[སྔོན་འགྲོའི་དཔར་གཞི།]་
@001A ༄༅། །བླ་བརྒྱུད་ནི། རིགས་བརྒྱའི་ཁྱབ་བདག་རྡོ་རྗེ་འཆང༌། །རྗེ་བཙུན་རྡོ་རྗེ་རྣལ་འབྱོར་མ། །གྲུབ་ཆེན་རྡོ་རྗེ་དྲིལ་བུ་པ། །གསོལ་བ་འདེབས་སོ་བྱིན་གྱིས་རློབས། །རུས་སྦལ་ཞབས་དང་དྲ་བ་འཛིན། །ནག་པོ་གུ་ཧྱ་རྣམ་རྒྱལ་ཞབས། །
ཏེ་ལོ་ནཱ་རོ་ཕམ་མཐིང་ལ། །གསོལ་བ་⁽14c6⁾། །ཤེར་བརྩེགས་བློ་གྲོས་གྲགས་པའི་དཔལ། །ཀུན་སྙིང་བསོད་ནམས་རྩེ་མོ་དང༌། །གྲགས་པ་རྒྱལ་མཚན་ས་པཎ་ལ། །གསོལ་བ་⁽14c6⁾། །བོ་དོང་ཁྲོ་བུ་ཡང་རྩེ་བ། །བུ་སྟོན་ཡབ་སྲས་བཙོང་ཁ་པ། །མཁས་
གྲུབ་ཞ་ལུ་ཆེན་པོ་ལ། །གསོལ་བ་⁽14c6⁾། །ཀུན་མཁྱེན་ངག་དབང་བརྩོན་འགྲུས་སོགས། །དཔལ་ལྡན་འཁོར་ལོ་སྡོམ་པ་ཡི། །རྩ་བརྒྱུད་བླ་མ་ཐམས་ཅད་ལ། །གསོལ་བ་འདེབས་སོ་བྱིན་གྱིས་རློབས། །སྨོན་ལམ་ནི། ཐུན་མོང་ལམ་གྱིས་རྒྱུད་སྦྱངས་ཏེ།།
རྣམ་དག་དབང་གི་སྒོར་ཞུགས་ནས། །དམ་ཚིག་སྡོམ་པ་མིག་འབྲས་ལྟར། །ཚུལ་བཞིན་སྲུང་པར་ཉིད་གྱུར་ཅིག །མ་དག་སྐྱེ་ཤི་བར་དོ་གསུམ། །སྦྱོང་བྱེད་རིམ་པ་དང་པོའི་ལམ། །སྒྲུབ་པ་སྙིང་པོར་བྱེད་པ་ཡིས། །རང་རྒྱུད་སྨིན་པར་བྱེད་ནུས་ཤོག །
རྗེས་གཞིག་རིམ་པའི་རྣལ་འབྱོར་སོགས། །ཐབས་མཁས་མཆོག་ལས་བདེ་སྟོང་གི །ཡེ་ཤེས་སྒྱུ་ལུས་ཟུང་འཇུག་བཅས། །མངོན་གྱུར་གྲོལ་བར་བྱེད་ནུས་ཤོག །དེ་ཡི་མཐུ་ལས་འགྲོ་བ་ཀུན། །དཔལ་ལྡན་འཁོར་ལོ་སྡོམ་པ་ཡི། །གོ་འཕང་
མཆོག་ལ་སྐད་ཅིག་གིས། །བདེ་བླག་ཉིད་དུ་འགོད་ནུས་ཤོག །ཞེས་དང༌། བཀྲ་ཤིས་ནི། རབ་ཡངས་ནམ་མཁར་འཁོར་ལོ་བདེ་མཆོག་གི །ལྷ་ཚོགས་ཁ་ཅིག་མེ་ཏོག་ཆར་འབེབས་ཤིང༌། །ལ་ལས་གླུ་དབྱངས་གཞན་དག་བགེགས་འཇོམས་ཀྱིས།།
@001B འཕྲིན་ལས་མཛད་པས་ཁྱེད་ལ་དཔལ་སྟེར་བར། །ཤིས་གྱིས་ཤིས་བརྗོད་བདག་གིས་བསྒྲགས་པར་བྱ། །ལན་ལག་བདུན་ལྡན་ཁྱབ་བདག་རྡོ་རྗེ་འཆང༌། །གསང་བདག་ས་ར་ཧ་དང་ཀླུ་སྒྲུབ་ཞབས། །རྡོ་རྗེ་དྲིལ་བུ་ལ་སོགས་བླ་མ་ལ། །དགེ་ལེགས་
མཚན་མ་ཇི་སྙེད་མཆིས་པ་དེས། །མི་མཐུན་ཕྱོགས་ཞི་བཀྲ་ཤིས་དཔལ་ཐོབ་ཤོག །བཅོམ་ལྡན་ཧེ་རུ་ཀ་དཔལ་ཡབ་ཡུམ་དང༌། །མཁའ་འགྲོ་ལཱ་མདུང་སྐྱེས་གཟུགས་ཅན་མ། །དཔའ་བོ་རྣལ་འབྱོར་མ་ཚོགས་ཐམས་ཅད་ལ། །དགེ་ལེགས་
མཚན་མ་⁽14c6⁾། །མི་མཐུན་ཕྱོགས་ཞི་⁽14c6⁾། །འཁོར་ལོ་སྡོམ་པའི་རྩ་བཤད་རྒྱུད་རྣམས་དང༌། །རིམ་གཉིས་ལམ་དང་དེ་ཡི་ཕྱོགས་གཅིག་ཙམ། །འཛིན་པར་བྱེད་དང་སྒྲུབ་པ་མ་ལུས་ལ། །དགེ་ལེགས་མཚན་མ་ཇི་སྙེད་མཆིས་པ་དེས། །མི་མཐུན་
ཕྱོགས་ཞི་བཀྲ་ཤིས་དཔལ་ཐོབ་ཤོག །ཡེ་ཤེས་རང་བཞིན་ལས་གྲུབ་ཕོ་བྲང་མཆོག །ཉི་ཟླའི་འོད་འཕྲོ་རིན་ཅེན་རྒྱན་གྱིས་མཛེས། །དཀྱིལ་འཁོར་ལྷ་ཚོགས་འདུ་བའི་གཞིར་གྱུར་བ། །དགེ་ལེགས་མཚན་མ་ཇི་སྙེད་མཆིས་པ་དེས། །མི་མཐུན་
ཕྱོགས་ཞི་བཀྲ་ཤིས་དཔལ་ཐོབ་ཤོག །ཅེས་དྲིལ་བུ་ལྷ་ལྔའི་བླ་བརྒྱུད་སྨོན་ལམ་ཤིས་བརྗོད་མདོར་བསྡུས་པ་འདི་ཡང༌། གནས་བརྟན་ཀུན་དགའ་ནོར་བུས་བསྐུལ་བ་ལྟར། བཤད་སྒྲུབ་མིང་ཅན་གྱིས་མྱུར་བར་བྲིས་སོ། །བཀྲ་ཤིས། །