@19A.6 (TSAD MED BZHI'I RGYA CHER 'GREL PA BZHUGS,) *, ,BYAMS PA DANG NI SNYING RJE DANG, ,DGA' BA DANG NI BTANG SNYOMS TE, ,DE DAG CHEN PO TSAD MED PA, ,'BAD PAS BSGOM PHYIR 'DIR BSHAD BYA, ,'DI LTAR SEMS CAN TSAD MED PA LA DMIGS PA DANG, TSOGS TSAD MED PA DANG, CHOS TSAD MED PA DANG, YE SHES TSAD MED PA'O, , DE LA SEMS CAN TSAD MED PA NI KHAMS GSUM PA'I SEMS CAN MANG NYUNG 'DI TZAM ZHIG YOD DO ZHES DPAG PAR MI NUS PAS NA SEMS CAN TSAD MED PA ZHES BYA STE, 'DI LTAR BCOM LDAN 'DAS KYIS 'PHAGS PA DE BZHIN GSHEGS PA'I SNYING RJE CHEN PO BSTAN PA'I MDO LAS 'DI SKAD DU, RIGS KYI @19B BU PHYOGS 'DI NYID NA SHING RTA'I 'PHANG LO TZAM GYI BUG PA NA GNAS PAR GYUR PA'I SEMS CAN GANG DAG DE BZHIN GSHEGS PAS GZIGS PAR GYUR PA DE DAG NI CHES MANG GI ,STONG GSUM GYI STONG CHEN PO'I 'JIG RTEN GYI KHAMS KYI LHA DANG MI RNAMS NI DE LTA MA YIN TE, DE LTAR SNANG BAR MA GYUR PA'I SEMS CAN GYI KHAMS NI TSAD MED DO ZHES GSUNGS TE, DE LTA BAS NA SEMS CAN GYI KHAMS TSAD MED PA GZUNG BAR MI NUS PAS NA SEMS CAN TSAD MED PA ZHES BYA'O, ,TSAD MED PA BSGOMS PAS SEMS CAN TSAD MED PA LA CI LTAR DMIGS PAR BYA ZHING BSGOM ZHE NA, 'DI LTAR KHAMS GSUM PA'I SEMS CAN THAMS CAD THOG MA MED PA'I DUS NAS, SO SO'I LAS KYI DBANG GIS GNAS MTHON DMAN DU 'KHOR BA 'DI DAG BDAG DANG LAN BRGYA STONG DU MAR GNYEN DU MA GYUR PA MED DE, 'DI NI BDAG GI GNYEN YIN NO SNYAM NAS, SEMS CAN THAMS CAD LA TSAD MED PA BZHI POS BTANG SNYOMS SU GNAS PA 'DI NI SEMS CAN TSAD MED PA LA DMIGS PA ZHES BYA BA'I THA TSIG GO, ,DE LA TSOGS TSAD MED PA NI, BSOD NAMS DANG YE SHES KYI TSOGS TSAD MED PA STE, RGYUR GYUR PA NI CHOS BZHI PO YIN LA DE NI BSOD NAMS DANG YE SHES KYI TSOGS TSAD MED PA RNAM PA GNYIS BSKYED PA'I RGYU'AM NGO BO YIN TE, 'DI LTAR BCOM LDAN 'DAS KYIS KYANG MDO DAG LAS GSUNGS PA, RIGS KYI BU BYAMS PA'I TING NGE 'DZIN BSGOM PA STAN LAS MA LANGS PA LA YON 'BUL BAR BYED PA NI BSOD NAMS DPAG TU MED PA BSKYED PAR 'GYUR RO ZHES GSUNGS PA LTA BU STE, 'DI LTAR BYAMS PA LA SOGS PA TSAD MED PA BSGOM PA'I MI LA YON PHUL BAS KYANG BSOD NAMS MANG PO 'THOB NA GANG TSAD MED PA RNAMS SU DNGOS SU NYAMS SU BLANGS TE BSGOMS PA LTA SMOS KYANG CI DGOS TE, BSOD NAMS KYI PHUNG PO GONG MA BAS CHES MANG DU BSKYED DO, , DE LTAR BSOD NAMS DANG YE SHES KYI TSOGS TSAD MED PA SKYES PA DANG, RGYU DE LAS CHOS KYI TSOGS TSAD MED PA BSKYED LA, RGYU DE LAS YE SHES KYI TSOGS TSAD MED PA BSKYED PA'O, ,CHOS TSAD MED PA NI SANGS RGYAS KYI CHE BA'I YON TAN STOBS DANG MI 'JIGS PA LA SOGS PA STE, DE 'THOB PA'I @20A *, ,RGYUR 'GYUR BA NI CHOS BZHI PO LA GNAS PA'I SGO NAS BSOD NAMS DANG YE SHES KYI TSOGS SKYES PA'I RGYUS SANGS RGYAS KYI CHE BA'I YON TAN RNAMS SKYE ZHING 'GRUB PAR 'GYUR BAS NA TSAD MED PA BZHI LA NAN TAN DU BYA'O, ,CHOS BZHI PO DE RNAMS DE BZHIN GSHEGS PA'I YE SHES TSAD MED PA'I DMIGS PA'I YUL DU GYUR PA'AM, YE SHES NYID BYAMS PA LA SOGS PA CHOS BZHI PO DE DAG GI NGANG DU 'AM NGO BOR GNAS TE, SHES BYA DANG SHES PA THA MI DAD PA'I SPYOD YUL DU 'AM, NGO BOR GYUR PA'O ZHES BYA BA'I THA TSIG GO, ,DE LA BYAMS PA NI MOS PAS SPYOD PA'I SA NI NGES PAR 'BYED PA'I CHA BZHI PO SNANG BA THOB PA DANG SNANG BA MCHED PA DANG, DE KHO NA NYID KYI DON LA PHYOGS GCIG PA RJES SU ZHUGS PA DANG, BAR CHAD MED PA'I TING NGE 'DZIN ZHES BYA BA NGES PAR 'BYED PA'I CHA BZHI LA GNAS PA'I BYANG CHUB SEMS DPA' STE, 'DI LTAR NGES PAR 'BYED PA'I CHA BZHI LA GNAS PA'I BYANG CHUB SEMS DPA'I MNGON PAR SHES PA'I DBANG PO'I SPYOD YUL DU NI LHA DANG MI DANG YI DAGS LA SOGS PA DANG SEMS CAN DMYAL BA'I GNAS RNAMS MNGON SUM DU GYUR TE, LHA DANG MI LA SOGS PA DANG NGAN SONG GI GNAS DE DAG NA SDUG BSNGAL BA'I RANG BZHIN CAN GYI SEMS CAN RNAMS MTHONG NAS LHAG PAR SNYING RJE CHEN PO SKYE ZHING SEMS CAN DE DAG THOG MA MED PA NAS 'KHOR BAR 'KHOR BA NA, BDAG GI GNYEN DU MA GYUR PA MED PAR KHONG DU CHUD NAS SEMS CAN DE DAG THAMS CAD LA BU GCIG PA DANG 'DRA BAR SEMS PA'I BYAMS PA CHEN PO'I SEMS SKYES PA'I SGO NAS SEMS CAN THAMS CAD SDUG BSNGAL LAS THAR TE BDE BA LA GNAS PAR GYUR CIG CES SMON LAM 'DEBS SHING, SEMS CAN THAMS CAD LA PHAN 'DOGS PAR BYED PA NI SEMS CAN LA DMIGS PA'I BYAMS PA ZHES BYA BA'I THA TSIG GO, ,BYANG CHUB SEMS DPA' SA DANG PO BRNYES PA NAS BDUN PA'I BAR GYI BYANG CHUB SEMS DPA' RNAMS NI CHOS KYI DE KHO NA NYID MNGON SUM DU RTOGS PA'I SGO NAS SEMS CAN LA BYAMS PA SKYE STE, DE YANG 'DI LTAR CHOS THAMS CAD RANG BZHIN NYID MED PA YIN NA, SEMS CAN RNAMS KYIS DE LTAR MA SHES TE DNGOS PO LA MNGON PAR ZHEN PAS KHAMS GSUM @20B DU 'KHOR BAR GYUR PA RE SDUG PA DE DAG LA BYAMS PA'I SEMS SKYE ZHING 'DI DAG GIS CHOS NYID RTOGS PAR SHOG CIG CES SMON LAM 'DEBS SHING, SEMS CAN THAMS CAD LA CHOS KYIS PHAN 'DOGS PAR BYED PA NI CHOS LA DMIGS PA'I BYAMS PA ZHES BYA BA'I THA TSIG GO, ,BYANG CHUB SEMS DPA' SA BRGYAD PA BRNYES PA YAN CHAD NAS SANGS RGYAS KYIS BRNYES PA MAN CHAD NI LHUN GYIS GRUB PA'I SA DMIGS PA MED PA ZHES BYA BA STE, SA BRGYAD PA YAN CHAD NA RTOG PA MED PA LHUN GYIS GRUB PA'I TSUL GYIS SEMS CAN LA BYAMS PA SKYE ZHING PHAN 'DOGS PAR MDZAD DE, DPER NA YID BZHIN GYI NOR BU RIN PO CHE DANG DPAG BSAM GYI SHING BZHIN DU SEMS CAN LA PHAN 'DOGS TE, DE YANG RTOG PA MI MNGA' BZHIN DU SNGON GYI SMON LAM GYI DBANG GIS SEMS CAN LA BYAMS PA CHEN PO YANG LHUN GYIS GRUB PAR 'BYUNG ZHING SEMS CAN GYI DON MDZAD PA DE NI DMIGS PA MED PA'I BYAMS PA ZHES BYA BA'I THA TSIG GO, ,'O NA SO SO'I SKYE BO LAS DANG PO PAS SEMS CAN LA DMIGS PA'I BYAMS PA JI LTAR BSGOM ZHE NA, 'DI LTAR SO SO'I SKYE BO LAS DANG PO PAS SEMS CAN LA DMIGS PA'I BYAMS PA'I BSGOM RIM 'DI LTAR BYA STE, SEMS CAN SNYING DU SDUG PA DANG, THA MAL PA DANG, SNYING DU MI SDUG PA YIN PA'I RNAM PA 'DI GSUM YOD PA LAS, SEMS CAN SNYING DU SDUG PA LA YANG GSUM DU DBYE STE, RAB 'BRING THA MA GSUM DU'O, ,SEMS CAN THA MAL PA DANG, MI SDUG PA LA YANG GSUM DU DBYE STE, RAB 'BRING THA MA STE, BDUN DU DBYE BA BYAS LA, THOG MAR 'BRING TZAM DU SDUG PA DE PHA MA LA SOGS PAR RAB TU BSGOM MO, DE GOMS PA DANG THA MAL PA KUN RAB DANG 'DRA BAR BSGOM, DE NAS CUNG ZAD MI SDUG BA SDUG PA RAB DANG 'DRA BAR BSGOM, DE GOMS PA DANG MI SDUG PA 'BRING SDUG PA RAB DANG 'DRA BAR BSGOM, DE NAS SHIN TU MI SDUG PA LA YANG PHA MA DANG 'DRA BAR BYA STE, DE LTAR GOMS PA'I DMIGS PA YANG SEMS CAN THAMS CAD THOG MA MED PA'I DUS NAS PHA MA LA SOGS PA GNYEN DU MA GYUR PA MED PA DANG, DE LTAR BSGOM PA YANG THOG MAR YANG KHYIM GANG GI MI TZAM LA BSGOMS PA NAS RIM GYIS TE, DE NAS NI MTHA' YAS PAR @21A *, ,BSGOM MO ZHES BYA BA'I DON BSTAN TO, ,DE LA SNYING RJE NI SDUG BSNGAL BA'I SEMS CAN LA DMIGS PA'I SNYING RJE NI SDUG BSNGAL GYI SDUG BSNGAL LA SOGS GSUM MAM, SKYE PA LA SOGS PA BRGYAD KYIS SDUG BSNGAL BA'I SEMS CAN DE DAG KUN GYI SDUG BSNGAL SNYING RJES SEL ZHES BYA BA'I THA TSIG GO, ,NYES PA BYED PA'I SEMS CAN LA DMIGS PA'I SNYING RJE NI GONG GI SDUG BSNGAL DE DAG GI RTZA BA 'AM, RGYU MI DGE BA LA SPYOD PA'I SEMS CAN DE DAG GI MI DGE BA KUN SNYING RJES SEL ZHES BYA BA'I DON TO, ,RKYEN DANG MI LDAN PAS RNAM PAR MA GROL BA'I SEMS CAN LA DMIGS PA'I SNYING RJE NI SEMS CAN DGE BA'I BSHES GNYEN DANG MI LDAN PAS CHOS MA THOS PA STE, DE YANG RGYUD LAS, DGE BSHES MA BSTEN CHOS MA MNYAN BYA BA DANG, MA GROL BA'I SEMS CAN LA SNYING RJES GROL BAR BYED CES BYA BA'I DON TO, ,DE LA DGA' BA NI DE LA SEMS CAN DAG ZANG ZING GI 'BYOR BA DANG, CHOS KYI 'BYOR BA DANG, BDE BA'I 'BYOR BA DANG LDAN PAS DGA' BA'O, ,BDAG GI TSOGS YONGS SU RDZOGS PA LA DMIGS PA'I DGA' BA NI BDAG NYID DGE BA'I TSOGS CHE BA LA DMIGS NAS DGA' BA'I DON TO, ,DAM PA'I CHOS KYI RO LA DMIGS PA'I DGA' BA NI BDAG DANG GZHAN CHOS THOS PA'I RO DANG, BSAM PA DANG BSGOM PA'I RO RNYED PA'I SGO NAS DGA' BA'I DON TO, ,DE LA BTANG SNYOMS NI SEMS CAN GYI DON LA SPYOD PA DAG NI SKAL BA YOD PA DANG SKAL BA MED PA'I BTANG SNYOMS NI, SKAL BA DANG LDAN PA'I DON NI BYA, SKAL BA DANG MI LDAN PA'I DON NI MI BYA ZHES DE LTAR 'BYED PA MED PAR GNYIS KA'I DON SNYOMS PAR BYA ZHES BYA BA'I THA TSIG GO, ,'JIG RTEN GYI CHOS BRGYAD PO RNYED PA DANG MA RNYED PA LA SOGS PA'I SGRAS BSDUS PA 'DI LTA STE, BDE BA DANG, SDUG BSNGAL BA DANG, BSTOD PA DANG, SMAD PA DANG, GRAGS PA DANG, MA GRAGS PA LA DGA' BA DANG MI DGA' BA MED PAR BTANG SNYOMS SU GNAS PA STE, DE LA 'JIG RTEN GYI CHOS BRGYAD NI RNYED PA DANG MA RNYED PA LA SOGS PA LA BYA STE, CHOS BRGYAD PO DE DAG 'JIG RTEN NA GRAGS SHING YOD PA'I PHYIR 'JIG RTEN GYI CHOS BRGYAD DO, ,CHOS BRGYAD PO DE DAG LA JI LTAR BTANG SNYOMS SU GNAS SHE NA, 'DI @21B LTAR BDAG GIS LONGS SPYOD PHUN SUM TSOGS PA RNYED PA NA DE LA DGA' BA STE CHAGS PA YANG MED LA, LONGS SPYOD 'GRIBS SAM MA RNYED NA YANG DE YI CHAD PA MED CING MI DGA' BA MED PA NI RNYED MA RNYED LA DGA' MI DGA' MED PA'I BTANG SNYOMS ZHES BYA'O, ,BDAG GI MDZA' BO BYAMS PA ZHIG GIS BDAG GI LUS LA SPOS DANG TZANDAN LA SOGS PA'I BYUG PAS NYUG CING BSNYEN BKUR DANG BSTI STANG BYED NA BKUR STI'I BDE BA LA DGA' ZHING CHAGS PA YANG MED LA, DGRA BO ZHIG GIS BDAG GI LUS LA BRDEG BRDUNG LA SOGS PA BYED NA YANG DE LA'ANG MI KHRO ZHING BRDEG BRDUNG GI SDUG BSNGAL DANG DU BLANG BA DANG, SDUG GO MI SNYAM STE, BDE SDUG LA DGA' MI DGA' MED PA'I BTANG SNYOMS ZHES BYA'O, ,BDAG GI MDZA' BO ZHIG GIS BDAG GI RIGS LAS GLENGS TE SNYAN PA'I TSIG GIS BSTOD NA DE LA DGA' ZHING GZENGS MTHO BAR 'GYUR BA YANG MED LA, DGRA BO ZHIG GIS BDAG GI SKYON BRUS SHING BSGRAGS NA YANG DE LA YANG MI DGA' ZHING DPA' ZHUM PA MED PA NI BSTOD PA DANG SMAD PA LA DGA' BA DANG, MI DGA' BA MED PA'I BTANG SNYOMS ZHES BYA'O, ,BDAG GI YON TAN YOD PA SKYE BO MANG POS THOS SHING SHES PAR GYUR PA NA 'DI SNYAM DU BDAG NI YON TAN CAN DU SKYE BO MANG POS SHES PAS BDAG GI YON TAN GRAGS TE MA SUBS SO ZHES YON TAN GRAGS PA LA DGA' BA YANG MED LA, BDAG GI YON TAN SKYE BO MANG POS MA THOS SHING MA SHES NA YANG BDAG GI YON TAN MA GRAGS TE, NUB BO ZHES MI DGA' BA MED PA NI YON TAN GRAGS PA DANG MA GRAGS PA LA DGA' BA DANG MI DGA' BA MED PA'I BTANG SNYOMS ZHES BYA BA'I DON TO, ,TSOGS ZHES BYA BA NI GONG GI TSIG STE, TSOGS YONGS SU BSKANG BA LA DUS DANG DUS MA YIN PA LA DMIGS PA'I BTANG SNYOMS NI BDAG NYID DGE BA'I TSOGS BSKANG ZHING SPYAD PA LA DUS 'DIR NI BYA, DUS 'DIR NI MI BYA ZHES 'BYED PA MED PAR DUS KUN TU SPYOD PAR BYED PA'O, ,TSAD MED BZHI PO DAG NI TSANGS PA'I GNAS, ,BSGOM PA KUN GYI DON DU BDAG GIS 'DI, ,SEMS CAN DON DU BYAS SHING BSDEBS PA DES, ,'GRO KUN SGRIB BRAL MYUR DU SANGS RGYAS SHOG ,TSAD MED PA BZHI'I RGYA CHER 'GREL PA SLOB DPON BUDDHA GUPTAS MDZAD PA RDZOGS SO,, ,,