྔའི་དོན་འདས་མ་འོངས་ད་ལྟའི་དུས་གསུམ་དུ་ཇི་ལྟར་བྱུང་བ་དང་གནས་པ་དང༌། འབྱུང་བའི་གང་ཡིན་པ་རྣམས་ཀྱི་དུས་སྔ་ཕྱིའི་སྐད་ཅིག་པ་སྐྱེས་ཤིང་ཞིག་པ་དང་གནས་པ་དང་འབྱུང་བ་ཐམས་ཅད་ཀྱང༌། ཡེ་ཤེས་ཀྱི་དུས་གཅིག་ལ་སོ་སོར་མ་འདྲེས་པར་བྱེ་བྲག་ཕྱེད་པའི་ཚུལ་གྱིས་མཁྱེན་པའོ།
དེས་ན་སྐད་ཅིག་མ་གཅིག་གིས་ཆོས་ཐམས་ཅད་ལ་མངོན་པར་རྫོགས་པ་སངས་རྒྱས་པ་ཞེས་བྱ་སྟེ། དུས་སྐད་ཅིག་མ་ཐུང་ངུ་གཅིག་ལའང་ཆོས་ཐམས་ཅད་མངོན་སུམ་དུ་རྟོགས་པའི་ཕྱིར་རོ། །སངས་རྒྱས་ཐམས་ཅད་ཀྱི་ཆོས་སྐུ་ལ་རིགས་མི་འདྲ་བའི་དབྱེ་བ་མེད་པ་དག་པ་གཉིས་ལྡན་གྱི་སྐུར་མཚུངས་པ་དེ་ཉིད། རང་གི་ངོ་
བོར་འཛིན་པས་ན། སངས་རྒྱས་ཀུན་གྱི་རང་བཞིན་འཆང་བ་སྟེ། འགའ་ཞིག་ཏུ། རིགས་ཀྱི་བདག་པོའི་དོན་དུ་བཤད་དོ། །རྡུལ་ཕྲ་རབ་ལས་གྲུབ་པའི་ལུས་མེད་པའི་ཆོས་ཀྱི་སྐུའི་བདག་ཉིད་ཅན་གྱི་ལུས་ཏེ་དེ་ནི་ལུས་ཐམས་ཅད་ཀྱི་ཆོག་ཅེས་བྱ་སྟེ། ལུས་ཐམས་ཅད་ཀྱི་མཐའ་རུ་ཕྱིན་པའི་ལུས་ནི་རྟོགས་པ་པོ་སྟེ་ཐོབ་པ་
@030A ༄༅། །ཡིན་ནོ། །དེ་ལྟ་བུའི་ལུས་སམས་སྐུ་ཐོབ་ནས་གདུལ་བྱའི་དོན་དུ་སྡུལ?་བའི་གཟུགས་རྣམས་སྣ་ཚོགས་པ་ཀུན་ཏུ་སྟོན་པར་བྱེད་པས་སྐུ་དེ་ནི་ནོར་བུ་ཆེན་པོ་རིན་ཆེན་དབང་གི་རྒྱལ་མཚན་གྱི་ཏོག་ཏུ་བྱས་པ་དང་མཚུངས་པར་གདུལ་བྱའི་བསམ་པ་ཐམས་ཅད་ཡོངས་སུ་རྫོགས་པར་བྱེད་པས་སོ། །ལུས་ཀྱི་མཆོག་ཅེས་པའི་སྐབས་
ཀྱི་ལུས་ནི། རྒྱ་འགྲེལ་འགའ་ཞིག་ཏུ་ཆོས་སྐུ་ལ་གཉིས་སུ་བྱེ་བའི་ཡེ་ཤེས་ཆོས་སྐུ་ལ་བཤད། ཁ་གཅིག་ངོ་བོ་ཉིད་སྐུ་ལ་ཆོས་སྐུར་བྱས་པ་དེར་བཤད། ཁལ?་ནི། ལོངས་སྐུའི་ལུས་ལ་འཆད་པའང་སྣང་ངོ། །ཅེས་བྱ་བ་ནི། ལེའུ་དགུ་པའི་བཤད་པའོ།། །།ལྔ་པ་བྱ་བ་གྲུབ་པའི་ཡེ་ཤེས་ནི། སངས་རྒྱས་ཀུན་གྱིས་རྟོགས་བྱ་བ།
ནས༑ འཇམ་དཔལ་དཔལ་དང་ལྡན་པའི་མཆོག །ཅེས་སོ། །དུས་གསུམ་གྱི་སངས་རྒྱས་ཀུན་གྱིས་རྟོགས་པར་བྱ་བ་སྟེ་མངོན་དུ་བྱས་པའི་གཉིས་སུ་མེད་པའི་ཡེ་ཤེས་ཀྱི་སྐུ་ནི། སངས་རྒྱས་ཀྱི་བྱང་ཆུབ་བླ་ན་མེད་པ་ཞེས་བྱ་ལ། བྱང་ཆུབ་དེ་ནི་ཐབས་དང་ཤེས་རབ་ཀྱི་བདག་ཉིད་གསང་སྔགས་ཀྱི་རྒྱུ་ལས་བྱུང་བའོ། །གསང་སྔགས་དེ་ནི་ཐབས་
ཤེས་ཀྱི་བདག་ཉིད་ཅན་ཡིན་གྱི། ཡི་གེའི་གཟུགས་ཀྱི་ངོ་བོར་མེད་དོ། །གསང་སྔགས་ཆེན་པོ་དེ་ལ་རིགས་གསུམ་ཡོད་པ་སྟེ། སྐུ་གསུང་ཐུགས་ཀྱི་དབྱེ་བ་དེ་ལྟར་རོ། །གསང་སྔགས་དེ་ནི་དོན་གཉིས་སམ་དོན་ཐམས་ཅད་ཀུན་བསྐྱེད་པ་པོ་སྟེ། འགྲུབ་པར་བྱེད་པའི་ཐབས་ཡིན་ལ། འདིས་སྦས་དོན་དུ་བསྐྱེད་རིམ་བསྟན་པར་བཤད། ཐིག
ལེ་ཆེན་པོ་ཡི་གེ་མེད་ཅེས་པ་ནི། ཁ་ཅིག། ཐིག་ལེ་ནི་ཆོས་དབྱིངས་དང༌། ཡི་གེ་མེད་པ་ནི་འགྱུར་བ་མེད་པའི་དོན་འཆད་པ། འགའ་ཞིག། ཐིག་ལེ་ནི་དབྱང་གསལ་ལ་བྱས་ནས། ཡི་གེ་མེད་པ་ནི། དེ་དག་དོན་དམ་པར་མེད་པ་ལ་འཆད། གཞན་དག། ཐབས་
ཤེས་དབྱེར་མེད་པའི་གསང་སྔགས་ནི་ཡི་གེའི་གཟུགས་སུ་མེད་པས། དེ་ལྟར་འཆད་པར་བྱེད་དོ། །རེ་ཞིག་དང་པོའི་དབང་དུ་བྱས་ན། དེ་ལྟ་བུའི་ཆོས་དབྱིངས་ཀྱི་ཐིག་ལེ་སྟོང་པ་ཆེན་པོ་དེ་འདི་ལས་ཡི་གེ་ལྔ་འཆར་ཏེ། འདི་ཡང་ཡེ་ཤེས་ལྔའི་བདག་ཉིད་རིགས་ལྔ་ལ་བྱེད་པ་དང༌། ཨོཾ་ཨཱཿ ཧཱུཾ་སྭཱ་ཧཱ་ལ་བྱེད་པ་དང༌།
@030B ཨ་ར་པ་ཙ་ན་ལ་བྱེད་པ་དང༌། ཨོཾ་ཧཱུཾ་ཏྲཱུཾ་ཧྲཱིཿ ཁཾ་ལ་ཆད་པའང་སྣང་སྟེ། གང་ལྟར་ཡང་རིགས་ལྔའི་བདག་ཉིད་མཚོན་པ་ཞིག་གོ །ཐིག་ལེ་སྟོང་པ་ཡི་གེ་དྲུག་ཅེས་པ་ལ་ནི། ལ་ལར་ཡི་གེ་བརྒྱ། ཞེས་བྱས་ནས་རིགས་བརྒྱར་འབྱེད་ལ། ཨོཾ་ཝཱ་གི་ཤྭ་རི་མུཾཿ སྟེ་དྲུག་ལ་བྱེད་པ་དང་སྣང་པ་ལས། རྒྱ་འགྲེལ་ཕལ་ཆེར་ལས་
སྔ་མ་ལྟར་འབྱུང་བས་དེ་བཞིན་དུ་བྱའོ། །ཐིག་ལེའི་དོན་ནི་ཕྱག་རྒྱའི་དོན་དུའང་བཤད་ལ། ཕྱག་རྒྱ་ཡང་རྒྱས་བཏབ་པ་ལས་མི་འདའ་པའི་དོན་ཏེ། ཆོས་དབྱིངས་ཀྱི་སྐུའི་བདག་ཉིད་ལས་རིགས་བརྒྱའི་དབྱེ་བ་འབྱེད་པའི་དོན་དུ་བྱའོ། །རྣམ་པ་ཀུན་ལྡན་རྣམ་པ་མེད། །ཅེས་པའི་རྣམ་པ་ཀུན་ལྡན་ནི། རིགས་ཀྱི་དབྱེ་བ་དེ་ལྟར་ཡོད་ཀྱང༌།
རྣམ་པ་མེད་ཅེས་པ་ནི། དེ་དག་མཐར་བཏུགས་ན་རིགས་གཅིག་ཏུ་འདུ་བའི་དོན་དུ་བཤད་པ་དང༌། མཚན་དཔེའི་རྣམ་པ་ཀུན་དང་ལྡན་པ་དང༌། ཆོས་སྐུ་སྟོང་པ་ཉིད་དུ་རྣམ་པ་མེད་པ་དང༌། ཡང༌། རྣམ་པ་ཀུན་གྱི་མཆོག་དང་ལྡན་པའི་ལུས་སུ་སྣང་ལང༌། རྡུལ་ཕྲ་རབ་ལས་གྲུབ་པའི་ལུས་ཀྱི་རྣམ་པའི་?????་སྣང་བ་ལས། རེ་ཞིག་དང་
པོ་ལྟེ་རོ། །བཅུ་དྲུག་ཕྱེད་ཕྱེད་ཐིག་ལེ་འཆང་ཞེས་པ་ལ། ཁ་ཅིག །བཅུ་དྲུག་ནི་དབྱངས་ཡིག་བཅུ་དྲུག་ལ་བྱས་ནས། དེའི་ཕྱེད་ནི་བརྒྱད་དང༌། དེའི་ཕྱེད་ནི་བཞི་སྟེ། ཨ་ཨཱ་ཨ་ཨཿ ཞེས་པ་བཞི་སྟེ། འདིས་རྣམ་ཐར་སྒོ་བཞི་མཚོན་གསུང་ལ། འགའ་ཞིག་ནི། བཞི་ནི་སུ་བཞི་འཆང་བའི་དོན་དུ་བཤད་པ་ལ། གོང་ལྟར་བརྩིས་པའི་བཞི་ནི། རྡོ་
རྗེ་དང་པདྨ་གཉིས། དེ་གཉིས་སྦྱོར་བས་ཀུན་ལྟ་བུ་དང༌། དེ་ལས་དོན་དམ་པའི་བདེ་བ་གཉིས་ཏེ་བཞིའི་གསུངས་ཏེ་ཕྱི་མ་ནི་སྦས་དོན་དུ་བྱའོ། །དེར་མ་ཟད། གཞན་དག་ནི་སྤྱི་བོར་ཟླ་བའི་ཐིག་ལེ་རལ་པའི་ཅོད་པན་ཐོགས་པའི་དོན་དུ་བཤད་པ་དང༌། ཐིག་ལེ་ཆ་བཅུ་དྲུག་ཏུ་འབབ་པའི་ཆ་བཞི་ལ་བཤད་པའང་སྣང་ངོ། །ཡན་ལག་མེད་པ་རྩིས་ལས་
འདས། ཞེས་པ་ལ། ཁ་ཅིག །ཡན་ལག་མེད་པ་ནི། རྣམ་པར་རྟོག་པ་མེད་པ་དང༌། ལ་ལ་ནི། ཆ་ཤས་མེད་པ་དང༌། འགའ་ཞིག་སྤྲོས་པ་མེད་པའི་དོན་དུ་འཆད་ལ། རྩིས་ལས་འདས་པ་ནི་བཅུ་དྲུག་ཕྱེད་ཅེས་པ་ལྟར་བརྗོད་པའི་རྩིས་ལས་འདས་པ་དང༌། ཡོད་མེད་སོགས་རྟག་ཆད་དུ་འཛིན་པའི་རྟོག་པ་ལས་འདས་པ་ལའང་བཤད་ཅིང༌།
@031A ༄༅། །དེ་རྣམས་མེད་པ་དང་འདས་རྒྱུ་ནི་བཞེད་པ་མི་འདྲ་བ་ཡོད་ཀྱང༌། རེ་ཞིག་སྐུ་བཞི་ལ་བྱའོ། །བསམ་གཏན་དང་པོ་སོགས་བསམ་གཏན་བཞི་ཡོད་པའི་བསམ་གཏན་བཞི་པ་མཐར་ཕྱིན་པའི་རྩེ་མོ་མཆོག་ལྷན་སྐྱེས་ཀྱི་ཡེ་ཤེས་འཆད་པ་སྟེ། བླ་མེད་ཀྱི་སྐབས་དང་སྦྱར་ཚེ། དབང་བཞི་པའི་སྐབས་དང་སྦྱར་དགོས་པས། ཐུན་
མོང་བའི་བསམ་གཏན་བཞི་པ་ཙམ་མིན་ནོ། །བསམ་གཏན་དང་པོ་སོགས་བཞི་པོ་རེ་རེ་ལའང་ལན་ལག་མི་འདྲ་བ་སྣ་ཚོགས་ཡོད་པ་ཀུན་མཁྱེན་པས་ན། བསམ་གཏན་ཡན་ལག་ཀུན་ཤེས་ཤིང་ཞེས་བྱ་ལ། ཐུན་མོང་བའི་བསམ་གཏན་བཞི་ལ་བཅོ་བརྒྱད་ཡོད་དོ། །སྦས་དོན་དུ་སྟོང་པ་བཞིན་དང་དགའ་བ་བཞི་འདྲེན་ཚུལ་སོགས་ཤེས་པའོ། །
དཔའ་བར་འགྲོ་བའི་ཏིང་ངེ་འཛིན་ལ་སོགས་པ་ཏིང་ངེ་འཛིན་རྣམས་མཁྱེན་ཅིང༌། ཏིང་ངེ་འཛིན་དེ་རྣམས་ནི་རིགས་གང་དུ་གཏོགས་པ་དང༌། དེ་དག་གང་ཟག་གང་གི་རྒྱུད་ཀྱིས་བསྡུས་པ་སོགས་མཁྱེན་པས་ན་རྒྱུད་རིག་པའོ། །ཁ་ཅིག་རྒྱུད་རིག་པ་ནི་ཤེར་ཕྱིན་རིག་པའི་དོན་དུ་འཆད། ཏིང་འཛིན་མཐར་ཕྱིན་པའི་ཡེ་ཤེས་ལུས་ཅན་དང༌། ལུས་
ཀྱི་མཆོག་ཆོས་སྐུ་དང༌། ལོངས་སྤྱོད་རྫོགས་པའི་སྐུ་གུན་གྱི་རྒྱལ་པོ་དང༌། སྤྲུལ་པའི་སྐུ་སྟེ་སྐུ་ཡི་མཆོག་བརྙེས་པས། སངས་རྒྱས་ཀྱི་སྤྲུལ་པའི་རྒྱུད་འཆད་པ་སྟེ་འཛིན་པའོ། །རྒྱུད་འཆང་བའི་ཚུལ་ཡང༌། ཕྱོགས་བཅུར་སྤྲུལ་པ་སྣ་ཚོགས་འགྱེད་པའི་ཚུལ་གྱིས་རང་རང་སྐལ་བ་ཇི་བཞིན་འགྲོ་བའི་དོན་བྱེད་པའོ། །ལྷའི་དབང་
པོ་ཞེས་སོགས་ཀྱི་སྦས་དོན་དུ་དཀྱིལ་འཁོར་གྱི་ལྷ་འགོད་པ་དང་སྦྱར་བ་ཞིག་སྣང་ཡང་འདི་ལྟར་བཤད་པ་བཞིན་བྱ་སྟེ། དེ་ལྟར་སྤྲུལ་པ་བསྟན་ནས་འགྲོ་བའི་དོན་བྱེད་པའི་ནང་ནས་འཇིག་རྟེན་པའི་རྣམ་པར་བསྟན་པ་ལ། ལྷ་ཡི་དབང་པོ་ཁྱབ་འཇུག། ལྷ་ཡི་ལྷ་ཚངས་པ། ལྷ་ཡི་དབང་པོ་བརྒྱ་བྱིན། ལྷ་མིན་བདག་པོ་སྒྲ་གཅན།
འཆི་མེད་དབང་པོ་ནི་འཐབ་བྲལ་ལ་སོགས་པའི་རྒྱལ་པོ་དང༌། ལྷ་ཡི་བླ་མ་ནི་ཕུར་ཕུ་དང༌། འཇོམས་བྱེད་ནི་ཚོགས་བདག། ལང་འཇོམས་བྱེད་ནི་དབང་ཕྱུག་སྟེ། དབང་ཕྱུག་ཆེན་པོར་སྤྲུལ་ནས་འགྲོ་བའི་དོན་བྱེད་ཅེས་སྦྱར་བ་དང༌། འདི་ལའང་འཆི་མེད་དབང་པོ་ནི་བརྒྱ་བྱིན་ལ་སྦྱར་བ་དང༌། ལྷ་དང་ཞེས་བཏོན་ནས་བཤད་
@031B བའང་ཡོད་དོ། །སྟོན་པ་གཅིག་པུ་ཞེས་སོགས་ནི། གོང་དུ་བརྗོད་མ་ཐག་པའི་སྤྲུལ་པ་དེ་དག་ཀྱང་རང་རང་གི་འཁོར་དུ་སྟོན་པ་དང་འདྲ་བ་ལ་བཤད་པ་ཞིག་སྣང་ཡང༌། འདི་ལྟར་བྱ་སྟེ་ཏེ་རྗེ་བཙུན་ནི་འགྲོ་བའི། ཆོས་སྟོན་པའི་ནང་ནས་ཟླ་མེད་པ་ལྟ་བུར་གྱུར་བས་ན། སྟོན་པ་གཅིག་པུ་དང༌། འགྲོ་བའི་བླ་མ་ཞེས་བྱ་
ལ༑ དེ་ལྟར་ཡིན་པའི་སྒྲ་འཇིག་རྟེན་ཕྱོགས་བཅུར་རབ་ཏུ་གྲགས་པ་དང༌། ཆོས་ཀྱི་སྦྱིན་པ་བྱེད་པས་ན་ཆོས་ཀྱི་སྦྱིན་བདག་ཆེ་བ་དང༌། དེ་ཡང་སེམས་ཅན་བདེ་བ་ལ་འགོད་པར་བཞེད་པའི་བྱམས་པའི་གནས་སེམས་ཅན་གྱི་དོན་དུ་ཆས་པ་སྟེ་བྱམས་པའི་གོ་ཆ་བཙན་པོ་བགོས་ཤིང༌། སེམས་ཅན་སྡུག་བསྔལ་ལས་
སྐྱོབ་འདོད་ཀྱི་སྙིང་རྗེ་ཡིན་ལ་ལད་ཁྲབ་ལྟ་བུའི་ཚུལ་དུ་བགོས་པ་སྟེ་གྱོན་ནས། ཤེས་རབ་ཀྱི་རལ་གྲི་དང་མདར། ཐབས་ཀྱི་གཞུ་ཐོགས་ཏེ། འགྲོ་བའི་ཉོན་མོངས་པ་སྤྱི་དང་མི་ཤེས་པའི་གཡུལ་དེ་སེལ་བར་མཛད་དོ། །མདའ་སྙིང་རྗེ་དང༌། གཞུ་སྟོང་ཉིད་ལ་སྦྱར་བའང་བསྣང༌། གཞན་ཡང༌། དཔའ་བོ་ཞེས་བྱ་སྟེ། བདུད་ཀྱི་དགྲ་ཆེན་པོ་
ཡིན་པའི་ཕྱིར་དང་བདུད་འདུལ་བའི་མཆོག་ཡིན་པའི་ཕྱིར་ཏེ། ལྷའི་བུའི་བདུད་སོགས་བདུད་བཞིའི་འཇིགས་པ་སེལ་བར་བྱེད་ཅིང༌། བདུད་ཀྱི་དབུང་རྣམས་ཕམ་པར་བྱེད་པའི་ཕྱིར་རོ། །བདུད་ལ་ཕྱིའི་བདུད་དང་ནང་གི་བདུད་གཉིས་ལས། ཕྱི་མ་ནི་ཉོན་མོངས་སོགས་ཡིན་ནོ། །འདི་དག་ནི། འཇམ་དབྱངས་ཉིད་ལ་སྦྱར་བ་ཙམ་དུ་མ་ཟད། སངས་རྒྱས་ཀྱི་
ལོངས་སྤྲུལ?་གྱི་སྐུ་གཞན་ལའང་སྦྱར་རྒྱུ་ཡིན་ནོ། །འདིར་སྦས་དོན་དུ་འཇམ་དབྱངས་ཀྱི་སྐུ་བསྒོམ་མའི་ཚུལ་ཞིག་བསྟན་པ་ཡང་བཤད། ངེས་དོན་དུ་རྗེ་བཙུན་ནི། རྫོགས་པའི་སངས་རྒྱས་འཇིག་རྟེན་གྱི་འདེན?་པ་ཡིན། དེའི་ཕྱིར་མཆོད་པར་འོས་པ་དང༌། བསྟོད་པར་འོས་པ་དང་ཕྱག་གི་གནས་དང༌། དུས་རྟག་ཏུ་བསྟེན་ནས་རི་མོར་བྱ་བའི་འོས་
ཡིན་པ་དང༌། རྒྱལ་སྟར་བཀུར་བར་འོས་པ་དང༌། བསྔགས་པའི་གནས་སུ་གྱུར་པས་བརྗོད་པར་བྱ་བའི་མཆོག་དང༌། བླ་མ་ལྟར་ཕྱག་བྱ་བར་འོས་པ་དང༌། བླ་མའི་ནང་ནས་མཆོག་ཡིན་པས་ནི་བླ་མའི་རབ་ཅེས་བྱའོ། །འཇིག་རྟེན་གསུམ་པོ་ནི་རྫུ་འཕྲུལ་གྱི་གོམ་པ་གཅིག་གིས་བགྲོད་པར་མཛད་ལ། ནམ་མཁའི་ཁམས་ཀྱིས་ཀུན་ཁྱབ་པ་ལྟར་
@032A ༄༅། །སྤྲུལ་པས་འཇིག་རྟེན་གྱི་ཁམས་མཐའ་མེད་པ་རྣམ་པར་གནོན་པ་སྟེ་ཁྱབ་པའི། །འཇིག་རྟེན་གསུམ་ནི་ས་འོག་ས་སྟེང་ས་བླ་གསུམ་དང༌། འདོད་ཁམས་གཟུགས་ཁམས་གཟུགས་མེད་ཁམས་གསུམ་ལ་བཤད་པ་གཉིས་སྣང༌། གོམ་གཅིག་བགྲོད་པ་ནི། སྔགས་གྱི་ཐེག་པ་ལ་བརྟེན་ནས་ཚེ་གཅིག་ལུས་གཅིག་ལ་འཆད་
རྒྱ་ནུས་པའི་དོན་དུ་བཤད་པའང་སྣང་ངོ། །མཁའ་ལྟར་མཐའ་མེད་སོགས་ལ། ཆོས་སྐུ་ནམ་མཁའ་ལྟ་བུ་ལ་གནས་པས་མི་མཐུན་ཕྱོགས་ཐམས་ཅད་གནོན་པ་དང༌། སེམས་ཅན་མཐའ་མེད་པའི་དོན་བྱེད་པ་ལའང་བཤད་དོ། །གསུམ་རིག་པ་ནི། ཁ་ཅིག་ལྷའི་མིག་གི་མངོན་ཤེས་དང༌། སྔོན་གྱི་གནས་རྗེས་སུ་དྲན་པ་དང༌། ཟག་པ་མེད་པའི་མངོན་ཤེས་
གསུམ་ལ་བཤད། ལ་ལ་དུས་གསུམ་རིག་པ་དང༌། སྡེ་སྣོད་གསུམ་རིག་པ་དང༌། ནང་དུ་སྐུ་གསུང་ཐུགས་རིག་པ་ལ་བཤད་པའི་ཚུལ་ཡང་སྣང་ངོ། །དེ་ལྟར་རིག་པ་ཡེ་ཤེས་ནི། སྐྱོན་ཐམས་ཅད་ཀྱིས་མ་གོས་པས་ན་གཙང་མ་དག་པ་སྟེ་ཞེས་བྱའོ། །ལྷའི་མིག་གི་མངོན་ཤེས་ནས། ཟག་པ་ཟད་པའི་མངོན་ཤེས་ཀྱི་བར་མངོན་ཤེས་དྲུག་དང་ལྡན་
ལ། དཀོན་མཆོག་གསུམ་དང་ཚུལ་ཁྲིམས་གཏོང་པ་ལྷ་རྗེས་སུ་དྲན་བཱི་རྗེས་དྲན་དྲུག་སྟེ་ཁ་ཅིག་ཕྱི་མ་གསུམ་ལ། དམ་ཚིག་ཐུགས་མཛད་པ་རྗེས་སུ་དྲན་པ་གསུམ་འདྲེན། ལ་ལ་འགྲོ་དྲུག་རྗེས་སུ་དྲན་པ་ལ་བཞེད། དེ་ལྟ་བུ་དང་ལྡན་པས་བྱང་ཆུབ་སེམས་དཔའ་སྟེ་རང་དོན་གྱི་སྐུ་ལ་དམིགས་པ་དང༌། སེམས་དཔའ་ཆེན་པོ་སྟེ་གཞན་དོན་གྱི་སྐུ་
ལ་དམིགས་པའམ་ཐོབ་པའི་སྒོ་ནས་འགྲོ་བའི་དོན་བྱེད་པའོ། །རྫུ་འཕྲུལ་ཆེན་པོ་འཇིག་རྟེན་ལས་འདས་པ་བརྙེས་པ་སྟེ། སྐུའི་དབང་ཕྱུག་ཐོབ་པའོ། །ཁ་ཅིག་རྫུ་འཕྲུལ་ཆེན་པོ་དང་འཇིག་རྟེན་ལས་འདས་པ་སོ་སོར་ཕྱེ་ནས་འཆད་དེ། འཁོར་བ་ལས་འདས་པའི་ཕྱིར་འཇིག་རྟེན་ལས་འདས་བྲ་བཞེད། ཆོས་ཐམས་ཅད་རང་བཞེན་མེད་ལྔ་
རྟོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་མཐའ་ལ་གནས་པ་སྟེ་མཐར་ཕྱིན་པར་གྱུན་ལ། ཤེས་རབ་གོམས་པའི་སྟོབས་ཀྱིས་ནི་ཆོས་ཀྱི་དེ་ཁོ་ན་ཉིད་ཀྱི་སྐུ་ཐོབ་བོ། །བདག་གི་དོན་རིག་པ་དང༌། གཞན་གྱི་དོན་རིག་པ་ཐམས་ཅད་མཐར་ཕྱིན་པ་སྟེ། དེའི་ཕྱིར་སེམས་ཅན་ཀུན་ལ་ཕན་པ་དང༌། དེས་ན་གང་ཟག་མཆོག་གམ་དམ་ཕ་ཞེས་
@032B བྱའོ༑ ༑གཞན་གྱི་དོན་བྱེད་པ་ལ་མཚུངས་པ་གཞན་མེད་པས། དཔེར་བྱ་ཀུན་ལ་འདས་པ་སྟེ། དཔེ་མེད་པའོ། །ཤེས་པ་ཡེ་ཤེས་ཀྱི་སྐུ་དང༌། ཤེས་བྱ་གཟུགས་ཀྱི་སྐུ་གཉིས་ངོ་བོ་དབྱེར་མེད་པའི་ཟུང་འཇུག་གི་སྐུའི་བདག་པོ་མཆོག་གོ །ཁ་ཅིག། ཤེས་པར་བྱེད་པ་དང་བྱ་བའི་དོན་གཉིས་ཀའི་བདག་པོ་མཆོག་ཏུ་བཞེད། ལ་ལ་གཟུངས་
འཛིན་གཉིས་ཀྱི་བདག་པོར་འཆད་པའང་སྣང༌། སྐྱེ་འཕགས་ཀུན་གྱི་གཙོ་བོ་དང༌། ཆོས་ཀྱི་སྦྱིན་པ་བྱིན་པས་ན་ཆོས་ཀྱི་སྦྱིན་བདག་ཞེས་བྱ་སྟེ། དམ་རྒྱ། ཆོས་རྒྱ། ལས་རྒྱ། ཕྱག་ཆེན་གྱི་ཕྱག་རྒྱ་བཞི་པོའི་དོན་སྟོན་པ་སྟེ། ཐུགས་དམ་རྒྱ། གསུང་ཆོས་བརྒྱ། འཕྲིན་ལས་རྒྱ། སྐུ་ཕྱག་རྒྱ་ཆེན་པོ་སྟོན་པའོ། །ཁ་ཅིག། འདུས་བྱས་ཐམས་ཅད་མ་རྟག
བག་བཅས་ཐམས་ཅད་སྡུག་བསྔལ། ཆོས་ཐམས་ཅད་བདག་མེད་པ། མྱ་ངན་ལས་འདས་པ་ཞིབ་སྟེ་ལྟ་བ་བཀར་བཏགས་ཀྱི་ཕྱག་རྒྱ་བཞི་སྟོན་པ་ལ་སྐྱར་ནས་བཤད་པ་ལྟར་བྱས་ཀྱང་མི་འགལ་ལོ། །དེ་སྟོན་པས་ན་འགྲོ་བའི་སྙེན་བཀུར་གནས་ཀྱི་མཆོག་ཏུ་གྱུར་པའོ། །ཉན་ཐོས་རང་རྒྱལ་བྱང་སེམས་ཀྱི་ཐེག་པ་གསུམ་གྱི་ངེས་པར་འབྱུང་གི་
གསུམ་པོ་དེར་བགྲོད་པའི་འབྲས་བུ་རྣམས་ཀྱི་ནང་ནས་དོན་གྱི་དམ་པ་མཆོག་ནི། སྒྲིབ་གཉིས་བག་ཆགས་དང་བཅས་པའི་དྲི་མས་རྣམ་པར་དག་པའི་དཔལ་དུ་གྱུར་པ་འཇིག་རྟེན་གསུམ་ན་སྐལ་བཟང་ཆབ་སྟེ་ཕུན་སུམ་ཚོགས་པ་དང༌། དོན་གཉིས་ཀྱི་དཔལ་དང་ལྡན་པའི་འབྱོར་བ་ཀུན་འགྲུབ་པར་བྱེད་པ་སྟེ། དེ་གང་ཞེ་ན། དྲང་དོན་དང༌། དེ་ལ?་
དོན་གྱི་འཇམ་དཔལ་ཡོན་ཏན་གྱི་དཔལ་དང་ལྡན་པའི་མཆོག་དེ་ཉིད་ཡིན་ནོ།། ཅེས་བྱ་བ་ནི་ལེའུ་བཅུ་པའི་བཤད་པའོ།། །།གསུམ་པ་འཇུག་བསྡུ་བ་ལ་གཉིས། ཡེ་ཤེས་ལྔ་ལ་བསྟོད་པའི་ལེའུ་དང༌། སྔགས་ཀྱི་ལེའུ་བཤད་པའོ། །དང་པོ་ནི། མཆོག་སྦྱིན་རྡོ་ནས་ཡེ་ཤེས་སྐུ་ཉིད་ཁྱོད་ལ་འདུད། །ཅེས་པའི་བར་ཏེ། འདི་ལ་ལྡེ་
མེ་ལོང་ལྟ་བུ། ཆོས་དབྱིངས་ཡེ་ཤེས། སོ་སོར་རྟོགས་པ། མཉམ་ཉིད་ཡེ་ཤེས། བྱ་གྲུབ་ཡེ་ཤེས་ཀྱི་སྒོ་ནས་བསྟོད་པའོ། །དང་པོ་ནི། སངས་རྒྱས་ས་ཀྱི་གོ་འཕང་མཆོག་སྦྱིན་པར་བྱེད་པ་གཉིས་སུ་མེད་པའི་ཡེ་ཤེས་ཀྱི་རྡོ་རྗེ་མཆོག་མེ་ཡོང་ལྟ་བུའི་ཡེ་ཤེས་ཁྱོད་ལ་འདུད། ཡང་དག་པའི་མཐའ་དག་པ་གཉིས་ལྡན་གྱི་ཆོས་དབྱིངས་དང་རོ་
@033A ༄༅། །གཅིག་ཏུ་ཞུགས་པར་གྱུར་པ་ཁྱོད་ལ་འདུད། ཆོས་རྣམས་རང་བཞིན་གྱིས་སྟོང་པ་ཉིད་རྟོགས་པ་ལས་བྱུང་བ་ཁྱོད་ལ་འདུད། སངས་རྒྱས་ཀྱི་བྱང་ཆུབ་ཏུ་གྱུར་བ་ཁྱོད་ལ་འདུད་དོ་ཅེས་པ་སྟེ་ངོ་བོའི་སྒོ་ནས་བསྟོད་པའོ། །གཉིས་པ་ནི། སྒྲིབ་གཉིས་ཀྱི་གཉིད་སངས་ཤིང་ཞེས་བྱ་ལ་བློ་རྒྱས་པ། ཡུལ་སྟོང་པ་ཉིད་ལ་རྟག་ཏུ་གནས་
པས་ན་ཆགས་པ་སྟེ། ཆོས་དབྱིངས་ཡེ་ཤེས་ཁྱོད་ལ་འདུད། སངས་རྒྱས་ཡུལ་སྟོང་པ་ཉིད་ལ་གནས་པར་འདོད་པ་ལ་ཕྱག་འཚལ་འདུད། སངས་རྒྱས་ཡུལ་དེར་གནས་པར་དགྱེས་པ་ཁྱོད་ལ་འདུད། སངས་རྒྱས་ཡུལ་དེར་རྟག་ཏུ་སར་རོལ་པ་ལ??་ཕྱག་འཚལ་འདུད་དོ། །འདིར་སེམས་ཅན་གྱི་དོན་དུ་ཆགས་པ་དང༌། འདོད་པ་སོ??????་
པ་སྣང་ངོ། །གསུམ་པ་ནི། སངས་རྒྱས་ཆོས་སྟོན་པའི་མཉེས་ནས་འཛུམ་པའི་རྒྱུ་བྱེད་པའི་སོ་སོར་རྟོགས་པའི་ཡེ་ཤེས་ཁྱོད་ལ་འདུད། སངས་རྒྱས་འགྲོ་བའི་དོན་མཛད་པ་ལ་དགྱེས་ནས་བཞད་པ་ལ་ཕྱག་འཚལ་འདུད། སངས་རྒྱས་ཆོས་སྟོན་པའི་གསུང་གི་མངའ་བདག་ཉིད་དུ་གྱུར་པ་ཁྱོད་ལ་འདུད། སངས་རྒྱས་དེ་བཞིན་ཉིད་དང་ངོ་གཅིག་ཏུ་
གྱུར་པའི་ཐུགས་ལ་ཕྱག་འཚལ་འདུད་དོ། །བཞི་པ་ནི། རང་བཞིན་གྱིས་མེད་པའི་སྟོང་པ་ཉིད་ལས་བྱུང་བའི་མཉམ་ཉིད་ཡེ་ཤེས་ཁྱོད་ལ་འདུད། སངས་རྒྱས་ཀྱི་གོ་འཕང་འབྱུང་བའི་གནས་ཁྱོད་ལ་འདུད། ནམ་མཁའ་ལྟ་བུའི་ཆོས་ཉིད་རྟོགས་པ་ལས་བྱུང་བ་ཁྱོད་ལ་འདུད། གཉིས་སུ་མེད་པའི་ཡེ་ཤེས་ལས་བྱུང་བ་ཁྱོད་ལ་འདུད་དོ། །ལྔ་
པ་ནི། སྒྱུ་མ་ལྟ་བུའི་རྣམ་པར་འཕྲུལ་པའི་དྲ་བ་སྤྲུལ་པ་སྣ་ཚོགས་སྟོན་པ་བྱ་གྲུབ་ཡེ་ཤེས་ཁྱོད་ལ་འདུད། སངས་རྒྱས་ཀྱི་མཛད་པའི་རྣམ་རོལ་སྟོན་པ་ཁྱོད་ལ་འདུད། ཡོན་ཏན་གྱི་རྣམ་པ་ཐམས་ཅད་ཡོངས་སུ་རྫོགས་པས་སེམས་ཅན་ཐམས་ཅད་ཀྱི་དོན་བྱེད་པ་ཁྱོད་ལ་འདུད། ལྷན་ཅིག་སྐྱེས་པའི་ཡེ་ཤེས་ཀྱི་སྐུ་ཉིད་དུ་གྱུར་པ་ཁྱོད་ལ་འདུད་
དོ་ཅེས་པ་སྟེ། འདི་དག་ཡེ་ཤེས་ལྔ་གང་གི་བསྟོད་པ་ཡིན་པའི་གོ་རིམ་དང༌། དོན་བཤད་པས་མི་འདྲ་བ་འགའ་རེ་སྣད་ངོ། །འདི་ཡེ་ཤེས་ལྔའི་བསྟོད་པ་ཡིན་ཀྱང༌། དོན་ལ་རིགས་ལྔའི་བསྟོད་པ་སྟེ། དེ་ཡང་སྤྱི་དང་བྱེ་བྲག་འཇམ་དཔལ་ཉིད་ལ་རིགས་ལྔར་ཕྱེ་ནས་བསྟོད་པའི་སྐབས་སོ། །ཞེས་པ་ནི། ལེའུ་བཅུ་གཅིག་པའི་བཤད་པའོ།། །།
@033B གཉིས་པ་ནི། ཨོཾ་སརྦ་དྷརྨཱ་ནས་གརྦྷེ་ཨཿ ཞེས་སོ། །ཨོཾ་ནི་སྔགས་ཀྱི་འགོ་འདྲེན་ཏེ། དམ་བཅའ་བ་དང༌། བཀྲ་ཤིས་པ་སོགས་ལ་འཇུག་གོ །སརྦ་དྷརྨ་ནི་ཆོས་ཐམས་ཅད། ཨ་བྷ་ཝ་ནི་དངོས་པོ་མེད་བཅམ་རང་བཞིན་མེད་པ། སྭ་བྷཱ་ཝ་ནི་རང་བཞིན། བི་ཤུདྡྷེ་ནི་རྣམ་པར་དག་པ། བཛྲ་ཙཀྵཱ?་ནི་རྡོ་རྗེའི་མིག་ཨ་ཨཱཿ ཨཾ་ཨཿ རྣམ་པར་
ཐར་པའི་སྒོ་བཞི་མཚོན་བྱེད། པྲ་ཀྲྀ་ཏ་ནི་རང་བཞིན་ནས་གང་ལ་ཞུགས་པའམ་གཉིས་སུ་མེད་པ། པ་རི་དུད་དྷ་ནི་ཡོངས་སུ་དག་པ། སརྦ་དྷཱརྨཱ་ནི་ཆོས་ཐམས་ཅད། ཡ་དུ་ཏ་ནི་གཤེགས་ཤིག་གམ་སྐྱེད་པ། སརྦ་ཏ་ཐཱ་ག་ཏ་ནི་དེ་བཞིན་གཤེགས་པ་ཐམས་ཅད། ཛྙཱ་ན་ཀཱ་ཡ་ནི་ཡེ་ཤེས་ཀྱི་སྐུ། མཉྫུ་ཤྲཱིནི་འཇེལ་དཔལ། བ་རི་
ཤུདྷི་ཏ་ནི་ཡོངས་སུ་དག་པ། མུ་པཱ་དཱ་ཡ་ཏི་ནི་མྱུར་པར་གཤེགས་ཤིག །ཨ་ཨཱཿནི་རང་བཞིན་སྐྱེ་མེད་མཚོན་བྱེད། སརྦ་ཏ་ཐཱ་ག་ཏ་ནི་དེ་བཞིན་གཤེགས་པ་ཐམས་ཅད། ཧྲྀ་ད་ཡ་ནི་སྙིང་པོ། །ཧ་ར་ཧ་ར་ནི་འབྱུང་བ་འབྱུང་བའམ་འཕྲོག་པ་གཉིས། ཨོཾ་ཧཱུཾ་ཧྲཱིཿ ནི་སྐུ་གསུང་ཐུགས་མཚོན་བྱེད། བྷ་ག་ཝན་བཅོམ་ལྡན་འདས། ཛྙཱ་ན་ཡེ་
ཤེས། མུརྟི་ནི་ལུས་སམ་སྐུའམ་ཐམས་ཅད། ཝཱ་གི་ཤྭ་ར་ནི་དག་གི་དབང་ཕྱུག། མ་ཧཱ་པ་ཙ་ནི་འཇམ་པ་ཆེན་པོའམ་སྨིན་པ་ཆེན་མོ། །ག་ག་ནཱི་ནམ་མཁའ། ཨ་མ་ལ་ནི་ལྟ་བུ། སུ་ནི་བདེ་བ། པ་རི་ཤུདྷ་ནི་ཡོངས་སུ་དག་པ། དྷཱརྨ་དྷཱ་དུ་ནི་ཆོས་ཀྱི་དབྱིངས། གརྦྷ་ནི་སྙིང་པོ། ཨཱཿ ནི་སྐྱེ་བ་མེད་པའོ། །དེ་ཡང༌། རྩ་སྔགས། སྤྱན་འདྲེན་
གྱི་སྔགས། འཕྲེང་སྔགས་གསུམ་སྟེ། ཨོཾ་སརྦ་དྷརྨཱ་ནས། ཨ་ཨ་ཨཾ་ཨཿ འི་བར་རྩ་སྔགས་དང༌། པྲ་ཀྲྀ་ཏ་ནས། མུ་བཱ་དཱ་ཡ་ཏིའི་བར་སྤྱན་འདྲེན་པའི་སྔགས། དེ་མན་ཆད་ནི་འཕྲེང་བའི་སྔགས་སོ། །སྔགས་འདི་དག་གི་དོན་ལ་ངེས་དོན་གྱི་བཤད་པ་གཞན་ཡོད་ཀྱང་མང་དུ་དོགས་ནས་མ་བྲིས་སོ། །
ཞེས་པ་ནི་ལེའུ་བཅུ་གཉིས་པའི་བཤད་པའོ།། །།གསུམ་པ་རྗེས་སུ་ཡི་རང་བ་ནི། དེ་ནས་དཔལ་ལྡན་རྡོ་རྗེ་འཆང༌། །ནས། རྫོགས་པའི་སངས་རྒྱས་རྣམས་ཀྱི་བཤད། །ཅེས་པའི་བར་ཏེ། སྟོན་པས་ལན་རྒྱས་པར་གསུངས་པའི་རྗེས་དེ་ནས་སྡུད་པ་པོ་རྡོ་རྗེ་འཆང་(OPHYA)ག་ན་རྡོ་རྗེ། ཡི་དག་ཞིང་
@034A ༄༅། །མགུ་ནས་ཐལ་མོ་སྦྱར་ཏེ། མགོན་པོ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ཏེ། རྣམ་མང་མགོན་པོ་ལག་ན་རྡོ་རྗེ་གཞན་རྣམས་དང༌། གསང་བ་ཀུན་གྱི་དབང་པོ་ལག་ན་རྡོ་རྗེ་དེ། རང་གི་འཁོར་ཁྲོ་བོའི་རྒྱལ་པོར་བཅས་པ་རྣམས་ཀྱིས་སྐད་ཀྱི་གསང་
བསྟོད་ནས་ནི་འོག་ནས་འབྱུང་བའི་ཚིག་འདི་སྐད་ཅེས་གསོལ་ཏོ། །མགོན་པོ་ཞེས་སྟོན་པ་ལ་བོས་ནས། ཞུ་བ་པོ་བདག་ཅག་ཁྱོད་ཀྱིས་གསུངས་པ་ལ་རྗེས་སུ་ཡི་རང་ངོ། །ལེགས་སོ་ལེགས་སོ་ཞེས་གཉིས་འབྱུང་བའི་སྔ་མ་ནི། རང་དོན་དང༌། ཕྱི་མ་གཞན་དོན་དུ་བྱིན་པའི་ཚུལ་གཅིག་དང༌། ཡང་སྔ་མ་ཟབ་པ་དང༌། ཕྱི་མ་བརྗོད་
བྱ་རྒྱ་ཆེ་བའི་ཚུལ་ལ་བྱིན་པར་བཤད་པའང་སྣང་ངོ། །དེའི་ཕྱིར་རྒྱུད་འདི་ལེགས་པར་གསུངས་སོ་ཞེས་པ་སྟེ། དེ་ཡང་ཞུ་བ་པོ་བདག་ཅག་རྣམས་ཡང་དག་པར་རྫོགས་པ་ཡི་བྱང་ཆུབ་མྱུར་དུ་ཐོབ་པར་བྱེད་པའི་དོན་ཆེན་པོ་མཛད་པའོ། །འགྲོ་བ་མགོན་མེད་པ་རྣམས་དང་ནི། རྣམ་གྲོལ་འབྲས་བུ་སངས་རྒྱས་ཀྱི་གོ་འཕང་འཚལ་བ་སྟེ། འདོད་
པ་ཡི་དོན་དུ་གཉེར་བྱ་རྣམ་དག་ལེགས་པའི་ལམ་འདི་ནི། སྒྱུ་འཕྲུལ་དྲ་བའི་ཚུལ་ཏེ་ལྷ་དང་ཡེ་ཤེས་ཀྱི་བཀོད་པའི་རྣམ་རོལ་བསྟན་པ། བརྗེད་བྱ་ཟབ་ཅིང་ཡངས་ལ་རྒྱ་ཆེ་བ་སྟེ། དོན་ཆེན་པོ་སངས་རྒྱས་ཀྱི་གོ་འཕང་སྟེར་བར་མཛད་པའི་སྒོ་ནས་འགྲོ་བའི་དོན་བྱེད་པ། དོན་མ་ལུས་པ་སངས་རྒྱས་རྣམས་ཀྱི་མངོན་སུམ་གྱི་སྤྱོད་ཡུལ་ཡིན་
པའི་མཚན་ཡང་དག་པར་བརྗོད་པ་འདི་ནི། དུས་གསུམ་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱིས་བཤད་པ་ཡིན་ནོ། །འདི་ལའང་སྦས་དོན་གྱི་བཤད་པ་གཞན་ཞིག་ཀྱང་སྣང་ལ། དེར་མ་ཟད་ལེའུ་འདི་ལ་འགྱུར་མི་འདྲ་བ་སྣང་བས་དོན་ཀྱང་གོ་རིམ་མི་འདྲ་བ་རེ་འབྱུང་ངོ། །རྒྱུད་འདི་ནི་སྒྱུ་འཕྲུལ་དྲ་བ་སྟོང་ཕྲག་བཅུ་དྲུག་པ་རྣལ་
འབྱོར་ཆེན་པོའི་རྒྱུད་རྒྱས་པ་ལས་ལོགས་སུ་ཕྱུང་བ་ཡིན་པ་སོགས་ནི་འཕགས་པ་སྒྱུ་འཕྲུལ་དྲ་བ་ཞེས་སོགས་ཀྱིས་སྟོན་པ་དོན་ནི་སླའོ། །ཅེས་པ་ནི་ལེའུ་བཅུ་གསུམ་པའི་རྣམ་པར་བཤད་པའོ། །འདི་ལ་ཕན་ཡོན་ནི་ལེའུ་དྲངས་ན་བཅུག་བཞི་ཡིན་ལ། བཅུ་གསུམ་གྱི་རིམ་པ་ནི། གོང་དུ་བསྟན་པ་ལྟར་ཏེ། གོ་བདེ་བར་
@034B བརྗོད་ན། ཞུས་པའི་ལེའུ། ལན་གྱི་ལེའུ། ལུས་རྣམ་གང་གི་ལེའུ། མངོན་པར་བྱང་ཆུབ་པའི་ལེའུ། རྡོ་རྗེ་དབྱིངས་ཀྱི་དཀྱིལ་འཁོར་གྱི་ལེའུ། ཡེ་ཤེས་ལྔ་ལ་ཆོས་དབྱིངས་ཡེ་ཤེས། མེ་ལོང་ཡེ་ཤེས། སོར་རྟོགས་ཡེ་ཤེས། མཉམ་ཉིད་ཡེ་ཤེས། བྱ་གྲུབ་ཡེ་ཤེས་ཀྱི་ལེའུ་ལྔ། བསྟོད་པའི་ལེའུ། སྔགས་ཀྱི་ལེའུ། རྗེས་སུ་
ཡི་རངས་པའི་ལེའུ་སྟེ་བཅུ་གསུམ་མོ། །འདི་ལས་སྐུ་གསུམ་གྱི་རྣམ་གཞག་དང༌། མཛད་པ་སོགས་བསྐྱར་ནས་གསུངས་པ་སྣང་བ་ནི། ཡེ་ཤེས་ལྔ་པོ་རེ་རེ་ལ་བརྩམས་ཏེ་སྐུ་གསུམ་མཛད་པ་སོགས་བསྟན་པ་ཡིན་པས་ཟློས་པའི་སྐྱོན་མེད་ལ། དེ་དག་ཀྱང་འཇམ་དཔལ་གྱི་རྣམ་པར་འཕྲུལ་པའི་དབང་དུ་བྱས་པ་ཡིན་པས། འཇམ་
དཔལ་ལ་བསྟོད་པའི་སྐབས་འཆོལ་པའི་ཉེས་པ་ཡང་མེད་དོ། །རྒྱུད་འདིའི་དོན་འགྲལ་བའི་སློབ་དཔོན་ཉི་མ་སྦས་པ་དང༌། གྲུབ་ཆེན་དཔེ་མེད་འཚོས་འདི་འི་དོན་གཙོ་བོར་ངེས་དོན་བསྐྱེད་རྫོགས་གཉིས་དང༌། ཁྱད་པར་རྫོགས་རིམ་པ་བསྟོན་པའི་དུན་དུ་བཤད་ལ། རྒྱ་འགེལ་གཞན་ཕལ་ཆེར་ལས་སྔར་གྱི་འཆད་ཚུལ་ལྟར་བཤད་དོ། །
འོན་ཀྱང་འཆད་ཚུལ་མི་འདྲ་བ་ཡོད་པ་ནི་གོང་དུ་བརྗོད་པ་ལྟར་ཏེ། རྒྱ་འཕྲེལ་འདི་དག་གི་དགོངས་པ་རྟོགས་དཀའ་ཡང་དེ་དག་ལས་གང་འཆད་བདེ་བ་དང་སྐབས་སུ་བབས་པ་ཉིད་གཞིར་བྱས་ཏེ་བཤད་པ་ཡིན་ནོ།། །།སྨྲས་པ། གསུང་རབ་ཀུན་གྱི་སྙིང་པོ་མཐར་ཐུག་པ། །རྡོ་རྗེའི་ཚིག་གིས་རྒྱས་བཏབ་རྒྱུད་ཀྱི་རྩེ། །སར་
གནས་འཕགས་པའི་སྤྱོད་ཡུལ་འདི་ཡི?་དོན། །བདག་ལྟའི་བྱིས་བློས་དཔག་པར་ག་ལ་ཞིག །ཇི་ལྟར་འདོད་རྒུའི་འབྱུང་གནས་དབང་གི་རྒྱལ། །དམུས??་ལག་ཏུ་སོན་བཞིན་ཕྱོགས་ཀུན་ན། །འདི་ལ་ཞལ་ཏོན་བྱེད་པ་མང་མོད་ཀྱང༌། །གང་འདིའི་དོན་ཟབ་མི་ཤེས་ཚིག་ཙམ་བརྗོད། །གལ་
ཏེ་དཔྱད་ཀྱང་གཏིང་དཔོག་མི་ནུས་ཤིང༌། །ཁྱིམ་པ་ཡན་ཀྱི་བྱའི??་ཚས་ཙམ་དུ། །འཛིན་པར་མཐོང་ནས་ཚུལ་དམ་བཟོད་པར། །གང་གིས་བསྐུལ་བཞིན་འདི་དོན་འགྲེལ་ལ་བརྩོན། །དེ་ཚེ་མཁས་པས་བཀྲལ་བའི་སྲོལ་ཞུགས་ནས། །ཇི་ལྟར་ནུས་པའི་ཚུལ་གྱིས་དཔྱད་པ་
@035A ༄༅། །འདིར༑ མ་རྟོགས་ལོག་རྟོག་ནོངས་པར་གྱུར་པའི་ཚེ། །རང་གི་ཉེས་ཏེ་དམ་པའི་སྤྱན་སྔར་འཆགས། །གང་ཕྱིར་འཕགས་ཡུལ་མཁས་པའི་མཆོག་དག་ཀྱང༌། །ཤིན་ཏུ་རྟོགས་དཀའི་གནས་འདི་འཆད་པའི་ཚེ། །ཐེ་ཚོམ་ཁྱོགས་??་ངལ་སོ་བསྡེད་
བྱེད་ན། །བླུན་རྨོངས་བདག་ལྟ་འདི་ལ་ཅིས་མི་འཁྲུལ། །འོན་ཏེ་ཚད་ལྡན་གཞུང་དོན་གཞིར་བཞག་ནས། །རང་གི་བློ་ཡིས་འབད་པས་བཀྲལ་བ་ལས། །ལེགས་པར་བསྐྲུན་པའི་དགེ་བ་གང་ཐོབ་དེས། །རྒྱལ་བའི་དམ་ཆོས་མ་ལུས་འཛིན་
གྱུར་ཅིག །ཅེས་རྒྱུད་ཀྱི་རྒྱལ་པོ་མཚན་ཡང་དག་པར་བརྗོད་པའི་སྙིང་པཱོ་དོན་འགྲེལ་གསལ་བ་ཞེས་བྱ་བ་འདི་ནི། ཕྱོགས་འདིར་བསྟན་པའི་མངའ་བདག་ཀོའུ་ཤྲི་ནང་སོ་ངག་དབང་འཕྲིན་ལས་རྒྱ་མཚོ་དཔལ་བཟང་པོ་དང༌། གང་དེའི་རིགས་དཔོན་དུ་གྱུར་བ་
དཔོན་སྲས་བློ་བཟང་བསྟན་པའི་རྒྱལ་མཚན་རྣམ་པ་གཉིས་ཀྱིས་གནང་སྦྱིན་དང་བཅས་ཏེ་བསྐུལ་བ་དང༌། དབོན་པོ་ཉིད་ཀྱི་སློབ་དཔོན་པ་གནས་བརྟན་འཕྲིན་ལས་དར་རྒྱས་དང༌། ཉང་བཟའི་དཀའ་བཅུས་ཀྱང་བསྐུལ་བའི་དོང་ཅོ་ནེའི་སློབ་དཔོན་པ་ཤཱཀྱའི་དགེ་
སློང་རིགས་པ་སྨྲ་བའི་སྤོབས་པ་ཅན་གྲགས་བཤད་སྒྲུབ་ཅེས་བྱ་བས་དགེ་བྱེད་ཀྱི་ལོར་སྦྱར་བ་སྟེ། ཕྱིས་དགེ་སློང་འཇམ་དབྱངས་གྲགས་པ་དང་བློ་བཟང་ཕུན་ཚོགས་གཉིས་ཀྱིས་གྲྭ་ཚང་དུ་དཀའ་བཅུའི་མཚན་གསོལ་བའི་ཚ་པར་དུ་བརྐོས་སོ།། མངྒ་ལ།།